Eziptɩ tẽw yib 31 - A SƐB-SÕW

A zi-sõw tõ-tõ-biir

¹ A Sore tɩ cãà na lɛb yel a Moyiir:

² «Nyɛ̃, ɩ̃ kaa na ír Besalɛl na ɩ Uuri bidɛb, ɛ́ ɩ Huur yãw a, a Zuda dɔwlʋ pʋɔ.

³ Ɩ̃ ƴãw nɩ a ɩ̃ vʋʋrʋ paalɩ ʋ, k'ɩ̃ɩ ɩ ʋ bãw tome vla vla, ɛ́ tɛr yã. Ʋ bãw nɩ bãwfʋ bʋʋrɛ bʋʋrɛ za:

⁴ ʋ bãw nɩ a bʋ̃-maalɩ tɩ́ɛrʋ mɩ́ tɩ́ɛrɩ, bãw salm-zɩɛ, salm-pla nɩ kur-zɩɛ tome,

⁵ ʋ bãw nɩ a lɛ bɛ na mɩ́ pɛnɩ pɛnɩ kʋsɛ-bi-nyɩlɩ ƴãw bome ƴãw a, bãw a dàa pɛnʋ nɩ tõ-pɛ-bʋʋrɛ za.

⁶ Ɩ̃ ƴãwnɛ nɩ Oholɩavʋ na ɩ Ahisamakɩ bidɛb, ɛ́ ɩ Dan dɔwlʋ nɩr a ɓɛrɛ nɩ ʋ. Ɩ̃ mɩ̀ kʋ̀rɛ nɩ bãwfʋ yaga a nuru tõ-tonbɛ bɛ mɩnɛ. Bɛ na lãw na maalɩ a bome al za ɩ̃ na yel kʋ̀ b a:

⁷ a tuor-taa pɛn-sɛw, a wõ-taa kʋsɛ-pamɛ daga, a daw-pàwra, a pɛn-sɛw bʋ̃-kpɛ̃kpɛrsɩ za,

⁸ a dipɛ̃ tabal nɩ a fɩ̃tɩlɩ dɔwlʋ zie bɛ na maal'ɩ salm-zɩɛ mɩŋa mɩŋa a, nɩ a mɩ̀ bʋ̃-kpɛ̃kpɛrsɩ za, a parfɛ̃ bàwr-maal-kuur,

⁹ a nyɩw-a-za-bagɛ bàwr-maal-kuur nɩ a ʋ bʋ̃-kpɛ̃kpɛrsɩ, a kur-zɩɛ-dʋw nɩ a ʋ dɔwlʋ zie,

¹⁰ a dɛpaal-bʋ̃-suuri nɩ a kpar-son a Aarɔ̃ nɩ a ʋ bidɛbr na na mɩ́ su tone nɩ a bɛ bàwr-maal-tome a,

¹¹ a kãá a kãá-cir-ƴãwfʋ ƴãw nɩ a parfɛ̃ bɛ na na mɩ́ nyɩw a zi-sõw ƴãw a.»

A pɩ̃ɛnʋ-bibir maal-tɛrʋ yele

¹² A Sore tɩ yel'ɩ a Moyiir:

¹³ «A nɛ-ƴãwnɩ n'ɩ à á ŋá fʋ na na tɩ yel kʋ̀ a Ɩsɩrayɛl nɩbɛ a: Nyɩ na maal'a tɛr a pɩ̃ɛnʋ-bibie, bʋ̃ʋ n'ʋ vɛ̃, a pɩ̃ɛnʋ-bibir na ɩ n bãwfʋ kʋralɛ mãa nɩ a nyɩɩm cara pʋɔ. Ʋ na sɩ̃wnɛ nɩ a nyɩ tɩ́ɛrʋ kɛ́ mãa n'ɩ a Sore na mɩ́ ɩ kɛ̀ nyɩ ɩ son a.

¹⁴ A lɛ pʋɔ a, nyɩ na maal'a tɛr a pɩ̃ɛnʋ-bibir. Bibi-sõw n'ʋ a nyɩ zie. Sob nɛ nãà bɛ wa maal tɛr ʋ, ɛ́ tone a ʋlɩ bibir nɛ a, bɛ na ír ʋ na bɛr a lãw pʋɔ, ɛ́ kʋ ʋ.

¹⁵ Bibie ayʋɔb'a nyɩ na mɩ́ tõ a nyɩ tome. Ɛcɛ a bibie ayopõi sob ɩ n a pɩ̃ɛnʋ-bibir ɩ̃ na so a. Nɩr wa tõ ton pɩ̃ɛnʋ-bibir a, bɛ na kʋ ʋ na.

¹⁶ A Ɩsɩrayɛl nɩbɛ na maal'a tɛr a pɩ̃ɛnʋ-bibir a nɩbɛ na dɔwr lɩɛrɛ taa a zie. Wõ-taa na be be kʋralɛ a n'ʋ.

¹⁷ A pɩ̃ɛnʋ-bibir na ɩ n bãwfʋ kʋralɛ mãa nɩ a Ɩsɩrayɛl nɩbɛ cara pʋɔ, bʋ̃ʋ n'ʋ vɛ̃, bibie ayʋɔb'a ɩ̃ ír a salom nɩ a tẽw, ɛ́ a bibie ayopõi sob ɩ̃ zɩ̃ vʋʋrɩ.»

¹⁸ A Naaŋmɩn na tɩ ƴɛ̀r a Moyiir zie baarɩ a Sinayi tãw zu a, ʋ kʋ̀ ʋ nɩ a kʋsɛ-pamɛ ayi, a al zu ʋl mɩŋa na tɩ sɛb a nɛ-ƴãwnɩ ƴãw a.