Eziptɩ tẽw yib 30 - A SƐB-SÕW

A parfɛ̃ bàwr-maal-kuur

¹ «Bɛ na maal'ɩ bàwr-maal-kuur nɩ akasɩa dàar, a parfɛ̃ nyɩwfʋ ƴãw.

² A ʋ lõboge za na sɛw nɩ taa, ɛ́ a lõbowr za mɩ́ ɩ mɛtɩr-kʋba-bie lɩz'a ayi nɩ pie, ɛ́ a kɛrʋ ɩ mɛtɩr been. A ʋ ɩ́lɛ́ na nyɛ na nyɔw ʋ.

³ Bɛ na nyɩl'ɩ salm-zɩɛ mɩŋa mɩŋa pàw ʋ ʋ za, a zu-sɔw nɩ a ɩ́lɛ́, lãwnɩ a kõkowe anaar, ɛ́ bɛ na vibl'ɩ a nʋɔr nɩ salm-zɩɛ viiri koli.

⁴ Bɛ na maal'ɩ salm-zɩɛ bamɛ ayi ƴãw a bàwr-maal-kuur lõbowe ayi ƴãw, a nɔ-vibla pile, mɩ́ tõ dàar ƴãw tuo nɩ.

⁵ Akasɩa n'a bɛ na cɛ pɛnɩ a dàar á ŋá, ɛ́ nyɩl salm-zɩɛ pàw a.

⁶ Bɛ na bin nɩ a bàwr-maal-kuur ŋa a pɛn-yawla na pàw a wõ-taa kʋsɛ-pamɛ daga a niŋé, a be ɩ̃ na na mɩ́ ƴãw a tɩ tuor-taa kʋ̀ b a.

⁷ Biɓaara za, a Aarɔ̃ wa cɔbrɛ a zi-sõw fɩ̃tɩlɩ a, ʋ na mɩ́ nyɩw nɩ a parfɛ̃ kʋ̀ m a bàwr-maal-kuur zu.

⁸ Zaanʋɔra za mɩ̀ a, ʋ na mɩ́ nyɩw a nɩ a lɛn daar ʋ na tɔ̃wnɛ a fɩ̃tɩlɩ a. Bɛ na nyɩwr'ɩ a parfɛ̃ a ɩ̃ ƴãw kʋra kʋralɛ.

⁹ A bàwr-maal-kuur ŋa zu a, bɛ bɛ nyɩwr parfɛ̃-sãsaralɛ ɩ, bɛ maalɛ nyɩw-a-za-bàwr ɛ, bɛ waar'ɩ kukur de-kʋ̀b bome ɩ, bɛ bɛ cire divɛ̃ ƴãwn a ʋ zu ɛ.

¹⁰ Gb'a-been yũon za a, a Aarɔ̃ na mɩ́ ɩ na ʋ lɛb vɩɛl. Ʋ na mɩ́ ɩ n a dʋ̃w bɛ na maal'ɩ a yel-bier ír-bɛrʋ bàwr a zɩ̃ɩ ƴãw a bàwr-maal-kuur ɩ́lɛ́ ƴãw. A tub ŋa na mɩ́ lɛb'a tu yũon za, a nɩbɛ na dɔwr lɩɛrɛ taa a zie. A bàwr-maal-kuur ŋa na ɩ n sõw yaga za a ɩ̃ ƴãw.»

A zi-sõw kaafʋ zu-yar

¹¹ A Sore tɩ cãà na yel a Moyiir:

¹² «Fʋ̃ʋ wa sɔrɛ a Ɩsɩrayɛl nɩbɛ a lɛn daar a, ŋa za na mɩ́ tɩr'ɩ zu-yar a ʋ nyɔ-vʋʋrʋ ya-deb ƴãw. Lɛ n'a faa za kʋ̃ páw nyɩ a sɔ́rʋ daar ɛ.

¹³ Nɩr za bɛ na sɔrɛ a na tɩr'ɩ salm-pla libir a tɩbrʋ na ɩ gɩram anũu a, a pɛr lɛ k'aa bʋ̃-mána ʋl bɛ na tɛr manɛ nɩ a zi-sõw pʋɔ a, põ-zɛ̃-taa. Bɛ na ír'ɩ a libir ŋa a mãa ƴãw.

¹⁴ A Ɩsɩrayɛl nɩbɛ za bɛ na sɔ́r, ɛ́ bɛ tɛr yome lɩzɛr'ɩ dɔwlɛ a, bɛlɛ nɛbɛ na ír a libir ŋa.

¹⁵ Nãà bɛ tɩrɛ zuore a salm-pla gɩram anũu ɛ, nã́w sob bɛ yarɛ cɩɛr ŋmãa ɩ, ŋa za na mɩ́ ya n a lɛ nʋɔr na ƴãw a kʋ̀ m, tʋ̃ɔ́ ya de a ʋ nyɔ-vʋʋrʋ.

¹⁶ Fʋ̃ʋ wa de a libie á ŋá za a Ɩsɩrayɛl nɩbɛ zie a, fʋ na kaarɛ nɩ nɩ a tuor-taa pɛn-sɛw zie. À ŋá n'a ɩ̃ na mɩ́ cãà bãwnɩ a Ɩsɩrayɛl nɩbɛ, ɛ́ gù a bɛ nyɔ-vʋʋrʋ.»

A kur-zɩɛ-dʋw a dɛwr-so-bɛrʋ ƴãw

¹⁷ A Sore tɩ cãà na lɛb yel a Moyiir:

¹⁸ «A dɛwr-so-bɛrʋ ƴãw a, bɛ na maal'ɩ kur-zɩɛ-dʋw, dɔwlɩ dɔwlʋ zie bɛ mɩ̀ na maal'ɩ kur-zɩɛ a. Bɛ na bin ʋ nɩ a tuor-taa pɛn-sɛw nɩ a bàwr-maal-kuur cara pʋɔ, ɛ́ 'wɔ̃w kʋ̃ɔ paalɩ.

¹⁹ A Aarɔ̃ nɩ a ʋ bidɛbr na mɩ́ pɛ́w nɩ a bɛ nuru nɩ a bɛ gbɛ́ɛ nɩ a kʋ̃ɔ á ŋá,

²⁰ ɛ́ bãw kpɛ a tuor-taa pɛn-sɛw pʋɔ, bɩɩ taw pɩɛlɩ a bàwr-maal-kuur maal a bàwr kʋ̀ m. Lɛ n'a bɛ kʋ̃ mɩ́ kpi ɛ.

²¹ Bʋ̃ʋ n'ʋ vɛ̃, a fɛr'a kɛ́ bɛ mɩ́ pɛ́w a nuru nɩ a gbɛ́ɛ, taa kpiir ɛ. Nʋɔr'ʋ ƴãw gã kʋralɛ, bɛlɛ nɩ a bɛ bʋʋrɛ ƴãw.»

A kãá-sõw

²² A Sore tɩ cãà na yel a Moyiir:

²³ «Bɔ parfɛ̃ na vɩɛl vɩɛl a: mɩ́ɩ̀r-kʋ̃ɔ kilo anũu, sɩnamɔm na nyùur vla a kilo ayi nɩ ŋmãa, kanɛl na nyùur vla a kilo ayi nɩ ŋmãa,

²⁴ nɩ kasɩ kilo anũu — na tu a tɩbrʋ bʋ̃-mána bɛ na manɛ nɩ a zi-sõw pʋɔ a — de nɩ olivʋ tɩ-wɔmɛ kãá litɩr ayʋɔb.

²⁵ Parfɛ̃-maalɛ na nyaw a nɩ taa maal'ɩ a kãá a nũu-ka-ƴãwfʋ ƴãw.

²⁶ Fʋ na ɩ a na ƴãw a tuor-taa pɛn-sɛw ƴãw, a wõ-taa kʋsɛ-pamɛ daga ƴãw,

²⁷ a dipɛ̃ tabal nɩ a fɩ̃tɩlɩ dɔwlʋ zie nɩ a ʋ kpɛ̃kpɛrsɩ ƴãw, a parfɛ̃ bàwr-maal-kuur ƴãw,

²⁸ a bàwr-maal-kuur nɩ a ʋ kpɛ̃kpɛrsɩ ƴãw, nɩ a kur-zɩɛ-dʋw nɩ a ʋ dɔwlʋ zie ƴãw.

²⁹ Fʋ̃ʋ wa maalɩ a nɩ a kãá baar'a, a na ɩ n son yaga za. Lɛ n'a nɩr za bɩɩ bom za wa tʋɔr a a na ɩ sõw.

³⁰ Fʋ na cir'ɩ a kãá á ŋá ƴãw a Aarɔ̃ nɩ a ʋ bidɛbr, ka a nũu ƴãw bɛ bɛ ɩ bàwr-maalbɛ tone a ɩ̃ tome.»

³¹ «Al pùorí, fʋ na yel'ɩ à ŋá a Ɩsɩrayɛl nɩbɛ zie: “A kãá-sõw bɛ na na mɩ́ cir ƴãw a n'ɩ à á ŋá. A Sore yõ tome ƴãw n'a bɛ na mɩ́ de a kãá á ŋá kʋralɛ.

³² Nɩr za bɛ zɩɛr a ɩ, nɩr za mɩ̀ bɛ cɔwrɛ a maalʋ ɛ. Bʋ̃ʋ n'ʋ vɛ̃, a kãá á ŋá ɩ n sõw, ɛ́ a na ɩ n sõw gã.

³³ Nɩr wa cɔwrɛ a nyaw-taa ŋa bʋʋrɛ, maalɩ kãá ƴãw nɩ-zawla ƴã-gan zu a, bɛ na ír ʋ na bɛr a lãw pʋɔ”.»

A parfɛ̃ maalʋ

³⁴ A Sore tɩ cãà na yel a Moyiir: «Bɔ bome na nyùur vla a: sɩtorasɩ, onisɩ nɩ galbanɔm. Ɩ tɩ-suur-zɔ̃-na-nyùur-vla-vla-a ƴãw, ɛ́ ɩ a zɛ̃ taa.

³⁵ Parfɛ̃-maalɛ na nyaw a nɩ taa lãwnɩ nyaarʋ, maal'ɩ bom na vɩɛl ɛ́ ɩ sõw a.

³⁶ Bɛ na ɩ n a ŋmãa ƴɛ́r a bàalɛ bɛ mɩ́ ƴãw a tuor-taa pɛn-sɛw pʋɔ, a wõ-taa kʋsɛ-pamɛ daga niŋé, a be ɩ̃ na na mɩ́ wa tuori fʋ a. A bom ŋa na ɩ n sõw yaga za a nyɩ zie.

³⁷ Nɩr bɛ maalɛ parfɛ̃ cɔwrɛ nɩ a parfɛ̃ ŋa maalʋ a nyɩɩm mɩŋa ƴãw ɛ.

³⁸ Nɩr wa maalɩ a parfɛ̃ ŋa tɔ k'ʋʋ mɩ́ wõ a nyũu a, bɛ na ír ʋ na bɛr a lãw pʋɔ.»