Ezekɩɛl 27 - A SƐB-SÕW

Lãw-mʋɔlɛ na kõ a Tɩ́ɩ̀r tẽ-kpɛ̃ɛ ƴãw a

¹ A Sore tɩ yel mɛ̃ na:

² «A fʋ̃ʋ nɩsaal bie, kõ lãw-mʋɔlɛ ƴãw a Tɩ́ɩ̀r tẽ-kpɛ̃ɛ

³ na be a kʋ̃ɔ-kpɛ̃ɛ nʋɔr ɛ́ maalɛ yɛ̀rʋ́ nɩ nɩ-bʋʋr-yaga na kpɩɛr a kʋ̃ɔ-kpɛ̃ɛ-sɔgɔ-ten pʋɔ a. Yel a lɛ a mãa Sore Naaŋmɩn na yere a kʋ̀ ʋ: Tɩ́ɩ̀r tẽ-kpɛ̃ɛ ɛ, fʋ yel'ɩ à ŋá: Ɩ̃ pɔ̀l'a bɛ cɛ ɩ!

⁴ A fʋ zie cen na tɩ tɔ a kʋ̃ɔ-kpɛ̃ɛ sɔwlɩsɔw, ɛ́ a bɛlɩ dem na mɛ b a ɩ na fʋ pɔ̀l bɛ cɛ ɩ.

⁵ Bɛ mɛ b'a mɛ̃ gbor-kpɛ̃ɛ a. Bɛ de nɩ Seniir tãw sɩpɩrɛ tɩɩr maal'ɩ a fʋ ƴã-gan ziir za. Bɛ de nɩ Libã tẽw sɛɛdɩr tɩɛ kɛ́ bɛ maal'ɩ a fʋ dà-wogo.

⁶ Bɛ cɛ n Basan tẽw sɛn tɩɩr kɛ́ bɛ maal'ɩ a fʋ vue. Bɛ maal'ɩ a fʋ gàr nɩ sɛɛdɩr tɩɩr na yi Gɩrɛkɩ mɩnɛ kʋ̃ɔ-kpɛ̃ɛ-sɔgɔ-ten, ɛ́ bɛ ƴãw wɔb nyɩmɛ pɩ̃ɛmɛ a.

⁷ Bɛ wób'ɩ a fʋ pɛnɛ nɩ Eziptɩ tẽw lɛ̃ bɛ na ƴãw bʋ̃-mawrɩ a. A mɩ́ ɩ na bɛ nyɛ b zi-zãána bãw. Pɛn-zɩɩr-mʋɔlɛ nɩ pɛn-zɩɩr na yi Sɩɩpʋr kʋ̃ɔ-kpɛ̃ɛ-sɔgɔ-tẽw a pàw nɩ a fʋ yɛ̀rʋ́ bome.

⁸ Sɩdɔ̃ nɩ Aravadɩ ten nɩbɛ nɛbɛ fʋ tɩ de bɛ ɩ a gbor-duwrbɛ. Tɩ́ɩ̀r tẽw dem na bãw a tome vla a nɛbɛ tɩ kaarɛ a gbor-kpɛ̃ɛ zie.

⁹ Bɩbɩlɔsɩ tẽw nuru-tõ-tonbɛ na cɩ a tome pʋɔ, ɛ́ bãw a tome vla a nɛbɛ tɩ so a gbor-kpɛ̃ɛ maal-ƴãwfʋ. A gbor-bɛrɛ na duwre a kʋ̃ɔ-kpɛ̃ɛ zu a tɩ tɛwr'a àrɛ a fʋ zie, ɛ́ a gbor-duwrbɛ daar a fʋ yɛ̀rʋ́ bome.

¹⁰ Pɛrsɩ, Ludɩ nɩ Putɩ sojarɩ pʋɔ nɩ a fʋ zɛbr-nɩbɛ pʋɔ. Bɛ mɩ́ bin nɩ a bɛ zɛbr-kur-pãgalɩ nɩ a bɛ zɛbr-kpawʋʋr a fʋ zie. Bɛ ɩrɛ na fʋ páwr yúor.

¹¹ Aravadɩ dɛbr lãw nɩ nɩ a fʋ sojarɩ gùre a fʋ dacine, ɛ́ Gamadɩ dɛbr gùre a fʋ yir-cõcowli. Bɛ mɩ́ yawlɩ nɩ a bɛ zɛbr-kur-pãgalɩ a dacine na viiri koli fʋ a zu, ɛ́ à à ŋá n'a bɛ mɩ́ ɩ fʋ vɩɛl bɛ cɛ ɩ.»

A Tɩ́ɩ̀r tẽw n'ɩ a yɛ̀rʋ́ tẽ-kpɛ̃ɛ

¹² «A Tarsisɩ tẽw nɩbɛ maalɛ nɩ yɛ̀rʋ́ a fʋ zie nɩ na-bʋ̃-pɛ-bʋʋrɛ za. Bɛ dàar'ɩ a fʋ yɛ̀rʋ́ bome nɩ salm-pla, kure bɩɩ kur-pla mɔrmɔr nɩ kur-mɔrmɔr.

¹³ Mɔ̃ mɩ̀, Yavan, Tubal nɩ Mesɛkɩ ten maalɛ nɩ fʋ nɩ yɛ̀rʋ́. Bɛ tɩ kʋ̀rɛ fʋ nɩ yɛ̀rʋ́ bome á ŋá: gbãgbaar nɩ kur-zɩɛ bome.

¹⁴ A Bɛtɩ-Togarma tẽw nɩbɛ tɩ kʋɔrɛ nɩ fʋ nɩ tõ-tõ-wie, zɛbr wie nɩ mílɛ̀.

¹⁵ A Dedan tẽw dem mɩ̀ tɩ maalɛ nɩ fʋ nɩ yɛ̀rʋ́. A nɩbɛ na kpɩɛr a kʋ̃ɔ-kpɛ̃ɛ-sɔgɔ-ten yaga pʋɔ a waar'a wa dàar yɛ̀rʋ́ bome a fʋ zie. Bɛ mɩ́ ya b'a nɩ wɔb nyɩmɛ nɩ dàar na kpɛmɛ ɛ́ tɩbrɛ bɛ bʋɔlɛ ebɛn a.

¹⁶ A Siiri tẽw dem dàar'ɩ bʋ̃-yaga a fʋ zie, ɛ́ mɩ̀ kʋ̀rɛ fʋ kʋsɛ-bi-nyɩlɩ, gàn-vɩɛlɩ zɩɩr, gàn-mawrɩ, lɛ̃ pɛnɛ, kʋsɛ-bʋʋrɛ kãw bɛ na bʋɔlɛ koraɩ nɩ iribi a.

¹⁷ A Zuda nɩ a Ɩsɩrayɛl ten nɩbɛ dàar'ɩ bome a fʋ zie, ɛ́ mɩ́ kʋɔr'ɩ fʋ Minitɩ tẽw ble, ci, sɩwr, kãá nɩ tɩ-suur-zɔ̃-na-nyùur-vla-vla-a.

¹⁸ A Damasɩ tẽw dem dàar'ɩ a bʋ̃-yaga fʋ na maalɛ bɛ dɩ vuo a, nɩ na-bʋ̃-pɛ-bʋʋrɛ za. Bɛ mɩ́ ya b'a nɩ Hɛlbon tẽw divɛ̃ nɩ Sahaar tẽw píir kɔblʋ.

¹⁹ A Dan nɩ Yavan dɔwlʋ nɩbɛ na tɩ be a Uzal tẽ-kpɛ̃ɛ pʋɔ a mɩ́ tɩ ya n a alɩ bome nɛ a na fɛr kɛ́ bɛ kʋ̀ b a nɩ kure bɛ na zuw ír a, kanɛl tɩ-pɛgɛ zɔ̃ nɩ bàa-kɛkɛɛ na nyùur vla vla a.

²⁰ A Dedan nɩbɛ tɩ kʋɔrɛ nɩ fʋ nɩ gàn-vaarɩ wie zɔmnʋ ƴãw.

²¹ A Arabi tẽw nɩ a Kedaar tẽw nɩ-bɛrɛ tɩ n'ɩ a fʋ bʋ̃-daarbɛ. Bɛ mɩ́ tɩ ya b'a nɩ péli, píir nɩ bʋʋr.

²² A Saba nɩ a Araema ten yɛ-yɛrbɛ kʋɔrɛ nɩ fʋ nɩ bome. Bɛ mɩ́ dà a na, ɛ́ kʋɔr'ɩ fʋ parfɛ̃ na vɩɛl vɩɛl a, kʋsɛ-bi-nyɩlɩ bʋʋrɛ bʋʋrɛ za nɩ salm-zɩɛ.

²³ A Haran, a Kane nɩ a Edɛn tẽ-bɛrɛ, a Saba tẽw yɛ-yɛrbɛ, a Asuur nɩ a Kilimadɩ tẽ-bɛrɛ kʋɔrɛ nɩ fʋ nɩ bome.

²⁴ Bɛ kʋɔrɛ nɩ fʋ nɩ bʋ̃-suuri a dàarʋ na kpɛmɛ a. Bɛ mɩ́ wa n nɩ a fʋ kʋɔrʋ zie bʋ̃-suur-vɩɛlɩ zɩɩr-kãbalɩ, kpar-mawrɩ, tẽsɔw pɛn-yɛrɩ bʋʋrɛ bʋʋrɛ, mie bɛ na pal a kpɛ a.

²⁵ Gbor-bɛrɛ n'a tuore a fʋ yɛ̀rʋ́ bome.» «Fʋ tɩ paal'ɩ yɛ̀rʋ́ bome, tuo to-tɩbrʋ tɩbrʋ a kʋ̃ɔ-kpɛ̃ɛ sɔwlɩsɔw.

A lãw-mʋɔlɛ ŋmãa na cɛ a Tɩ́ɩ̀r tẽw ƴãw a

²⁶ A fʋ gbor-duwrbɛ tɛr fʋ na cen nɩ a kʋ̃ɔ-zulu pʋɔ, ɛ́ a kʋ̃ɔ-kpɛ̃ɛ sɔwlɩsɔw a, a saa-pɛrɩ́ sɛsɛb ŋmɛ b'a ka.

²⁷ A fʋ bʋ̃-dɩrɩ, a fʋ yɛ̀rʋ́ bome, a fʋ tɛra za, a gbor-duwrbɛ na be a gbor-kpɛ̃ɛ pʋɔ a, a nuru-tõ-tonbɛ na tɩ maalɛ a fʋ gbee ƴãwn a, a yɛ-yɛrbɛ na kaarɛ a fʋ yɛ̀rʋ́ zie a, a sojarɩ na tone a fʋ tome a, a zu-sɛbla na tɩ be a gbor-kpɛ̃ɛ pʋɔ a, a kʋ̃ɔ-kpɛ̃ɛ kʋ̃ɔ lim'ɩ a za, a lɛn daar a gbor na tɩ tu kʋ̃ɔ a.

²⁸ A fʋ gbor-duwrbɛ na mɩ́ wa ŋmɩɛr cɛlsɩ a, a bɛlɩ dem na kpɩɛr a kʋ̃ɔ-kpɛ̃ɛ nʋɔr a mɩ́ màwr'a.

²⁹ Lɛ n'a, a bɛlɩ dem za na tɛr a gbor-vue a na yi na ɛ́ bɛr a bɛ gbor-bɛrɛ. A gbor-duwrbɛ nɩ a nɩbɛ za na be a gbor pʋɔ a na siw nɩ tẽsɔw.

³⁰ Bɛ kone na ƴãwn fʋ, kone zɛbr'ɩ. Bɛ 'wɔ̃w nɩ tanɛ ƴãw a bɛ zurú, ɛ́ ɓiile a tãpɛlʋ pʋɔ.

³¹ A fʋ̃ʋ ƴãw a, bɛ na fɔr'ɩ a zu, ɛ́ su ko-tuolu bʋ̃-suuri. Bɛ na kone na ƴãwn fʋ, bɛ na kone nɩ lãw-mʋɔl-tʋlʋ.

³² A bɛ kpɩɛrʋ pʋɔ a, bɛ na kone nɩ lãw-mʋɔlɛ ƴãwn fʋ, bɛ na kone na yere nɩ: “Ãa n'ʋ tɩ ŋmɛ̃ mɛ̃ a Tɩ́ɩ̀r tẽw a kʋ̃ɔ-kpɛ̃ɛ sɔwlɩsɔw?”

³³ Fʋ na mɩ́ tɩ wɩlɛ a fʋ yɛ̀rʋ́ bome a, nɩ-bʋʋr-yaga mɩ́ tɩ páw nɩ bʋ̃-páwrɩ. A fʋ tɛra na bɛ gbʋ́r a nɩ a fʋ yɛ̀rʋ́ bome tɩ ƴãw nɩ a tẽw zu na-mɩnɛ tɛra pʋɔ.

³⁴ Ƴɛrɛŋa a, kʋ̃ɔ-mie ŋmɛ b'a ŋmɛr, a ɩ na fʋ bɔr a kʋ̃ɔ-zulu pʋɔ. A fʋ yɛ̀rʋ́ bome nɩ a fʋ nɩbɛ za lãw na lim'ɩ fʋ a kʋ̃ɔ-zulu pʋɔ.

³⁵ Nʋɔr ɓãa nɩ a bɛlɩ dem na kpɩɛr a kʋ̃ɔ-kpɛ̃ɛ-sɔgɔ-ten pʋɔ a, a fʋ ƴãw. A bɛ na-mɩnɛ màwr'ɩ dɛ̃bɩ̃-mawfʋ, niwn sɔb bɛ na.

³⁶ A nɩ-bʋʋr-sãanbɛ yɛ-yɛrbɛ nʋɔr ɓãa na, bɛ fuole ƴãwn fʋ. Fʋ lɩɛb'ɩ dɛ̃bɩ̃-bom, fʋ bɔr'a a nʋɔr kʋ!»