Ezekɩɛl 48 - A SƐB-SÕW

A saa-pɛrɩ́-gʋba-lowr dɔwlʋ ziir

¹ «A dɔwlʋ yée nɩ a ziir'ɩ á ŋá: A Dan zie na wɩɛr'a tɩ be a saa-pɛrɩ́-gʋba-lowr za, lanɩ a sɔ́r na tu tɔl Hetɩlon, Lebo-Hamatɩ nɩ Hasaar-Einan ten na pɩɛlɩ Damasɩ nɩ Hamatɩ naalʋ-ten a. Ʋ na yi n a saa-pɛrɩ́ tʋr-bɔw ƴãw ɛ́ tɩ tɔ a Mediterane kʋ̃ɔ-kpɛ̃ɛ a mʋ̃tɔ̃w-kpɛb-lowr.

² Asɛɛr dem na lanɩ nɩ a Dan dem, a saa-pɛrɩ́ tɩ tɔ a mʋ̃tɔ̃w-kpɛb-lowr.

³ Nɛfɩtali dem na lanɩ nɩ a Asɛɛr dem,

⁴ Manase dem na lanɩ nɩ a Nɛfɩtali dem,

⁵ Efarayim dem na lanɩ nɩ a Manase dem,

⁶ Urubɛn dem na lanɩ nɩ a Efarayim dem,

⁷ ɛ́ Zuda dem lanɩ a Urubɛn dem, a saa-pɛrɩ́ tɩ tɔ a mʋ̃tɔ̃w-kpɛb-lowr.»

A Sore zie

⁸ «Bɛ na bɛr'ɩ zie na lanɩ a Zuda dem, a saa-pɛrɩ́ tʋr-bɔw tɩ tɔ a Mediterane kʋ̃ɔ-kpɛ̃ɛ a mʋ̃tɔ̃w-kpɛb-lowr a. A ʋ wogo na ta n a dɔwlʋ kãw za zie wogo, ɛ́ a yɛ̀lʋ ɩ mɛtɩr tùr-pie nɩ ayi dɔwlɩ kɔbr anũu (12 500). A zi-sõw na be n a sɔwlɩsɔw.

⁹ A vuo ʋl a Sore yõ na so a na tɛr'ɩ wogo mɛtɩr tùr-pie nɩ ayi dɔwlɩ kɔbr anũu (12 500) nɩ yɛ̀lʋ mɛtɩr tùr-pie (10 000).

¹⁰ A tẽsɔw ŋa vuo ʋl bɛ na kʋ̀ a bàwr-maalbɛ a na ɩ n mɛtɩr tùr-pie nɩ ayi dɔwlɩ kɔbr anũu (12 500) a saa-pɛrɩ́ tɩ tɔ a mʋ̃tɔ̃w-kpɛb-lowr, ɛ́ ɩ mɛtɩr túr-anũu (5 000) a saa-pɛrɩ́-gʋba-lowr tɩ tɔ a saa-pɛrɩ́-dʋrʋ-lowr. A Sore zi-sõw na be n a sɔwlɩsɔw.

¹¹ A vuo ŋa na ɩ n a bàwr-maalbɛ bɛ na ka nũu ƴãw a, a Sadɔkɩ bʋ̃-dɔwrɩ, sób. Bɛ tõ n a Sore tome bɛ lɛb pùor ɛ, ɛ́ bɛ ɩ mɛ̃ a levitɩ mɩnɛ a ɩ, bɛ bɛ jɛ a Naaŋmɩn bɛr a lɛn daar a Ɩsɩrayɛl nɩbɛ na tɩ ŋmɛlɩ kpaar cɔw ʋ a ɩ.

¹² Alɛ n'a so bɛ na páw zie na sʋ̃ɔmɩ ɩ sõw a, a tẽw bɛ na ŋmãa kʋ̀ a Sore a pʋɔ. Ʋ na pɩɛl'ɩ a levitɩ mɩnɛ dem.

¹³ A levitɩ mɩnɛ zie na ŋmɛ̃ na taa nɩ a bàwr-maalbɛ dem. A za ayi na tɛr'ɩ wogo mɛtɩr tùr-pie nɩ ayi dɔwlɩ kɔbr anũu (12 500) nɩ yɛ̀lʋ mɛtɩr túr anũu (5 000).

¹⁴ Nɩr kʋ̃ tʋ̃ɔ́ tɛw, bɩɩ kʋɔrɩ, bɩɩ bɛr tẽsɔw kʋ̀ nɩr a tẽw vuo ŋa pʋɔ na ɩ kpɛ̃ɛ zuo a za a ɩ. Bʋ̃ʋ n'ʋ vɛ̃, bɛ de ʋ na kʋ̀ a Sore.»

A nãà nɩ a tẽ-kpɛ̃ɛ ziir

¹⁵ «A tẽw ŋa a Sore yõ na so a zu a, tẽsɔw a yɛ̀lʋ na ɩ mɛtɩr túr-ayi dɔwlɩ kɔbr anũu (2 500) ɛ́ a wogo ɩ mɛtɩr tùr-pie nɩ ayi dɔwlɩ kɔbr anũu (12 500) a na cɛ na. Ʋ na ɩ n tẽsɔw-sãsaralɛ, a tẽ-kpɛ̃ɛ, a ʋ yie nɩ a ʋ tẽ-kpɔwlɩ na so a. A tẽ-kpɛ̃ɛ na be n a ʋ sɔwlɩsɔw.

¹⁶ A ʋ lõbowe zɛ̃a na ɩ n been, túr-ayi dɔwlɩ kɔbr ayi lɩz'a ayi nɩ pie (2 250) a saa-pɛrɩ́-gʋba-lowr, a saa-pɛrɩ́-dʋrʋ-lowr, a saa-pɛrɩ́ nɩ a mʋ̃tɔ̃w-kpɛb-lowr.

¹⁷ A tẽ-kpɛ̃ɛ lõbowe anaar ƴãw a, vuo na gã nɩ zawla a yɛ̀lʋ ɩ mɛtɩr lɩz'a ayʋɔb nɩ anũu (125).

¹⁸ Bɛ na bɛr'ɩ zie na lanɩ a zie ʋl a Sore yõ na so a, tẽsɔw na cãà na cɛ a wogo ɩ mɛtɩr túr-anũu (5 000) a tẽ-kpɛ̃ɛ saa-pɛrɩ́, ɛ́ mɩ̀ ta a lɛ a mʋ̃tɔ̃w-kpɛb-lowr. Be n'a bɛ na mɩ́ páw a bɛlɩ dem na tone a tẽ-kpɛ̃ɛ pʋɔ a bʋ̃-dɩrɩ.

¹⁹ A tẽ-kpɛ̃ɛ pʋɔ tõ-tõ-biir na na mɩ́ kɔ ʋ a, na yi n a Ɩsɩrayɛl dɔwlʋ za pʋɔ.

²⁰ A tẽsɔw ʋl za a Sore yõ na so a na tɛr'ɩ zɛ̃a been, mɛtɩr tùr-pie nɩ ayi dɔwlɩ kɔbr anũu (12 500) a lõbowe a za anaar, ɛ́ bɛ na põ ʋ nɩ ziir anaar, a zi-been sob ɩ a tẽ-kpɛ̃ɛ tẽsɔw.

²¹ A ʋl na cɛ a na ɩ n a nãà sób. A ʋ zie na be n a tẽw a Sore yõ na so a nɩ a tẽ-kpɛ̃ɛ lowr ŋa nɩ lowr ŋa. Ʋ na tɛr'ɩ mɛtɩr tùr-pie nɩ ayi dɔwlɩ kɔbr anũu (12 500). Ʋ na lanɩ nɩ a ziir al na cɛ a, a saa-pɛrɩ́ lowr tɩ tɔ a saa-pɛrɩ́ tʋr-bɔw nɩ a mʋ̃tɔ̃w-kpɛb-lowr, ɛ́ tɛr tɩ ta a Mediterane kʋ̃ɔ-kpɛ̃ɛ. Lɛ n'a a tẽsɔw ʋl a Sore yõ na so a nɩ a zi-sõw na be a tẽw vuo ʋl bɛ na ŋmãa bɛr a sɔwlɩsɔw.

²² A levitɩ mɩnɛ zie nɩ a tẽ-kpɛ̃ɛ zie na be n a nãà zie sɔwlɩsɔw. A nãà zie na be n a Zuda zie a saa-pɛrɩ́-gʋba-lowr nɩ a Bɛ̃zamɛ zie a saa-pɛrɩ́-dʋrʋ-lowr cara pʋɔ.»

A saa-pɛrɩ́-dʋrʋ-lowr dɔwlʋ ziir

²³ «A dɔwlʋ al na cɛ a ziir'ɩ á ŋá: a Bɛ̃zamɛ dem na yi n a saa-pɛrɩ́ tʋr-bɔw ƴãw ɛ́ tɩ tɔ a Mediterane kʋ̃ɔ-kpɛ̃ɛ a mʋ̃tɔ̃w-kpɛb-lowr.

²⁴ Sɩmɩ̃ɔ dem na lanɩ nɩ a Bɛ̃zamɛ dem, a saa-pɛrɩ́ tɩ tɔ a mʋ̃tɔ̃w-kpɛb-lowr,

²⁵ Ɩsakaar dem na lanɩ nɩ a Sɩmɩ̃ɔ dem,

²⁶ Zabulɔ̃ dem na lanɩ nɩ a Ɩsakaar dem,

²⁷ Gadɩ dem na yi a saa-pɛrɩ́ tɩ tɔ a mʋ̃tɔ̃w-kpɛb-lowr a na lanɩ nɩ a Zabulɔ̃ dem.

²⁸ A Gadɩ tʋr-bɔw a saa-pɛrɩ́-dʋrʋ-lowr'ʋ na ɩ a tẽw tʋr-bɔw. Ʋ na yi n Tamaar tẽw, a saa-pɛrɩ́, ɛ́ tɩ tɔ Meriba na be Kadɛsɩ tẽw a kʋ̃ɔ, ɛ́ lanɩ a Eziptɩ tẽw bàa ɛ́ tɩ tɔ a Mediterane kʋ̃ɔ-kpɛ̃ɛ.

²⁹ À à ŋá n'a nyɩ na ŋmɛ gbãw põ a tẽw a Ɩsɩrayɛl dɔwlʋ cará, ɛ́ ƴãw ŋa za tẽsɔw ʋ be be. A mãa Sore Naaŋmɩn n'ʋ yel.»

A Zerizalɛm dɩ̃dɛɛ pie nɩ ayi

^30-31 «A tẽ-kpɛ̃ɛ tu-kpɛb ziir kãw za na na mɩ́ tɛr a Ɩsɩrayɛl dɔwlʋ kãw yúor a n'ɩ á ŋá. A saa-pɛrɩ́-gʋba-lowr dacin, a wogo na ɩ mɛtɩr túr-ayi dɔwlɩ kɔbr ayi lɩz'a ayi nɩ pie (2 250) a na tɛr'ɩ dɩ̃dɛɛ ata: Urubɛn dɩ̃dɔr, Zuda dɩ̃dɔr nɩ Levi dɩ̃dɔr.

³² A saa-pɛrɩ́ mɩ̀ na tɛr'ɩ dacin a manʋ na ɩ mɛtɩr túr-ayi dɔwlɩ kɔbr ayi lɩz'a ayi nɩ pie (2 250) ʋʋ tɛr dɩ̃dɛɛ ata a: Zuzɛb dɩ̃dɔr, Bɛ̃zamɛ dɩ̃dɔr nɩ Dan dɩ̃dɔr.

³³ A saa-pɛrɩ́-dʋrʋ-lowr dacin mɩ̀ na zɛ̃ n a lɛ, ɛ́ mɩ̀ tɛr a dɩ̃dɛɛ ata: Sɩmɩ̃ɔ dɩ̃dɔr, Ɩsakaar dɩ̃dɔr nɩ Zabulɔ̃ dɩ̃dɔr.

³⁴ A mʋ̃tɔ̃w-kpɛb-lowr na baa cɛ a dacin mɩ̀ na cãà tɛr a wog-been nɛ nɩ dɩ̃dɛɛ ata mɩ̀: Gadɩ dɩ̃dɔr, Asɛɛr dɩ̃dɔr nɩ Nɛfɩtali dɩ̃dɔr.

³⁵ A dacine na na viiri koli a tẽ-kpɛ̃ɛ a wowr za na ɩ n mɛtɩr tùr-piwaɩ (9 000). A na dɛ tĩ a ʋlɩ bibir nɛ a, bɛ na bʋɔlɛ nɩ a tẽ-kpɛ̃ɛ kɛ́: “A-Sore-be-n-ka.”»