Eziptɩ tẽw yib 24 - A SƐB-SÕW

A Naaŋmɩn maal'ɩ nɩ a Ɩsɩrayɛl nɩbɛ wõ-taa

¹ A Sore tɩ yel'ɩ a Moyiir: «Do wa a ɩ̃ zie a tãw zu, a fʋ̃ʋ, a Aarɔ̃, a Nadavʋ, a Avihu nɩ a Ɩsɩrayɛl nɩ-kore lɩz'a ata nɩ pie. Nyɩ na cãà na zãá, ɛ́ gbĩ dume gũu tɩ tɔ tẽw.

² Fʋ̃ʋ yõ n'ʋ na taw pɩɛlɩ mɛ̃, a bɛ ŋa bɛ tawr pɩɛlɛ ɩ, a nɩbɛ mɩ̀ bɛ páwr nyɩ dúor waar a tãw zu ɛ.»

³ A Moyiir tɩ cen na tɩ manɩ a Sore ƴɛ̀rʋ za nɩ a ʋ nɛ-ƴãwnɩ za kʋ̀ a Ɩsɩrayɛl nɩbɛ. Bɛ tɩ lãw nɩ nɔ-been sɔw à ŋá: «Tɩ na tu n a lɛ za a Sore na yel a.»

⁴ A Moyiir tɩ sɛb'ɩ a Sore ƴɛ̀rʋ za. Ɛ́ a bio daarɩ́ ʋ dãwnɩ ìru, mɛ bàwr-maal-kuur a tãw sɩ̃ɛ́, ɛ́ mɩ̀ bin kʋsɛbɛ pie nɩ ayi teli teli, a Ɩsɩrayɛl nɩbɛ dɔwlʋ pie nɩ ayi ƴãw.

⁵ Ʋ tɩ ƴãw na a Ɩsɩrayɛl nɩbɛ pɔlbili bɛ mɩnɛ maalɩ nyɩw-a-za-bagɛ kʋ̀ a Sore, ɛ́ kʋ nadɛɛ maal'ɩ lãw-taa bagɛ kʋ̀ ʋ.

⁶ A Moyiir tɩ ɩ n a zɩ̃ɩ ŋmãa ƴãw lali pʋɔ, ɛ́ cir a ŋmãa ƴãw a bàwr-maal-kuur zu.

⁷ Al pùorí ʋ de a wõ-taa sɛbɛ kanɩ a yi a nɩbɛ niŋé. A Ɩsɩrayɛl nɩbɛ tɩ yel'a: «A lɛ za a Sore na yel a, tɩ na tu na, tɩ na sàw nɩ a ʋ nʋɔr.»

⁸ Lɛ n'a a Moyiir tɩ de a zɩ̃ɩ mɩr a nɩbɛ ɛ́ yel: «A wõ-taa a Sore na maal'ɩ nyɩ a nɛ-ƴãwnɩ á ŋá za zũú a, a ʋ zɩ̃ɩ n'ɩ à á ŋá.»

⁹ Al pùorí, a Moyiir tɩ do n a tãw zu, ʋlɛ nɩ a Aarɔ̃, a Nadavʋ, a Avihu nɩ a Ɩsɩrayɛl nɩ-kore lɩz'a ata nɩ pie.

¹⁰ Bɛ tɩ nyɛ̃ nɩ a Ɩsɩrayɛl Naaŋmɩn. A ʋ gbɛ́ɛ pile a, a tɩ ɩ na mɛ̃ tẽsɔw bɛ na maal'ɩ kʋsɛ-nyɩlɩ kãw bɛ na bʋɔlɛ safɩɩr, ʋʋ ɩ mɛ̃ a salom sɛbla a.

¹¹ A Naaŋmɩn bɛ tɩ ɩ a Ɩsɩrayɛl nɩ-bɛrɛ bɛ ŋa bom ɛ. Bɛ tɩ tʋ̃ɔ́ na jɩ́r ʋ, al pùorí bɛ dɩ kɛ́ nyũ.

A Moyiir na tuori a Naaŋmɩn a tãw zu a

¹² A Sore tɩ yel'ɩ a Moyiir: «Do wa a ɩ̃ zie a tãw zu, wa be be. Ɩ̃ bɔbr'a k'ɩ̃ɩ kʋ̀ b a kʋsɛ-pamɛ al zu a Wulu nɛ-ƴãwnɩ na sɛb a, fʋ tɩ wul a a Ɩsɩrayɛl nɩbɛ bɛ bãw a.»

¹³ A Moyiir tɩ ìr'a, ʋlɛ nɩ a ʋ tõ-tone Zozue, bɛ do a Naaŋmɩn tãw zu.

¹⁴ Ɛcɛ, ʋ na tɩ dúor a, ʋ tɩ yel'ɩ a nɩ-kore: «Nyɩ gùre tɩ a ka tɩ tɩ lɛb wa. Aarɔ̃ nɩ Huur n'ɩ bɛ ŋa be a nyɩ zie, nɩr wa tɛr yel a, ʋ páw bɛ.»

¹⁵ Lɛ n'a a Moyiir tɩ do a tãw zu. A zũzuwr tɩ pàw nɩ a tãw.

¹⁶ A Sore yúor-vɩɛlʋ-danʋ tɩ be n a Sinayi tãw zu, ɛ́ a zũzuwr pili pàw ʋ bibie ayʋɔb. A bibie ayopõi sob daar a, a Sore tɩ be n a zũzuwr pʋɔ ɛ́ bʋɔlɩ a Moyiir.

¹⁷ A Sore yúor-vɩɛlʋ-danʋ mɩ́ tɩ sãá nɩ a Ɩsɩrayɛl nɩbɛ zie ɩ mɛ̃ vũu na dɩrɛ a, a tãw nyʋɔrɩ́.

¹⁸ A Moyiir tɩ kpɛ n a zũzuwr pʋɔ ɛ́ cãà tɔl do. Ʋ tɩ maal'ɩ bibie lɩz'a ayi nɩ tɩ̃ɩsɔwr lɩz'a ayi a tãw zu be.