Ezekɩɛl 9 - A SƐB-SÕW

A Sore dɔwrɛ nɩ a Zerizalɛm

¹ A Sore tɩ cɩɩr'ɩ kpɛ̃w za yel: «Nyɩ taw pɩɛlɩ, nyɩɩm bɛ na yel kɛ́ nyɩ dɔwrɩ a Zerizalɛm a. Ŋa za, ʋ ɓáw a ʋ zɛbr bom sãw nɩ a tẽ-kpɛ̃ɛ bɛr!»

² Lɛ n'a ɩ̃ tɩ nyɛ̃ dɛbr ayʋɔb bɛ yi a saa-zu dɩ̃dɔr na be a Ŋmɩn-yir-kpɛ̃ɛ saa-pɛrɩ́-gʋba-lowr a waar. Ŋa za tɩ tɛr'ɩ a ʋ kʋ-pàw-pɛr zɛbr bom. A bɛ sɔwlɩsɔw a, dɛb kãw tɩ su n lɛ̃ pɛn kparɩ, ɛ́ sɛ sɛbrʋ bom a sɩɛmɩ́. Bɛ za tɩ taw na ta tɛw àr a kur-zɩɛ bàwr-maal-kuur niŋé.

³ Lɛ n'a a Ɩsɩrayɛl Naaŋmɩn na be a seribɛ̃ zu-sɔw a yúor-vɩɛlʋ-danʋ tɩ ìr tu a Ŋmɩn-yir-kpɛ̃ɛ dɩ̃dɔr lowr. A Sore tɩ bʋɔl'ɩ a dɛb ʋl na tɩ su a lɛ̃ pɛnɛ kparɩ ɛ́ sɛ a sɛbrʋ bom a sɩɛmɩ́ a.

⁴ Ʋ tɩ yel ʋ na: «Cen a Zerizalɛm sɛ́ɛ zu. Fʋ na tɩ nyɛ̃ nɩ a bɛl a na wone bɛ kone, a ɩb na bɛ maal'ɩ wob a nɩbɛ na ɩrɛ a tẽ-kpɛ̃ɛ ŋa pʋɔ a ƴãw. Fʋ na tɩ ƴãw bɛ nɩ bãwfʋ a gbẽé.»

⁵ Al pùorí, ɩ̃ tɩ wõ n a Sore yel a bɛl na cɛ a: «Nyɩ tuur a nɩr ŋa a tẽ-kpɛ̃ɛ pʋɔ ɛ́ kʋrɛ a nɩbɛ. Nyɩ taa tɛrɛ mimi-baalʋ a bɛ ƴãw ɛ, nyɩ taa zɔrɛ nɩbaalʋ ɛ.

⁶ Nyɩ kʋ a dɛb-nyamɛ, a pɔlbili nɩ a pɔwsɩrali, a bibiir nɩ a pɔwbɛ! Nyɩ ɩ bɛ za bɔr! Ɛcɛ a bɛl za na tɛr bãwfʋ a gbẽé a, nyɩ taa tʋɔr bɛ ɩ! Nyɩ tĩ a ka, a ɩ̃ zi-sõw ƴãw.» Lɛ n'a bɛ tɩ tĩ kʋrɛ a nɩ-kore na be a Ŋmɩn-yir-kpɛ̃ɛ niŋé a.

⁷ A Sore tɩ tɩr'ɩ nʋɔr ŋa: «Nyɩ ɩ a Ŋmɩn-yir-kpɛ̃ɛ tɛr dɛwr, nyɩ ɩ a ʋ davʋrɩ paalɩ kũuni, ɛ́ nyɩ yi!» Bɛ tɩ cen na tɩ kʋ a tẽ-kpɛ̃ɛ nɩbɛ.

⁸ Bɛ na tɩ cãà kʋrɛ a, ɩ̃ tɩ cɛ nɩ ɩ̃ yõ. Ɩ̃ tɩ gbĩ n dume gũu tɩ tɔ tẽw, ɛ́ cɩɩrɩ: «'Woi, Sore Naaŋmɩn i, fʋ na ɩ n a fʋ su-tʋlʋ ɩb a Zerizalɛm ƴãw à ŋá a? Fʋ na kʋ n a Ɩsɩrayɛl nɩbɛ za na cɛ a bɩɩ?»

⁹ Ʋ tɩ sɔw mɛ̃ na: «A Ɩsɩrayɛl nɩ a Zuda naalʋ-ten yel-bebe bɛ dɩ vuo ɩ: a tẽw ɩ n zɩ̃ɩ tɛwr, a ɩ-ɩrɩ na bɛ tu a mɩnʋ a paal'ɩ a tẽ-kpɛ̃ɛ. Sɩza n'a, a nɩbɛ yere na: “A Sore jɛ n a tẽw bɛr, ʋ kʋ̃ tʋ̃ɔ́ nyɛ̃ bom za ɩ.”

¹⁰ A na ɩ à ŋá a, mãa a, ɩ̃ kʋ̃ tɛr mimi-baalʋ a bɛ ƴãw ɛ, ɩ̃ kʋ̃ zɔ nɩbaalʋ ɛ. Ɩ̃ na ɩ n a faa bɛ na maalɩ a, a lɛb lo a bɛ zu.»

¹¹ A lɛn daar a, a nɩr ʋl na tɩ su a lɛ̃ pɛn kparɩ ɛ́ sɛ a sɛbrʋ bom a, tɩ wa na wa manɩ a lɛ a ʋ tome na ɩ a kʋ̀ a Naaŋmɩn à ŋá: «Ɩ̃ tõ n a lɛ fʋ na ƴãw a nʋɔr kʋ̀ m a.»