Ezekɩɛl 7 - A SƐB-SÕW

A Sore hiere na yere a kpɩɛrʋ pɛ-baara

¹ A Sore tɩ yel mɛ̃ na:

² «Ɛ́ a fʋ̃ʋ, nɩsaal bie, bɛrɛ wone a lɛ a Sore Naaŋmɩn na yere kʋ̀rɛ a Ɩsɩrayɛl tẽw dem a: A baar'a, a kpɩɛrʋ pɛ-baara ta n a tẽw lõbowe a za anaar.

³ Ƴɛrɛŋa a, a nyɩ yele nʋɔr kʋ na: a ɩ̃ suur na ìr'ɩ a nyɩ zu. Ɩ̃ na dɩ n nyɩ nɩ ƴɛ̀rʋ tu n a nyɩ ɩb, ɛ́ ƴãw nyɩ ya a nyɩ ɩb na bɛ maal'ɩ wob a san.

⁴ Ɩ̃ kʋ̃ tɛr mimi-baalʋ ɛ́ kʋ̃ bɛr nyɩ nyɩ cɩ̃ɛ ɩ. Ɩ̃ na ɩ na nyɩ ya a nyɩ ɩb san. A nyɩ ɩb na bɛ maal'ɩ wob a na sãá nɩ nyɩraalɛ. Lɛ n'a nyɩ na sàw k'ɩ̃ɩ ɩ n a Sore.

⁵ À ŋá n'a a Sore Naaŋmɩn yere: A kpɩɛrʋ waar'a, kpɩɛrʋ na bɛ tɛr tɔ a!

⁶ A baar'a: a kpɩɛrʋ pɛ-baara waar'a, ʋ na lo n a nyɩ zu, ʋ ta na!

⁷ Nyɩɩm na kpɩɛr a tẽw a, a nyɩ daar ta na. A bibir vɩɛ na, a ƴɛ̀rʋ-dɩb bibir pɩɛl'a. A dɛ̃bɩ̃ɛ na lɩɛr'ɩ a nʋ̃ɔ̀ cɛlsɩ a tan zu.

⁸ A na man ka a, ɩ̃ na bɛr'ɩ ƴɛrɛŋa a ɩ̃ su-tʋlʋ kpãkpã ʋ ìr a nyɩ zu, ɩ̃ na bɛr ʋ na ʋ tõ a ʋ pʋ-tɩɛr-tome tɩ ɓɩɩlɩ. Ɩ̃ na dɩ n nyɩ nɩ ƴɛ̀rʋ tu n a nyɩ ɩb, ɛ́ ƴãw nyɩ ya a nyɩ ɩb na bɛ maal'ɩ wob a san.

⁹ Ɩ̃ kʋ̃ tɛr mimi-baalʋ ɛ́ kʋ̃ bɛr nyɩ nyɩ cɩ̃ɛ ɩ. Ɩ̃ na ɩ na nyɩ ya a nyɩ ɩb san. A nyɩ ɩb na bɛ maal'ɩ wob a na sãá nɩ nyɩraa lɛ. Lɛ n'a nyɩ na sàw k'ɩ̃ɩ ɩ n a Sore na dɔwrɛ nyɩ a.

¹⁰ A ƴɛ̀rʋ-dɩb bibir vɩɛ na, a nyɩ daar ta na. A gãda-faa-ɩb bʋʋl'a pàw a ziir za. A pɔ̀l-ɩb yɛ̀r'a.

¹¹ A po-to-fãw-ɩb ɩ na mɛ̃ dabɔl na zɛw k'ʋʋ ŋmɛ a. Bom kʋ̃ cãà cɛ nyɩ ɛ, bom kʋ̃ cãà cɛ a nyɩ naalʋ pʋɔ ɩ, bom kʋ̃ cãà cɛ a nyɩ yãwmʋ pʋɔ ɩ, bom kʋ̃ cãà cɛ a nyɩ yúor na yi a pʋɔ ɩ.

¹² A daar ta na, a ƴɛ̀rʋ-dɩb pɩɛl'a. Sob nɛ na dàar a, ʋ ta cɩlɛ ɩ, sob nɛ na kʋɔrɛ a, ʋ ta tɛr pʋ-sãwna ɩ. Bʋ̃ʋ n'ʋ vɛ̃, ɩ̃ nyɛ̃ nɩ suur nɩ a nɩ-bʋʋrɛ za kpɛ̃lɛ̃kpɛ̃lɛ̃.

¹³ A kʋ̀ɔr-kʋ̀ɔrɛ kʋ̃ tʋ̃ɔ́ lɛb de a ʋ bʋ̃-kʋ̀ɔrɩ ʋlɛ saa cãà vʋʋrɛ a ɩ. Bʋ̃ʋ n'ʋ vɛ̃, a yel-nyɛra na hiere a nɩ-bʋʋrɛ za sãw-bɛrʋ a na tu na. Ŋa za vʋʋrɛ nɩ a yel-bier pʋɔ, alɛ n'a so nɩr za kʋ̃ tʋ̃ɔ́ lɛb páw ʋ tʋɔra ɩ.

¹⁴ Bɛlɛ saa pɛblɩ wɩ́ɛ ɛ́ cɔbrɩ bom za a, nɩr za kʋ̃ cen a zɛbr zie ɩ. Bʋ̃ʋ n'ʋ vɛ̃, ɩ̃ nyɛ̃ nɩ nɩ a nɩ-bʋʋrɛ za kpɛ̃lɛ̃kpɛ̃lɛ̃ suur.»

Nɩr za bɛ cɩ̃ɛnɛ ɩ

¹⁵ «A yẽw a, a na ɩ n a zɛbr. A dĩo a, a na ɩ n a jɛ̀lmɛ̃ bàalʋ nɩ a kɔ̃. A tẽli pʋɔ a, bɛ na kʋ n a nɩbɛ a zɛbr zie. A tẽ-kpɛ̃ɛ pʋɔ a, bɛ na kpi n kɔ̃ nɩ a jɛ̀lmɛ̃ bàalʋ kũu.

¹⁶ A bɛl na na cãà vʋʋrɛ a na zɔ na kpɛ a tan pʋɔ. Bɛ na kone nɩ a bɛ yel-bebe ƴãw mɛ̃ naŋmamɛ na kone nɩbaal-kon a.

¹⁷ A bɛ kpãkpamɛ kʋ̃ lɛb tʋ̃ɔ́ bom za tuo ɩ, a bɛ dume kʋ̃ tɛr fãw ɛ.

¹⁸ Bɛ na su n vʋɔrɩ kparɩ, ɛ́ màwr dɛ̃bɩ̃-mawfʋ. A bɛ niŋe na ɩ n vĩ tɛwr, bɛ na fɔr'ɩ a zuru za.

¹⁹ Bɛ na lɔb'ɩ a bɛ salm-pla bɛr a sɛ́ɛ pʋɔ, a bɛ salm-zɩɛ na ɩ n sagɛ a bɛ zie. A ʋlɩ bibir nɛ a Sore nãà wa nyɛ̃ a suur a, a bɛ salm-pla nɩ a bɛ salm-zɩɛ kʋ̃ tʋ̃ɔ́ faa bɛ ɩ. Bɛ kʋ̃ cãà dɩrɛ ɩ, a bɛ pée na gã nɩ zawlɛ. Bʋ̃ʋ n'ʋ vɛ̃, a bɛ salm-pla nɩ a bɛ salm-zɩɛ tɩ ɩ n bɛrɩ a bɛ ƴãw.

²⁰ Bɛ ƴãw nɩ a bɛ pɔ̀lʋ a bɛ na-bome vɩɛlʋ ƴãw. Bɛ de a na maal'ɩ ŋmɩn-faar na bɛ tɛr ŋmɛ̃a ɛ́ ɩrɛ kɔkɔrʋ a. Alɛ n'a so a Sore yel k'aa ŋmɩmɛ á ŋá na lɩɛb'ɩ sagɛ a bɛ zie.

²¹ Ɩ̃ na bɛr'ɩ sãanbɛ bɛ za a bɛ tɛra. Ɩ̃ na sàw na nɩbɛ na bɛ tɛr bir a de a cen nɩ mɛ̃ zɛbr bom a. Bɛ na dɛw a na bɛr.

²² Ɩ̃ kʋ̃ ɩ ɩb za bɛlɛ wa dɛw a ɩ̃ na-bom bɛr a ɩ. Nyãnyu-nɩ-kʋrbɛ na wa na wa ɩ ʋ tɛr dɛwr.

²³ Maalɩ bãzɔlɛ, bʋ̃ʋ n'ʋ vɛ̃, nɩ-kʋrbɛ paal'ɩ a tẽw, ɛ́ a tẽ-kpɛ̃ɛ ɩ po-to-fãw-ɩb tɛwr.

²⁴ Ɩ̃ na ƴãw nɩ nɩ-bʋʋr-po-to-faar na bɛ tɛr tɔ a wa, wa fa a bɛ yie. Ɩ̃ na sãw nɩ a kpɛnʋ dem bɛr, ɛ́ a bɛ maalʋ-ziir na tɛr'ɩ dɛwr.

²⁵ A dɛ̃bɩ̃ɛ waar'a! Bɛ na bɔbr'ɩ a ƴã-ɓaarʋ ɛ́ kʋ̃ nyɛ̃ ʋ ɛ.

²⁶ A kpɩɛrʋ na wa na suwli suwli taa, ɛ́ a yel-faar gbone taa. A nɩbɛ na zɛlɛ nɩ a naaŋmɩn-ƴɛ̀r-manɛ k'ʋʋ páw yel-nyɛra, a bàwr-maalɛ kʋ̃ cãà zanɛ nɩ a nɩbɛ bom za ɩ, ɛ́ a nɩ-kore kʋ̃ cãà wule a nɩbɛ yã ɩ.

²⁷ A nãà na be n ko-tuolu pʋɔ, a nãà bie tɩɛrʋ za na wɛ na, ɛ́ a tẽw nɩbɛ na màwr'ɩ dɛ̃bɩ̃-mawfʋ. Ɩ̃ na ɩ bɛ na tu n a bɛ ɩb, ɩ̃ na dɩ n bɛ nɩ ƴɛ̀rʋ mɛ̃ a lɛ a na sɛw taa nɩ bɛ a. Lɛ n'a bɛ na sàw kɛ́ mãa n'ɩ a Sore.»