Eziptɩ tẽw yib 16 - A SƐB-SÕW

A mãan nɩ a caparapɩɩr

¹ A Ɩsɩrayɛl nɩbɛ za tɩ yi n a Elim. Bɛ na tɩ yi a Eziptɩ a maalɩ cuwr ayi a, a cuw bibie pie nɩ anũu sob, a Ɩsɩrayɛl lãw nɩbɛ za tɩ ta n Sin wɛja-kpalɛ na be a Elim nɩ a Sinayi tãw cará a.

² A wɛja-kpalɛ pʋɔ be n'a a Ɩsɩrayɛl nɩbɛ za lɛb tɩ maal nyɔw a Moyiir nɩ a Aarɔ̃ yere.

³ Bɛ tɩ yere na: «A Sore nãá nɩ̃ɛ tɩ ɩ tɩ kpi a Eziptɩ, a be tɩ na mɩ́ tɩ zɩ̃ kɔw nɛnɛ nɩ dʋwr, ɛ́ mɩ́ dɩ bʋ̃-dɩrɩ tɩ sɛw a! Bʋ̃ʋ n'ʋ vɛ̃, nyɩ tɛr tɩ na wa n a wɛja-kpalɛ ŋa pʋɔ kɛ́ nyɩ wa bɛr tɩ tɩ kpi kɔ̃ tɩ za!»

⁴ A Sore tɩ yel'ɩ a Moyiir: «Ɩ̃ na ɩ na bʋ̃-dɩra yi a salom zu ɛ́ wa mɛ̃ saa a, a nyɩ ƴãw. A nɩbɛ na mɩ́ yi n bibir za tɩ wob a bibi-ɓil dem. À ŋá n'a ɩ̃ na ɩ nyɩ kaa nyɛ̃, nyɩ na sàw nɩ a ɩ̃ wulu bɩɩ nyɩ kʋ̃ sàw.

⁵ Nyɩmɛ wa cɔbrɛ a al nyɩ na na wob a bibie ayʋɔb sob a, a na ɩ n a bibir za dem gb'a ayi.»

⁶ A Moyiir nɩ a Aarɔ̃ tɩ yel'ɩ a Ɩsɩrayɛl nɩbɛ za: «A zaanʋɔra ŋa a, nyɩ na bãw na k'aa Sore n'ʋ ɩ nyɩ yi a Eziptɩ tẽw.

⁷ Ɛ́ a bio biɓaara a, nyɩ na nyɛ̃ nɩ a ʋ yúor-vɩɛlʋ-danʋ, bʋ̃ʋ n'ʋ vɛ̃, ʋ wõ a na nyɩ na zɛbr'ɩ ʋ a. Tɩɩm a, tɩmɛ mɩ̀ n'ɩ ã-mɩnɛ, nyɩ zɛbr'ɩ tɩ?»

⁸ A Moyiir tɩ cãà na yel: «Nyɩ na nyɛ̃ na bãw k'aa Sore n'ʋ, a lɛn daar ʋ nãà wa kʋ̀ nyɩ nɛn nyɩ 'wɔb a zaanʋɔra, ɛ́ a biɓaara ʋ kʋ̀ nyɩ dipɛ̃ a man nyɩ a. Bʋ̃ʋ n'ʋ vɛ̃, a Sore wõ n a zɛbr nyɩ na zɛbr'ɩ ʋ a. A tɩɩm a, tɩmɛ mɩ̀ n'ɩ ã-mɩnɛ? Tɩmɛ bɛ nɛbɛ nyɩ zɛbr'ɩ ɛ, a Sore sɩrɩ n'ʋ nyɩ zɛbr'ɩ.»

⁹ Al pùorí, a Moyiir yel a Aarɔ̃: «Yel a Ɩsɩrayɛl nɩbɛ za kɛ́ bɛ taw pɩɛlɩ a Sore, ʋ wõ n a zɛbr bɛ na zɛbr'ɩ ʋ a.»

¹⁰ A Aarɔ̃ na tɩ ƴɛ̀rɛ a Ɩsɩrayɛl nɩbɛ za zie a, bɛ tɩ lɩɛb'a jɩ́rɛ a wɛja-kpalɛ lowr, wa bere a Sore yúor-vɩɛlʋ-danʋ sãá a zũzuwr pʋɔ.

¹¹ A Sore tɩ yel'ɩ a Moyiir:

¹² «Ɩ̃ wõ n a Ɩsɩrayɛl nɩbɛ zɛbr. Yel à ŋá kʋ̀ bɛ: “Nyɩ na 'wɔb'ɩ nɛn a zaanʋɔra ŋa, ɛ́ a bio biɓaara nyɩ páw dipɛ̃ a man nyɩ. À ŋá n'a nyɩ na bãw k'aa mãa, a Sore, mãa n'ɩ a nyɩ Naaŋmɩn”.»

¹³ A zaanʋɔra a, caparapɩɩr tɩ lo na pàw a pɛnɛ-sɛwr za, ɛ́ a biɓaara ɓɩɛlʋ lo viiri koli a pɛnɛ-sɛwr.

¹⁴ A ɓɩɛlʋ na wa zor a, bʋ̃-bi-pɛlɛ kãw na ɩ zaa mɩmɩr a tɩ pàw nɩ a tẽsɔw.

¹⁵ A Ɩsɩrayɛl nɩbɛ tɩ jɩ́r'a kaa, ɛ́ sowre taa: «Bʋ̃ʋ n'a?» Bɛ sɩrɩ bɛ tɩ bãw alɩ bome nɛ na n'a a ɩ. A Moyiir tɩ sɔw bɛ: «A dipɛ̃ a Sore na kʋ̀rɛ nyɩ kɛ́ nyɩ 'wɔb a n'a.

¹⁶ Ɛ́ nyɩ nyɛ̃ a lɛ a Sore na ƴãw a nʋɔr a: “Ŋa za na mɩ́ wob'ɩ a lɛ na man ʋ a. Nyɩ mɩ́ wob ta litɩr anaar a nɩ-been ƴãw, ɛ́ bãwnɩ a nɩbɛ lɛ nʋɔr na kpɩɛr a pɛn-sɛw-been pʋɔ a”.»

¹⁷ A Ɩsɩrayɛl nɩbɛ tɩ ɩ n a lɛ. Bɛ mɩnɛ tɩ wob'ɩ yaga, ɛ́ bɛ mɩnɛ wob blã.

¹⁸ Ɛcɛ bɛ na wa manɩ a, a bɛl na tɩ tɛr yaga a, bɛ tɩ tɛr a zuo ɩ, ɛ́ a bɛl na tɩ tɛr blã a, tɩ tɛr'a a man. Ŋa za tɩ wob'a man a ʋ dɩb.

Nɛ́ɛ na ƴãw càar'ɩ a mãan a

¹⁹ A Moyiir tɩ cãà na lɛb yel bɛ à ŋá: «Nɩr za taa wa bine a ŋmãa bio ɛ!»

²⁰ Bɛ mɩnɛ bɛ tɩ sàw de a Moyiir ƴɛ̀rʋ ɛ, ɛ́ bin a ŋmãa a bio ƴãw, ɛcɛ a tɩ dãw nɩ bio kpɛ zãzule nyùur. Lɛ n'a a Moyiir tɩ nyɛ̃ nɩ bɛ suur.

²¹ Ŋa za mɩ́ tɩ wob'ɩ biɓaara za, a lɛ ʋ na na tʋ̃ɔ́ dɩ a. Ɛ́ a mʋ̃tɔ̃w wa tʋlɛ a lɛn daar a, a ŋmãa na cãà be a tẽw a mɩ́ nyɩl'a.

²² A bibie ayʋɔb sob a, bɛ tɩ wob'ɩ gb'a ayi dɩb, a nɩ-been dem mɩ́ ta litɩr ani. A nɩbɛ niw-dierbɛ za tɩ cen na tɩ yel kʋ̀ a Moyiir,

²³ ʋ yel bɛ: «Lɛ n'a a Sore yel. A bio a, ton za bɛ tone ɩ, pɩ̃ɛnʋ-bibir a Sore na so a n'ʋ. A al nyɩ na sɩ̃ɛn a, nyɩ sɛ̃, a al nyɩ na dʋwr a, nyɩ dʋw, ɛ́ a al na guu a, nyɩ bin a biɓaara.»

²⁴ Bɛ tɩ bin na gù n a bio, mɛ̃ a lɛ a Moyiir na yel a, ɛ́ a bɛ tɩ nyùur ɛ́ bɛ tɩ kpɛ zãzule ɩ.

²⁵ Lɛ n'a a Moyiir tɩ yel bɛ: «Nyɩ dɩ a a dɩ̃a. Bʋ̃ʋ n'ʋ vɛ̃, a pɩ̃ɛnʋ-bibir a Sore na so a n'ʋ. Nyɩ kʋ̃ nyɛ̃ bom za a yẽw ɛ.

²⁶ Nyɩ na mɩ́ wob'ɩ a bʋ̃-dɩrɩ á ŋá bibie ayʋɔb, ɛcɛ a bibie ayopõi sob a, a pɩ̃ɛnʋ-bibir'ʋ, a kʋ̃ mɩ́ ka be ɩ.»

²⁷ Ɛcɛ a bibie ayopõi sob a, a Ɩsɩrayɛl nɩbɛ bɛ mɩnɛ tɩ yi na kɛ́ bɛ tɩ wob, ɛ́ bɛ tɩ nyɛ̃ bom ɛ.

²⁸ A Sore tɩ yel'ɩ a Moyiir: «Debor'a nyɩ na zawrɩ a ɩ̃ nɛ-ƴãwnɩ nɩ a ɩ̃ wulu tɩ ta?

²⁹ Nyɩ bãwnɩ a, ɩ̃ kʋ̀ nyɩ nɩ a pɩ̃ɛnʋ-bibir kɛ́ nyɩ mɩ́ pɩ̃ɛnɩ, ɛ́ a al ƴãw n'a ɩ̃ mɩ́ kʋ̀ nyɩ bibie ayi bʋ̃-dɩrɩ a bibie ayʋɔb sob. A na ɩ lɛ a, ŋa za ʋ mɩ́ be a ʋ yir a bibie ayopõi sob, nɩr za ta yi a ʋ yir ɛ.»

³⁰ Lɛ n'a a Ɩsɩrayɛl nɩbɛ tɩ zɩ̃ pɩ̃ɛnɩ a bibie ayopõi sob.

³¹ A Ɩsɩrayɛl nɩbɛ tɩ por'ɩ a bʋ̃-dɩra nɛ yúor kɛ́ mãan. Ʋ tɩ ɩ na mɛ̃ tɩ-bʋʋrɛ kãw na dɩ koriyãdɩr a bie. Ʋ tɩ ɩ n pla, ɛ́ a nʋ̃ɔ̀ ɩ mɛ̃ sɛ̃sɛ̃ bɛ na sɔ sɩwr a.

³² A Moyiir tɩ yel'a: «Nyɛ̃ a lɛ a Sore na yel a: “Nyɩ de bom, ɩ a mãan paalɩ bin a nyɩ bʋʋrɛ ƴãw, bɛ tʋ̃ɔ́ nyɛ̃ a dipɛ̃ ʋl ɩ̃ na guol'ɩ nyɩ a wɛja-kpalɛ pʋɔ, a lɛn daar ɩ̃ na ɩ nyɩ yi a Eziptɩ a.”»

³³ Al pùorí, a Moyiir yel a Aarɔ̃: «De duwle, manɩ ta litɩr anaar mãan ƴãw bin a Sore niŋé, a gã a nyɩ bʋʋrɛ ƴãw.»

³⁴ A Aarɔ̃ tɩ bin nɩ a duwle a wõ-taa kʋsɛ-pamɛ niŋé, mɛ̃ a lɛ a Sore na tɩ ƴãw a nʋɔr kʋ̀ a Moyiir a, kɛ́ bɛ tʋ̃ɔ́ maal bin ʋ a be.

³⁵ A Ɩsɩrayɛl nɩbɛ tɩ dɩ n a mãan yome lɩz'a ayi, ɛ́ gù bɛ wa tɩ ta tẽw nɩbɛ na kpɩɛr a. A mãan n'a bɛ tɩ dɩrɛ tɩ ta n a Kanãa tẽw tʋr-bɔw ƴãw.

³⁶ A mãan bʋ̃-mána tɩ dɩ na kɛ́ omɛɛr, ɛ́ a omɛɛr ɩ bʋ̃-mána kpɛ̃ɛ bɛ na bʋɔlɛ kɛ́ efa a, ziir pie sob.