Eziptɩ tẽw yib 17 - A SƐB-SÕW

A kʋ̃ɔ na tɛb yi a pìir pʋɔ a

¹ A Sore tɩ ƴãw na a Ɩsɩrayɛl nɩbɛ lãw za yi a Sin wɛja-kpalɛ pʋɔ, ɛ́ cere kɛ́ tɛwr, tɩ ta Erefidim, maalɩ a bɛ pɛnɛ-sɛwr a be. Ɛcɛ kʋ̃ɔ bɛ tɩ ka be a nɩbɛ na nyũ ɛ.

² Lɛ n'a a nɩbɛ tɩ bɔ a Moyiir nɔhaarʋ, yel ʋ à ŋá: «Nyɩ kʋ̀ tɩ kʋ̃ɔ tɩ nyũ!» A Moyiir tɩ sɔw bɛ na: «Bʋ̃ʋ n'ʋ so nyɩ bɔbr mɛ̃ nɔhaarʋ? Bʋnʋ ƴãw n'a nyɩ yel kɛ́ nyɩ ɩ a Sore kaa?»

³ Ɛcɛ kʋ̃ɔ-nyúur tɩ kpɩɛr'ɩ a nɩbɛ, bɛ cãà zɛbr'ɩ a Moyiir yere nɩ: «Bʋnʋ ƴãw n'a fʋ ɩ tɩ yi a Eziptɩ? Fʋ wa ɩ tɩɩm nɩ a tɩ bibiir nɩ a tɩ dʋn kpi kʋ̃ɔ-nyúur ƴãw n'a bɩɩ?»

⁴ A Moyiir tɩ kõ na bʋɔlɩ a Sore yel á ŋá: «Bʋ̃ʋ n'ʋ ɩ̃ na ɩ a nɩbɛ bɛ ŋa ƴãw? Blã cɛ ɛ́ bɛ na lɔb'ɩ mɛ̃ nɩ kʋsɛbɛ!»

⁵ A Sore tɩ sɔw nɩ a Moyiir yel à ŋá: «De a nɩbɛ niwn, ɛ́ tɛr a Ɩsɩrayɛl nɩ-kore bɛ mɩnɛ. De a dabɔl fʋ na ŋmɛ n a Nɩl a, tɛr a nũú cen nɩ.

⁶ Ɩ̃ na àr'ɩ a be a fʋ niŋé, a Orɛb tãw pìir zu. Fʋ na va n a pìir, kʋ̃ɔ tɛb yi a nɩbɛ nyũ.» A Moyiir tɩ ɩ n a lɛ, a Ɩsɩrayɛl nɩ-kore niŋé.

⁷ Bɛ tɩ por'ɩ a zie nɛ yúor kɛ́ Masa nɩ Meriba, a pɛr lɛ kɛ́ “Ɩ-kaafʋ” nɩ “Nɔhaarʋ”. A Ɩsɩrayɛl nɩbɛ na tɩ bɔ a Moyiir nɔhaarʋ a ƴãw, nɩ bɛ na tɩ ɩ a Sore kaa sowri: «A Sore be n a tɩ sɔgɔ, bɩɩ ʋ bɛ ka be mɔ̃?»

A Amalesitɩ mɩnɛ ŋmãa nɩ nɩ a Ɩsɩrayɛl nɩbɛ zɛbr

⁸ A Amalesitɩ mɩnɛ tɩ wa na wa ŋmãa nɩ a Ɩsɩrayɛl nɩbɛ zɛbr a Erefidim.

⁹ A Moyiir tɩ yel'ɩ a Zozue: «Kaa ír nɩbɛ na na tʋ̃ɔ́ zɛb faa tɩ a, yi tɩ zɛb'ɩ a Amalesitɩ mɩnɛ. A bio a, ɩ̃ na be n a tãle nyʋɔrɩ́, ɛ́ tɛr a Naaŋmɩn dabɔl a ɩ̃ nũú.»

¹⁰ A Zozue tɩ cen na tɩ zɛbr'ɩ a Amalesitɩ mɩnɛ, mɛ̃ a lɛ a Moyiir na yel kʋ̀ ʋ a, ɛ́ a Moyiir, a Aarɔ̃ nɩ a Huur do tɩ be a tãw nyʋɔrɩ́.

¹¹ A Moyiir wa zɛw a nũu a, a Ɩsɩrayɛl nɩbɛ mɩ́ zɛbr'a tʋ̃ɔ́nɛ, ʋlɛ wa lɛb bɛr ʋ siw a, a Amalesitɩ mɩnɛ nɛbɛ mɩ́ zɛbr tʋ̃ɔ́nɛ.

¹² A Moyiir nuru a za ayi na wa bàl faarɛ siwr a, a Aarɔ̃ nɩ a Huur de nɩ kʋsɩɛr wa bin a ʋ pile, ʋ zɩ̃ a ʋ zu, ɛ́ ŋa àr ka lowr, ŋa àr ka lowr, bɛ tɩɛ a ʋ nuru tɛr. À ŋá n'a a Moyiir nuru tɩ zɛw tɩ ta a mʋ̃tɔ̃w kpɛb daar.

¹³ A Zozue tɩ zɛb'a tʋ̃ɔ́ a Amalesitɩ mɩnɛ pẽlẽpẽlẽ.

¹⁴ A Sore tɩ yel'ɩ a Moyiir: «Sɛb à á ŋá za ƴãw sɛbɛ pʋɔ, a nɩbɛ taa yiire bɛrɛ ɩ. Ɛ́ yel a Zozue k'ɩ̃ɩ na kʋ n a Amalesitɩ mɩnɛ pàw pɛr, nɩr za yiiri a bɛ yele a tẽw zu.»

¹⁵ A Moyiir tɩ mɛ n bàwr-maal-kuur por a yúor kɛ́ «A Sore n'ɩ a ɩ̃ dɩrapo.»

¹⁶ Ʋ tɩ yel'a: «A Amalesitɩ mɩnɛ na sʋ̃ɔmɩ sàw zɛw nũu a Sore naalʋ-dà-kɔw ƴãw a, a Sore na zɛbr'ɩ bɛ nɩ kʋralɛ.»