Ezekɩɛl 3 - A SƐB-SÕW

¹ A sob nɛ na tɩ ƴɛ̀rɛ nɩ mɛ̃ a tɩ yel'a: «A fʋ̃ʋ, nɩsaal bie, 'wɔb a sɛbɛ ŋa na pili bɛ kʋ̀rɛ fʋ a, al pùorí, cen tɩ ƴɛ̀r a Ɩsɩrayɛl nɩbɛ zie.»

² Ɩ̃ tɩ háa nɩ a nʋɔr, ʋʋ tɩ ɩ ɩ̃ 'wɔb a sɛbɛ na pili a.

³ Ʋ tɩ yel'a ƴãw pʋɔ: «A fʋ̃ʋ nɩsaal bie, paalɩ a fʋ púor ɛ́ kʋ̀ a fʋ ƴã-gan fãw nɩ a sɛbɛ ŋa na pili ɩ̃ kʋ̀rɛ fʋ a.» Lɛ n'a ɩ̃ tɩ 'wɔb ʋ: ʋ tɩ nʋmɛ nɩ a ɩ̃ nʋɔrɩ́ mɛ̃ sɩwr a.

⁴ A sob nɛ na tɩ ƴɛ̀rɛ nɩ mɛ̃ a tɩ yel mɛ̃ na: «Ìr lo a sɔ́r, nɩsaal bie e, cen a Ɩsɩrayɛl nɩbɛ zie tɩ yel a ʋlɩ bom nɛ ɩ̃ na na yel kʋ̀ b a kʋ̀ bɛ.

⁵ Ɩ̃ bɛ tone fʋ nɩ-bʋʋrɛ na ƴɛ̀rɛ ƴɛ̀r-yũo a wob na kpɛmɛ a zie ɩ. A Ɩsɩrayɛl bʋʋrɛ zie n'a ɩ̃ tone fʋ.

⁶ Mãa tɩ tone fʋ nɩ-bʋʋr-yaga zie na ƴɛ̀rɛ ƴɛ̀r-yũo na kpɛmɛ ɛ́ fʋ kʋ̃ tʋ̃ɔ́ wõ a, bɛ nãà tɩ bɛr'a wo b.

⁷ Ɛcɛ a Ɩsɩrayɛl nɩbɛ bɛl a, bɛ kʋ̃ bɔbr kɛ́ bɛ bɛr wo b ɛ, bʋ̃ʋ n'ʋ vɛ̃, bɛ bɛ bɔbr a ɩ̃ bɛr-wob ɛ. Sɩza n'a, bɛ ko n zuru ɛ́ kpawlɩ socie.

⁸ Ɛcɛ, ɩ̃ na ɩ na fʋ kpɛ zu-kpɛnʋ mɛ̃ a bɛl a, ɛ́ a fʋ zu ko mɛ̃ a bɛ zuru a.

⁹ Ɩ̃ na ɩ na fʋ kpɛmɛ mɛ̃ kʋsɛ-bi-nyɩla bɛ na bʋɔlɛ dɩamã a, fʋ kpɛmɛ zuo pìir. A na ɩ lɛ a, ta zɔrɛ bɛ ɩ, ɛ́ ta màwr a bɛ niŋé ɩ, bʋ̃ʋ n'ʋ vɛ̃, bɛ ɩ n nɩ-gaarɩ bʋʋrɛ.»

¹⁰ Ʋ tɩ cow na: «A fʋ̃ʋ, nɩsaal bie, yuo a fʋ socir ɛ́ ƴãw tobr vla a ɩ̃ ƴɛ̀rʋ ƴãw, ɛ́ maal tɛr a vla.

¹¹ Al pùorí, cen a fʋ nɩ-bʋʋrɛ nɩbɛ bɛ na diw wa n a ka a zie. Ƴɛ̀r a bɛ zie yel: “À ŋá n'a a Sore Naaŋmɩn ƴɛ̀rɛ”. Ƴɛ̀r a bɛ zie, bɛlɛ saa bɛrɛ wone bɩɩ bɛ bɛrɛ wone fʋ a.»

¹² Lɛ n'a a vʋʋrʋ tɩ zɛw mɛ̃ ìr'ɩ a tẽw, ɩ̃ɩ tɩ wõ a ɩ̃ pùorí cɩɩrʋ kpɛ̃ɛ ŋa na cɩɩrɛ a: «A Sore, ʋlɛ so danʋ a be ʋ na mɩ́ wul a ʋ yúor-vɩɛlʋ-danʋ a.»

¹³ Ɩ̃ mɩ̀ tɩ wõ n a gɔmɛ a bʋ̃-vʋʋrɩ pɩgɛ na tɩ ŋmɩɛr taa ɩrɛ a, nɩ a gbɛ́ɛ na tɩ pɩɛlɩ a a gɔmɛ. Gɔm-kpɛ̃ɛ tɩ n'a.

¹⁴ Lɛ n'a a Vʋʋrʋ na tɩ zɛw mɛ̃ ìr'ɩ a tẽw a tɩ ɓáw mɛ̃ cen nɩ. A Sore kpɛnʋ tɩ nyɔw mɛ̃ na ɩ̃ kʋ̃ tʋ̃ɔ́ zawrɩ ɛ, ɩ̃ɩ tɩ tɔl cen nɩ socir na sãw ɛ́ dam a.

¹⁵ Ɩ̃ tɩ ta n Tɛl-Avɩvʋ, a nɩ-diw-ceni na tɩ zɩ̃ a Kebaar man nʋɔr a zie. Ɩ̃ tɩ kpɛ n a bɛ pʋɔ bibie ayopõi, gem ɩ̃ za.

A Ezekɩɛl na ɩ n zi-piwre a Ɩsɩrayɛl nɩbɛ ƴãw

¹⁶ A bibie ayopõi pùorí, a Sore tɩ ƴɛ̀r'ɩ a ɩ̃ zie. Ʋ tɩ yel mɛ̃ na:

¹⁷ «Fʋ ɩ n nɩsaal tɛwr, ɛcɛ ɩ̃ ƴãw na fʋ ɩ zi-piwre a Ɩsɩrayɛl nɩbɛ ƴãw. Fʋ na bɛrɛ na wone a ɩ̃ ƴɛ̀rʋ, ɛ́ yere a yelu ɩ̃ na yere a Ɩsɩrayɛl nɩbɛ a kʋ̀rɛ bɛ.

¹⁸ Mãa wa yel kʋ̀ a nɩ-faa: “Fʋ na kpi na” a, yel ʋ. Yel kʋ̀ ʋ k'ʋʋ bɛr a ʋ nyɔ-vʋʋr-faa tʋ̃ɔ́ vʋʋrɛ. Fʋ̃ʋ bɛ wa yel ʋ a, a nɩ-faa na kpi n a ʋ ɩ-faar ƴãw. Ɛcɛ fʋ̃ʋ a, ɩ̃ na sowri fʋ nɩ bom a ʋ kũu ƴãw.

¹⁹ Ɛcɛ, fʋ̃ʋ wa yel kʋ̀ ʋ, ʋʋ bɛ bɛr a ʋ po-tuolu nɩ a ʋ nyɔ-vʋʋr-faa a, ʋ na kpi n a ʋ ɩ-faar ƴãw, ɛ́ fʋ̃ʋ a, fʋ na faa nɩ a fʋ nyɔ-vʋʋrʋ.

²⁰ Nɩ-mɩŋa wa bɛr a ʋ mɩnʋ ɛ́ maalɛ faa a, ɩ̃ na ɩ na ʋ lo: ʋʋ na kpi na —fʋ na bɛ yel kʋ̀ ʋ a n'a so ʋ na kpi a ʋ yel-bier ƴãw—. Bɛ kʋ̃ cãà tɛr a mɩnʋ pùor ʋ na tɩ tu a tɩɛrʋ ɛ. Ɛcɛ fʋ̃ʋ n'ʋ ɩ na sowri bom a ʋ kũu ƴãw.

²¹ Ɛcɛ fʋ̃ʋ wa yel kʋ̀ nɩ-mɩŋa k'ʋʋ taa maalɛ yel-bier, ʋʋ sɩrɩ bɛ maalɩ a, ʋ na vʋʋrɛ na, bʋ̃ʋ n'ʋ vɛ̃, fʋ yel'a kʋ̀ ʋ, ɛ́ a fʋ̃ʋ a, fʋ na vʋʋrɛ na.»

A Naaŋmɩn fɛr'a ƴãw a Ezekɩɛl ʋ ɩ gbili tɩ ta tab kãw

²² A Sore fãw tɩ siw nɩ a ɩ̃ zu, ʋʋ yel mɛ̃: «Ìr, cen a bà-fʋɔla pʋɔ, ɩ̃ bɔbr'a k'ɩ̃ɩ ƴɛ̀r a fʋ zie a be.»

²³ Lɛ n'a ɩ tɩ ìr cen a bà-fʋɔla pʋɔ. A be a, a Sore yúor-vɩɛlʋ-danʋ tɩ sãá na mɛ̃ ɩ̃ na tɩ nyɛ̃ ʋ a Kebaar man nʋɔr a. Ɩ̃ tɩ lo na gbĩ dume gũu tɩ tɔ tẽw.

²⁴ Lɛ n'a a vʋʋrʋ tɩ kpɛ a ɩ̃ pʋɔ ɛ́ ɩ ɩ̃ lɛb ìr. Ʋ tɩ yel mɛ̃ na: «Kul tɩ pàw fʋ tʋɔra a fʋ yir.

²⁵ A be a, bɛ na ƴãw fʋ nɩ mie, a fʋ̃ʋ nɩsaal bie, bɛ na 'le b'ɩ 'leb fʋ kʋ̃ tʋ̃ɔ́ mɩ́ lɛb kpɛ nɩbɛ pʋɔ ɩ.

²⁶ Ɩ̃ na ɩ n a fʋ zɛl mɛr a fʋ lán, fʋ kʋ̃ tʋ́ɔr ƴɛ̀rɛ ɩ. Fʋ kʋ̃ cãà tʋ́ɔr yere a nɩ-bʋʋr-gaarɩ bɛ ŋa ɩ.

²⁷ Ɛcɛ, a lɛn daar mãa mɩ́ wa tɛr ƴɛ̀rʋ na ƴɛ̀r kʋ̀ bɛ a, ɩ̃ na yuo nɩ a fʋ nʋɔr. Lɛ n'a fʋ na mɩ́ yel kʋ̀ bɛ à ŋá: “À ŋá n'a a Sore Naaŋmɩn yere.” Sob nɛ na bɔbr k'ʋʋ bɛr wõ a, ʋ bɛrɛ wone, sob nɛ na bɛ bɔbr k'ʋʋ bɛr wõ a, ʋ ta bɛrɛ wone ɩ, bʋ̃ʋ n'ʋ vɛ̃, nɩsaal-gaarɩ nɛbɛ.»