Eziptɩ tẽw yib 20 - A SƐB-SÕW

A Naaŋmɩn nɛ-ƴãwnɩ pie

¹ Ƴɛ̀rʋ á ŋá n'a a Naaŋmɩn tɩ ƴɛ̀r kʋ̀ a Ɩsɩrayɛl:

² «Ɩ̃ ɩ n a Sore fʋ Naaŋmɩn, mãa n'ʋ ɩ fʋ yi a Eziptɩ, a be fʋ na tɩ ɩ gbãgbaa a.»

³ «Fʋ kʋ̃ tɛr ŋmɩmɛ pʋɔ a ɩ̃ ƴãw ɛ.»

⁴ «Fʋ kʋ̃ tɛr tɩɩb kãw za ɩ. A bome na be a saa-zu, a salom zu, a pile ka, a tẽw zu, a kʋ̃ɔmɩ́ nɩ a tẽsɔw pile a, fʋ kʋ̃ maalɩ a kãw za bãwfʋ ɛ.

⁵ Fʋ kʋ̃ gbĩ dume gũu tɩ tɔ tẽw a ŋmɩmɛ á ŋá taabɛ niŋé, ɛ́ maalɩ a ɩ. Bʋ̃ʋ n'ʋ vɛ̃, mãa n'ɩ a Sore, a fʋ Naaŋmɩn, Naaŋmɩn na kpɛ nyuur a. A bɛlɩ dem na hɩ̃ɛn mɛ̃ a, ɩ̃ mɩ́ ƴãw bɛ nɩ dɔwrʋ, bɛlɛ nɩ a bɛ bʋʋrɛ na dɔw tu taa tɩ ta gb'a ata bɩɩ gb'a anaar a.

⁶ Ɛcɛ a bɛlɩ dem na nɔnɛ mɛ̃ ɛ́ sàwr a ɩ̃ nɛ́ɛ a, ɩ̃ mɩ́ tɛr'ɩ nɔ̃wfʋ-ɩb a bɛ zie tɩ ta bɛ na dɔw tu taa gb'aa túr a.»

⁷ «Fʋ kʋ̃ bʋnɩ por a ɩ̃ yúor ɛ. Nɩr na bʋnɩ por a mãa Sore fʋ Naaŋmɩn yúor a, ʋ ɩ n sãwna sob a ɩ̃ zie.»

⁸ «Bãwnɩ a pɩ̃ɛnʋ-bibir, ɩ k'ʋ ɩ Naaŋmɩn bibir.

⁹ Fʋ na mɩ́ tõ n bibie ayʋɔb, tõ a fʋ tome za.

¹⁰ Ɛcɛ a bibie ayopõi sob a, a pɩ̃ɛnʋ-bibir ɩ̃ na so a n'ʋ, a mãa, a Sore fʋ Naaŋmɩn. Fʋ kʋ̃ tõ ton za a ʋlɩ bibir nɛ ɩ, a fʋ̃ʋ, a fʋ bibiir, a fʋ tõ-tõ-bi-dɛbr bɩɩ a fʋ tõ-tõ-bi-pɔwbɛ, a fʋ dʋn nɩ a nʋʋra na kpɩɛr a fʋ zie a.

¹¹ Bʋ̃ʋ n'ʋ vɛ̃, bibie ayʋɔb'a ɩ̃ ír a salom, a tẽw, a kʋ̃ɔ-kpɛ̃ɛ nɩ a bome al za na be a pʋɔ a. Ɛcɛ a bibie ayopõi sob a, ɩ̃ zɩ̃ na pɩ̃ɛnɩ. Alɛ so a mãa, a Sore, ɩ̃ maalɩ a pɩ̃ɛnʋ-bibir, ɛ́ ɩ k'ʋ ɩ sõw.»

¹² «Ƴãwnɛ a fʋ sãà nɩ a fʋ mã, tʋ̃ɔ́ kpɛ a tẽw a mãa, a Sore fʋ Naaŋmɩn na kʋ̀rɛ fʋ a, cɛlɩ.»

¹³ «Fʋ kʋ̃ kʋ nɩr ɛ.»

¹⁴ «Fʋ kʋ̃ maalɩ pɩ̃ɔ-yele ɩ.»

¹⁵ «Fʋ kʋ̃ zu ɛ.»

¹⁶ «Fʋ kʋ̃ dɩ dãsɩ-ziri màl a fʋ tɔ ɩ.»

¹⁷ «Fʋ kʋ̃ bɔbr kɛ́ fʋ̃ʋ nãá so a fʋ tɔ sob yir ɛ. Fʋ kʋ̃ bɔbr kɛ́ fʋ̃ʋ nãá so a ʋ pɔw, a ʋ tõ-tõ-bi-dɛb, a ʋ tõ-tõ-bi-pɔw, a ʋ náab, a ʋ bõw nɩ a ʋ bʋ̃-sora kãw za ɩ.»

¹⁸ A Ɩsɩrayɛl nɩbɛ za tɩ wõ n a saa-tanʋ nɩ a ɩɩl pɛblʋ. Bɛ za tɩ nyɛ̃ nɩ a saa-nyɩwrʋ nɩ a tãw na ɩ zʋ̀ʋ́r ʋ za a. Dɛ̃bɩ̃ɛ tɩ ɩrɛ bɛ na, bɛ àr zãá.

¹⁹ Bɛ tɩ yel'ɩ a Moyiir: «A fʋ̃ʋ a, ƴɛ̀rɛ a tɩ zie, tɩ na bɛrɛ na wone, ɛcɛ a Naaŋmɩn a, ʋ ta ƴɛ̀rɛ a tɩ zie daadaa ɩ, alɛ bɛ ɩ lɛ, tɩ na kpi na.»

²⁰ A Moyiir tɩ sɔw bɛ na: «Nyɩ ta zɔrɛ dɛ̃bɩ̃ɛ ɩ! A nyɩ ɩ-kaafʋ ƴãw n'a a Naaŋmɩn wa. Ʋ bɔbr'a kɛ́ nyɩ zɔrɛ ʋ, ɛ́ ta maalɛ yel-bier ɛ.»

²¹ A Ɩsɩrayɛl nɩbɛ tɩ àr'a zãá, ɛ́ a Moyiir taw pɩɛlɩ a zũzuw-sɛbla, a be a Naaŋmɩn na tɩ be a.

A wulu na càarɩ a bàwr-maal-kuur a

²² A Sore tɩ yel'ɩ a Moyiir: «Tɩ ƴɛ̀r à ŋá kʋ̀ a Ɩsɩrayɛl nɩbɛ: “Nyɩ nyɛ̃ a na, salom zu n'a ɩ̃ be ɛ́ ƴɛ̀r a nyɩ zie.

²³ Nyɩ kʋ̃ maalɩ salm-pla nɩ salm-zɩɛ ŋmɩmɛ a pʋɔ a ɩ̃ ƴãw ɛ. Nyɩ kʋ̃ maal'a tɛr ɛ.

²⁴ Nyɩ na mɛ n tanɛ bàwr-maal-kuur a ɩ̃ ƴãw. A ʋ zu n'a nyɩ na mɩ́ kʋ a nyɩ píir, a nyɩ bʋʋr nɩ a nyɩ nĩi maal'ɩ nyɩw-a-za-bagɛ nɩ lãw-taa bagɛ kʋ̀ m. Ɛ́ mãa a, ɩ̃ na mɩ́ wa na wa maalɩ nyɩ, zie nɛ za ɩ̃ na wul k'ɩ̃ɩ be n be a.

²⁵ Ɛcɛ nyɩmɛ wa mɩɛr kʋsɛbɛ bàwr-maal-kuur kʋ̀rɛ mɛ̃ a, nyɩ ta mɛ n ʋ kʋsɛ-pɛnɩ ɛ. Bʋ̃ʋ n'ʋ vɛ̃, nyɩmɛ wa de a lɛr pɛnɩ nɩ a a, a na sãw na.

²⁶ Nyɩ kʋ̃ mɛ bàwr-maal-kuur bɛ na mɩ́ do tanɛ dɛr-mimie tɩ ta a, kʋ̀ m ɛ, a bàwr-maalɛ taa wa ɩrɛ bɛ nyɛrɛ a ʋ faalʋ ɛ.”»