Eziptɩ tẽw yib 37 - A SƐB-SÕW

A daw-sõw maalʋ

¹ A Besalɛl tɩ maal'ɩ a daw-sõw nɩ akasɩa dàar. A ʋ wogo tɩ ɩ n mɛtɩr-kʋba-bie lɩz'a ayʋɔb nɩ anũu, a yɛ̀lʋ ɩ mɛtɩr-kʋba-bie lɩz'a anaar ŋmãa anũu, a kɛrʋ mɩ̀ ɩ a mɛtɩr-kʋba-bie lɩz'a anaar ŋmãa anũu.

² A Besalɛl tɩ nyɩl'ɩ salm-zɩɛ mɩŋa mɩŋa pàw a ʋ za, a pʋɔ nɩ a zikur, ɛ́ vibli a daga nʋɔr viiri koli nɩ salm-zɩɛ.

³ Ʋ tɩ maal'ɩ salm-zɩɛ bamɛ anaar ƴãw a daga kõkowe anaar ƴãw: bamɛ ayi lõbowr ŋa, bamɛ ayi lõbowr ŋa.

⁴ Ʋ tɩ cɛ n akasɩa dà-wowr ayi nyɩl salm-zɩɛ pàw.

⁵ Bɛ mɩ́ tɩ tõ n a dàar ƴãw a bamɛ ƴãw a daga lõbowe ƴãw, mɩ́ tuo nɩ ʋ.

⁶ Ʋ tɩ maal'ɩ a daw-pàwra nɩ salm-zɩɛ mɩŋa mɩŋa. A ʋ wogo tɩ ɩ n mɛtɩr-kʋba-bie lɩz'a ayʋɔb nɩ anũu, ɛ́ a yɛ̀lʋ ɩ mɛtɩr-kʋba-bie lɩz'a anaar ŋmãa anũu.

⁷ Ʋ tɩ ŋmɛ n salm-zɩɛ nɩ 'hama maal'ɩ seribɛ̃ ayi a daw-pàwra nɛ́ɛ ayi ƴãw.

⁸ A seribɛ̃ ayi á ŋá nɩ a daw-pàwra tɩ nyɔw nɩ taa a daw-pàwra nɔgbãbie ayi ƴãw.

⁹ A tɩ tori nɩ taa, ɛ́ jɩ́rɛ a daw-pàwra a na tɩ dɔl a pɩgɛ a saa-zu piw nɩ a.

A dipɛ̃ bɛ na de kʋ̀ a Naaŋmɩn a tabal maalʋ

¹⁰ A Besalɛl tɩ maal'ɩ a tabal nɩ akasɩa dàar. A ʋ wogo tɩ ɩ n mɛtɩr been, a yɛ̀lʋ ɩ mɛtɩr-kʋba-bie lɩz'a ayi nɩ pie, ɛ́ a kɛrʋ ɩ mɛtɩr-kʋba-bie lɩz'a anaar ŋmãa anũu.

¹¹ Ʋ tɩ nyɩl'ɩ salm-zɩɛ mɩŋa mɩŋa pàw ʋ, ɛ́ vibli a nʋɔr viiri koli nɩ salm-zɩɛ.

¹² Ʋ tɩ ƴãw nɩ dà-pãgalali a lõbowe anaar ƴãw, dà-pãgalali a yɛ̀lʋ na ɩ mɛtɩr-kʋba-bie ani a. Ʋ mɩ̀ tɩ ƴãw nɩ salm-zɩɛ a dà-pãgalali nɛ́ɛ ƴãw viiri koli.

¹³ Ʋ tɩ maal'ɩ salm-zɩɛ bamɛ anaar ƴãw a tabal kõkowe anaar ƴãw, pɩɛlɩ a gbɛ́ɛ a za anaar.

¹⁴ A bamɛ tɩ pɩɛl'ɩ a dà-pãgalali. Bɛ mɩ́ tɩ tõ n dàar ƴãw a bamɛ ƴãw, tuo nɩ a tabal.

¹⁵ Ʋ tɩ cɛ n akasɩa dà-wowr ayi, nyɩl salm-zɩɛ pàw. A tɩ be n be a tabal tuofʋ ƴãw.

¹⁶ Ʋ tɩ maal'ɩ a bome bʋ̃-ƴãwnɩ na na mɩ́ be a tabal zu a: labɛ, koli-nyúuri, duwli nɩ lali, a divɛ̃ de-kʋ̀b ƴãw. Ʋ tɩ maal'ɩ a za nɩ salm-zɩɛ mɩŋa mɩŋa.

A fɩ̃tɩlɩ dɔwlʋ zie nɩ a ʋ ɓɛrmɛ ayopõi maalʋ

¹⁷ A Besalɛl tɩ ŋmɛ n salm-zɩɛ mɩŋa mɩŋa nɩ 'hama, maal'ɩ fɩ̃tɩlɩ dɔwlʋ zie. A sɩɛ nɩ a dàa, a koli, a tɩ-puur-kpãakpule nɩ a tɩ-puur-yɩɩrɩ, a za tɩ nyɔw nɩ taa ɩ bʋ̃-been.

¹⁸ Ɓɛrmɛ ayʋɔb tɩ ɓɛrɩ ɓɛrɩ nɩ a sɔwlɩsɔw dàa: ɓɛrmɛ ata be ka lowr, ɓɛrmɛ ata mɩ̀ be ka lowr.

¹⁹ A ɓɛrmɛ ayʋɔb á ŋá kãw za zu a, koli ata na ŋmɛ̃ taa nɩ amãdɩ a mɩ́ tɩ be n be, lãwnɩ tɩ-puur-kpãakpul nɩ tɩ-puur-yɩɩra.

²⁰ A sɔwlɩsɔw dàa zu a, koli anaar na ŋmɛ̃ taa nɩ amãdɩ a tɩ be n be, lãw nɩ tɩ-puur-kpãakpule nɩ tɩ-puur-yɩɩrɩ.

²¹ A ɓɛrmɛ ayi al na de niwn a nɩ a sɔwlɩsɔw dàa nyɔw-taa zie a pile a, tɩ-puur-kpãakpul tɩ be n be. Lɛ n'a a mɩ̀ tɩ ɩ a ɓɛrmɛ a za ayʋɔb na nyɔw a sɔwlɩsɔw dàa a ƴãw.

²² A tɩ-puur-kpãakpule nɩ a ɓɛrmɛ na nyɔw nɩ a al na baa cɛ a, a za ɩ bʋ̃-been daadaa, ɛ́ a za ɩ bom bɛ na ŋmɛ salm-zɩɛ mɩŋa mɩŋa maal'ɩ a.

²³ A Besalɛl tɩ maal'ɩ fɩ̃tɩlɩ ayopõi, ɛ́ mɩ̀ maalɩ cabli a fɩ̃tɩlɩ dɔwlʋ zie ƴãw, de nɩ tãpɛlʋ koli: salm-zɩɛ mɩŋa mɩŋa n'a ʋ tɩ maal'ɩ a.

²⁴ Kilo lɩzɛr'ɩ pie salm-zɩɛ mɩŋa mɩŋa n'a ʋ tɩ de maal'ɩ a fɩ̃tɩlɩ dɔwlʋ zie nɩ a ʋ kpɛ̃kpɛrsɩ.

A parfɛ̃ bàwr-maal-kuur maalʋ

²⁵ Al pùorí, a Besalɛl tɩ maal'ɩ bàwr-maal-kuur nɩ akasɩa dàar, a parfɛ̃-sõw nyɩwfʋ ƴãw. A ʋ lõboge za tɩ sɛw nɩ taa, ɛ́ lõbowr za tɩ ɩ mɛtɩr-kʋba-bie lɩz'a ayi nɩ pie, ɛ́ a kɛrʋ ɩ mɛtɩr been. A ʋ ɩ́lɛ́ tɩ nyɛ na nyɔw ʋ.

²⁶ Ʋ tɩ nyɩl'ɩ salm-zɩɛ mɩŋa mɩŋa pàw ʋ ʋ za, a zu-sɔw nɩ a ɩ́lɛ́, lãwnɩ a kõkowe anaar. Ʋ mɩ̀ tɩ vibl'ɩ a nʋɔr nɩ salm-zɩɛ viiri koli.

²⁷ Ʋ tɩ maal'ɩ salm-zɩɛ bamɛ ayi ƴãw a bàwr-maal-kuur lõboge a za ayi ƴãw a nɔ-vibla pile. Bɛ mɩ́ tɩ tõ n dàar ƴãw tuo nɩ.

²⁸ Akasɩa n'a a Besalɛl tɩ cɛ maal'ɩ a dàar ayi á ŋá, ɛ́ nyɩl salm-zɩɛ pàw a.

²⁹ Parfɛ̃-maalɛ tɩ cɔbr'ɩ a nũu-ka-ƴãwfʋ kãá nɩ a parfɛ̃-sõw bɛ na na mɩ́ nyɩw a bàwr-maal-kuur zu a.