Eziptɩ tẽw yib 12 - A SƐB-SÕW

A Tɔl-gãw cuw

¹ A Sore tɩ yel'ɩ a Moyiir nɩ a Aarɔ̃ a Eziptɩ:

² «A cuw ŋa n'ʋ na mɩ́ tĩ a yũon a nyɩ zie, ʋlɛ n'ʋ na ɩ a cuw-dãw-niwn sob.

³ Nyɩ tɩ yel a Ɩsɩrayɛl biir lãw za: A cuw ŋa bibie pie sob a, nyɩ nyɔw pele bɩɩ bʋle a dɔwlʋ dɔwlʋ bɩɩ a yie yie.

⁴ Yir kãw dem wa ɩ pʋrɩ zuo a dʋ̃w 'wɔbrʋ ƴãw a, bɛ̃ɛ wõ taa nɩ a yir-kpɔwla dem, ɛ́ bãwnɩ a nɩbɛ nʋɔr. Al pùorí, bɛ na kaa na ír a dʋ̃w man nɩ a lɛ ŋa za na mɩ́ dɩ ta a.

⁵ Nyɩ na kaa na ír yũon-been pʋrale bɩɩ bʋle a ƴã-gan zie kãw za na bɛ sãw a.

⁶ Nyɩ na tɛr ʋ na tɩ ta n a cuw bibie pie nɩ anaar sob. A ʋlɩ bibir nɛ zaanʋɔra a, a Ɩsɩrayɛl nɩbɛ lãw nɩbɛ za na ɓã taa a na ŋmãa nɩ a dʋ̃w kɔkɔr.

⁷ Yir za pʋɔ bɛ na 'wɔbr a dʋ̃w a, bɛ na ɩ n a zɩ̃ɩ ƴãw a dɩ̃dɔr dàar ayi ƴãw, nɩ a dɩ̃dɔr zu-sɔw dàa ƴãw.

⁸ Bɛ na sɛ̃ n a nɛn, ɛ́ a tɩ̃ɩsɔw bɛ 'wɔb ʋ nɩ dipɛ̃ na bɛ ƴãw dãbɩl a, nɩ zɛ-va-tuo.

⁹ Nyɩ taa 'wɔbr ʋ kɛr bɩɩ dʋwra ɩ, nyɩ sɛ̃ ʋ za, lãw nɩ a zu, a gbɛ́ɛ nɩ a pʋ-bome.

¹⁰ Nyɩ bɛ bɛrɛ bom bio ɛ. Bom wa cɛ a biɓaara a, nyɩ nyɩw ʋ bɛr.

¹¹ Nyɩ nyɛ̃ a lɛ nyɩ na na 'wɔb ʋ a: nyɩ 'lẽ a nyɩ bʋ̃-suuri nɩ kpàgɛ a sɩɛmɩ́, nyɩ ƴãw nafawr-ɓɛwlɩkɛl a gbɛ̃ɛ́, ɛ́ tɛr dabɔl a nũú. Nyɩ na 'wɔb ʋ nɩ fɔ̃w fɔ̃w. A na ɩ n a Tɔl-gãw cuw a mãa Sore ƴãw.»

¹² «Ɩ̃ na tɔl'ɩ a Eziptɩ tẽw pʋɔ a dɩ̃a tɩ̃ɩsɔw, kʋ a bʋ̃-dãw-dɔwrɩ za, a nɩsaalbɛ bi-dãw-dɔwrɩ lãwnɩ a dʋn bʋ̃-dãw-dɔwrɩ. À ŋá n'a a mãa, a Sore, ɩ̃ na dɔwrɩ a Eziptɩ tẽw ŋmɩmɛ.

¹³ Ɛcɛ a zɩ̃ɩ na be a yie nyɩ na kpɩɛr a zu a na ɩ n bãwfʋ gù nyɩ. Ɩ̃ na mɩ́ nyɛ̃ a na ɛ́ tɔl gãw nyɩ bɛr. À ŋá n'a, mãa wa dɔwrɛ a Eziptɩ a lɛn daar a, a bʋ̃-faa na kʋrɛ a kʋ̃ páw nyɩ ɛ.»

¹⁴ «A bibir ŋa na ɩ n bibir nyɩ na na mɩ́ cãà bãwnɩ a, ɛ́ nyɩ na mɩ́ maal'ɩ cuw-kpɛ̃ɛ a mãa Sore ƴãw. Nʋɔr'ʋ ƴãw gã kʋralɛ, a nyɩ nɩbɛ na dɔwr lɩɛrɛ taa a ƴãw.»

A dipɛ̃ na bɛ ƴãw dãbɩl a cuw

¹⁵ A Sore tɩ cãà na lɛb yel: «Nyɩ na 'wɔb'ɩ dipɛ̃ na bɛ ƴãw dãbɩl a bibie ayopõi. A bibi-dãw-niwn sob wa dɛ tĩ a, dãbɩl kʋ̃ cãà a nyɩ yie pʋɔ ɩ. Ɛ́ nɩr wa 'wɔb dipɛ̃ na ƴãw dãbɩl, a bibi-dãw-niwn sob tɩ tɔ a bibie ayopõi sob a, bɛ na ír ʋ na bɛr a Ɩsɩrayɛl nɩbɛ pʋɔ.

¹⁶ A bibi-dãw-niwn sob a, nyɩ na tɛr'ɩ lãw-sõw, ɛ́ lɛb tɛr lãw-sõw a bibie ayopõi sob. Ton za bɛ tone a bibie á ŋá ɩ. Ŋa za bʋ̃-dɩrɩ tɛwr'a ʋ na tʋ̃ɔ́ mɩ́ maalɩ.

¹⁷ Nyɩ na maalɛ nɩ a dipɛ̃ na bɛ ƴãw dãbɩl a cuw ŋa, bʋ̃ʋ n'ʋ vɛ̃, a dɩ̃a bibir tɔr za n'a ɩ̃ ɩ a nyɩ nɩbɛ yi a Eziptɩ. Nyɩ na tɛr'ɩ a yel ŋa ʋ ɩ cuw nyɩ maalɛ, a nɩbɛ na dɔwr lɩɛrɛ taa a zie. Nʋɔr'ʋ ƴãw gã kʋralɛ.

¹⁸ A cuw-dãw-niwn sob bibie pie nɩ anaar sob zaanʋɔra, tɩ ta n a cuw bibie lɩzɛr'ɩ been sob zaanʋɔra a, nyɩ na 'wɔbr'ɩ dipɛ̃ na bɛ ƴãw dãbɩl a.

¹⁹ Bɛ kʋ̃ nyɛ̃ dãbɩl a nyɩ yie pʋɔ bibie ayopõi ɛ. Ɛ́ nɩr wa 'wɔb dipɛ̃ na ƴãw dãbɩl a, nʋʋra n'ʋ bɩɩ tẽ-bie n'ʋ a, bɛ na ír ʋ na bɛr a Ɩsɩrayɛl nɩbɛ pʋɔ.

²⁰ A na ɩ à ŋá a, nyɩ bɛ dɩrɛ bom za na ƴãw dãbɩl a ɩ. Dipɛ̃ na bɛ ƴãw dãbɩl a n'a nyɩ na 'wɔbr, zie nɛ za nyɩ na kpɩɛr a.»

A Tɔl-gãw cuw pele kʋb

²¹ A Moyiir tɩ bʋɔl'ɩ a Ɩsɩrayɛl nɩ-kore za wa yel bɛ: «Nyɩ cen tɩ nyɔw peli bɩɩ bʋli a nyɩ yie ƴãw, ɛ́ ŋmaarɩ a a kɔkɛɛ a Tɔl-gãw ƴãw.

²² Nyɩ na de nɩ ɩzɔpɩ váar 'lẽ ɓã taa tõ a dʋ̃w zɩ̃ɩ na be a ku-laa pʋɔ a pʋɔ, ɛ́ cen nɩ a tɩ ƴãw a dɩ̃dɔr dàar ayi nɩ a dɩ̃dɔr zu-sɔw dàa ƴãw. Al pùorí, nɩr bɛ yire a yir pʋɔ ɩ ɛ́ tɩ ta a biɓaara.

²³ A Sore na tɔl'ɩ a Eziptɩ dɔwrɩ a ʋ nɩbɛ. Ɛcɛ ʋlɛ wa nyɛ̃ a zɩ̃ɩ a dɩ̃dɔr dàar ayi zu nɩ a dɩ̃dɔr zu-sɔw dàa zu a, ʋ na tɔl'a ɛ́ bɛ sàw a Kʋ-pàw-pɛr kpɛ a nyɩ yie pʋɔ kʋ ɛ.

²⁴ Nyɩ tɛr a tub ŋa ʋ ɩ nʋɔr nyɩɩm nɩ a nyɩ bibiir ƴãw kʋralɛ.

²⁵ Nyɩmɛ wa kpɛ a tẽw ʋl pʋɔ a Sore na yel k'ʋʋ na kʋ̀ nyɩ na a, nyɩ tɛr a tub ŋa tuur.

²⁶ A nyɩ bibiir wa sowre nyɩ: “A tub ŋa nyɩ na tuur a pɛr'ɩ bo?”

²⁷ Nyɩɩm sɔw: “A bàwr tɩ na mɩ́ maalɩ kʋ̀ a Sore a Tɔl-gãw cuw ƴãw a n'ʋ. A lɛn daar a Ɩsɩrayɛl nɩbɛ na tɩ be a Eziptɩ tẽw a, a Sore tɩ kʋ n a Eziptɩ nɩbɛ, ɛ́ tɔl gãw a Ɩsɩrayɛl nɩbɛ yie bɛr, bɛ tɔ a ɩ”.» Lɛ n'a a Ɩsɩrayɛl nɩbɛ tɩ gbĩ dume gũu tɩ tɔ tẽw puori a Sore.

²⁸ Al pùorí, bɛ tɩ cen na tɩ ɩ a lɛ tɔr za a Sore na tɩ yel kʋ̀ a Moyiir nɩ a Aarɔ̃ a.

A dɔwrʋ pɛ-baara: a Eziptɩ tẽw nɩbɛ bi-dãw-dɔwrɩ kũu

²⁹ A zie na wa bɩ põ-zɛ̃-taa a, a Sore kʋ n a dãw-dɔwrɩ za a Eziptɩ tẽw, a Faarawɔ̃ bi-dãw-dɔwra nãá lɩɛr'ʋ dɩ a naalʋ a, lãwnɩ a nɩ-pàwra na be a gaso pʋɔ a bi-dãw-dɔwra, de nɩ a dʋn bʋ̃-dãw-dɔwrɩ.

³⁰ A Faarawɔ̃ nɩ a ʋ tõ-tõ-bi-bɛrɛ nɩ a Eziptɩ tẽw dem za tɩ ír'ɩ a ʋlɩ tɩ̃ɩsɔw nɛ, ɛ́ cɛlsɩ ŋmɛ pàw a tẽw za, bʋ̃ʋ n'ʋ vɛ̃, yir bɛ tɩ cɛ kũu bɛ be ɩ.

³¹ A Faarawɔ̃ tɩ bʋɔl'ɩ a Moyiir nɩ a Aarɔ̃ a tɩ̃ɩsɔw nɛ wa yel bɛ: «Nyɩ ìr yi zaa a ɩ̃ nɩbɛ sɔgɔ, nyɩmɛ nɩ a Ɩsɩrayɛl nɩbɛ. Nyɩ cen tɩ maalɩ a Sore mɛ̃ a lɛ nyɩ na yel a.

³² Nyɩ tɛr a nyɩ nĩi nɩ a nyɩ píir nɩ a nyɩ bʋʋr, mɛ̃ a lɛ nyɩ na yel a cen nɩ. Ɛ́ nyɩ mɩ̀ zɛlɩ a nyɩ Naaŋmɩn ʋʋ maalɩ mɛ̃.»

³³ A Eziptɩ tẽw dem na tɩ tɩ́ɛrɛ kɛ́ bɛ na kpi n bɛ za a, tɩ canɛ nɩ a Ɩsɩrayɛl nɩbɛ kɛ́ bɛ yi zaa fɔ̃w a tẽw pʋɔ.

³⁴ Lɛ n'a a tɩ fɛr a Ɩsɩrayɛl nɩbɛ ɓáw a dipɛ̃ zɔ̃ bɛ na naw ɛ́ a bɛ ìr sɛr a cen nɩ. Bɛ tɩ pili nɩ a dipɛ̃ zɔ̃-nawfʋ-dawr nɩ a bɛ kpar-bɛrɛ dúori baw.

³⁵ A Ɩsɩrayɛl nɩbɛ tɩ ɩ n a lɛ a Moyiir na yel kʋ̀ bɛ a: bɛ tɩ zɛlɩ nɩ salm-zɩɛ nɩ salm-pla bome nɩ kparɩ a Eziptɩ nɩbɛ zie.

³⁶ A Sore tɩ ɩ na a Eziptɩ nɩbɛ pʋʋr pɛlɩ a Ɩsɩrayɛl nɩbɛ ƴãw, bɛ kʋ̀ bɛ a bome bɛ na zɛlɩ a. À ŋá n'a a Ɩsɩrayɛl nɩbɛ tɩ fá a Eziptɩ tẽw dem.

³⁷ Al pùorí, a Ɩsɩrayɛl nɩbɛ tɩ yi n Aramɩsɛsɩ ɛ́ wɩɛr Sukotɩ. Bɛ tɩ ta n nɩbɛ tùr-kɔbr ayʋɔb (600 000), ɛ́ bɛ bɛ tɩ sɔ́r a pɔwbɛ nɩ a bibiir nɩ a dɛb-nyamɛ ƴãw ɛ.

³⁸ Nɩ-pɛ-bʋʋrɛ na yãwmɛ yaga a mɩ̀ tɩ páw bɛ na cen. A píir nɩ a bʋʋr nɩ a nĩi tɩ yãwmɛ na bɛ dɩ vuo ɩ.

³⁹ A Ɩsɩrayɛl nɩbɛ tɩ maal'ɩ ble zɔ̃ sɛ̃sɛ̃ na bɛ ƴãw dãbɩl a, nɩ a dipɛ̃ zɔ̃ bɛ na tɩ naw tuo yi n a Eziptɩ a. Bʋ̃ʋ n'ʋ vɛ̃, bɛ na tɩ diw bɛ a Eziptɩ a, a zɔ̃ bɛ na naw a bɛ tʋ̃ɔ́ ìr ɛ, ɛ́ bɛ mɩ̀ bɛ tʋ̃ɔ́ tɛr bʋ̃-dɩrɩ lo n a sɔ́r ɛ.

⁴⁰ A Ɩsɩrayɛl nɩbɛ tɩ kpɛ n a Eziptɩ yome kɔbr anaar dɔwlɩ yome lɩzɛr'ɩ pie (430).

⁴¹ A yome kɔbr anaar dɔwlɩ yome lɩzɛr'ɩ pie (430) á ŋá na wa ta a, a bibir ŋa tɔr za, a Sore nɩbɛ tɩ tu n taa vla yi a Eziptɩ.

⁴² Mɛ̃ a lɛ a Sore na bɛ tɩ gúr a ʋlɩ tɩ̃ɩsɔw nɛ, ɛ́ ɩ a ʋ nɩbɛ yi a Eziptɩ a, lɛ n'a a fɛr k'aa Ɩsɩrayɛl nɩbɛ na dɔwr lɩɛrɛ taa a mɩ̀ mɩ́ bɛr gʋ̃ɔ a tɩ̃ɩsɔw ʋl, a Sore na n'ʋ so ʋ a ƴãw.

A lɛ a Tɔl-gãw na na mɩ́ tu a

⁴³ A Sore tɩ cãà na lɛb yel a Moyiir nɩ a Aarɔ̃: «Nyɛ̃ a tub na na mɩ́ tu a Tɔl-gãw cuw ƴãw a: “Sãan kãw za bɛ pʋɔrɛ a dɩb pʋɔ ɛ.

⁴⁴ “Gbãgbaa bɛ na dà a na tʋ̃ɔ́ na pʋɔ a dɩb pʋɔ, bɛlɛ wa ŋmãa ʋ a yʋ̀ɔr a.

⁴⁵ “Sãan nɩ tõ-tõ-bie na dier sã-ya a bɛ pʋɔrɛ a dɩb pʋɔ ɛ.

⁴⁶ “A yir pʋɔ n'a a nɛn 'wɔbr, ʋ bɛ yire yẽw ɛ. “A dʋ̃w kɔbɛ bɛ karɛ ɩ.

⁴⁷ “A Ɩsɩrayɛl lãw nɩbɛ za nɛbɛ na mɩ́ maalɩ a cuw ŋa.

⁴⁸ “Nʋʋra na kpɩɛr a nyɩ zie a wa bɔbr k'ʋʋ maalɩ a Tɔl-gãw cuw a Sore ƴãw a, a fɛr'a k'aa ʋ yir dɛbr nɩ a dɛbli za ŋma a yɛɛ. Lɛ n'a ʋ na tʋ̃ɔ́ pʋɔ a cuw maalʋ pʋɔ mɛ̃ a Ɩsɩrayɛl nɩbɛ a. “Nɩr za na bɛ ŋmãa yʋ̀ɔr a bɛ pʋɔrɛ a dɩb pʋɔ ɩ.

⁴⁹ “A tub na ɩ n been a Ɩsɩrayɛl nɩbɛ zie nɩ a nʋʋrɩ na kpɩɛr a nyɩ tẽw pʋɔ a zie.”»

⁵⁰ A Ɩsɩrayɛl nɩbɛ za tɩ ɩ n a lɛ tɔr za a Sore na tɩ yel kʋ̀ a Moyiir nɩ a Aarɔ̃ a.

⁵¹ A bibir ŋa tɔr za n'ʋ a Sore tɩ ɩ a Ɩsɩrayɛl zɛbr-nɩbɛ cɔrɩ yi a Eziptɩ tẽw.