Eziptɩ tẽw yib 11 - A SƐB-SÕW

A dɔwr-kpɛ̃ɛ pɛ-baara na waar a

¹ A Sore tɩ yel'ɩ a Moyiir: «Ɩ̃ na ƴãw nɩ dɔwr-kpɛ̃ɛ pɛ-baara a Faarawɔ̃ nɩ a Eziptɩ tẽw nɩbɛ. Al pùorí a, ʋ na bɛr nyɩ na nyɩ cen, mɔ̃ mɩ̀, ʋ na diw nyɩ na, nyɩ kʋ̃ lɛb wa a ka ɩ.

² A na ɩ lɛ a, yel a Ɩsɩrayɛl nɩbɛ kɛ́ dɛb za mɩ́ zɛlɩ a ʋ dɛb-tɔ na kpɩɛr pɩɛl'ʋ a zie, ɛ́ pɔw za zɛlɩ a ʋ pɔw-tɔ na kpɩɛr pɩɛl'ʋ a zie salm-pla nɩ salm-zɩɛ bome.»

³ A Sore tɩ ɩ na a Eziptɩ tẽw nɩbɛ pʋʋr pɛlɩ a Ɩsɩrayɛl nɩbɛ ƴãw. Lɛb waar mɩ̀, a Moyiir tɔr za tɩ ɩ n nɩr na nyɛrɛ ƴãwfʋ yaga za a Eziptɩ a, a Faarawɔ̃ tõ-tõ-bi-bɛrɛ zie nɩ a nɩbɛ za zie a.

⁴ A Moyiir tɩ yel'ɩ a Faarawɔ̃: «À ŋá n'a a Sore yere: “Alɛ wa manɛ a zie na bɩ põ-zɛ̃-taa a, ɩ̃ na tɔl'ɩ a Eziptɩ tẽw pʋɔ.

⁵ A tẽw ŋa dãw-dɔwrɩ za na kpi na: a fʋ bidɛb-dãw na na lɩɛrɩ fʋ dɩ a naalʋ a, tɩ tɔ a tõ-tõ-bi-pɔw na ƴɛ́rɛ a zɔ̃ a bidɛb-dãw, de nɩ a dʋn bʋ̃-dãw-dɔwrɩ za.

⁶ Lɛ n'a a na ɩ cɛlsɩ lawlaw a Eziptɩ tẽw za pʋɔ, mɛ̃ bɛ na bɛ dãw wõ, ɛ́ kʋ̃ lɛb wõ a towtow a.

⁷ Ɛcɛ a Ɩsɩrayɛl nɩbɛ zie a, baa bɛ 'hʋ̃ʋnɛ nɩr bɩɩ dʋ̃w ɛ. Lɛ n'a nyɩ na bãw kɛ́ a mãa Sore a, ɩ̃ owre nɩ a Eziptɩ tẽw nɩbɛ nɩ a Ɩsɩrayɛl nɩbɛ.”»

⁸ A Moyiir tɩ cãà na lɛb yel: «A lɛn daar a, a fʋ tõ-tõ-bi-bɛrɛ bɛ ŋa za na wa na wa gbĩ dume a ɩ̃ niŋé, ɛ́ yel mɛ̃: “Yi zaa a tẽw pʋɔ, fʋ̃ʋ nɩ a fʋ nɩbɛ za!” A pùorí n'a ɩ̃ na yi.» A Moyiir tɩ nyɛ̃ nɩ suur yaga yi n a Faarawɔ̃ zie.

⁹ A Sore tɩ yel'ɩ a Moyiir: «A Faarawɔ̃ bɛ bɔbr a nyɩ ƴɛ̀rʋ bɛr-wob ɛ, k'aa ɩ̃ nɔ-ɓãa-yel-maalɩ tʋ̃ɔ́ yãwmɛ a Eziptɩ tẽw pʋɔ.»

¹⁰ A Moyiir nɩ a Aarɔ̃ tɩ sɩrɩ na maalɩ nɔ-ɓãa-yele yaga a Faarawɔ̃ nyɛ̃. Ɛcɛ a Sore tɩ ɩ na ʋ kpãa tobr bɛ bɛr a Ɩsɩrayɛl nɩbɛ bɛ yi zaa a ʋ tẽw pʋɔ ɛ.