Ezekɩɛl 36 - A SƐB-SÕW

A Ɩsɩrayɛl nɩbɛ na lɛb'a wa a bɛ tẽw pʋɔ

¹ «A fʋ̃ʋ nɩsaal bie, ƴɛ̀r a ƴɛrɛŋa a ɩ̃ yúor ƴãw a Ɩsɩrayɛl tẽw tan ƴãw. Yel a k'aa bɛrɛ wone a ƴɛ̀rʋ ɩ̃ na ƴɛ̀rɛ kʋ̀rɛ a a,

² a mãa Sore Naaŋmɩn: A nyɩ dɔ̃ dem la na ɛ́ yel: “Ha haa! A Ɩsɩrayɛl tẽw tã-kore ɩ n a tɩ sób ƴɛrɛŋa!”

³ A na ɩ lɛ a, a fʋ̃ʋ nɩsaal bie, ƴɛ̀r a Ɩsɩrayɛl nɩbɛ zie a ɩ̃ yúor ƴãw: À ŋá n'a ɩ̃ yere kʋ̀rɛ bɛ, a mãa, a Sore Naaŋmɩn: A lõbowe za a, a nɩbɛ tɩ bɔbr'a kɛ́ bɛ sãw nyɩ bɛr ɛ́ ɩ nyɩ bɔr. Bɛ tɩ bɔbr'a kɛ́ bɛ nyɔw nyɩ, ɛ́ nyɩ lo n a nɩ-bʋʋr-yoru nuru pʋɔ. Bɛ ɩ nyɩ na la ɛ́ tʋ nyɩ.

⁴ A na ɩ à ŋá a, yel a ɩ̃ ƴɛ̀rʋ kʋ̀ a: Ɩsɩrayɛl tẽw tan i, nyɩ bɛrɛ wone a ɩ̃ ƴɛ̀rʋ! A mãa Sore Naaŋmɩn, ɩ̃ yere na kʋ̀rɛ a tã-bɛrɛ nɩ a tãli, a gblãkowe nɩ a bà-fʋɔlɩ. Ɩ̃ yere na kʋ̀rɛ a deboru nɩ a tẽ-bɛrɛ a nɩ-bʋʋr-yoru na kpɩɛr pɩɛl a na sãw bɛr, zà, ɛ́ tʋ a.

⁵ Sɩza, a mãa Sore Naaŋmɩn yere na, a ɩ̃ su-tʋlʋ kpãkpã pʋɔ, ɩ̃ zɛbr'ɩ nɩ a nɩ-bʋʋr-yoru nɩ a Edɔm tẽw za kpɛ̃lɛ̃kpɛ̃lɛ̃. Nʋ̃ɔ̀ na tɩ paalɩ bɛ ɛ́ bɛ tobr bɛ tɩ ka bom za ƴãw a n'a, bɛ tɩ de a ɩ̃ tẽw, kɛ́ bɛ za a ʋ dʋn mʋ̃ɔ 'wɔbrʋ ziir.

⁶ Alɛ n'a so, a fʋ̃ʋ nɩsaal bie, ƴɛ̀r a Ɩsɩrayɛl tẽw zie a ɩ̃ yúor ƴãw. Yel kʋ̀ a tã-bɛrɛ nɩ a tãli, a gblãkowe nɩ a bà-fʋɔlɩ, k'aa mãa, a Sore Naaŋmɩn, ɩ̃ na bɛr'ɩ a ɩ̃ su-tʋlʋ kpãkpã ʋ ìr. Ɩ̃ yere na kʋ̀rɛ a: A nɩ-bʋʋr-yoru ɩ na kɛ̀ vĩ nyɔw nyɩ.

⁷ A na ɩ lɛ a, a mãa Sore Naaŋmɩn yere na kʋ̀rɛ nyɩ, a nɩ-bʋʋr-yoru na viiri koli nyɩ a mɩ̀ na nyɛ̃ nɩ vĩ.

⁸ A lɛn daar a, a Ɩsɩrayɛl tẽw tan zu a, a tɩɩr na tɛr'ɩ a wuli, ɛ́ wɔ̃ wɔmɛ a nyɩ ƴãw, Ɩsɩrayɛl nɩbɛ ɩ̃ nɩ-bʋʋrɛ ɛ. Bʋ̃ʋ n'ʋ vɛ̃, nyɩ kʋ̃ yaa kɛ́ lɛb cen a nyɩ tẽw ɛ.

⁹ Sɩza, ɩ̃ na ƴɛ̀r'a kpɛ nyɩ, ɩ̃ na ƴãw nɩ fãw a nyɩ tẽsɔw lɛb bãw kɔ ɛ́ bʋ̀r.

¹⁰ A Ɩsɩrayɛl tẽw za pʋɔ a, ɩ̃ na ɩ na nyɩ yãwmɛ. A tẽ-bɛrɛ na lɛb'a tɛr nɩbɛ, ɛ́ bom bɛ na sãw bɛr a na lɛb'a mɛ.

¹¹ A ziir za a, a nɩbɛ nɩ a dʋn na lɛb'a yãwmɛ. Nyɩ na tɛr'ɩ bibiir, nyɩ na yãwmɛ na. A tẽw na lɛb'a tɛr nɩbɛ mɛ̃ a koro za a, ɛ́ a nyɩ tɛra na zuo nɩ a dãwdãw dem. Lɛ n'a nyɩ na bãw kɛ́ mãa n'ɩ a Sore.

¹² Ɩsɩrayɛl nɩbɛ, ɩ̃ nɩ-bʋʋrɛ ɛ, ɩ̃ na ɩ na nyɩ cere a ziir za a tẽw pʋɔ. Nyɩ na so ʋ na, ʋ na ɩ n a nyɩ sób, ʋʋ kʋ̃ lɛb kʋ a nyɩ bibiir towtow ɛ.

¹³ À ŋá n'a a mãa Sore Naaŋmɩn yere: Bɛ manɛ na k'aa Ɩsɩrayɛl tẽw vɔlɛ nɩ a bɛlɩ dem na kpɩɛr a ʋ pʋɔ a, k'ʋʋ kʋrɛ nɩ a ʋ nɩbɛ bibiir.

¹⁴ A na ɩ à ŋá a, a tẽw kʋ̃ lɛb vɔl a bɛlɩ dem na kpɩɛr a ʋ pʋɔ a ɩ, ʋ kʋ̃ lɛb kʋ a ʋ nɩbɛ bibiir ɛ. A mãa Sore Naaŋmɩn n'ʋ yere.

¹⁵ Ɩ̃ kʋ̃ ɩ fʋ lɛb wõ a nɩ-bʋʋr-yoru zʋmɛ nɩ a ɩ-lab ɛ. Bʋ̃ʋ n'ʋ vɛ̃, a nyɩ tẽw kʋ̃ lɛb ɩ a nyɩ bibiir kpiir ɛ. À ŋá n'a a Sore Naaŋmɩn yere.»

A Sore na ɓã n a Ɩsɩrayɛl nɩbɛ taa

¹⁶ A Sore tɩ yel mɛ̃ na:

¹⁷ «A fʋ̃ʋ nɩsaal bie, bɛrɛ wone! A lɛn daar a Ɩsɩrayɛl nɩbɛ na tɩ cãà kpɩɛr a bɛ tẽw pʋɔ a, bɛ tɩ sɩrɩ na vʋʋrɩ faa, ɛ́ tɩ dɛw a bɛ tẽw bɛr. A bɛ nyɔ-vʋʋrʋ tɩ dɛw na man pɔw zɩ̃ɩ a ʋ sɩɛ-loba daar.

¹⁸ Bɛ ɩ n a tẽw ʋ dɛw, a zɩ̃ɩ bɛ na ɩ a cir a be a ƴãw, nɩ a bɛ ŋmɩn-bɛlɛbɛlɛ ƴãw. Alɛ n'a so ɩ̃ ɩ a ɩ̃ su-tʋlʋ kpãkpã ìr a bɛ ƴãw.

¹⁹ Ɩ̃ diw bɛ na yaarɩ nɩ-bʋʋr-yoru sɔgɔ, tẽ-yoru pʋɔ. À à ŋá n'a ɩ̃ dɩ n bɛ a ƴɛ̀rʋ tu n a bɛ cenu nɩ a bɛ ɩ-ɩrɩ.

²⁰ A ten al za pʋɔ bɛ na cen a, a nɩbɛ ɩ n a ɩ̃ yo-sõw la a bɛl ƴãw. Bʋ̃ʋ n'ʋ vɛ̃, bɛ tɩ yere na: “A Sore nɩ-bʋʋrɛ tɩ nɛbɛ, a ʋ tẽw n'ʋ bɛ yi kɛ́ bɛr.”

²¹ A tɩ dam mɛ̃ na ɩ̃ na tɩ nyɛ̃ a yel ŋa a: a ɩ̃ yo-sõw tɩ nyɛrɛ nɩ ɩ-lab a tẽ-yoru pʋɔ, a Ɩsɩrayɛl nɩbɛ na mɩ́ tɩ tarɛ a be a ƴãw.

²² Alɛ n'a so, yel kʋ̀ bɛ a lɛ a mãa Sore Naaŋmɩn na yere a: Ɩsɩrayɛl nɩbɛ ɛ, a lɛ ɩ̃ na na ɩ a, ɩ̃ kʋ̃ ɩ ʋ a nyɩ zũú ɛ. Ɩ̃ na ɩ ʋ na kɛ́ bɛ tʋ̃ɔ́ tɛr ƴãwfʋ a ɩ̃ yo-sõw zie. Sɩza, nɩbɛ ɩ ʋ na la a nyɩ zũú, a ten al pʋɔ nyɩ na cen a.

²³ A nyɩɩm ƴãw a, a nɩ-bʋʋr-yoru ɩ n a ɩ̃ yúor la. A na ɩ lɛ a, ɩ̃ na wul bɛ na k'ɩ̃ɩ sɩrɩ na ɩ Naaŋmɩn. Lɛ n'a a nɩ-bʋʋr-yoru na bãw kɛ́ mãa n'ɩ a Sore, a lɛn daar ɩ̃ nãà wa wul a ɩ̃ sonu a nyɩ pʋɔ, a bɛ mimirí a. A mãa Sore Naaŋmɩn n'ʋ yere.

²⁴ Bʋ̃ʋ n'ʋ vɛ̃, mãa wa tɛr nyɩ yi n a nɩ-bʋʋrɛ sɔgɔ nɩ a ten al pʋɔ nyɩ na be a, ɩ̃ na ɓã nyɩ nɩ taa ɛ́ tɛr nyɩ lɛb wa n a nyɩ tẽw pʋɔ.

²⁵ Ɩ̃ na cir'ɩ kʋ̃ɔ-walwal ƴãw nyɩ, ɛ́ nyɩ na vɩɛl'a. Ɩ̃ na pɛ́w nɩ a nyɩ dɛwr za a yi, ɛ́ ír a nyɩ tɩbɛ za bɛr nyɩ.

²⁶ Ɩ̃ na kʋ̀ nyɩ nɩ soci-paala, ɩ̃ na ƴãw nyɩ nɩ vʋʋr-paala. Ɩ̃ na ír'ɩ a kʋsɩɛr socir bɛr a nyɩ ƴã-ganɩ́ ɛ́ ƴãw nyɩ ƴã-gã-nɛn socir.

²⁷ Ɩ̃ na ƴãw nyɩ nɩ a ɩ̃ Vʋʋrʋ. À ŋá n'a ɩ̃ na ɩ kɛ̀ nyɩ tʋ̃ɔ́ sàwr a ɩ̃ nɛ́ɛ, ɛ́ tɛr a tub ɩ̃ na ƴãw kʋ̀ nyɩ a tuur.

²⁸ Lɛ n'a nyɩ na kpɩɛr a tẽw ʋl ɩ̃ na kʋ̀ a nyɩ sãàkʋm-kore a. Nyɩ na ɩ n a ɩ̃ nɩ-bʋʋrɛ, ɩ̃ɩ ɩ a nyɩ Naaŋmɩn.

²⁹ Ɩ̃ na ír nyɩ na bɛr a nyɩ dɛwr za pʋɔ. Ɩ̃ kʋ̃ lɛb bɛr a kɔ̃ lo a nyɩ zu ɛ, ɛcɛ, ɩ̃ na ɩ n a ble bul wɔ̃ yaga za.

³⁰ Ɩ̃ na ɩ na a nyɩ tɩɩr wɔ̃ wɔmɛ yaga, ɛ́ a nyɩ póru bʋ̃-dieri ʋr. Lɛ n'a nyɩ kʋ̃ lɛb bãw a kɔ̃ vĩ a nɩ-bʋʋr-yoru niŋé ɩ.

³¹ A lɛn daar a, nyɩ na lɛb'a bãwnɩ a nyɩ cen-faa nɩ a nyɩ ɩ-ɩrɩ na bɛ tɩ vɩɛl a.

³² A sɛw na kɛ́ nyɩ bãwnɩ a, a nyɩɩm zũú bɛ n'a ɩ̃ na ɩ ɛ, a mãa Sore Naaŋmɩn n'ʋ yere. Vĩ n'a a nɩ̃ɛ sɛw k'aa ɩrɛ nyɩ, a nyɩɩm Ɩsɩrayɛl nɩbɛ!

³³ À ŋá n'a a mãa Sore Naaŋmɩn yere: A lɛn daar mãa wa pɛ́w a nyɩ sãwna za bɛr nyɩ a, ɩ̃ na ɩ na a nyɩ tẽ-bɛrɛ lɛb tɛr nɩbɛ, ɛ́ a deboru na lɛb'a libri.

³⁴ Bɛ na lɛb'a kʋɔr a póru bɛ na tɩ jɛ bɛr a, ɛ́ a sɔr-tɔlbɛ kʋ̃ cãà nyɛrɛ tẽsɔwr bɛ na zawrɩ bɛr a ɩ.

³⁵ Bɛ na yere na: “A tẽ-sãwna ŋa lɩɛb'ɩ a Edɛn zaadɛ̃. A tẽ-bɛrɛ bɛ na tɩ ŋmɛr bɛr, ɛ́ jɛ bɛr a ɩ deboru a, bɛ lɛb'a mɛ a, ɛ́ nɩbɛ lɛb kpɩɛr a pʋɔ.”

³⁶ Lɛ n'a a ten al na na cãà be viiri koli nyɩ a na bãw kɛ́ mãa n'ɩ a Sore, a sob nɛ na mɩ́ lɛb mɛ a tẽ-bɛrɛ na lo a, ɛ́ lɛb sɛl a bom nɛ bɛ na vʋ̃ɔ bɛr a. A mãa Sore Naaŋmɩn n'ʋ ƴɛ̀r, ɛ́ mɩ́ tu a lɛ ɩ̃ na yel a.

³⁷ À ŋá n'a a mãa Sore Naaŋmɩn yere: Ɩ̃ na lɛb'a bɛr a Ɩsɩrayɛl nɩbɛ bɛ bʋɔlɛ mɛ̃ k'ɩ̃ɩ wa sõw bɛ, ɩ̃ɩ na sɔw bɛ na, ɩ bɛ yãwmɛ mɛ̃ zaw dʋn a.

³⁸ A koro za a, a cuw-bɛrɛ daar a, a Zerizalɛm mɩ́ tɩ ɩ n dʋn tɛwr bɛ na mɩ́ tɩ de maal'ɩ bàwr a. A mɩ́ tɩ waar'a ɩ dʋ̃-yaga yaga. A na ɩ à ŋá a, a nɩbɛ na na lɛb wa, wa kpɩɛr a nyɩ tẽ-bɛr-sãwnɩ á ŋá a mɩ̀ na yãwmɛ na. Lɛ n'a nɩr za na bãw kɛ́ mãa n'ɩ a Sore.»