Eziptɩ tẽw yib 1 - A SƐB-SÕW

NAAŊMƖN SÕW NA A ƖSƖRAYƐL NƖBƐ YI ZAA A EZIPTƖ TẼW PƲƆ 1:1—15:21 A Ɩsɩrayɛl nɩbɛ lɩɛb'ɩ gbãgbaar a Eziptɩ tẽw

¹ A Zakɔb bɛ mɩ̀ na bʋɔlɛ Ɩsɩrayɛl a bibiir na wa a Eziptɩ tẽw nɩ a bɛ sãà a yée n'ɩ á ŋá:

² Urubɛn, Sɩmɩ̃ɔ, Levi nɩ Zuda.

³ Ɩsakaar, Zabulɔ̃ nɩ Bɛ̃zamɛ,

⁴ Dan nɩ Nɛfɩtali, Gadɩ nɩ Asɛɛr. Ŋa za nɩ a ʋ yir dem tɩ nɛbɛ.

⁵ A Zakɔb yir dem za tɩ ɩ n nɩbɛ lɩz'a ata nɩ pie. A Zakɔb bidɛb kãw na dɩ Zuzɛb a tɩ dãw na be a Eziptɩ.

⁶ Al pùorí, a Zuzɛb tɩ kpi na, a ʋ yɛbr mɩ̀ kpi, tɩ lãwnɩ a ʋlɩ daar nɛ nɩbɛ za.

⁷ A Ɩsɩrayɛl bibiir tɩ dɔw na yɛ̀r a pùorí tɩ yãwmɛ bɛ tɛr tɛwr ɛ, ɛ́ tɛr fãw yaga za. Bɛ tɩ paal'ɩ a tẽw za.

⁸ Na-paala tɩ ìr'a dɩ naalʋ a Eziptɩ tẽw, nãà na bɛ tɩ dãw bãw a Zuzɛb a.

⁹ Ʋ tɩ yel'ɩ a ʋ nɩbɛ: «Nyɩ nyɛ̃, a Ɩsɩrayɛl nɩbɛ yãwmɛ na zuo tɩ, ɛ́ tɛr fãw zuo tɩ.

¹⁰ Nyɩ ɩ tɩ bɔ yã, ɩ kɛ̀ bɛ ta cãà yãwmɛ dɔwlɛ ɩ. Alɛ bɛ ɩ lɛ, ɛ́ zɛbr wa ɩ mɛ̃ a ìr'a a, bɛ na pʋɔ nɩ a tɩ dɔ̃ dem pʋɔ zɛb'ɩ tɩ, ɛ́ yi zaa a tẽw pʋɔ.»

¹¹ Lɛ n'a a Eziptɩ tẽw dem tɩ kaa ír tõ-tõ-nɩ-bɛrɛ, kɛ́ bɛ mɩ́ fɛr a Ɩsɩrayɛl nɩbɛ bɛ tõ tõ-kpɛn a wõ bɛ. À à ŋá n'a a Ɩsɩrayɛl nɩbɛ tɩ mɛ a Pitom nɩ Aramɩsɛsɩ tẽ-bɛrɛ na ɩ a Faarawɔ̃ bʋ̃-dɩrɩ maal-binu ziir a.

¹² Ɛcɛ a lɛ tɔr za bɛ na tɩ dɔwrɛ bɛ a n'a, bɛ nɩ̃ɛ lɛb tɩ bãw yãwmɛ dɔwlɛ, ɛ́ paalɛ a zie. A ɩ a lɛ a Eziptɩ tẽw dem tɩ zɔrɛ bɛ.

¹³ A Eziptɩ tẽw dem tɩ dɔwr'ɩ a Ɩsɩrayɛl nɩbɛ mɛ̃ gbãgbaar nɛbɛ a.

¹⁴ Bɛ tɩ ɩ na a bɛ nyɔ-vʋʋrʋ bɛ nʋmɛ towtow ɛ, a tõ-kpɛn bɛ na tɩ ƴãw bɛ tone a ƴãw: yawra nawfʋ, birkiri ŋmab, póru tõ-bʋʋrɛ za, nɩ gbãgba-tome za bɛ na tɩ fɛr ƴãw bɛ tone a.

A Faarawɔ̃ bɔbr'a k'ʋʋ kʋ a Ɩsɩrayɛl nɩbɛ dɛbli

¹⁵ A Ebre nɩbɛ tɩ tɛr'ɩ pɔw-dɔwrbɛ ayi, a kãw dɩ kɛ́ Sɩfɩra, ɛ́ a kãw kɛ́ Puwa. A Eziptɩ tẽw nãà tɩ yel'ɩ

¹⁶ à ŋá kʋ̀ bɛ: «Nyɩmɛ mɩ́ wa dɔwr a Ebre pɔwbɛ a, nyɩɩm mɩ́ maal jɩ́r a bie: ʋlɛ wa ɩ dɛble a, nyɩɩm kʋ ʋ, ɛ́ ʋlɛ wa ɩ powle a, nyɩɩm bɛr ʋ ʋ vʋʋrɛ.»

¹⁷ Ɛcɛ a pɔw-dɔwrbɛ tɩ zɔrɛ nɩ a Naaŋmɩn, bɛ bɛ tɩ tu a lɛ a Eziptɩ tẽw nãà na yel a ɩ, ɛ́ bɛr a dɛbli bɛ vʋʋrɛ.

¹⁸ Lɛ n'a a nãà tɩ bʋɔlɩ a pɔw-dɔwrbɛ wa yel bɛ: «Bʋ̃ʋ n'ʋ so nyɩ ɩ à à ŋá? Bʋnʋ ƴãw n'a nyɩ bɛr a dɛbli bɛ vʋʋrɛ?»

¹⁹ Bɛ tɩ sɔw ʋ na: «A Ebre pɔwbɛ bɛ ɩ mɛ̃ a Eziptɩ tẽw pɔwbɛ a ɩ. Bɛ kpɛmɛ na, mɩ́ dɔw a bɛ bie ɛ́ a pɔw-dɔwrɛ wa bãw ta.»

²⁰ À ŋá n'a a Ɩsɩrayɛl nɩbɛ tɩ yãwmɛ dɔwlɛ cere, ɛ́ tɛr fãw. Naaŋmɩn tɩ maal'ɩ a pɔw-dɔwrbɛ,

²¹ ɩ kɛ̀ bɛ tɛr nɩbɛ, bɛ na tɩ sàw a ʋ nʋɔr a ƴãw.

²² Ɛcɛ a Faarawɔ̃ tɩ ƴãw nɩ nʋɔr ŋa kʋ̀ a ʋ nɩbɛ za: «Ebre bi-pɩɩla za na dɔw ɩ dɛble a, nyɩ mɩ́ lɔb ʋ ƴãw a Nɩl pʋɔ. Ɛcɛ nyɩ mɩ́ bɛr a powli bɛ vʋʋrɛ.»