Ezekɩɛl 42 - A SƐB-SÕW

A yie al a Ŋmɩn-yir-kpɛ̃ɛ na so a

¹ A nɩr nɛ tɩ ɩ na ɩ̃ yi a yẽw davʋra pʋɔ, ʋʋ ɩ ɩ̃ kpɛ diru na be a saa-pɛrɩ́-gʋba-lowr, tori a vo-zawla nɩ a yir na be a Ŋmɩn-yir-kpɛ̃ɛ pùorí a pʋɔ.

² A saa-pɛrɩ́-gʋba-lowr yir ŋa wogo tɩ ɩ n mɛtɩr lɩz'a ayi nɩ pie, ɛ́ a yɛ̀lʋ ɩ mɛtɩr lɩzɛr'ɩ anũu.

³ A lõbowr kãw a, a diru be n a vuo na viiri koli a Ŋmɩn-yir-kpɛ̃ɛ ɛ́ a yɛ̀lʋ cen tɩ ta mɛtɩr pie a pʋɔ. A lõbowr ʋl na cɛ a, a tori nɩ a yẽw davʋra kʋsɛ-pãgalɩ. A tɛr'ɩ fʋɔlɩ di-suwli ata pʋɔ.

⁴ A diru niŋé a, a sɔwlɩsɔw davʋra lowr a, fʋɔla be n be a yɛ̀lʋ ɩ mɛtɩr anũu ɛ́ a wogo ɩ mɛtɩr lɩz'a ayi nɩ pie. A saa-pɛrɩ́-gʋba-lowr'a fʋ mɩ́ tu kpɛ a yir ŋa pʋɔ.

⁵ A di-suwli ata sob diru ɩ n cãpili zuo a di-suwli al na cɛ a diru. Bʋ̃ʋ n'ʋ vɛ̃, a fʋɔlɩ de nɩ vo-kpɛ̃ɛ a di-suwli ata sob zie zuo a di-suwli ayi sob nɩ a dãw-niwn sob zie.

⁶ A garɛ tɩ dɔwl dɔwl'ɩ taa di-suwli ata zu. Kpule bɛ tɩɛ a tɛr mɛ̃ a davʋra yie al na cɛ a ɩ. Fʋ na dúor a lɛ a n'a a diru mɩ̀ ɩrɛ a cãpili cere.

⁷ A yẽw davʋra lowr a, a dacin na ɓɛ̃ɓɛrɩ a diru a wogo tɩ ɩ n mɛtɩr lɩzɛr'ɩ anũu.

⁸ A diru tɛɛ za wogo tɩ ɩ n mɛtɩr lɩzɛr'ɩ anũu. Ɛcɛ a diru na tɩ tori a Ŋmɩn-yir-kpɛ̃ɛ a wogo tɩ ɩ n mɛtɩr lɩz'a ayi nɩ pie.

⁹ A diru á ŋá pile a, a yir saa-pɛrɩ́ lowr a, kpɛb zie be n be a bɛlɩ dem na yi a yẽw davʋrá waar a ƴãw.

¹⁰ A kpɛb zie ŋa be n a be a davʋra dacin na tĩ a. A saa-pɛrɩ́-dʋrʋ-lowr a, diru na tori a davʋra nɩ a yir na be a Ŋmɩn-yir-kpɛ̃ɛ pùorí a mɩ̀ tɩ be n be.

¹¹ A diru á ŋá niŋé a, fʋɔla tɩ be n be. A wõwme na ɛ́ yɛlmɛ ta a diru al na be a saa-pɛrɩ́-gʋba-lowr a. A zɛ̃a, a cɔbrʋ bɛ na cɔbrɩ a a, a kpɛb ziir nɩ a yib ziir tɩ ɩ n been.

¹² A yie á ŋá na be a saa-pɛrɩ́-dʋrʋ-lowr a dɩ̃dɛɛ ŋmɛ̃ na taa nɩ a al na be a saa-pɛrɩ́-gʋba-lowr a. A fʋɔla tib zie a, kpɛb zie na tori a dacin na piw a zi-sõw tɛr a be n be. Saa-pɛrɩ́ lowr'a fʋ mɩ́ tu tɩ ta a be.

¹³ A nɩr nɛ tɩ yel mɛ̃ na: «A saa-pɛrɩ́-gʋba-lowr nɩ a saa-pɛrɩ́-dʋrʋ-lowr diru na tori a davʋra a ɩ n diru a Naaŋmɩn yõ na so a. A be a, a bàwr-maalbɛ na na tʋ̃ɔ́ kpɛ a zi-sõw pʋɔ a dɩrɛ nɩ a de-kʋ̀b bʋ̃-son. A be n'a a sɛw kɛ́ bɛ mɩ́ ƴãw a de-kʋ̀b bʋ̃-son: a bʋ̃-tɩrɩ nɩ a bàwr-maal pɛ-bʋʋrɛ dʋn bɛ na de tɩr a yel-bebe suur-páwfʋ ƴãw a, bʋ̃ʋ n'ʋ vɛ̃, a zie ŋa ɩ n sõw.

¹⁴ Lɛb waar mɩ̀, a bàwr-maalbɛ na kpɛ a zi-sõw pʋɔ a kʋ̃ tʋ̃ɔ́ cen daadaa a yẽw davʋra pʋɔ a yib daar ɛ. Bɛ sɛw na kɛ́ bɛ bɛr a bʋ̃-suur-son bɛ na su tõ n a Sore tome a diru á ŋá pʋɔ. Bɛ mɩ́ su n bʋ̃-suur-yoru ɛ́ bãw cen a be a nɩbɛ na ɓã taa a.»

A yẽw dacin manʋ

¹⁵ A lɛn daar a nɩr nɛ na wa manɩ a Ŋmɩn-yir-kpɛ̃ɛ pʋ̃ɔmɩ yie baar'a, ʋ ƴãw na ɩ̃ yi a saa-pɛrɩ́ dɩ̃dɔr ƴãw. Lɛ n'a ʋ tɩ manɛ a vuo na viiri koli a Ŋmɩn-yir-kpɛ̃ɛ a.

¹⁶ Ʋ tɩ manɩ nɩ nɩ a dali-mána nyɛ̃ wogo mɛtɩr kɔbr ayi dɔwlɩ lɩz'a ayi nɩ pie (250) a saa-pɛrɩ́.

^17-19 Ʋ mɩ̀ tɩ manɩ nɩ a saa-pɛrɩ́-gʋba-lowr, a saa-pɛrɩ́-dʋrʋ-lowr nɩ a mʋ̃tɔ̃w-kpɛb-lowr lõbowe nɩ a dali-mána. Ʋ tɩ páw nɩ a wogo been nɛ a ziir za, a pɛr lɛ kɛ́ mɛtɩr kɔbr ayi dɔwlɩ lɩz'a ayi nɩ pie (250).

²⁰ À ŋá n'a ʋ tɩ manɩ a dacin na tɩ viiri koli a Ŋmɩn-yir-kpɛ̃ɛ a lõbowe anaar. A dacin lõbowe tɩ zɛ̃ n taa, ɛ́ kãw za tɛr mɛtɩr kɔbr ayi dɔwlɩ lɩz'a ayi nɩ pie (250). A dacin ŋa yel-ɩra tɩ n'ɩ k'ʋʋ bʋ́r a vo-sõw nɩ a vuo ʋl na bɛ ɩ a sõw a.