Eziptɩ tẽw yib 32 - A SƐB-SÕW

A ƖSƖRAYƐL NƖBƐ SÃW NƖ A NAAŊMƖN NƖ A BƐL WÕ-TAA BƐR 32—34 A salm-zɩɛ nále

¹ A nɩbɛ na tɩ nyɛ̃ a Moyiir ʋ cɛlɛ a tãw lɛb-siwfʋ a, bɛ ɓã n taa a Aarɔ̃ zie yel ʋ: «Ìr! Maalɩ ŋmɩn na na de tɩ niwn a kʋ̀ tɩ. Bʋ̃ʋ n'ʋ vɛ̃, tɩ bɛ bãw ʋlɩ bom nɛ na ɩ a Moyiir a ɩ, a nɩr ŋa na ɩ tɩ yi a Eziptɩ tẽw a.»

² A Aarɔ̃ tɩ sɔw bɛ na: «Nyɩ yaarɩ a salm-zɩɛ tokpamɛ a nyɩ pɔwbɛ, a nyɩ bidɛbr nɩ a nyɩ pɔwyaar na ƴãw a, wa kʋ̀ m.»

³ A Ɩsɩrayɛl nɩbɛ za tɩ yaar'ɩ a bɛ salm-zɩɛ tokpamɛ wa kʋ̀ a Aarɔ̃.

⁴ Ʋ tɩ de a na nyɩl ƴãw dasul-laa pʋɔ, maal'ɩ nále dasule. Lɛ n'a a Ɩsɩrayɛl nɩbɛ tɩ yel: «Nyɛ̃ a tɩ Naaŋmɩn na ɩ tɩ yi a Eziptɩ a!»

⁵ A Aarɔ̃ na tɩ nyɛ̃ a lɛ a, ʋ mɛ n bàwr-maal-kuur a dasule niŋé, al pùorí ʋ yel: «A bio a, tɩ na maal'ɩ cuw a Sore ƴãw!»

⁶ A nɩbɛ tɩ dãwnɩ nɩ ìru a bio daarɩ́, maalɩ nyɩw-a-za-bagɛ nɩ lãw-taa bagɛ. A nɩbɛ tɩ zɩ̃ na kɛ́ bɛ dɩ ɛ́ nyũ, al pùorí bɛ ìr kɛ́ bɛ dɩ̃ɛnɩ.

⁷ Lɛ n'a a Sore tɩ yel a Moyiir: «Lɛb siw daadaalɛ! Bʋ̃ʋ n'ʋ vɛ̃, a nɩbɛ fʋ na ɩ bɛ yi a Eziptɩ a, bɛ sãw nɩ faa faa.

⁸ A sɔ́r ɩ̃ na tɩ wul bɛ a, bɛ bɛr ʋ nɩ pɛtɛlʋlɛ: bɛ nyɩl'ɩ kure maal'ɩ nále, bɛ gbĩ n dume a ʋ niŋé, ɛ́ maalɩ bagɛ kʋ̀ ʋ, ɛ́ yel: “Nyɛ̃ a tɩ Naaŋmɩn na ɩ kɛ̀ tɩ yi a Eziptɩ a.”

⁹ Ɩ̃ nyɛ̃ nɩ a nɩ-bʋʋrɛ bɛ ŋa: zu-kpɛn dem nɛbɛ!

¹⁰ Ƴɛrɛŋa a, bɛr mɛ̃! A ɩ̃ suur na ìr'ɩ a bɛ ƴãw, ɩ̃ kʋ bɛ pàw pɛr. Al pùorí, ɩ̃ na ɩ na fʋ yɛ̀r ɩ nɩ-bʋʋr-yaga.»

¹¹ Ɛcɛ a Moyiir tɩ zɛlɩ nɩ a Sore ʋ Naaŋmɩn yãayãa, k'ʋʋ ɓãá suur. Ʋ tɩ yel ʋ na: «Sore e, bʋ̃ʋ n'ʋ so fʋ na nyɛ̃ nɩ a fʋ nɩbɛ suur, bɛl a fʋ gãdaalʋ nɩ a fʋ kpãkpã-kpɛ̃w na ɩ bɛ yi a Eziptɩ a?

¹² Fʋ̃ʋ wa ɩ à à ŋá a, a Eziptɩ nɩbɛ na yere na: “Po-tuo n'a a Sore ɩ n a Ɩsɩrayɛl nɩbɛ, ƴãw bɛ yi a tɩ tẽw pʋɔ, k'ʋʋ tɩ kʋ bɛ a tan pʋɔ, k'ʋʋ tɩ kʋ bɛ pàw pɛr, bɛ ta cãà a tẽw zu ɛ.” Sore e, ɓãá a fʋ su-tʋlʋ kpãkpã, ɛ́ lɛb bɛr a faa fʋ na tɩ bɔbr a fʋ nɩbɛ ƴãw a.

¹³ Lɛb tɩɛrɩ a fʋ tõ-tõ-biir Abraham, Ɩzaakɩ nɩ Zakɔb yele, a bɛl zie fʋ na pɔ n a fʋ̃ʋ mɩŋa yel: “Ɩ̃ na ɩ n a nyɩ bʋʋrɛ bɛ yãwmɛ sɛw a ŋmar-bie. Ɩ̃ na kʋ̀ bɛ nɩ a tẽw ɩ̃ na yel a, ɛ́ bɛ na so ʋ nɩ kʋralɛ”.»

¹⁴ Lɛ n'a a Sore tɩ lɛb bɛr a faa ʋ na tɩ bɔbr k'ʋʋ ɩ a ʋ nɩbɛ a.

¹⁵ A Moyiir tɩ lɛb'a siw a tãw. Ʋ tɩ tɛr'ɩ a kʋsɛ-pamɛ ayi al bɛ na sɛb a Naaŋmɩn nɛ-ƴãwnɩ ƴãw a lõbowe a za ayi zu a.

¹⁶ A kʋsɛ-pamɛ á ŋá tɩ ɩ n a Naaŋmɩn bʋ̃-maalɩ, ɛ́ a sɛbrʋ ɩ a Naaŋmɩn nũu sɛbrʋ.

¹⁷ A Zozue tɩ wõ n a cɛlsɩ a nɩbɛ na lɔbr a, ɛ́ yel a Moyiir: «Zɛbr gɔmɛ n'a pàwr a pɛnɛ-sɛwr pʋɔ.»

¹⁸ Ɛcɛ a Moyiir tɩ sɔw na: «Nɩbɛ na zɛb tʋ̃ɔ́ a cɛlsɩ bɛ n'a ŋmɩɛr ɛ, ɛ́ mɩ̀ bɛ lɛb ɩ nɩbɛ bɛ na zɛb tʋ̃ɔ́ a cɛlsɩ ɛ. Cuw na maalɛ a yielu n'a ɩ̃ wone.»

¹⁹ Bɛ na tɩ tarɛ pɩɛlɛ a pɛnɛ-sɛwr a, a Moyiir nyɛ̃ nɩ a nále nɩ a nɩbɛ na ƴawr a bɩnɛ a. A ʋ suur tɩ ìr'a, ʋ lɔb a kʋsɛ-pamɛ ʋ na tɛr a nuru pʋɔ a kar bɛr, a tãw sɩɛ ƴãw.

²⁰ Ʋ tɩ ɓáw nɩ a nále dasule bɛ na maalɩ a, lɔb ƴãw vũumí. Al pùorí, ʋ de baw baw, ƴãw a zɔ̃-bàalʋ a kʋ̃ɔ pʋɔ, ɛ́ ƴãw a Ɩsɩrayɛl nɩbɛ nyũ.

²¹ Al pùorí, ʋ sowri a Aarɔ̃: «Bʋ̃ʋ n'ʋ a nɩbɛ bɛ ŋa ɩ b fʋ taw bɛ ƴãw a sãwna-kpɛ̃ɛ ŋa pʋɔ?»

²² A Aarɔ̃ tɩ sɔw na: «Ɩ̃ zɛlɛ fʋ na, ta nyɛ̃ suur ɛ. Fʋ̃ʋ mɩŋa bãw nɩ a nɩbɛ bɛ ŋa: bɛ bɛ mɩ́ yaa kɛ́ maalɩ a faa ɩ.

²³ Bɛ wa na wa yel mɛ̃: “Maalɩ ŋmɩn kʋ̀ tɩ ʋ de tɩ niwn. Bʋ̃ʋ n'ʋ vɛ̃, tɩ bɛ bãw ʋlɩ bom nɛ na ɩ a Moyiir a ɩ, a nɩr ŋa na ɩ tɩ yi a Eziptɩ a.”

²⁴ A lɛ n'a ɩ̃ tɩ sowri bɛ: “Ãa n'ʋ tɛr salm-zɩɛ a nyɩ pʋɔ?” Ɛ̀ bɛ yaarɩ a bɛ pɩ̃ɛmɛ a bɛ tobe ƴãw kʋ̀ m, ɩ̃ de a ƴãw vũumí a nyɩl wa yi ɩ a nále ŋa.»

A sãwna dɔwrʋ

²⁵ A Moyiir tɩ nyɛ̃ na k'aa Aarɔ̃ bɛr'ɩ a nɩbɛ bɛ ɩrɛ lɛ za bɛ na bɔbr a, nãà wa ƴãw a bɛ dɔ̃ dem ɩrɛ bɛ laar.

²⁶ Lɛ n'a a Moyiir tɩ cen tɩ àr a pɛnɛ-sɛwr dɩ̃dɔr nʋɔr ɛ́ yel kpɛ̃w za: «A bɛlɩ dem na tu a Sore a, bɛ wa a ɩ̃ zie ka!» A Levi dɔwlʋ nɩbɛ tɩ cen na tɩ ɓã taa viiri koli ʋ.

²⁷ Ʋ yel bɛ: «À ŋá n'a a Sore, a Ɩsɩrayɛl Naaŋmɩn, yere: “Ŋa za, ʋ mɩ́ de a ʋ zɛbr-sɔ-kpɛ̃ɛ: nyɩ cɔlɩ a pɛnɛ-sɛwr za kʋ a nyɩ yɛbr, a nyɩ bárɩ nɩ a nyɩ kpɛ-pɩɛl dem”!»

²⁸ A Levitɩ mɩnɛ tɩ sàw nɩ a Moyiir nʋɔr, ɛ́ a Ɩsɩrayɛl nɩbɛ tɩ kpi a ʋlɩ bibir nɛ ta nɩbɛ túr ata (3 000).

²⁹ A lɛ n'a a Moyiir tɩ yel a Levitɩ mɩnɛ: «A dɩ̃a a, nyɩ ƴãw nɩ nyɩ tʋɔra a Sore tome tob pʋɔ, nyɩ na bɛ bʋnɩ nɩ a nyɩ bidɛbr bɩɩ a nyɩ yɛbr kʋb a. A Sore, ʋ kʋ̀ nyɩ a ʋ maalʋ a dɩ̃a bibir.»

A Moyiir zɛlɛ nɩ a Naaŋmɩn k'ʋʋ dɩ suur kʋ̀ a Ɩsɩrayɛl nɩbɛ

³⁰ A Moyiir tɩ yel'ɩ a nɩbɛ a bio daarɩ́: «Nyɩ maal'ɩ yel-bier-kpɛ̃ɛ. Ƴɛrɛŋa a, ɩ̃ na lɛb'a do a Sore zie a tãw zu, a mɩnɛ kãw, ɩ̃ na tɩ zɛlɩ na páw a nyɩ yel-bier suur-dɩ-kʋ̀b.»

³¹ A lɛ n'a a Moyiir tɩ lɛb do a Sore zie tɩ yel ʋ: «'Woi! Sore e, a nɩbɛ bɛ ŋa maal'ɩ yel-bier-kpɛ̃ɛ, bɛ maal'ɩ ŋmɩn nɩ salm-zɩɛ tɛr.

³² Ɩ̃ zɛlɛ fʋ nɩ yãayãa, dɩ suur kʋ̀ bɛ! Alɛ bɛ ɩ lɛ, fʋ̃ʋ sãw a ɩ̃ yúor fʋ na sɛb a nyɔ-vʋʋrʋ sɛbɛ pʋɔ a bɛr.»

³³ A Sore tɩ sɔw na: «A bɛlɩ dem na maalɩ a yel-bier sãw mɛ̃ a, bɛl yée n'a ɩ̃ na sãw bɛr a ɩ̃ sɛbɛ pʋɔ.

³⁴ Ƴɛrɛŋa a, cen tɩ tɛr a nɩbɛ cen nɩ a zie ʋl ɩ̃ na yel kʋ̀ b a. A ɩ̃ malkɩ na de b'ɩ niwn. Mãa ƴãw a, mãa wa wa a bɛ nyɛ́b a ʋlɩ bibir nɛ a, ɩ̃ na dɔwrɩ bɛ nɩ a bɛ yel-bier ƴãw.»

³⁵ Lɛ n'a a Sore tɩ dɔwrɩ a Ɩsɩrayɛl nɩbɛ, bɛ na tɩ ƴãw a Aarɔ̃ maalɩ a nále dasule kʋ̀ bɛ a ƴãw.