Ezekɩɛl 5 - A SƐB-SÕW

A Sore na dɔwr'ɩ a ʋ nɩ-bʋʋrɛ

¹ Ɛ́ a fʋ̃ʋ, nɩsaal bie e, ɓáw zɛbr-sɔ-kpɛ̃ɛ na dɩrɛ a, ʋ ɩ bʋra. Fɔr a fʋ zu nɩ a fʋ tɩɛm ɛ́ manɩ a al fʋ na ŋma a nɩ tɩbrʋ bʋ̃-mána, ɛ́ põ a ziir ata.

² Bɛlɛ wa zɛb de a Zerizalɛm baar'a, fʋ na nyɩw nɩ vũu pʋɔ a fʋ kɔblʋ na põ ziir ata a, a zi-been sob a tẽ-kpɛ̃ɛ sɔwlɩsɔw. Fʋ na de nɩ a fʋ zɛbr-sɔ-kpɛ̃ɛ ŋmɩɛr'ɩ a ziir ayi sob viire kole nɩ a tẽ-kpɛ̃ɛ. Fʋ na yɛ́lɩ nɩ a ziir ata sob bɛr sɛsɛb pʋɔ, ɛ́ mãa a, ɩ̃ na vʋ̃ɔ nɩ a ɩ̃ zɛbr-sɔ-kpɛ̃ɛ a ʋ ƴãw.

³ Ɛcɛ, fʋ na tɛr'ɩ a kɔblʋ zaa pʋrɩ ƴãw a fʋ kparʋ pʋɔ.

⁴ Fʋ na ír'ɩ a ŋmãa lɔb ƴãw vũumí, nyiw a. Ɛ́ a vũu na dɩ n a Ɩsɩrayɛl nɩbɛ za.

⁵ À ŋá n'a a mãa Sore Naaŋmɩn yel: Nyɛ̃ lɛ a na na ŋmɛ̃ a Zerizalɛm a. Ɩ̃ tɩ ƴãw ʋ nɩ a nɩ-bʋʋr-yoru sɔgɔ, tẽ-sãanbɛ tɩ viir'a koli ʋ.

⁶ A ʋ kpɩɛrbɛ zawr'ɩ a tub nɩ a wulu ɩ̃ na tɩ kʋ̀ bɛ a. Bɛ maal'ɩ faa zuo a nɩ-bʋʋr-yoru a ten al na viiri koli bɛ a pʋɔ. Bʋ̃ʋ n'ʋ vɛ̃, bɛ zawr'ɩ a ɩ̃ tub nɩ a ɩ̃ wulu bɛr, bɛ bɛ tu a ɩ.

⁷ A na ɩ lɛ a, a mãa, a Sore Naaŋmɩn, ɩ̃ yere na kʋ̀rɛ bɛ: Nyɩ maal'ɩ faa tɩ maal zuo a nɩ-bʋʋr-yoru na viiri koli nyɩ a. Nyɩ bɛ sàw a ɩ̃ nɛ́ɛ ɩ, nyɩ bɛ tu a ɩ̃ tub ɛ, ɛ́ mɩ̀ bɛ tu a nɩ-bʋʋr-yoru na viiri koli nyɩ a dem ɛ.

⁸ Alɛ n'a so a mãa, a Sore Naaŋmɩn, ɩ̃ yere à ŋá: Ɩ̃ na ìr'ɩ a nyɩ ƴãw Zerizalɛm tẽw dem i. Ɩ̃ na tu n a lɛ ɩ̃ na dɩ a ƴɛ̀rʋ bin a tẽ-kpɛ̃ɛ sɔwlɩsɔw, a nɩ-bʋʋr-yoru niŋé a.

⁹ Ɩ̃ na ìr'ɩ a fʋ ƴãw mɛ̃ ɩ̃ na bɛ dãw ɩ ɛ́ kʋ̃ʋ wa ɩ towtow a, a fʋ ɩb na bɛ maal'ɩ wob a ƴãw.

¹⁰ A tẽ-kpɛ̃ɛ pʋɔ a, a dɔwrbɛ na 'wɔbr'ɩ a bɛ bibiir, ɛ́ a bibiir 'wɔbr a bɛ dɔwrbɛ. Ɩ̃ na dɔwrɩ nyɩ na ɛ́ diw a bɛl na na cãà vʋʋrɛ a yaarɩ a ziir za.

¹¹ «A mãa, a Sore Naaŋmɩn, ɩ̃ pɔ n nɩ a ɩ̃ nyɔ-vʋʋrʋ, yel à ŋá: Nyɩ dɛw nɩ a ɩ̃ yir-sõw bɛr nɩ a nyɩ ɩb na bɛ maal'ɩ wob a, nɩ a nyɩ ŋmɩn-bɛlɛbɛlɛ. A na ɩ lɛ a, ɩ̃ na ɩ n a bʋra tɔl a nyɩ zu. Ɩ̃ bɛ tɛrɛ mimi-baalʋ ɛ, nyɩ bɛ cɩ̃ɛnɛ ɩ.

¹² A nyɩ na põ ziir ata a, a zi-dãw-niwn sob na kpi n jɛ̀lmɛ̃ bàalʋ kũu bɩɩ kɔ̃ kũu a tẽw pʋ̃ɔmɩ, a ziir ayi sob na kpi n zɛbr-sɔ-kpɛ̃ɛ kũu a tẽw kõkowe ƴãw. Ɩ̃ na diw nɩ a ziir ata sob yaarɩ a ziir za ɛ́ vʋ̃ɔ a ɩ̃ zɛbr-sɔ-kpɛ̃ɛ a bɛ ƴãw.

¹³ Ɩ̃ na bɛr'ɩ a ɩ̃ su-tʋlʋ ʋ ìr, ɩ̃ na bɛr ʋ na ʋ ìr tɩ ɓɩɩlɩ, ɩ̃ɩ na yáa nɩ a san a nyɩ zu. Lɛ n'a nyɩ na sàw de k'aa mãa Sore n'ʋ tɩ ƴɛ̀r a nyɩ zie, ɩ̃ na bɛ cãà tʋ́ɔr a nyɩ na-bɛ-tu-m'a ƴãw.

¹⁴ A ten al na jil koli nyɩ a kpɩɛrbɛ nɩ a bɛlɩ dem za na na tɔlɛ a ka a na nyɛ̃ na ɩ̃ na ɩ a Zerizalɛm k'ʋ ɩ tẽw na lo ɛ́ sãw a.

¹⁵ Ɩ̃ na tu n a lɛ ɩ̃ na dɩ a ƴɛ̀rʋ bin a fʋ ƴãw nɩ su-tʋlʋ a, ɩ̃ɩ na yel fʋ nɩ yaga. Lɛ n'a a nɩ-bʋʋrɛ na be a kõkowe ƴãw a na de a tẽ-kpɛ̃ɛ ŋa ʋ ɩ bʋ̃-ɩ-laara nɩ zʋmɛ bom. Ɛcɛ a tẽ-kpɛ̃ɛ ŋa mɩ̀ na ɩ n kpaalʋ nɩ dɛ̃bɩ̃-kpɛ̃ɛ bom a bɛ zie. A mãa Sore n'ʋ ƴɛ̀rɛ a nyɩ zie.

¹⁶ Ɩ̃ na ƴãw na kɔ̃ kʋ nyɩ. Ʋ na ƴãw nyɩ nɩ bàalʋ mɛ̃ a lɛ tɔrza pime na mɩ́ tawr cɩɛrɛ a. Ɩ̃ na sãw nɩ a dipɛ̃ al nyɩ na maal bin a bɛr, ɛ́ bɛr nyɩ nyɩ kpi kɔ̃.

¹⁷ A kɔ̃ ɩ̃ na na ƴãw nyɩ, nɩ a dʋ̃-faar ɩ̃ na na ɩ a wa a nyɩ ƴãw a, na kʋ n a nyɩ bibiir. A jɛ̀lmɛ̃ bàalʋ, a po-to-fãw-ɩb nɩ a zɛbr na kʋ nyɩ na pàw pɛr. A mãa Sore n'ʋ ƴɛ̀rɛ a nyɩ zie.»