Eziptɩ tẽw yib 36 - A SƐB-SÕW

¹ «A Besalɛl, a Oholɩavʋ nɩ a nuru tõ-tonbɛ bɛl na cɛ a Sore kʋ̀ bãwfʋ nɩ yã a tome tob ƴãw a, bɛ na maal'ɩ a zi-sõw puoru bome za mɛ̃ a lɛ a Sore na yel a.»

² A Moyiir tɩ bʋɔl'ɩ a Besalɛl, a Oholɩavʋ nɩ a nuru tõ-tonbɛ bɛl na cɛ a, bɛl a Sore na tɩ kʋ̀ bãwfʋ yaga za, ɛ́ bɛ sàw na tõ a tome a.

³ A Moyiir tɩ de nɩ a Ɩsɩrayɛl nɩbɛ bʋ̃-tɩrɩ bɛ na tɩr a zi-sõw maalʋ ƴãw a kʋ̀ bɛ. Ɛcɛ biɓaarɛ za a, nɩbɛ mɩ́ tɩ cãà na nɔ̃w waar'ɩ bome wa kʋ̀rɛ a Moyiir.

⁴ Lɛ n'a a nuru tõ-tonbɛ za na tɩ nyɔw a zi-sõw maalʋ a tɩ bɛr a tome ɛ́ cen

⁵ tɩ yel a Moyiir: «A nɩbɛ wa n nɩ a bome a zuo a lɛ a na sɛw kɛ́ bɛ wa n bɛ wa tõ n a tome a Sore na yel a.»

⁶ A Moyiir tɩ tɩr'ɩ nʋɔr daadaalɛ kɛ́ bɛ yel a pɛnɛ-sɛwr za pʋɔ: «Nɩr za, dɛb bɩɩ pɔw, ta lɛb cɔbrɩ bʋ̃-tɩra a zi-sõw ƴãw ɛ!» Lɛ n'a a nɩbɛ tɩ bɛr bɛ cãà waar'ɩ bʋ̃-tɩrɩ ɛ,

⁷ a al bɛ na tɩ tɩr a na tɩ man a tome tob ƴãw a zũú. A tɩ zuo na mɔ̃ mɩ̀.

A zi-sõw maalʋ

⁸ A nuru tõ-tonbɛ bɛl na bãw a tome zuo a bɛ taabɛ a tɩ maal'ɩ a zi-sõw: bɛ tɩ wob'ɩ pɛn-nuru pie nɩ lɛ̃ fomi-kpɛn na jɛr'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ a. Bɛ tɩ maw nɩ seribɛ̃ mɩnɛ ƴãw a vɩɛl.

⁹ A pɛn-nuru za tɩ zɛ̃ n taa: a wogo ɩ mɛtɩr pie nɩ anaar, ɛ́ a yɛ̀lʋ ɩ mɛtɩr ayi.

¹⁰ Bɛ tɩ de nɩ niwn sɛ pɛn-nuru anũu ɓã taa, ɛ́ mɩ̀ lɛb ɩ a lɛ a anũu al na cɛ a ƴãw.

¹¹ Bɛ tɩ ƴãw nɩ bʋ̃-'leni a pɛn-nuru na sɛ ɓã taa a pɛn-nũ-baara ƴãw, ɛ́ mɩ̀ ƴãw a pɛn-nuru na sɛ ɓã taa a pɛn-nũ-dãw-niwn sob ƴãw.

¹² Bɛ tɩ ƴãw nɩ bʋ̃-'leni lɩz'a ayi nɩ pie a pɛn-nuru anũu bɛ na de niwn sɛ ɓã taa a nʋɔr kãw ƴãw, ɛ́ mɩ̀ lɛb ƴãw lɩz'a ayi nɩ pie a al bɛ na bɩɛrɩ sɛ ɓã taa a nʋɔr kãw ƴãw. A bʋ̃-'leni á ŋá tɩ tori nɩ taa.

¹³ Bɛ tɩ maal'ɩ bʋ̃-cawrɩ lɩz'a ayi nɩ pie nɩ salm-zɩɛ. Al pùorí bɛ caw a pɛn-nuru na sɛ ɓã taa a, a pɛn-sɛw ɩ bʋ̃-been daadaa.

¹⁴ Bɛ tɩ wob'ɩ pɛn-nuru pie nɩ been nɩ bʋʋr kɔblʋ fomie, a pɛnɛ-sɛwr ayi sob ƴãw, ʋʋ mɩ́ pàw a pɛn-sɛw-sõw.

¹⁵ A pɛn-nuru za tɩ zɛ̃ n taa: a wogo ɩ mɛtɩr pie nɩ anũu, ɛ́ a yɛ̀lʋ ɩ mɛtɩr ayi.

¹⁶ Bɛ tɩ de nɩ niwn sɛ pɛn-nuru anũu ɓã taa, ɛ́ mɩ̀ lɛb ɩ a lɛ a ayʋɔb al na cɛ a ƴãw.

¹⁷ Bɛ tɩ ƴãw nɩ bʋ̃-'leni lɩz'a ayi nɩ pie a pɛn-nuru bɛ na de niwn sɛ ɓã taa a nʋɔr kãw ƴãw, ɛ́ mɩ̀ lɛb ƴãw lɩz'a ayi nɩ pie a al bɛ na bɩɛrɩ sɛ ɓã taa a nʋɔr kãw ƴãw.

¹⁸ Bɛ tɩ maal'ɩ bʋ̃-cawrɩ lɩz'a ayi nɩ pie nɩ kur-zɩɛ, caw caw nɩ a pɛn-nuru na sɛ ɓã taa a ziir ayi a, a pɛn-sɛw ɩ bʋ̃-been.

¹⁹ A pɛnɛ-sɛwr ayi sob piw-tɛrʋ ƴãw a, bɛ tɩ cɔbr'ɩ bʋ̃-pàwra nɩ pʋ́rɩ gan-zɩɩr nɩ gan-kpɛn kpɛn a saa-zu.

²⁰ Bɛ tɩ maal'ɩ dà-tɩɛrɩ nɩ akasɩa dàar bà tɩɛ nɩ a pɛn-sɛw-sõw.

^21-22 A dà-tɩɛrɩ za tɩ ŋmɛ̃ n taa: kãw za wogo mɩ́ tɩ ɩ n mɛtɩr anũu, ɛ́ a yɛ̀lʋ ɩ mɛtɩr-kʋba-bie lɩz'a anaar ŋmãa anũu. Dà-pãgalɩ ayi mɩ́ tɩ be n a dà-tɩɛrɩ pɛr ƴãw, kãw ka lowr, kãw ka lowr, a ɓɛrɩ taa siw.

²³ Bɛ tɩ maal'ɩ dà-tɩɛrɩ lɩzɛr, a pɛn-sɛw lõbowr na be a saa-pɛrɩ́-dʋrʋ-lowr a ƴãw,

²⁴ ɛ́ maalɩ a dà-tɩɛrɩ dɔwlʋ ziir lɩz'a ayi nɩ salm-pla: dà-tɩɛra za tɩ tɛr'ɩ dɔwlʋ ziir ayi, a dà-pãgalɩ ayi ƴãw.

²⁵ Bɛ mɩ̀ tɩ maal'ɩ dà-tɩɛrɩ lɩzɛr a pɛn-sɛw lõbowr na be a saa-pɛrɩ́-gʋba-lowr a ƴãw,

²⁶ ɛ́ maalɩ dɔwlʋ ziir lɩz'a ayi nɩ salm-pla, dɔwlʋ ziir ayi dà-tɩɛra been za ƴãw.

²⁷ Bɛ tɩ maal'ɩ dà-tɩɛrɩ ayʋɔb a pɛn-sɛw na be a mʋ̃tɔ̃w-kpɛb-lowr a pɛr ƴãw,

²⁸ de nɩ dà-tɩɛrɩ ayi na ɩ a tʋɔra a, a pɛrɩ́ gõgone ƴãw.

²⁹ A dà-tɩɛrɩ ayi á ŋá tɩ yãyaar'ɩ a pɛrɩ́, ɛ́ do tɩ tuori taa a bãw-dãw-niwn sob pʋɔ. A za ayi tɩ ŋmɛ̃ n taa, ɛ́ ɩ a pɛn-sɛw gõgone dà-tɩɛrɩ.

³⁰ A na ɩ à ŋá a, a pɛn-sɛw-sõw pɛr tɩ tɛr'ɩ dà-tɩɛrɩ ani nɩ salm-pla dɔwlʋ ziir pie nɩ ayʋɔb, dɔwlʋ ziir ayi dà-tɩɛra been za ƴãw.

³¹ Al pùorí, bɛ tɩ pɛnɩ nɩ dà-garjɩrɩ nɩ akasɩa: anũu garjɩr a pɛn-sɛw lõbowr kãw dà-tɩɛrɩ,

³² anũu garjɩr a lõbowr ƴen sob dà-tɩɛrɩ, ɛ́ anũu garjɩr a pɛrɩ́ dà-tɩɛrɩ, a mʋ̃tɔ̃w-kpɛb-lowr.

³³ A sɔwlɩsɔw dà-garjɩrɩ tɩ garjɩr'ɩ a dà-tɩɛrɩ a põ-zɛ̃-taa zie, ɛ́ yi a pɛn-sɛw kõkowr ŋa tɩ tɔ kõkowr ŋa.

³⁴ Bɛ tɩ nyɩl'ɩ salm-zɩɛ pàw a dà-tɩɛrɩ nɩ a dà-garjɩrɩ za, ɛ́ maalɩ salm-zɩɛ bamɛ mɩ́ tõ a dà-garjɩrɩ ƴãw.

³⁵ Nuru tõ-tonbɛ tɩ maal'ɩ pɛn-yawla nɩ lɛ̃ fomi-kpɛn na jɛr'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ a. Bɛ tɩ maw nɩ seribɛ̃ ƴãw a ʋ zu ʋ vɩɛl.

³⁶ Bɛ tɩ cɛ n akasɩa dàar maal'ɩ kpule anaar, ɛ́ nyɩl salm-zɩɛ pàw. A kpule al ƴãw n'a bɛ na mɩ́ kpa a pɛn-yawlɩ nɩ salm-zɩɛ pĩi-bie. Bɛ tɩ nyɩl'ɩ salm-pla maal'ɩ kpule dɔwlʋ ziir anaar.

³⁷ A pɛn-sɛw-sõw yẽw dɩ̃dɔr ƴãw a, pɛn-mawrbɛ tɩ maal'ɩ pɛn-yawla ƴen sob nɩ lɛ̃ fomi-kpɛn na jɛr'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ a.

³⁸ A pɛn yawlʋ ƴãw a, bɛ mɩ̀ tɩ maal'ɩ kpule anũu, ɛ́ maalɩ a pĩi-bie a kpab ƴãw, maalɩ a kpule zuru ɛ́ maalɩ kur-dali-mɩɩlɛ, ɛ́ nyɩl salm-zɩɛ pàw a za. A kpule dɔwlʋ ziir anũu tɩ ɩ n kur-zɩɛ.