Eziptɩ tẽw yib 35 - A SƐB-SÕW

A ZI-SÕW MAALƲ 35—40 A pɩ̃ɛnʋ-bibir

¹ A Moyiir tɩ bʋɔl'ɩ a Ɩsɩrayɛl lãw nɩbɛ za ɓã taa, ɛ́ yel bɛ: «A nɛ-ƴãwnɩ a Sore na yel kɛ́ bɛ tuur a n'ɩ á ŋá:

² “Nyɩ na mɩ́ tõ n a nyɩ tome bibie ayʋɔb. Ɛcɛ a bibie ayopõi sob na mɩ́ ɩ n bibi-sõw, a pɩ̃ɛnʋ-bibir nyɩ na de kʋ̀ a Sore a. Nɩr za wa tone a ʋlɩ bibir a, bɛ na kʋ ʋ na.

³ Zie nɛ za nyɩ na na kpɩɛr a, vũu tɛɛ za bɛ gbɔwr a pɩ̃ɛnʋ-bibir ɛ.»

A Ɩsɩrayɛl nɩbɛ waar'ɩ nɩ a bɛ bʋ̃-kʋ̀rɩ a zi-sõw maalʋ ƴãw

⁴ A Moyiir tɩ cãà na cow yel a lɛ a Sore na yel a kʋ̀ a Ɩsɩrayɛl lãw nɩbɛ za:

⁵ «Nyɩ ƴãw bʋ̃-tɩrɩ tɩrʋ be be a nyɩ pʋɔ, a Sore ƴãw: bɛlɩ dem za nãà wa tɩrɛ nɩ pʋ-pɩɛlʋ a na wa n nɩ bʋ̃-pɛ-bʋʋrɛ za wa kʋ̀ a Sore: salm-zɩɛ, salm-pla, kur-zɩɛ,

⁶ píir kɔblʋ pɛn-zɩɩr-mʋɔlɛ, pɛn-zɩɩr-kãbala, pɛn-zɩɩr-ɓõɓõ, lɛ̃ pɛn-vʋlvʋl, bʋʋr kɔblʋ pɛnɛ,

⁷ pʋ́rɩ gan-zɩɩr, gan-kpɛn, akasɩa dàar,

⁸ fɩ̃tɩlɩ kãá, parfɛ̃ a nũu-ka-ƴãwfʋ kãá ƴãw, nɩ parfɛ̃ bɛ na na mɩ́ nyɩw a,

⁹ kʋsɛ-bi-nyɩlɩ bɛ na bʋɔlɛ konalin a, nɩ kʋsɛ-bi-nyɩlɩ a mɩnɛ a bàwr-maal-kara nyãa-kpale nɩ a ʋ nyãa-zu-zʋbɛ ƴãw.

¹⁰ Bɛlɩ dem za na bãw a nuru tome vla a nyɩ pʋɔ a na ɓã n taa maalɩ a alɩ bome nɛ a Sore na yel a:

¹¹ a zi-sõw nɩ a pɛn-sɛw-sõw nɩ a bʋ̃-pàwra na na pàw ʋ a, a bʋ̃-cawrɩ, a dà-tɩɛrɩ, a dà-garjɩrɩ, a kpule nɩ a dɔwlʋ ziir,

¹² a daw-sõw nɩ a ʋ dàar nɩ a ʋ nɔ-pàwra, a pɛn-yawla na bʋ́r a zi-son a,

¹³ a dipɛ̃ tabal nɩ a ʋ dàar, a ʋ bʋ̃-kpɛ̃kpɛrsɩ nɩ a dipɛ̃ bɛ na de kʋ̀ a Naaŋmɩn a,

¹⁴ a fɩ̃tɩlɩ dɔwlʋ zie nɩ a ʋ bʋ̃-kpɛ̃kpɛrsɩ, a ʋ fɩ̃tɩlɩ nɩ a fɩ̃tɩlɩ kãá,

¹⁵ a parfɛ̃ bàwr-maal-kuur nɩ a ʋ dàar, a nũu-ka-ƴãwfʋ kãá, a parfɛ̃ bɛ na na mɩ́ nyɩw a, a pɛn-sɛw dɩ̃dɔr pɛn-yawla,

¹⁶ a bàwr-maal-kuur nɩ a ʋ kur-zɩɛ mɩ̃ɛ, a ʋ dàar nɩ a ʋ bʋ̃-kpɛ̃kpɛrsɩ za, a kur-zɩɛ-dʋw nɩ a ʋ dɔwlʋ zie,

¹⁷ a davʋra pɛnɛ nɩ a kpule nɩ a kpule dɔwlʋ ziir, a davʋra dɩ̃dɔr pɛn-yawla,

¹⁸ a pɛn-sɛw kpawbie, a davʋra kpawbie nɩ a mie,

¹⁹ a dɛpaal-bʋ̃-suuri a zi-sõw pʋɔ tome tob ƴãw, nɩ a kpar-son a Aarɔ̃ nɩ a ʋ bidɛbr na na mɩ́ su tone nɩ a bɛ bàwr-maal tome a.»

²⁰ A Ɩsɩrayɛl nɩbɛ tɩ bɛr'ɩ a Moyiir ɛ́ cen.

²¹ Al pùorí, a bɛlɩ dem za na bɔbr a, nɩ nɩbɛ bɛl pʋʋr na pɛlɩ a, bɛ tɩ wa n nɩ a bɛ bʋ̃-tɩrɩ wa kʋ̀ a Sore, a tuor-taa pɛn-sɛw maalʋ ƴãw, a puoru yele za ƴãw nɩ a kpar-son sɛb ƴãw.

²² A dɛbr nɩ pɔwbɛ bɛl pʋʋr na pɛlɩ a tɩ wa n nɩ salm-zɩɛ pɩ̃ɛmɛ bʋʋrɛ za, pɩ̃ɛmɛ bɛ na mɩ́ caw kparʋ ƴãw a, bãw-vilovilo, nũ-tʋɛ bɩɩ kɔkɔrɩ́ pɩ̃ɛmɛ. Bɛ tɩ de a na kʋ̀ a Sore tu n a lɛ bɛ na mɩ́ ɩ de a bome kʋ̀ a Sore a.

²³ Bɛlɩ dem na tɩ tɛr píir kɔblʋ pɛn-zɩɩr-mʋɔlɛ, pɛn-zɩɩr-kãbala, pɛn-zɩɩr-ɓõɓõ nɩ lɛ̃ pɛn-vʋlvʋl a, bʋʋr kɔblʋ pɛnɛ, pʋ́rɩ gan-zɩɩr bɩɩ gan-kpɛn a, bɛ tɩ de a na wa n.

²⁴ Bɛlɩ dem na tɩ bin salm-pla bɩɩ kur-zɩɛ a Sore ƴãw a tɩ de a na wa n. Bɛlɩ dem na tɩ tɛr akasɩa dàar bɛ na na tʋ̃ɔ́ tõ n a tome a tɩ de a na wa n.

²⁵ Pɔwbɛ na bãw a tome vla a tɩ tɛ n lɛ̃ fomi-vʋlvʋl, píir kɔblʋ fomi-zɩɩr-mʋɔlɛ, zɩɩr-kãbala, zɩɩr-ɓõɓõ nɩ a bɛ nuru wa n.

²⁶ Pɔwbɛ bɛ mɩnɛ na bãw a tome a tɩ tɛ n bʋʋr kɔblʋ fomie.

²⁷ A lãw nɩ-bɛrɛ tɩ wa n nɩ a konalin kʋsɛ-bi-nyɩlɩ nɩ a kʋsɛ-bi-nyɩlɩ ŋmaarɛ a bàwr-maal-kara nyãa-kpale nɩ a ʋ nyãa-zu-zʋbɛ ƴãw,

²⁸ lãwnɩ a parfɛ̃ nɩ a kãá a fɩ̃tɩlɩ ƴãw, a nũu-ka-ƴãwfʋ kãá maalʋ ƴãw, nɩ a parfɛ̃ bɛ na na mɩ́ nyɩw a maalʋ ƴãw.

²⁹ A Ɩsɩrayɛl nɩbɛ bɛl za pʋʋr na pɛlɩ a, a dɛbr nɩ pɔwbɛ tɩ wa n nɩ a bɛ bʋ̃-tɩrɩ bɛ na nɔnɛ tɩrɛ a Sore ƴãw a, a tome a Sore na tɩ yel k'aa Moyiir tõ a tob ƴãw.

Besalɛl nɩ Oholɩavʋ nyɔw nɩ a tome

³⁰ A Moyiir tɩ yel'ɩ a Ɩsɩrayɛl nɩbɛ: «Nyɛ̃, a Sore kaa na ír Besalɛl na ɩ Uuri bidɛb, ɛ́ ɩ Huur yãw a, a Zuda dɔwlʋ pʋɔ.

³¹ Ʋ ƴãw nɩ a ʋ vʋʋrʋ paalɩ ʋ, k'ʋʋ ɩ ʋ bãw tome vla vla, ɛ́ tɛr yã. A Besalɛl bãw nɩ bãwfʋ bʋʋrɛ za.

³² Ʋ bãw nɩ a bʋ̃-maalɩ tɩ́ɛrʋ mɩ́ tɩɛrɩ bãw salm-zɩɛ, salm-pla nɩ kur-zɩɛ tome,

³³ ʋ bãw nɩ a lɛ bɛ na mɩ́ pɛnɩ pɛnɩ kʋsɛ-bi-nyɩlɩ ƴãw bome ƴãw a ɛ́ bãw a dàa pɛnʋ. Alɛ ɩrɛ mɛ̃ bom'ʋ a, ʋ na tʋ̃ɔ́ na maalɩ bom za.

³⁴ A Sore mɩ̀ kʋ̀ ʋ na k'ʋʋ mɩ́ tʋ̃ɔ́ wul a nɩbɛ a bãwfʋ bʋʋrɛ á ŋá, ʋlɛ nɩ Ahisamakɩ bidɛb Oholɩavʋ na ɩ Dan dɔwlʋ nɩr a.

³⁵ Ʋ ɩ na bɛ bãw a vla na tʋ̃ɔ́ tõ tome á ŋá: kʋsɛ-bi-nyɩlɩ pɛnʋ, wib, píir kɔblʋ pɛn-zɩɩr-mʋɔlɛ, pɛn-zɩɩr-kãbala nɩ pɛn-zɩɩr-ɓõɓõ máwfʋ, lɛ̃ pɛn-vʋlvʋl máwfʋ nɩ pɛn-wobru. Bɛ na tʋ̃ɔ́ na tõ nuru ton za, ɛ́ bãw bʋ̃-paalɛ vɩɛlɩ vɩɛlɩ maalɩ.»