Ezekɩɛl 4 - A SƐB-SÕW

A EZEKƖƐL YERE NƖ A BOM NƐ̃ NA NA TA A ZERIZALƐM A 4—24 Bɛ na zɛb'ɩ nɩ a Zerizalɛm tẽ-kpɛ̃ɛ

¹ A Sore tɩ lɛb'a yel mɛ̃ à ŋá: «A fʋ̃ʋ, nɩsaal bie, ɓáw yawra birkiri bin a fʋ niŋé. Wi a Zerizalɛm tẽ-kpɛ̃ɛ ƴãw a ʋ zu.

² Al pùorí, wul kɛ́ dɔ̃ dem ŋmãa na jil ʋ. Wɛr bɔwrɩ a ʋ ƴãw, kaalɩ tanɛ gbõ taa, ƴãw zɛbr-laɩ nɩ zɛbr bome a mɩnɛ viiri koli ʋ.

³ Al pùorí, de kur-pãgala ƴãw fʋ̃ʋ nɩ a tẽ-kpɛ̃ɛ cará mɛ̃ dacin a. Jɩ́rɛ a Zerizalɛm gbẽgbẽ: bɛ zɛbr'ɩ ʋ na. Fʋ̃ʋ n'ʋ zɛbr'ɩ ʋ. À à ŋá fʋ na ɩrɛ a ɩ n bãwfʋ a Ɩsɩrayɛl nɩbɛ zie.

⁴ Gã a fʋ gʋba lõbowr zu. Lɛn daar za fʋ na na gã à à ŋá a, fʋ na tuo nɩ a Ɩsɩrayɛl naalʋ-tẽw yel-bebe, fʋ na tuo nɩ a tɩbrʋ.

⁵ Ɩ̃ ƴãw na fʋ ɩrɛ à à ŋá bibie na man a yome lɛ nʋɔr a Ɩsɩrayɛl naalʋ-tẽw na maalɩ a yel-bebe a. A na ɩ à ŋá a, fʋ na tuo nɩ a ʋ yel-bebe tɩbrʋ bibie kɔbr ata dɔwlɩ lɩz'a anaar nɩ pie (390).

⁶ Fʋ̃ʋ wa baarɩ a bibie á ŋá a, fʋ̃ʋ lɩɛbɩ a dʋrʋ lõbowr zu, ɛ́ tuo a Zuda naalʋ-tẽw yel-bebe tɩbrʋ yome lɩz'a ayi. Ɩ̃ kʋ̀rɛ fʋ nɩ bibi-been yũon za ƴãw, a yome al za a Zuda na maalɩ a yel-bebe a.

⁷ Al pùorí, fʋ na jɩ́rɛ nɩ a Zerizalɛm gbẽgbẽ bɛ na zɛbr'ɩ a. Fʋ na tur'ɩ a fʋ kpãkpãw-ɓʋɔl cɔw ʋ ɛ́ ƴɛ̀r a ɩ̃ yúor ƴãw càar'ɩ a tẽ-kpɛ̃ɛ.

⁸ Ɛ́ mãa a, ɩ̃ na 'le b'a nɩ mie fʋ ta tʋ̃ɔ́ mɩ́ yi lõbowr ŋa ɛ́ lɩɛbɩ lõbowr ŋa zu ɛ, ɛ́ gù fʋ tɩ baarɩ a bibie fʋ na zɛbr'ɩ a tẽ-kpɛ̃ɛ a.

⁹ De ble, ɔɔzʋ, bɛ̃w bʋʋrɛ kãw bɛ na bʋɔlɛ fɛɛvʋ nɩ lãtɩɩ a, ci nɩ ble kpawlɛ. Nyaw a za taa bom pʋɔ maal'ɩ dipɛ̃. A na ɩ n a fʋ bʋ̃-dɩrɩ a bibie kɔbr ata dɔwlɩ lɩz'a anaar nɩ pie (390) fʋ na na gã nɩ a lõbowr a.

¹⁰ Fʋ na mɩ́ dɩ n lɛ na na man fʋ a, a ta mɛ̃ gɩram kɔbr ayi (200) bibir za a: à á ŋá sɛw na k'aa man fʋ tɩ ta a bio daarɩ́.

¹¹ Fʋ na mɩ́ nyũ n kʋ̃ɔ mɩ̀, a ta zuo ɛ́ ta ɩ pʋrɩ ɛ, litɩr been bibir za.

¹² A fʋ bʋ̃-dɩra na mɩ́ ŋmɛ̃ na mɛ̃ ɔɔzʋ sɛ̃sɛ̃ a. Fʋ na mɩ́ sɛ̃ ʋ nɩ nɩsaal bine vũu zu, a nɩbɛ za niŋé.»

¹³ A Sore tɩ yel'a ƴãw pʋɔ: «À à ŋá n'a a Ɩsɩrayɛl nɩbɛ na dɩrɛ bʋ̃-dɩ-dɛgɛ a tẽ-yoru al pʋɔ ɩ na na diw bɛ cen nɩ a.»

¹⁴ Ɩ̃ tɩ sɔw na: «'Woi, Sore Naaŋmɩn i! Ɩ̃ bɛ dãw ɩ dɛwr sob ɛ! A ɩ̃ bibile daarɩ́ za wa tɩ tɔ dɩ̃a, ɩ̃ bɛ dãw 'wɔb dʋ̃-kũu bɩɩ dʋ̃w wɛ-dʋ̃w na kʋ a ɩ. Nɛn-dɛwr kãw za bɛ dãw kpɛ a ɩ̃ nʋɔrɩ́ ɛ.»

¹⁵ A Sore tɩ yel mɛ̃ na: «A na ɩ lɛ a, ɩ̃ kʋ̀ b'ɩ sɔ́r kɛ́ fʋ lɩɛrɩ a nɩsaal bine nɩ nawbine mɩ́ maal'ɩ a fʋ bʋ̃-dɩra.»

¹⁶ Ʋ tɩ yel'a ƴãw pʋɔ: «Nɩsaal bie e, bɛr wõ! Ɩ̃ na sãw nɩ a Zerizalɛm dipɛ̃ al bɛ na ír bin kõkowrí a bɛr. Bɛ na mɩ́ põ nɩ a bʋ̃-dɩra nɩ a bʋ̃-nyúura zaa pʋrɩ, ɛ́ à á ŋá zũú, a nɩbɛ na mɩ́ gã na bɛ gúr ɛ.

¹⁷ A dipɛ̃ nɩ a kʋ̃ɔ na dɩ n nã́w, alɛ n'a so a nɩbɛ na tɛr pʋl-vʋ̃ɔ ɛ́ a bɛ fãw baarɩ a bɛ yel-faar zũú.»