Ezekɩɛl 47 - A SƐB-SÕW

A Ŋmɩn-yir-kpɛ̃ɛ bul-nʋɔr

¹ A nɩr nɛ tɩ lɛb'a tɛr mɛ̃ wa n a Ŋmɩn-yir-kpɛ̃ɛ dɩ̃dɔr nʋɔr. Lɛ n'a ɩ̃ tɩ nyɛ̃ kʋ̃ɔ a bule yire a dɩ̃dɔr pile a saa-pɛrɩ́. Bʋ̃ʋ n'ʋ vɛ̃, a Ŋmɩn-yir-kpɛ̃ɛ niwn tɩ tori nɩ a saa-pɛrɩ́. A kʋ̃ɔ tɩ gbɔlɛ nɩ a Ŋmɩn-yir-kpɛ̃ɛ saa-pɛrɩ́-dʋrʋ-lowr ɛ́ tɩ tɔlɛ a bàwr-maal-kuur saa-pɛrɩ́-dʋrʋ-lowr.

² A nɩr nɛ tɩ ɩ na ɩ̃ tu yi a saa-pɛrɩ́-gʋba-lowr dɩ̃dɔr ƴãw. Ʋ tɩ ɩ na ɩ̃ cen viiri koli a yẽw tɩ ta a saa-pɛrɩ́ dɩ̃dɔr na tori a saa-pɛrɩ́ a. A kʋ̃ɔ mɩ̀ tɩ gbɔlɛ nɩ a dɩ̃dɔr ŋa saa-pɛrɩ́-dʋrʋ-lowr.

³ A nɩr nɛ na wa yi a saa-pɛrɩ́ a, ʋ tɩ tɛr'ɩ miwr a nũú ɛ́ tɩ de ʋ manɩ nɩ mɛtɩr kɔbr anũu (500) a saa-pɛrɩ́ lowr. Al pùorí ʋ ƴãw ɩ̃ kpɛ gãw a kʋ̃ɔ: a tɩ ta n a ɩ̃ gbɛnakɔɛ ƴãw.

⁴ Ʋ tɩ lɛb'a manɩ mɛtɩr kɔbr anũu (500) ɛ́ ɩ ɩ̃ kpɛ gãw a kʋ̃ɔ: a tɩ do na ta a ɩ̃ dume ƴãw. Al pùorí ʋ lɛb manɩ mɛtɩr kɔbr anũu (500) ɛ́ ɩ ɩ̃ kpɛ gãw a kʋ̃ɔ: a tɩ ta n a ɩ̃ sɩɛ ƴãw.

⁵ Ʋ tɩ baa na manɩ mɛtɩr kɔbr anũu (500): ʋ tɩ ɩ n bàa ɩ̃ na kʋ̃ tʋ̃ɔ́ kpɛ gãw a, a kʋ̃ɔ na tɩ yãwmɛ a ƴãw: kʋ̃ɔ a na fɛr kɛ́ fʋ duwri a, bàa na bɛ tɛr gãwfʋ a tɩ n'ʋ.

⁶ Ʋ tɩ yel mɛ̃ na: «Nɩsaal bie e, fʋ maal'a jɩ́r vla a?» Ʋ tɩ tɛr mɛ̃ na cen zãá nɩ blã ɛ́ lɛb tɛr mɛ̃ wa n a bàa nʋɔr.

⁷ Ʋ na tɩ tɛr mɛ̃ lɛb wa n a, ɩ̃ tɩ nyɛ̃ nɩ tɩ-yaga yaga a bàa nʋɔr a kõkowe a za ayi ƴãw.

⁸ Ʋ tɩ yel mɛ̃ na: «A bàa ŋa gbɔlɛ na tu a tẽw saa-pɛrɩ́, ʋ siwr'ɩ a Zurdɛ̃ bà-fʋɔla pʋɔ tɩ kpɩɛr a kʋ̃ɔ-kpɛ̃ɛ-kũu pʋɔ. Ʋlɛ wa ta a Kʋ̃ɔ-kpɛ̃ɛ-kũu pʋɔ a, ʋ mɩ́ ɩ n a ʋ kʋ̃ɔ a lɩɛbɩ ɩ kʋ̃ɔ-vla.

⁹ Zie nɛ za a bàa ŋa na tuur tɔlɛ a, bʋ̃-vʋʋrɩ za na ƴɔ̃ƴɔ̃wn a na vʋʋrɛ na. Zʋ́mɛ́ na yãwmɛ na bɛ dɩ vuo ɩ, bʋ̃ʋ n'ʋ vɛ̃, a kʋ̃ɔ á ŋá mɩ́ ɩ n a kʋ̃ɔ-kpɛ̃ɛ kʋ̃ɔ a lɩɛbɩ, ɛ́ a nyɔ-vʋʋrʋ sãá zie nɛ za a bàa na tarɛ ɛ.

¹⁰ Lɛ n'a, a na yi a Ɛɩn-Gedi ɛ́ tɩ tɔ a Ɛɩn-Egilayim a, a zʋm-nyɔwrbɛ na mɩ́ dɩ̀ɛl'ɩ a bɛ mɩ̃ɛ a kʋ̃ɔ-kpɛ̃ɛ nʋɔr k'aa ko. Zʋm-pɛ-bʋʋrɛ za na be n be mɛ̃ a Mediterane kʋ̃ɔ-kpɛ̃ɛ pʋɔ a.

¹¹ Ɛcɛ, bɛ kʋ̃ ɩ a bà-ƴɔrɛ nɩ a bà-tɛrtɛr na kpɔwlɩ ʋ a a vɩɛl ɛ, a na gã nɩ a nyaarʋ ƴãw.

¹² A bàa kõkowr za ƴãw a, tɩ-wɔnɩ bʋʋrɛ bʋʋrɛ za na bul'a. A váar bɛ be za na vàr ɛ, ɛ́ a na wɔnɛ na kʋ̃ tɛr ŋmãafʋ daar ɛ. Bɛ na mɩ́ pɔr'ɩ a wɔmɛ cuw za, bʋ̃ʋ n'ʋ vɛ̃, a zi-sõw kʋ̃ɔ n'a cɔ̀rɛ a. A wɔmɛ na ɩ n dɩb ɛ́ a váar ɩ tɩ̃ɩ.»

A Sore ƴãw nɩ a Ɩsɩrayɛl tẽw tʋr-bɔwrɩ

¹³ À ŋá n'a a Sore Naaŋmɩn yere: «Ɩ̃ na wul nyɩ nɩ a tẽw a dɔwlʋ pie nɩ ayi na na põ a tʋr-bɔwrɩ. A Zuzɛb dɔwlʋ na páw nɩ ziir ayi.

¹⁴ Nyɩ na põ nɩ a tẽw a zɛ̃ taa. Bʋ̃ʋ n'ʋ vɛ̃, ɩ̃ pɔ na yel k'ɩ̃ɩ na kʋ̀ n a Ɩsɩrayɛl tẽw a nyɩ sãàkʋm-kore, ɛ́ nyɩɩm so ʋ na dɩ a gbãw.

¹⁵ A saa-pɛrɩ́-gʋba-lowr tʋr-bɔw na yi n a Mediterane kʋ̃ɔ-kpɛ̃ɛ ƴãw, ɛ́ de a sɔ́r na tu tɔl Hetɩlon, Lebo-Hamatɩ, Sedadɩ a,

¹⁶ al pùorí ʋ tu tɔl Berotaɩ nɩ Sivɩrayim tẽ-bɛrɛ na be Damasɩ nɩ Hamatɩ naalʋ-ten cará a, nɩ Hasɛɛr-Tikon na pɩɛlɩ a Horan tʋr-bɔw a.

¹⁷ À ŋá n'a a tʋr-bɔw ŋa na yi a Mediterane kʋ̃ɔ-kpɛ̃ɛ ƴãw ɛ́ tɩ tɔ a Hasaar-Einan tẽw a saa-pɛrɩ́. Damasɩ nɩ Hamatɩ naalʋ-ten na be n a saa-pɛrɩ́-gʋba-lowr. A saa-pɛrɩ́-gʋba-lowr tʋr-bɔw n'ɩ à à ŋá.

¹⁸ A saa-pɛrɩ́ tʋr-bɔw na yi n zie na be Damasɩ nɩ Horan ten cará a, ʋ na tu n a Zurdɛ̃ fʋɔla, a Galaadɩ vuo nɩ a Ɩsɩrayɛl tẽw cará, ɛ́ cen tɩ ta Tamaar tẽw a kʋ̃ɔ-kpɛ̃ɛ-kũu zu. A saa-pɛrɩ́ tʋr-bɔw n'ɩ à à ŋá.

¹⁹ A saa-pɛrɩ́-dʋrʋ-lowr a, a tʋr-bɔw na yi n Tamaar tẽw ɛ́ tɩ tɔ Meriba na be Kadɛsɩ tẽw a kʋ̃ɔ. Ʋ na lanɩ nɩ a Eziptɩ tẽw bàa ɛ́ tɩ tɔ a Mediterane kʋ̃ɔ-kpɛ̃ɛ. A saa-pɛrɩ́-dʋrʋ-lowr tʋr-bɔw n'ɩ à à ŋá.

²⁰ A mʋ̃tɔ̃w-kpɛb-lowr a, a Mediterane kʋ̃ɔ-kpɛ̃ɛ n'ʋ na ɩ a tʋr-bɔw na yi a saa-pɛrɩ́-dʋrʋ-lowr ɛ́ tɩ tɔ Lebo-Hamatɩ tẽw na be a saa-pɛrɩ́-gʋba-lowr a. A mʋ̃tɔ̃w-kpɛb-lowr tʋr-bɔw n'ɩ à à ŋá.

²¹ A nyɩ nɩ-bʋʋrɛ dɔwlʋ cará n'a nyɩ na põ a tẽw.

²² Nyɩ na ŋmɛ n gbãw põ ʋ nyɩɩm nɩ a nɩ-bʋʋr-yoru na kpɩɛr a nyɩ sɔgɔ ɛ́ dɔw bibiir a tẽw pʋɔ a. A fɛr'a kɛ́ nyɩ ɩrɛ a bɛ zie mɛ̃ Ɩsɩrayɛl nɩbɛ nɛbɛ a. Bɛ sɛw na kɛ́ bɛ páw a bɛ zie a Ɩsɩrayɛl dɔwlʋ pʋɔ.

²³ A bɛ kãw za na mɩ́ páw nɩ a ʋ zie a dɔwlʋ ʋl pʋɔ ʋ na na zɩ̃ a.» A mãa Sore Naaŋmɩn n'ʋ yel.