Ezekɩɛl 8 - A SƐB-SÕW

A tɩbɛ maalʋ a Ŋmɩn-yir-kpɛ̃ɛ pʋɔ

¹ A nɩbɛ bɛ na tɩ diw cen nɩ baar'a yome ayʋɔb sob a, a cuwr ayʋɔb sob bibie anũu sob daar a, ɩ̃ tɩ zɩ̃ n a ɩ̃ yir, ɛ́ a Zuda tẽw nɩ-kore tɩ zɩ̃ a ɩ̃ niŋé. Be n'a a Sore Naaŋmɩn fãw tɩ siw a ɩ̃ zu.

² Ɩ̃ tɩ nyɛ̃ nɩ bom kãw na tɩ ŋmɛ̃ mɛ̃ nɩsaal a. Bom kãw na tɩ ɩ mɛ̃ a ʋ sɩɛ n'ʋ a pile a, a ʋ ƴã-gan tɩ ɩ na mɛ̃ vũu a. A zu-sɔw a, cãà kãw tɩ n'ʋ, nyɩwrɛ mɛ̃ salm-zɩɛ bɛ na zuw a.

³ Ʋ tɩ tur'ɩ bom kãw na ɩ mɛ̃ nũu a, ɛ́ nyɔw mɛ̃ a zukɔbɛ ƴãw. Lɛ n'a a yel-nyɛra ŋa na yi a Naaŋmɩn zie a pʋɔ, a Vʋʋrʋ tɩ zɛw mɛ̃ do n a salom nɩ a tẽsɔw cará, ɛ́ cen nɩ mɛ̃ a Zerizalɛm. Ɩ̃ tɩ be n a tẽ-kpɛ̃ɛ saa-pɛrɩ́-gʋba-lowr dɩ̃dɔr sɔwlɩsɔw, a be bɛ na bin tɩɩb kãw na ɩ zʋm bom a Naaŋmɩn zie a.

⁴ Ɛcɛ a be a, a Ɩsɩrayɛl Naaŋmɩn yúor-vɩɛlʋ-danʋ tɩ wul'ɩ ʋ tʋɔra ɩ̃ nyɛ̃, mɛ̃ a lɛ ʋ na tɩ dãw wul ʋ tʋɔra ɩ̃ nyɛ̃ a bà-fʋɔla pʋɔ a.

⁵ A Naaŋmɩn tɩ yel mɛ̃ na: «A fʋ̃ʋ nɩsaal bie, jɩ́r a saa-pɛrɩ́-gʋba-lowr sɔ́r.» Ɩ̃ tɩ jɩ́r'ɩ a be lowr. A bàwr-maal-kuur dɩ̃dɔr saa-pɛrɩ́-gʋba-lowr a, a tɩɩb na ɩ zʋm bom a Naaŋmɩn zie a tɩ be n a kpɛb zie.

⁶ Ʋ tɩ yel'a ƴãw pʋɔ: «A fʋ̃ʋ nɩsaal bie, fʋ nyɛ̃ nɩ a lɛ bɛ na ɩrɛ a a? A ka a, a Ɩsɩrayɛl nɩbɛ ɩrɛ nɩ ɩb na bɛ maal'ɩ wob a, kɛ́ bɛ tʋ̃ɔ́ ɩ k'ɩ̃ taw zãá nɩ a ɩ̃ zi-sõw. Fʋ na cãà na nyɛ̃ yele a mɩnɛ mɩ̀ na bɛ maal'ɩ wob a.»

⁷ Lɛ n'a ʋ tɩ tɛr mɛ̃ cen nɩ a Ŋmɩn-yir-kpɛ̃ɛ davʋra dɩ̃dɔrɩ́. Ɩ̃ tɩ nyɛ̃ nɩ vʋɔr ʋ be a dacin pʋɔ.

⁸ Ʋ tɩ yel mɛ̃ na: «A fʋ̃ʋ nɩsaal bie, puo a dacin.» Ɩ̃ puo a dacin, ɩ tɔlʋ zie ʋ be be.

⁹ Ʋ tɩ yel mɛ̃ na: «Kpɛ ɛ́ jɩ́r nyɛ̃ a ɩb na bɛ maal'ɩ wob ɛ́ ɩrɛ kɔkɔrʋ a nɩbɛ bɛ ŋa na ɩrɛ a ka a.»

¹⁰ Ɩ̃ tɩ kpɛ na nyɛ̃ à ŋá: Wɩɩr nɩ dʋn na ɩrɛ kɔkɔrʋ a tɩ wi na pàw a dacine na viiri koli mɛ̃ a. A Ɩsɩrayɛl ŋmɩn-bɛlɛbɛlɛ za tɩ wi na ƴãw a dacine zu.

¹¹ A Ɩsɩrayɛl nɩbɛ nɩ-kore lɩz'a ata nɩ pie tɩ àr'ɩ saaƴẽwn a ŋmɩn-bɛlɛbɛlɛ niŋé. A bɛ pʋɔ a, Safan bidɛb, Yaazaniyahu, tɩ be n be. Ŋa za tɩ tɛr'ɩ tɩ-suur-zɔ̃-na-nyùur-vla-vla-a nyɩwfʋ-kole a nũú, ɛ́ a tɩ-suur-zɔ̃-na-nyùur-vla-vla-a zʋ̀ʋ́r tɩ dúor a salom zu.

¹² A Naaŋmɩn tɩ sowri mɛ̃ na: «A fʋ̃ʋ nɩsaal bie, fʋ nyɛ̃ nɩ a lɛ a Ɩsɩrayɛl nɩbɛ nɩ-kore na sɔwlɛ ɩrɛ, ŋa za a ʋ beba zie a ʋ ŋmɩn-bɛlɛbɛlɛ niŋé a? Bɛ yere na: “A Sore kʋ̃ tʋ̃ɔ́ nyɛ̃ tɩ ɛ, ʋ zawr'ɩ a tẽw bɛr.”»

¹³ A Naaŋmɩn tɩ yel'a ƴãw pʋɔ: «Fʋ na nyɛ̃ na kɛ́ bɛ cãà na ɩrɛ ɩb a mɩnɛ mɩ̀ na bɛ maal'ɩ wob a.»

¹⁴ Ʋ tɩ tɛr mɛ̃ na cen nɩ a Ŋmɩn-yir-kpɛ̃ɛ saa-pɛrɩ́-gʋba-lowr dɩ̃dɔr lowr. Pɔwbɛ tɩ zɩ̃ n a be ɛ́ kone a Tamuuzʋ kũu.

¹⁵ Ʋ tɩ sowri mɛ̃ na: «A fʋ̃ʋ nɩsaal bie, fʋ nyɛ̃ nɩ vla a? Fʋ na nyɛ̃ nɩ yele na bɛ maal'ɩ wob a, a zuo à á ŋá.»

¹⁶ Ʋ tɩ tɛr mɛ̃ na cen nɩ a Ŋmɩn-yir-kpɛ̃ɛ sɔwlɩsɔw davʋra lowr. A zi-sõw kpɛb zie a, a davʋra nɩ a bàwr-maal-kuur cará a, dɛbr tɩ be n be ta mɛ̃ dɛbr lɩzɛr'ɩ anũu a. Bɛ tɩ ŋmɛlɩ nɩ kpaar cɔw a zi-sõw, lɩɛbɩ a niŋe cɔw a saa-pɛrɩ́, ɛ́ tɩ gbĩ dume gũu tɩ tɔ tẽw a mʋ̃tɔ̃w niŋé.

¹⁷ A Naaŋmɩn tɩ sowri mɛ̃ na: «A fʋ̃ʋ nɩsaal bie, fʋ nyɛ̃ a na a? A Zuda nɩbɛ bɛ ŋa bɛ ɩrɛ a ɩb na bɛ maal'ɩ wob a tɛwr a ka ɩ. Bɛ paal'ɩ a tẽw nɩ po-to-fãw-ɩb mɩ̀, ɛ́ bɔbr tuotuo kɛ́ bɛ ɩ a ɩ̃ suur ìr. Bɛ wule nɩ a bɛ fãw nɩ suur.

¹⁸ A mãa mɩ̀ a, ɩ̃ mɩ̀ na ɩrɛ na nɩ su-tʋlʋ kpãkpã. Ɩ̃ kʋ̃ tɛr'ɩ bɛ mimi-baalʋ ɛ, ɩ̃ kʋ̃ zɔ nɩbaalʋ ɛ. Bɛlɛ saa cɩɩrɛ bʋɔlɛ mɛ̃ a, ɩ̃ kʋ̃ bɛr wõ bɛ ɩ.»