Eziptɩ tẽw yib 38 - A SƐB-SÕW

A bàwr-maal-kuur nɩ a kur-zɩɛ-dʋw maalʋ

¹ A bagɛ maalʋ ƴãw a, a Besalɛl tɩ maal'ɩ bàwr-maal-kuur nɩ akasɩa dàar. A lõboge za tɩ sɛw nɩ taa: lõbowr za wogo mɩ́ ɩ mɛtɩr ayi nɩ ŋmãa. A bàwr-maal-kuur ŋa kɛrʋ tɩ ɩ n mɛtɩr been nɩ ŋmãa.

² A ʋ gõgone anaar tɩ tɛr'ɩ ɩ́lɛ́ na nyɛ nyɔw ʋ a. A Besalɛl tɩ nyɩl'ɩ kur-zɩɛ pàw ʋ.

³ Ʋ tɩ maal'ɩ a bàwr-maal-kuur bome za nɩ kur-zɩɛ: a tãpɛlʋ laar, a pɛ́lɛ̀, a zɩ̃ɩ lali, a nɛn tɩr-jajaar nɩ a parfɛ̃ nyɩwfʋ-koli.

⁴ Ʋ tɩ maal'ɩ mɩ̃ɛ nɩ kur-zɩɛ bã-mɩɩlɛ ƴãw viiri koli a bàwr-maal-kuur, ʋʋ yi a pɛr ƴãw ɛ́ do tɩ ta a põ-zɛ̃-taa zie a bàwr-maal-kuur nɔgbãbie pile.

⁵ Ʋ tɩ maal'ɩ bamɛ anaar ƴãw a mɩ̃ɛ gõgone anaar ƴãw kɛ́ bɛ mɩ́ tõ daar ƴãw.

⁶ Ʋ tɩ cɛ n akasɩa dàar ayi nyɩl kur-zɩɛ pàw.

⁷ Bɛ mɩ́ tɩ de a na tõ ƴãw a bamɛ na be a bàwr-maal-kuur lõboge ƴãw a ƴãw, tuo nɩ ʋ. A bàwr-maal-kuur ŋa bɛ na tɩ maal'ɩ dà-pawlɩ a pʋɔ tɩ ɩ n vuo.

⁸ Al pùorí, a Besalɛl tɩ maal'ɩ a kur-zɩɛ-dʋw, ɛ́ mɩ̀ maalɩ a ʋ dɔwlʋ zie nɩ a kur-zɩɛ. A pɔwbɛ na mɩ́ tɩ tone a tuor-taa pɛn-sɛw dɩ̃dɔrɩ́ a kur-zɩɛ caalɩ n'a ʋ tɩ de maal'ɩ.

A davʋra pɛnɛ

⁹ Davʋra tɩ ŋmãa na jil a zi-sõw. Lɛ̃ fomi-kpɛn pɛnɛ n'a tɩ ŋmãa a davʋra ŋa ír. A saa-pɛrɩ́-dʋrʋ-lowr a, a pɛnɛ tɩ ƴãw na cen tɩ ta mɛtɩr lɩz'a ayi nɩ pie.

¹⁰ Kur-zɩɛ kpule lɩzɛr na bà dɔwlʋ ziir lɩzɛr bɛ na maal'ɩ kur-zɩɛ a zu n'a bɛ tɩ yawlɩ a pɛnɛ nɩ salm-pla bãw-mɩɩlɛ nɩ salm-pla bʋ̃-cawrɩ.

¹¹ A saa-pɛrɩ́-gʋba-lowr a, a pɛnɛ mɩ̀ tɩ ƴãw na cen tɩ ta mɛtɩr lɩz'a ayi nɩ pie, ɛ́ a yawlʋ ɩ been.

¹² A mʋ̃tɔ̃w-kpɛb-lowr a, a pɛnɛ tɩ ƴãw na cen tɩ ta mɛtɩr lɩzɛr'ɩ anũu. A yawlʋ tɩ ɩ n been, ɛ́ bɛ yawl'a kpule pie na be dɔwlʋ ziir pie zu a ƴãw.

¹³ A tu-kpɛb zie na be a saa-pɛrɩ́ a, a davʋra yɛ̀lʋ mɩ̀ tɩ ɩ n a mɛtɩr lɩzɛr'ɩ anũu.

^14-15 A tu-kpɛb zie lowr za a, pɛnɛ tɩ ƴãw na cen tɩ ta mɛtɩr ayopõi nɩ ŋmãa, ɛ́ kpule atarɩ nɩ a dɔwlʋ ziir atarɩ be be.

¹⁶ A pɛnɛ za na tɩ ŋmãa a davʋra ír a tɩ ɩ n lɛ̃ pɛn-kpɛn.

¹⁷ A kpule dɔwlʋ ziir tɩ ɩ n kur-zɩɛ, a bʋ̃-cawrɩ nɩ a bãw-mɩɩlɛ ɩ salm-pla. Salm-pla n'a tɩ nyɩl pàw a kpule zuru, ɛ́ salm-pla bãw-mɩɩlɛ ɩ a kpule nyɔw taa cen.

¹⁸ Pɛn-mawrbɛ tɩ wob'ɩ a davʋra dɩ̃dɔr pɛn-yawla nɩ lɛ̃ fomi-kpɛn na jɛr'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ a. A pɛn-yawla ŋa wogo tɩ ɩ n mɛtɩr pie, ɛ́ a kɛrʋ ɩ mɛtɩr ayi nɩ ŋmãa, mɛ̃ a davʋra pɛnɛ a.

¹⁹ Bɛ tɩ yawl'ʋ nɩ kpule anaar na bà kur-zɩɛ dɔwlʋ ziir anaar zu a ƴãw. A bʋ̃-cawrɩ tɩ ɩ n salm-pla, a bãw-mɩɩlɛ nɩ a kpule zuru tɩ nyɩl'ɩ salm-pla pàw.

²⁰ A pɛn-sɛw kpawbie nɩ a davʋra kpawbie za tɩ ɩ n kur-zɩɛ.

A kure nɩ a salmɛ bɛ na tõ n a tome a zɛ̃a

²¹ A zi-sõw pʋɔ bɛ na na bin a wõ-taa kʋsɛ-pamɛ a, nyɛ̃ a kure nɩ a salm-zɩɛ bɛ na de maal'ɩ ʋ a zɛ̃a. Mɛ̃ a lɛ a Moyiir na tɩ yel a, a bàwr-maalɛ Aarɔ̃ bidɛb Itamaar'ʋ tu a levitɩ mɩnɛ pùor bɛ manɩ a.

²² Uuri bidɛb nɩ Huur yãw, Besalɛl, na yi Zuda dɔwlʋ pʋɔ a, tɩ maal'ɩ a lɛ za a Sore na tɩ yel kʋ̀ a Moyiir a.

²³ Ahisamakɩ bidɛb, Oholɩavʋ, na yi Dan dɔwlʋ pʋɔ a tɩ sõw ʋ na. Ʋ tɩ ɩ n kʋsɛ-nyɩlɩ pɛ̃-pɛnɛ, wi-wire, píir kɔblʋ pɛn-zɩɩr-mʋɔlɛ, pɛn-zɩɩr-kãbala nɩ pɛn-zɩɩr-ɓõɓõ mawrɛ, nɩ lɛ̃ pɛn-mawrɛ.

²⁴ A salm-zɩɛ za a Ɩsɩrayɛl nɩbɛ na tɩ tɩr bɛ tõ n a zi-sõw tome a tɩ ɩ n kilo kɔbr ani dɔwlɩ lɩz'a ata nɩ pie nɩ ayopõi (877) dɔwlɩ gɩram kɔbr ata (300), ɛ́ tu a zi-sõw pʋɔ tɩbrʋ bʋ̃-mána mã.

²⁵ A salm-pla za a nɩbɛ bɛ na sɔ́r a na tɩr a tɩ ɩ n kilo túr ata dɔwlɩ pie nɩ ayopõi (3 017) dɔwlɩ gɩram kɔbr ayopõi lɩz'a ayi nɩ pie (750).

²⁶ A nɩbɛ bɛ na tɩ sɔ́r bɛ ɩ tùr-kɔbr ayʋɔb dɔwlɩ nɩbɛ túr ata dɔwlɩ kɔbr anũu lɩz'a ayi nɩ pie (603 550), ɛ́ tɛr yome lɩzɛr nɩ dɔwlɛ a, ŋa za tɩ tɩr'ɩ salm-pla gɩram anũu.

²⁷ Salm-pla kilo túr ata (3 000) n'a bɛ tɩ nyɩl maal'ɩ a zi-sõw nɩ a pʋ̃ɔmɩ pɛn-yawla kpule dɔwlʋ ziir kʋba (100). Dɔwlʋ zie za mɩ́ tɩ de nɩ kilo lɩzɛr'ɩ pie.

²⁸ A kilo pie nɩ ayopõi nɩ a gɩram kɔbr ayopõi lɩz'a ayi nɩ pie (750) na tɩ cɛ a, alɛ n'a bɛ tɩ de maal'ɩ a kpule bʋ̃-cawrɩ, ɛ́ nyɩl pàw a kpule zuru nɩ a bãw-mɩɩlʋ na ɩ a kpule a nyɔw taa cen a.

²⁹ A kur-zɩɛ za a Ɩsɩrayɛl nɩbɛ na tɩr a tɩ ɩ n kilo túr-ayi dɔwlɩ lɩz'a ayʋɔb nɩ anaar (2 124).

³⁰ Alɛ n'a bɛ tɩ maal'ɩ a tuor-taa pɛn-sɛw dɩ̃dɔr ƴãw kpule dɔwlʋ ziir, a kur-zɩɛ bàwr-maal-kuur nɩ a ʋ kur-zɩɛ mɩ̃ɛ, a bàwr-maal-kuur bome bʋ̃-ƴãwnɩ za,

³¹ a davʋra nɩ a ʋ dɩ̃dɔr kpule dɔwlʋ ziir, de nɩ a pɛn-sɛw nɩ a davʋra kpawbie.