Ezekɩɛl 25 - A SƐB-SÕW

NAAŊMƖN NA DƖ N NƖ A NƖ-BƲƲR-YORU ƳƐ̀RƲ 25—32 Naaŋmɩn-ƴɛ̀r-manɛ ƴɛ̀rʋ na ƴɛ̀r Amɔ̃ tẽw dem ƴãw a

¹ A Sore tɩ yel mɛ̃ na:

² «A fʋ̃ʋ nɩsaal bie, lɩɛb a fʋ niwn cɔw a Amɔ̃ tẽw dem ɛ́ ƴɛ̀r naaŋmɩn-ƴɛ̀r-manɛ ƴɛ̀rʋ kʋ̀ bɛ a ɩ̃ yúor ƴãw.

³ Yel kʋ̀ bɛ kɛ́ bɛ bɛrɛ wone a ƴɛ̀rʋ á ŋá a mãa Sore Naaŋmɩn na ƴɛ̀rɛ kʋ̀rɛ bɛ a: A lɛ a nɩbɛ na tɩ ɩ a ɩ̃ zi-sõw la a, a lɛ bɛ na tɩ sãw a Ɩsɩrayɛl tẽw bɛr a, a lɛ a bɛl na kpɩɛr a Zuda tẽw a na tɩ cen a diw-cenu zie a, nyɩ tɩ la n vla vla.

⁴ À à ŋá ƴãw a, ɩ̃ na bɛr'ɩ a saa-pɛrɩ́ nɩ-yʋɔrɩ bɛ de a nyɩ tẽw. Bɛ na maal'ɩ a bɛ laɩ a nyɩ zie, bɛ na ba n a bɛ pɛnɛ-sɛwr a nyɩ zie. Bɛlɛ nɛbɛ na dɩrɛ a nyɩ tɩɩr wɔmɛ ɛ́ nyúur a nyɩ bʋ̀rʋ.

⁵ Ɩ̃ na ɩ na a nyɩ tẽ-kpɛ̃ɛ Araba ʋ ɩ nyɔ̃wmɩ mʋ̃ɔ 'wɔbrʋ zie. A Amɔ̃ tẽw za na lɩɛb'ɩ píir àrʋ zie. Lɛ n'a nyɩ na bãw kɛ́ mãa n'ɩ a Sore.

⁶ À ŋá n'a a mãa Sore Naaŋmɩn yere: Nyɩ ŋmɛ n nuru ɛ́ ƴaw nʋ̃ɔ̀ ƴawfʋ nyɩ na wõ a Ɩsɩrayɛl kpɩɛrʋ a. À à ŋá a, nyɩ wul'ɩ jewru na ɩ jewru a, a ɩ̃ nɩ-bʋʋrɛ.

⁷ À à ŋá a, ɩ̃ na zɛw nɩ nũu a nyɩ ƴãw, ɩ̃ na bɛr nyɩ na kʋ̀ nɩ-bʋʋr-yoru bɛ fa nyɩ. Ɩ̃ na ɩ na a nyɩ nɩ-bʋʋrɛ bɛ cãà ɩ, ɩ̃ na ɩ na a nyɩ tẽw bɔr, ɩ̃ na sãw nyɩ na bɛr nɩr bɛ tɩ cɛ ɩ. Lɛ n'a nyɩ na bãw kɛ́ mãa n'ɩ a Sore.»

Naaŋmɩn-ƴɛ̀r-manɛ ƴɛ̀rʋ na ƴɛ̀r Mowab tẽw dem ƴãw a

⁸ «À ŋá n'a a mãa Sore Naaŋmɩn yere: A Mowab tẽw dem yel'a: “A Zuda tẽw nɩ-bʋʋrɛ ɩ na mɛ̃ a nɩ-bʋʋrɛ za a”.

⁹ À à ŋá ƴãw a, ɩ̃ na ɩ n zɛbr lo a tẽ-bɛrɛ al na gùre a Mowab tẽw dɩ̃dɔr a zu. A dɔ̃ dem na sãw a na bɛr been been, tɩ lãwnɩ a al na vɩɛl zuo a za a: a Bɛtɩ-Yesimɔtɩ, a Baal-Mewon nɩ a Kiriyatayim.

¹⁰ Ɩ̃ na bɛr'ɩ a saa-pɛrɩ́ nɩ-yʋɔrɩ bɛ de a Mowab tẽw mɛ̃ a lɛ bɛ na de a Amɔ̃ tẽw a. Lɛ n'a nɩr kʋ̃ cãà tɛr a Mowab tẽw tɩɛrʋ a nɩdaar ɛ.

¹¹ Ɩ̃ na dɩ n nɩ a Mowab tẽw dem a ƴɛ̀rʋ, ɛ́ lɛ n'a bɛ na bãw kɛ́ mãa n'ɩ a Sore.»

Naaŋmɩn-ƴɛ̀r-manɛ ƴɛ̀rʋ na ƴɛ̀r Edɔm tẽw dem ƴãw a

¹² «À ŋá n'a a mãa Sore Naaŋmɩn yere: A Edɔm tẽw dem yáa nɩ a san faa faa a Zuda tẽw nɩbɛ zu, ɛ́ alɛ n'a so bɛ ɩ sãwna dem.

¹³ À à ŋá ƴãw a, ɩ̃ yere na, a mãa Sore Naaŋmɩn: Ɩ̃ na dɔl'ɩ nũu a Edɔm ƴãw. Ɩ̃ na ɩ na a tẽw ŋa nɩbɛ nɩ a dʋn kpi, ɩ̃ na sãw ʋ na bɛr, yi n a Teman tẽ-kpɛ̃ɛ́ ɛ́ tɩ tɔ a Dedan tẽ-kpɛ̃ɛ́. A nɩbɛ na kpɩɛr a ʋ pʋɔ a na kpi n zɛbr zie.

¹⁴ Ɩ̃ na bɛr'ɩ a ɩ̃ nɩ-bʋʋrɛ Ɩsɩrayɛl bɛ yáa a ɩ̃ san a Edɔm tẽw dem zie. A Ɩsɩrayɛl nɩbɛ na ɩ bɛ na mɛ̃ a lɛ a ɩ̃ su-tʋlʋ kpãkpã na bɔbr a. Lɛ n'a bɛ na bãw kɛ́ a ɩ-sãw-mɛ̃ 'wɔbr'a. A mãa Sore Naaŋmɩn n'ʋ yere.»

Naaŋmɩn-ƴɛ̀r-manɛ ƴɛ̀rʋ na ƴɛ̀r Filisɩtɛ̃ mɩnɛ ƴãw a

¹⁵ «À ŋá n'a a mãa Sore Naaŋmɩn yere: A Filisɩtɛ̃ mɩnɛ ɩ n a ɩb nɩ san-yaafʋ tɩɛrʋ. Bɛ nyar'ɩ niwn ɛ́ yáa a san a bɛl bɛ na hɩ̃ɛn koro kãw za a zu, ɛ́ sãw bɛ bɛr.

¹⁶ À à ŋá ƴãw a, nyɛ̃ a lɛ a mãa Sore Naaŋmɩn na yere a: Ɩ̃ na zɛw nɩ nũu a bɛ ƴãw. Ɩ̃ na kʋ n a Filisɩtɛ̃ mɩnɛ, a Kafɩtɔɔr nɩbɛ bɛ ŋa na zɩ̃ a kʋ̃ɔ-kpɛ̃ɛ nʋɔr a.

¹⁷ Ɩ̃ na ɩ n san-yaafʋ na bɛ dɩ vuo a, nɩ dɔwrʋ na bɛ tɛr manʋ a, a lo a bɛ zu. Lɛ n'a bɛ na bãw kɛ́ mãa n'ɩ a Sore.»