Ezekɩɛl 26 - A SƐB-SÕW

Naaŋmɩn-ƴɛ̀r-manɛ ƴɛ̀rʋ na ƴɛ̀r Tɩ́ɩ̀r tẽw ƴãw a

¹ A diw-cenu pùorí yome pie nɩ been sob, a cuw bibi-dãw-niwn sob, a Sore tɩ ƴɛ̀r'ɩ a ɩ̃ zie à ŋá:

² «A fʋ̃ʋ nɩsaal bie, bɛrɛ wone! A bɛlɩ dem na kpɩɛr a Tɩ́ɩ̀r tẽw a ɩrɛ nɩ a Zerizalɛm laar. Bɛ yere na: “Ha, háa! Bɛ sãw ʋ na bɛr, a tẽ-kpɛ̃ɛ ʋl pʋɔ a nɩ-bʋʋrɛ za na tɩ tuur tɔlɛ a! Tɩɩm n'a cɛ na kpɛ a naalʋ. Bʋ̃ʋ n'ʋ vɛ̃, a Zerizalɛm ɩ n debuo!”

³ A na ɩ à ŋá a, a mãa Sore Naaŋmɩn yere na: Ɩ̃ waar'ɩ a fʋ ƴãw, Tɩ́ɩ̀r tẽw i. Ɩ̃ na ɩ n nɩ-bʋʋr-yaga ìr a fʋ ƴãw mɛ̃ kʋ̃ɔ-kpɛ̃ɛ na mɩ́ ɩ a ʋ kʋ̃ɔ mie ìr a.

⁴ Bɛ na ŋmɛ n a fʋ dacine lɔb ɛ́ da a fʋ yir-cõcowli lɔb. Ɩ̃ na wob'ɩ a fʋ kʋsɛ-ŋmɛrsɩ za, a fʋ pìir tɛwr'ʋ ɩ̃ na bɛr ʋ gã kpõlõkpõlõ.

⁵ A Tɩ́ɩ̀r tẽw na ɩ n zie a kʋ̃ɔ-kpɛ̃ɛ sɔwlɩsɔw, a zʋm-nyɔwrbɛ na mɩ́ dɩ̀ɛlɩ a bɛ mɩ̃ɛ a ko a. A mãa Sore Naaŋmɩn n'ʋ ƴɛ̀rɛ, ɛ́ a lɛ n'a ɩ̃ yere. Nɩ-bʋʋr-yoru na wa na wa za a Tɩ́ɩ̀r tẽ-kpɛ̃ɛ.

⁶ Bɛ na sãw nɩ a tẽ-bɛr-kpɔwlɩ bɛr a kʋ̃ɔ-kpɛ̃ɛ nʋɔr. Lɛ n'a nɩr za na bãw kɛ́ mãa n'ɩ a Sore.

⁷ Sɩza, a mãa Sore Naaŋmɩn yere na: Tɩ́ɩ̀r tẽ-kpɛ̃ɛ ɛ, ɩ̃ na ɩ n a Babɩlɔn tẽw nãà, Nabikodonozɔɔr, na kpɛmɛ zuo a na-mɩnɛ za a, ʋ yi a saa-pɛrɩ́-gʋba-lowr wa a fʋ ƴãw. Ʋ na wa n nɩ wie, zɛbr-torkori, wi-zɔmnbɛ nɩ zɛbr-nɩbɛ yaga yaga wa zɛb'ɩ fʋ.

⁸ Ʋ na sãw nɩ a tẽ-bɛr-kpɔwlɩ a kʋ̃ɔ-kpɛ̃ɛ nʋɔr bɛr. A pùorí, a Babɩlɔn tẽw dem na wɛ̀r'ɩ bɔwrɩ, bɛ na kaal'ɩ tanɛ gbõ taa, bɛ na pɩɛrɩ nɩ zɛbr-kur-pãgalɩ dacin a fʋ ƴãw, Tɩ́ɩ̀r tẽ-kpɛ̃ɛ ɛ.

⁹ Bɛ na da n a fʋ dacine lɔb nɩ zɛbr bome, bɛ na sãw nɩ a fʋ yir-cõcowli bɛr nɩ kure dàar.

¹⁰ A uuru a bɛ wi-yaga na na 'wɔ̃w a na pàw fʋ na, a fʋ dacine na dam'ɩ a bɛ wi-zɔmnbɛ gɔmɛ nɩ a bɛ torkori zɔba zũú. Bʋ̃ʋ n'ʋ vɛ̃, bɛ na kpɛ n a fʋ dɩ̃dɛɛ ƴãw mɛ̃ bɛ na mɩ́ puo dacin ɛ́ kpɛ tẽ-kpɛ̃ɛ pʋɔ a.

¹¹ Bɛ na nɛb'ɩ a fʋ sɛ́ɛ tẽsɔw ɓuoli nɩ a bɛ wie gbɛ-nafɩlɛ, bɛ na kʋ n a bɛlɩ dem na kpɩɛr a fʋ pʋɔ a nɩ zɛbr-sɔ-kpɛ̃ɛ, ɛ́ ɩ a fʋ kpul-kpɛn kpɛn lo tẽw.

¹² Bɛ na zu n a fʋ tɛra ɛ́ za a fʋ yɛ̀rʋ́ bome. Bɛ na dá n a fʋ dacine lɔb ɛ́ sãw a fʋ yir-vɩɛlɩ vɩɛlɩ bɛr. Bɛ na de nɩ a kʋsɛbɛ, a dàar nɩ a bʋ̃-ŋmaarɛ al na na cɛ a, lɔb a ƴãw a kʋ̃ɔ-kpɛ̃ɛ pɛrɩ́.

¹³ Ɩ̃ na ɩ n a fʋ yielu nʋɔr kʋ, bɛ kʋ̃ cãà wone a fʋ pɛ̀nɩ́ kon ɛ.

¹⁴ Ɩ̃ na ɩ na fʋ ɩ pì-kpolõkpolõ, zie a zʋm-nyɔwrbɛ na na mɩ́ dɩ̀ɛlɩ a bɛ mɩ̃ɛ a ko a. Bɛ kʋ̃ lɛb mɛ b ɛ. Sɩza, a mãa Sore Naaŋmɩn n'ʋ ƴɛ̀rɛ, ɛ́ a lɛ n'a ɩ̃ yere.

¹⁵ À ŋá n'a a mãa Sore Naaŋmɩn ƴɛ̀rɛ a Tɩ́ɩ̀r tẽ-kpɛ̃ɛ zie: A lɛn daar bɛlɛ wa sãw fʋ bɛr a, bɛ na kʋ n a nɩbɛ za a fʋ dacine sɔwlɩsɔw, ɛ́ bɛ na wone nɩ a bàalbɛ na kone 'woi 'woi a. A lɛn daar a, a bɛlɩ dem na kpɩɛr a kʋ̃ɔ-kpɛ̃ɛ-sɔgɔ-ten na zãá a pʋɔ a na màwr'ɩ dɛ̃bɩ̃-mawfʋ.

¹⁶ A kʋ̃ɔ-kpɛ̃ɛ nʋɔr nɩbɛ na-mɩnɛ na siw nɩ a bɛ naalʋ-dà-kɔwr zu, bɛ na yaa nɩ a bɛ bʋ̃-suur-vɩɛlɩ vɩɛlɩ nɩ a bɛ kpar-mawrɩ bɛr. Bɛ na ɩ n dɛ̃bɩ̃ɛ tɛwr, ɛ́ bɛ na zɩ̃ n tẽsɔw. Bɛ kʋ̃ bɛr a mawfʋ ɛ, ɛ́ pʋl-vʋ̃ɔ na tɛr bɛ nɩ yaga za a fʋ zũú.

¹⁷ Bɛ na kõ n a lãw-mʋɔlɛ ŋa a fʋ ƴãw: “'Woi, bɛ sãw ʋ na bɛr, a tẽ-kpɛ̃ɛ-yúor ŋa, ʋ bɔr'ɩ a kʋ̃ɔ-bɛrɛ sɔgɔ! A bɛlɩ dem na kpɩɛr a fʋ pʋɔ a tɩ kpɛmɛ nɩ a kʋ̃ɔ-kpɛ̃ɛ zu, ɛ́ a nɩbɛ za tɩ zɔrɛ bɛ.

¹⁸ Ƴɛrɛŋa a, a kʋ̃ɔ-kpɛ̃ɛ nʋɔr nɩ-bʋʋrɛ màwr'a fʋ na bɛ cãà a zũú, a bɛlɩ dem na kpɩɛr a kʋ̃ɔ-kpɛ̃ɛ-sɔgɔ-ten pʋɔ a, pʋl-vʋ̃ɔ tɛr bɛ na, fʋ na bɔr a zũú.”

¹⁹ Sɩza, a mãa Sore Naaŋmɩn yere na: Ɩ̃ na ɩ na fʋ ɩ mɛ̃ a tẽ-bɛrɛ al bɛ na sãw bɛr a, al pʋɔ nɩbɛ na bɛ cãà kpɩɛr a. Ɩ̃ na ɩ n kʋ̃ɔ yaga yaga yi a kʋ̃ɔ-kpɛ̃ɛ pɛrɩ́ do wa vɔl fʋ.

²⁰ Ɩ̃ na ɩ na fʋ siw a kpɩmɛ tẽw, nɩ a bɛl na be a yarʋ pʋɔ a, ɛ́ fʋ na tɩ páw nɩ a koro za nɩbɛ. Ɩ̃ na ɩ na fʋ kpɩɛr a tẽsɔw pʋ̃ɔmɩ. Fʋ na ŋmɛ̃ na taa nɩ a kʋsɛ-kore, fʋ na lãw nɩ nɩ a bɛlɩ dem na be a yarʋ pʋɔ a. Fʋ kʋ̃ tʋ̃ɔ́ lɛb yi do ɩ, ɛ́ kʋ̃ lɛb páw vuo a nɩ-vʋʋrɩ tẽw zu ɛ.

²¹ A nɩbɛ za na màwr'ɩ dɛ̃bɩ̃-mawfʋ a fʋ ƴãw, fʋ na kʋ̃ cãà a zũú. Bɛ na bɔbr fʋ na, ɛcɛ nɩr za bɛ be nãà lɛb wa nyɛ b ɛ, a mãa Sore Naaŋmɩn n'ʋ yere.»