Eziptɩ tẽw yib 25 - A SƐB-SÕW

LƐ BƐ NA NA ŊMÃA A ZI-SÕW A 25—31 A bome a Ɩsɩrayɛl nɩbɛ na tɩr a zi-sõw ƴãw a

¹ A Sore tɩ ƴɛ̀r'ɩ a Moyiir zie yel ʋ:

² «Yel a Ɩsɩrayɛl nɩbɛ kɛ́ bɛ ƴãw bʋ̃-tɩrɩ tɩrʋ be be a ɩ̃ ƴãw. Bɛlɩ dem pʋʋr na pɛlɩ a zie n'a bɛ na mɩ́ de a bʋ̃-tɩrɩ á ŋá.

³ A bome bɛ na na tɩr a n'ɩ á ŋá: salm-zɩɛ, salm-pla, kur-zɩɛ,

⁴ píir kɔblʋ pɛn-zɩɩr: zɩɛ-mʋɔlɛ, zɩɛ-kãbala, zɩɛ-ɓõɓõ, lɛ̃ pɛn-vʋlvʋl, bʋʋr kɔblʋ pɛnɛ,

⁵ pʋ́rɩ gan-zɩɩr, gan-kpɛn, akasɩa dàar,

⁶ fɩ̃tɩlɩ kãá, parfɛ̃ bɛ na na mɩ́ ƴãw a kãá-cir-ƴãwna pʋɔ a, nɩ parfɛ̃ bɛ na mɩ́ nyɩw a,

⁷ kʋsɛ-bi-nyɩlɩ zɩɩr zɩɩr, nɩ kʋsɛ-bi-nyɩlɩ a mɩnɛ a bàwr-maal-kara nyãa-kpale nɩ a ʋ nyãa-zu-zʋbɛ ƴãw.

⁸ A Ɩsɩrayɛl nɩbɛ na maal'ɩ zi-sõw kʋ̀ m, ɩ̃ɩ na kpɩɛr'ɩ a bɛ sɔgɔ.

⁹ Ɩ̃ na wul fʋ nɩ a lɛ a kpɛb zie na na ŋmɛ̃ a, nɩ a lɛ a bʋ̃-son za na na ŋmɛ̃ a. Nyɩ na maal'a na a ɩ a lɛ tɔr za.»

A wõ-taa daga

¹⁰ «Bɛ na maal'ɩ daga nɩ akasɩa dàar. A ʋ wogo na ɩ n mɛtɩr-kʋba-bie lɩz'a ayʋɔb nɩ anũu (125), a yɛ̀lʋ ɩ mɛtɩr-kʋba-bie lɩz'a anaar ŋmãa anũu, a kɛrʋ mɩ̀ ɩ a mɛtɩr-kʋba-bie lɩz'a anaar ŋmãa anũu.

¹¹ Salm-zɩɛ mɩŋa mɩŋa n'a bɛ na nyɩl pàw a pʋɔ nɩ a zikur. Salm-zɩɛ n'a bɛ na vibli nɩ a nʋɔr viiri koli.

¹² Bɛ na nyɩl'ɩ salm-zɩɛ maal'ɩ bamɛ anaar, ƴãw a daga kõkowe anaar ƴãw: bamɛ ayi lõbowr ŋa, bamɛ ayi lõbowr ŋa.

¹³ Bɛ na maal'ɩ dà-wowr ayi nɩ akasɩa dàar, ɛ́ nyɩl salm-zɩɛ pàw.

¹⁴ Bɛ na tõ n a dàar ƴãw a bamɛ ƴãw, a daga lõbowe ƴãw, mɩ́ tuo nɩ ʋ.

¹⁵ A dàar na tõ na ƴãw gã a daga bamɛ pʋɔ, bɛ bɛ lɛb íre a ɩ.

¹⁶ Fʋ na ƴãw nɩ a wõ-taa kʋsɛ-pamɛ ɩ̃ na na kʋ̀ b a, a daga pʋɔ.

¹⁷ Bɛ na maal'ɩ a daga pàwra nɩ salm-zɩɛ mɩŋa mɩŋa. A ʋ wogo na ɩ n mɛtɩr-kʋba-bie lɩz'a ayʋɔb nɩ anũu (125), ɛ́ a yɛ̀lʋ ɩ mɛtɩr-kʋba-bie lɩz'a anaar ŋmãa anũu.

¹⁸ Bɛ na ŋmɛ ŋmɛ n salm-zɩɛ nɩ 'hama maal'ɩ seribɛ̃ ayi ƴãw a daw-pàwra nɛ́ɛ ayi ƴãw.

¹⁹ A seribɛ̃ ayi á ŋá nɩ a daw-pàwra na nyɔw nɩ taa, a daw-pàwra nɔgbãbie a za ayi ƴãw.

²⁰ A seribɛ̃ na tori nɩ taa, ɛ́ jɩ́rɛ a daw-pàwra. A na dɔl'ɩ a pɩgɛ a saa-zu pàw nɩ ʋ.

²¹ Fʋ na ƴãw nɩ a wõ-taa kʋsɛ-pamɛ ɩ̃ na na kʋ̀ b a, a daga pʋɔ, ɛ́ de a daw-pàwra dɔwlɩ pàw.

²² A daw-pàwra zu ka n'a ɩ̃ na mɩ́ ɩ fʋ nyɛ̃ m, a seribɛ̃ ayi cara pʋɔ. A ka n'a ɩ̃ na mɩ́ be, ɛ́ ƴãw a nɛ́ɛ za kʋ̀ b a Ɩsɩrayɛl nɩbɛ ƴãw.»

A dipɛ̃ bɛ na mɩ́ kʋ̀ a Naaŋmɩn a tabal

²³ «Bɛ na maal'ɩ tabal nɩ akasɩa dàar. A ʋ wogo na ɩ n mɛtɩr been, a yɛ̀lʋ ɩ mɛtɩr-kʋba-bie lɩz'a ayi nɩ pie, ɛ́ a kɛrʋ ɩ mɛtɩr-kʋba-bie lɩz'a anaar ŋmãa anũu.

²⁴ Bɛ na nyɩl'ɩ salm-zɩɛ mɩŋa mɩŋa pàw ʋ, ɛ́ vibli a nʋɔr viiri koli nɩ salm-zɩɛ.

²⁵ Bɛ na ƴãw nɩ dà-pãgalali a lõbowe anaar viiri koli, dà-pãgalali a yɛ̀lʋ na ɩ mɛtɩr-kʋba-bie ani a. A dà-pãgalali nɛ́ɛ mɩ̀ na ƴãw nɩ salm-zɩɛ viiri koli.

²⁶ Bɛ na maal'ɩ salm-zɩɛ bamɛ anaar ƴãw a tabal kõkowe anaar ƴãw, pɩɛlɩ a gbɛ́ɛ a za anaar.

²⁷ A bamɛ na pɩɛl'ɩ a dà-pãgalali. Bɛ na tõ n dàar ƴãw a bamɛ ƴãw, mɩ́ tuo nɩ a tabal.

²⁸ Bɛ na cɛ n akasɩa dàar ayi nyɩl salm-zɩɛ pàw mɩ́ tuo nɩ a tabal.

²⁹ Bɛ na maal'ɩ salm-zɩɛ mɩŋa mɩŋa labɛ, koli-nyúuri, duwli nɩ lali, mɩ́ de nɩ a divɛ̃ kʋ̀ a mãa Sore.

³⁰ A tabal ŋa zu n'a bɛ na mɩ́ dɔwlɩ a dipɛ̃ bɛ na kʋ̀rɛ mɛ̃ a. A na mɩ́ be n a ɩ̃ niŋé kʋralɛ.»

A fɩ̃tɩlɩ dɔwlʋ zie na tɛr ɓɛrmɛ ayopõi a

³¹ «Bɛ na ŋmɛ ŋmɛ n salm-zɩɛ mɩŋa mɩŋa nɩ 'hama maal'ɩ fɩ̃tɩlɩ dɔwlʋ zie. A sɩɛ nɩ a dàa, a koli, a tɩ-puur-kpãakpule nɩ a tɩ-puur-yɩɩrɩ, a za na nyɔw nɩ taa ɩ bʋ̃-been.

³² Ɓɛrmɛ ayʋɔb na ɓɛrɩ nɩ a sɔwlɩsɔw dàa: ɓɛrmɛ ata be ka lowr, ɓɛrmɛ ata mɩ̀ be ka lowr.

³³ A ɓɛrmɛ ayʋɔb á ŋá kãw za zu a, koli ata na ŋmɛ̃ taa nɩ amãdɩ a na mɩ́ be n be, lãwnɩ tɩ-puur-kpãakpul nɩ tɩ-puur-yɩɩra.

³⁴ A sɔwlɩsɔw dàa zu a, koli anaar na ŋmɛ̃ taa nɩ amãdɩ a n'a na be be, lãwnɩ tɩ-puur-kpãakpul nɩ tɩ-puur-yɩɩra.

³⁵ A ɓɛrmɛ ayi al na de niwn a, nɩ a sɔwlɩsɔw dàa nyɔw-taa zie, a pile a, tɩ-puur-kpãakpul na be n be. Ɛ́ a na ɩ n a lɛ a ɓɛrmɛ a za ayʋɔb na nyɔw a sɔwlɩsɔw dàa a ƴãw.

³⁶ A tɩ-puur-kpãakpul nɩ a ɓɛrmɛ na nyɔw nɩ a al na baa cɛ a, a za ɩ bʋ̃-been daadaa, ɛ́ ɩ bom bɛ na ŋmɛ ŋmɛ salm-zɩɛ mɩŋa mɩŋa maal'ɩ a.

³⁷ Bɛ na maal'ɩ fɩ̃tɩlɩ ayopõi dɔwlɩ a fɩ̃tɩlɩ dɔwlʋ zie a tʋ̃ɔ́ caalɛ a ʋ nisɔw.

³⁸ Salm-zɩɛ mɩŋa mɩŋa n'a bɛ na maal'ɩ a ʋ cabli nɩ a ʋ tãpɛlʋ koli.

³⁹ Salm-zɩɛ mɩŋa mɩŋa kilo lɩzɛr'ɩ pie n'a bɛ na de maal'ɩ a fɩ̃tɩlɩ dɔwlʋ zie nɩ a kpɛ̃kpɛrsɩ.

⁴⁰ A fʋ̃ʋ Moyiir, jɩ́r ɛ́ tɩ ƴãw bɛ maalɩ tu n a bʋ̃-mã ɩ̃ na wule fʋ a tãw zu ka a.»