Ezekɩɛl 43 - A SƐB-SÕW

A Sore lɛb'a waar a Zerizalɛm Ŋmɩn-yir-kpɛ̃ɛ pʋɔ

¹ A nɩr nɛ tɩ tɛr mɛ̃ na cen nɩ a dɩ̃dɔr na be a Ŋmɩn-yir-kpɛ̃ɛ saa-pɛrɩ́ a pɛr.

² Lɛ n'a ɩ̃ tɩ nyɛ̃ a Ɩsɩrayɛl Naaŋmɩn yúor-vɩɛlʋ-danʋ ʋ yi a saa-pɛrɩ́ waar. A gɔmɛ ʋ na tɩ ɩrɛ a ŋmɛ̃ na taa nɩ kʋ̃ɔ-kpɛ̃ɛ gɔmɛ, ɛ́ a ʋ cãà tɩ caalɛ a tẽw.

³ A bom nɛ ɩ̃ na tɩ nyɛ̃ a ŋmɛ̃ na taa nɩ a ʋl ɩ̃ na tɩ nyɛ̃ a dãwdãw, a lɛn daar a Sore na tɩ wa wa sãw a Zerizalɛm bɛr a, nɩ a lɛn daar ɩ̃ na tɩ be a Kebaar man nʋɔr a. Lɛ n'a ɩ̃ tɩ lo vɔblɩ muru.

⁴ A Sore yúor-vɩɛlʋ-danʋ tɩ tu n a dɩ̃dɔr na be a saa-pɛrɩ́ a kpɛ a Ŋmɩn-yir-kpɛ̃ɛ pʋɔ.

⁵ A vʋʋrʋ tɩ zɛw mɛ̃ na ìr'ɩ a tẽw ɛ́ tɩ tɛr mɛ̃ cen nɩ a sɔwlɩsɔw davʋra pʋɔ. Ɩ̃ tɩ nyɛ̃ na k'aa Sore yúor-vɩɛlʋ-danʋ paal'ɩ a Ŋmɩn-yir-kpɛ̃ɛ.

⁶ Ɩ̃ tɩ wõ n kɔkɔr na ƴɛ̀rɛ yire a Ŋmɩn-yir-kpɛ̃ɛ pʋ̃ɔmɩ a. A lɛn daar a, a nɩr nɛ na tɩ tɛr mɛ̃ cere nɩ a tɩ àr'a kɔw mɛ̃.

⁷ A kɔkɔr nɛ tɩ yel mɛ̃ na: «Nɩsaal bie e, bɛrɛ wone! A ka ɩ n a ɩ̃ naalʋ-dà-kɔw zie, a tẽsɔw ɩ̃ na mɩ́ bin a ɩ̃ gbɛ́ɛ a. Ɩ̃ na kpɩɛr'ɩ a ka a Ɩsɩrayɛl nɩbɛ sɔgɔ kʋralɛ. A Ɩsɩrayɛl nɩbɛ nɩ a bɛ na-mɩnɛ kʋ̃ lɛb ɩ a ɩ̃ yo-sõw la ɩ: bɛ kʋ̃ cãà ɩrɛ a pɔw-yɛm ɩb ɛ́ kʋ̃ cãà ũùne a bɛ na-mɩnɛ na kpi a ƴã-gamɛ a ka ɩ.

⁸ A na-mɩnɛ ƴãw nɩ a bɛ nãà yir dɩ̃dɛɛ nɩ a bɛ dɩ̃dɛɛ dàar a pɩɛlɩ a ɩ̃ dem, ɛ́ ƴãw dacin ʋ bʋ́r a ɩ̃ yir nɩ a bɛ yir. Bɛ ɩ n a ɩ̃ yo-sõw la. Bʋ̃ʋ n'ʋ vɛ̃, bɛ ɩ n ɩb na bɛ maal'ɩ wob a. Alɛ n'a so ɩ̃ kʋ bɛ pàw pɛr a ɩ̃ suur pʋɔ.

⁹ Ƴɛrɛŋa a, a Ɩsɩrayɛl nɩbɛ na bɛr'ɩ a bɛ bà-ɩb. Bɛ na ɩ na a bɛ na-mɩnɛ na kpi a ƴã-gamɛ a zãá nɩ mɛ̃, ɩ̃ɩ na kpɩɛr'ɩ a bɛ sɔgɔ kʋralɛ.

¹⁰ Ɛ́ a fʋ̃ʋ nɩsaal bie, man a Ŋmɩn-yir-kpɛ̃ɛ ŋmɛ̃a kʋ̀ a Ɩsɩrayɛl nɩbɛ. Bɛ nyɛ̃ vĩ a bɛ yel-bebe zũú, ɛ́ su zu zanɩ a yir ŋa ŋmãafʋ na manɩ ƴãw sɛbɛ zu a.

¹¹ Bɛlɛ wa sɩrɩ nyɛ̃ vĩ a lɛ bɛ na ɩ a zũú a, wul bɛ a Ŋmɩn-yir-kpɛ̃ɛ ŋmãafʋ na man ƴãw a sɛbɛ zu a, a ziir al a yie na na àr a, a tu-kpɛb nɩ a tu-yib ziir na na be a, a lɛ za ʋ na cɔbrɩ bin a. Sɛb a bɛ mimirí a nɛ́ɛ nɩ a tub a na fɛr kɛ́ bɛ tuur a zie ŋa pʋɔ a. Lɛ n'a bɛ na sàw a ɛ́ tuur a.

¹² A nɔ-kpɛ̃ɛ na càarɩ a Ŋmɩn-yir-kpɛ̃ɛ a n'ɩ ŋa: vuo za na viiri koli ʋ a tãw nyʋɔrɩ́ a na ɩ n sõw yaga za.»

A bàwr-maal-kuur nɩ a bagɛ

¹³ A bàwr-maal-kuur manʋ n'ɩ à ŋá. A bʋ̃-mána zuo nɩ mɛtɩr ŋmãa blã. Bɔw a wogo na tɩ ɩ mɛtɩr ŋmãa ɛ́ a yɛ̀lʋ mɩ̀ tɩ ɩ mɛtɩr ŋmãa a, tɩ viir'a koli a bàwr-maal-kuur. A yẽw lowr a, a bɔw nɔgbãbir kɛrʋ́ bɛ tɩ ta mɛtɩr ŋmãa ɩ. A bàwr-maal-kuur kɛrʋ́ n'ɩ à ŋá:

¹⁴ A ʋ kɛrʋ́ tɩ ɩ n mɛtɩr been, a na tĩ a pɛr na sʋ̃ɔ́ a, na man taa nɩ a tẽsɔw a, ɛ́ tɩ tɔ a pile dɔwlʋ zi-dãw-niwn sob a. A pɛr tɩ tɛr'ɩ mɛtɩr ŋmãa gãw a dɔwlʋ zie ŋa lõbowr kãw za manʋ. A dɔwlʋ zi-dãw-niwn sob ŋa zu-sɔw a, dɔwlʋ ziir ayi sob tɩ be n be a kɛrʋ́ ɩ mɛtɩr ayi. A dɔwlʋ zi-dãw-niwn sob tɩ tɛr'ɩ mɛtɩr ŋmãa gãw a dɔwlʋ ziir ayi sob lõbowr kãw za manʋ.

¹⁵ A dam tɩ be n a dɔwlʋ ziir ayi sob zu-sɔw. A ʋ kɛrʋ tɩ ɩ n mɛtɩr ayi ɛ́ a ʋ gõgone zɛw ìr.

¹⁶ A dam wogo tɩ ɩ n mɛtɩr ayʋɔb, a yɛ̀lʋ mɩ̀ ɩ a lɛ. A lõbowe a za anaar tɩ zɛ̃ n taa.

¹⁷ A dɔwlʋ ziir ayi sob wogo tɩ ɩ n mɛtɩr ayopõi, a yɛ̀lʋ mɩ̀ ɩ a lɛ. A lõbowe a za anaar tɩ zɛ̃ n taa. A yẽw lowr a, a ʋ nɔgbãbir kɛrʋ́ bɛ tɩ ta mɛtɩr ŋmãa ɩ, ɛ́ bɔw-cãpile na viiri koli a tɩ be n be ɩ mɛtɩr ŋmãa. A saa-pɛrɩ́ tanɛ dɛr-mimie n'a fʋ mɩ́ do tɩ ta a dɔwlʋ ziir ayi sob ŋa.

¹⁸ A nɩr nɛ tɩ yel mɛ̃ na: «A fʋ̃ʋ nɩsaal bie, bɛrɛ wone a lɛ a Sore Naaŋmɩn na yere kʋ̀rɛ fʋ a: A ʋlɩ bibir a bàwr-maal-kuur nãà wa mɛ a nyɩw-a-za-bàwr maalʋ nɩ a dʋn zɩ̃ɩ ciru ƴãw a, tub á ŋá n'a bɛ na tɛr.

¹⁹ Fʋ na kʋ̀ n nadɛr a levitɩ mɩnɛ na ɩ bàwr-maalbɛ yi a Sadɔkɩ yir a. Bɛl tɛwr nɛbɛ tɛr sɔ́r na taw pɩɛlɩ mɛ̃ tone a ɩ̃ tome, a mãa Sore Naaŋmɩn n'ʋ yere. Bɛ na maal'ɩ nɩ a nadɛr ŋa bàwr a yel-bebe suur-dɩ-kʋ̀b ƴãw.

²⁰ Fʋ na ɩ n a ʋ zɩ̃ɩ ƴãw a bàwr-maal-kuur gõgone na zɛw ìr a zu, a dɔwlʋ ziir ayi sob gõgone anaar zu, nɩ a nɔgbãbir na viiri koli ʋ a zu. À à ŋá n'a fʋ na ɩ a bàwr-maal-kuur ʋ vɩɛl ɛ́ fʋ de ʋ kʋ̀ a Naaŋmɩn.

²¹ Al pùorí, fʋ na ɩ na bɛ ɓáw a nadɛr bɛ na maal'ɩ a bàwr a yi n a zi-sõw pʋɔ cen nɩ tɩ nyɩw ʋ bɛr zie bɛ na kaa ír a tub ŋa ƴãw a.

²² A bibie ayi sob a, fʋ na nyɔw nɩ bʋrale a ƴã-gan zie kãw za na bɛ sãw a. Fʋ mɩ̀ na maal'ɩ ʋ nɩ bàwr tʋ̃ɔ́ páw a yel-bebe suur-dɩ-kʋ̀b. Fʋ na ɩ n a bàwr-maal-kuur ʋ vɩɛl mɛ̃ a lɛ fʋ na tu n a nadɛr a.

²³ Fʋ̃ʋ wa baarɩ a bàwr ŋa a, fʋ na nyɔw nɩ a dʋn pʋɔ nadɛr nɩ pʋ́ra a ƴã-gan zie kãw za na bɛ sãw a.

²⁴ Fʋ na de a na wul a mãa Sore. A bàwr-maalbɛ na cir'ɩ nyaarʋ ƴãw a zu, ɛ́ de a maal'ɩ nyɩw-a-za-bàwr kʋ̀ m.

²⁵ Bibie ayopõi ƴãw a, fʋ na mɩ́ maal'ɩ nɩ bʋrale bàwr bibir za a yel-bebe suur-dɩ-kʋ̀b ƴãw, lãwnɩ nadɛr nɩ pʋ́ra na yi a dʋn pʋɔ ɛ́ a ƴã-gan zie kãw za bɛ sãw a.

²⁶ À à ŋá a, bibie ayopõi ƴãw a, bɛ na ɩ n a bàwr-maal-kuur ʋ vɩɛl, ɛ́ bɛ de ʋ kʋ̀ a Naaŋmɩn a tome tib ƴãw.

²⁷ A bibie ayopõi á ŋá wa tɔl a, a bibie ani sob nɩ a bibie al na na tu a, a bàwr-maalbɛ na maalɛ nɩ a nyɩw-a-za-bagɛ nɩ a ƴã-ɓaarʋ bagɛ a nɩbɛ ƴãw a bàwr-maal-kuur zu. Lɛ n'a ɩ̃ na wul nyɩ a ɩ̃ nɔ̃wfʋ. A mãa Sore Naaŋmɩn n'ʋ yere.»