Ezekɩɛl 23 - A SƐB-SÕW

A Samaari tẽw tõ n pɔw-yɛm tome

¹ A Sore tɩ yel mɛ̃ na:

² «A fʋ̃ʋ nɩsaal bie, bɛrɛ wone yɛ-pɔwbɛ ayi na lãw mã been a yele.

³ Bɛ na tɩ ɩ pɔw-sɩrɩ a, bɛ tõ n pɔw-yɛmɛ tome a Eziptɩ tẽw bɛ na tɩ be a. A be a, dɛbr tɩ tɛblɩ nɩ a bɛ bɩrɛ ɛ́ gbaalɩ a bɛ pɔwsɩ-nyarʋ.

⁴ A yeepuul-kpɛ̃ɛ yúor tɩ dɩ na kɛ́ Ohola, ɛ́ a bile yúor dɩ kɛ́ Oholiba. A dãw-niwn sob a, Samaari n'ʋ, ɛ́ a bile ɩ Zerizalɛm. Ɩ̃ tɩ kul'ɩ bɛ za ayi, ɛ̀ bɛ dɔw dɛbli nɩ powli kʋ̀ m.

⁵ Ɛcɛ, a Ohola tɩ tõ n pɔw-yɛm tome ɩ̃ na saa tɩ so ʋ a. Ʋ tɩ nɔ̃w nɩ a ʋ kpɛ-pɩɛl dem yaga za, a Asiiri tẽw dem, ɛ́ tɩ ír a ʋ sɛnbɛ a bɛ pʋɔ.

⁶ Bɛ tɩ suur'ɩ kpar-vɩɛlɩ zɩɩr zɩɩr, bɛ na tɩ ɩ na-kpɛ̃ɛ-lɩɛrbɛ nɩ ƴɛ̀r-dɩrbɛ a zũú. Bɛ za tɩ ɩ n pɔlbili bɛ na mɩ́ nyɛ̃ kpiir lore a, ɛ́ tɩ ɩ wi-zɔm-karɩ.

⁷ A Ohola tõ n pɔw-yɛm tome nɩ a Asiiri tẽw tõ-tõ-bi-bɛr-yée bɛ ŋa. Daar nɛ za a dɛbr bɛ ŋa kãw vʋla na mɩ́ wa kpɩɛr ʋ yaga za a, ʋ mɩ́ dɛw nɩ ʋ tʋɔra bɛr a bɛ ŋmɩn-bɛlɛbɛlɛ puoru pʋɔ.

⁸ Ʋ cãà na cow tone a pɔw-yɛm tome mɛ̃ ʋ na tɩ tõ a Eziptɩ tẽw pʋɔ a. A be a, ʋ tɩ ɩ n pɔwsɩrale, dɛbr tɩ ganɛ nɩ ʋ na, bɛ tɩ gbaalɛ nɩ a ʋ pɔwsɩ-nyãa, bɛ tɩ ƴãw na ʋ bʋnɩ vʋʋrɛ sãsaralɛ.

⁹ Lɛ n'a ɩ̃ tɩ jɛ ʋ bɛr a ʋ sɛnbɛ nuru pʋɔ, a Asiiri tẽw dem ʋ na tɩ nɔnɛ a.

¹⁰ Bɛ tɩ yaar'ɩ a ʋ bʋ̃-suuri za kpɛ̃lɛ̃kpɛ̃lɛ̃ bɛr, ɛ́ kʋ ʋ nɩ zɛbr-sɔ-kpɛ̃ɛ. Bɛ de nɩ a ʋ bidɛbr nɩ a ʋ pɔwyaar. À à ŋá n'a bɛ dɔwrɩ ʋ. A Ohola yele ɩ n wulu a pɔwbɛ na cɛ a zie.»

A Zerizalɛm tõ n pɔw-yɛm tome

¹¹ «A ʋ yɛb Oholiba tɩ nyɛ̃ nɩ à á ŋá za. Ɛcɛ, a ʋ socir vʋla pʋɔ a, ʋ tɩ kpɛ n faa zuo a Ohola. A ʋ pɔw-yɛm tome tɩ zuo nɩ a ʋ yɛb dem.

¹² A ʋ socir tɩ nɔ̃w nɩ a ʋ kpɛ-pɩɛl dem yaga za, a Asiiri tẽw dem. Tõ-tõ-bi-bɛrɛ nɩ ƴɛ̀r-dɩrbɛ na mɩ́ su kpar-vɩɛlɩ vɩɛlɩ a tɩ nɛbɛ. Bɛ tɩ ɩ n wi-zɔm-karɩ, bɛ za pɔlbili, ɛ́ pɔ̀l bɛ mɩ́ nyɛ̃ kpiir lore.

¹³ Ɩ̃ tɩ nyɛ̃ na ʋ mɩ̀ dɛw ʋ tʋɔra bɛr: a yɛb-pɔwbɛ bɛ za ayi tɩ lo n sɔr-been!

¹⁴ Ɛcɛ a Oholiba pɔw-yɛm tome tɩ kpɛ n faa zuo a ʋ yɛb dem. Bibir kãw, ʋ tɩ nyɛ̃ nɩ dɛbr bɛ na maalɩ ɛ́ bʋl'ɩ bʋ̃-zɩɩr dacin zu a. Bɛ tɩ ɩ n Babɩlɔn tẽw dem.

¹⁵ Kpàgɛ tɩ 'lẽ nɩ a bɛ sɩɛmɩ́, zu-pɛn-vili tɩ 'lẽ nɩ a bɛ zurú. Bɛ tɩ ŋmɛ̃ na taa nɩ zɛ-zɛbrbɛ na pɔ̀l a. A nɩbɛ na kpɩɛr a bɛ tẽw Babɩlɔn a ŋmɛ̃a tɔr za n'a bɛ tɩ ŋmɛ̃.

¹⁶ A Oholiba na dɛ tɩ nyɛ̃ bɛ a, a bɛ vʋla tɩ kpɛ ʋ na, ʋ tõ nɩbɛ a bɛ tẽw.

¹⁷ Lɛ n'a a Babɩlɔn tẽw dem tɩ wa wa gã nɩ ʋ, ɩ ʋ ɩ dɛwr sob. Ʋ na tɩ sãw a ʋ nyɔ-vʋʋrʋ bɛr'ɩ bɛ a, ʋ tɩ jewri bɛ na.

¹⁸ Ʋ tõ n pɔw-yɛm tome a nɩbɛ za niŋé, ʋ wul'ɩ a ʋ ƴã-gã-kpãkpol. Lɛ n'a ɩ̃ tĩ jewre ʋ mɛ̃ ɩ̃ na tɩ jewri a ʋ yɛb a.

¹⁹ Ɛcɛ, ʋ tɩ tõ n a pɔw-yɛm tome lɛb bãw dɔwlɩ, mɛ̃ ʋ na tɩ tõ a Eziptɩ tẽw a ʋ pɔ̀lʋ̀ daarɩ́ a.

²⁰ A be a, ʋ tɩ nɔ̃w nɩ dɛbr na bʋnɩ vʋʋrɛ sãsaralɛ a yaga za. A bɛ dɛblʋ yel-bɔbrɩ tɩ ŋmɛ̃ na mɛ̃ a dʋn dem a. Bòn nɩ wie tɩ nɛbɛ ɛ́ bɛ bʋɔlɛ bɛ nɩsaalbɛ.»

A Sore na ìr'ɩ a Zerizalɛm ƴãw

²¹ «Oholiba a, fʋ lɛb'a tĩ bʋnɩ vʋʋrɛ sãsaralɛ mɛ̃ a fʋ pɔ̀lʋ̀ daarɩ́ a: A lɛn daar a, fʋ mɩ́ tɩ bɛr'ɩ a Eziptɩ tẽw dem bɛ tɛblɛ a fʋ bɩrɛ ɛ́ gbaalɛ a fʋ pɔwsɩ-nyãa.

²² Alɛ n'a so a mãa Sore Naaŋmɩn, ɩ̃ yere à ŋá kʋ̀rɛ fʋ: Ɩ̃ na dɔ n a fʋ sɛnbɛ ƴãw fʋ, a bɛl fʋ na tɛr lɛɛ tɩ jewre a. Ɩ̃ na ɩ na bɛ yi a ziir za wa ɓã taa a fʋ ƴãw.

²³ Ɩ̃ na ɩ na a Babɩlɔn tẽw dem wa, a Kalde tẽw dem za, a bɛlɩ dem na kpɩɛr a Pekɔdɩ, a Soa nɩ a Koa a, ɛ́ a Asiiri tẽw dem na lãw na wa n bɛ. Ɩ̃ na ɓã n a nɩbɛ bɛ ŋa taa, na ɩ pɔlbili ɛ́ pɔ̀l bɛ mɩ́ nyɛ̃ àr gù, na-kpɛ̃ɛ-lɩɛrbɛ nɩ ƴɛ̀r-dɩrbɛ, zɛ-zɛbrbɛ nɩ tõ-tõ-bi-bɛr-yée, wi-zɔm-karɩ bɛ za a.

²⁴ Bɛ na yi n saa-pɛrɩ́-gʋba-lowr wa nɩ torkori, nɩ bʋ̃-zɔrɩ pɛ-bʋʋrɛ za, nɩ zɛbr-nɩ-yaga. Zɛbr-kur-pãgalɩ nɩ zɛbr-kpawʋʋr na piw bɛ na tɛr. Bɛ na jil'a koli fʋ a lõbowe za. Ɩ̃ na man bɛ nɩ a fʋ yele, ɛ́ bɛ na dɩ n fʋ nɩ ƴɛ̀rʋ tu n a bɛ nɛ́ɛ.

²⁵ Oholiba a, ɩ̃ na nyɛ̃ nɩ fʋ nɩ suur, alɛ n'a so bɛ na ɩb nɩ po-to-fãw. Bɛ na ŋmãa nɩ a fʋ nyʋɔr nɩ a fʋ tobe. Bɛ na kʋ n a bɛlɩ dem na kpɩɛr a fʋ pʋɔ a nɩ zɛbr-sɔ-kpɛ̃ɛ. Bɛ na de nɩ a fʋ bidɛbr nɩ a fʋ pɔwyaar, ɛ́ a bɛl na na cãà vʋʋrɛ a, bɛ na nyɩw bɛ na.

²⁶ Bɛ na faa nɩ a fʋ bʋ̃-suuri nɩ a fʋ pɩ̃ɛmɛ.

²⁷ Oholiba a, ɩ̃ na ɩ na a fʋ vĩ-yele nɩ a fʋ pɔw-yɛm nyɔ-vʋʋrʋ fʋ na tɩ tĩ a Eziptɩ tẽw a, a baarɩ. Fʋ kʋ̃ lɛb jɩ́rɛ a dɛbr ɛ́ kʋ̃ lɛb tɩɛrɛ a Eziptɩ tẽw dem ɛ.

²⁸ A mãa Sore Naaŋmɩn yere na: Ɩ̃ na zawrɩ fʋ na bɛr ƴãw a bɛl fʋ na hɩ̃ɛn a, nuru pʋɔ, a bɛl fʋ na jewre a nuru pʋɔ.

^29-30 Bɛ na maalɩ fʋ nɩ faa yaga, bɛ na hɩ̃ɛn fʋ a ƴãw. Bɛ na zu n a bome za fʋ na tõ páw a. Bɛ na bɛr fʋ nɩ ƴã-gã-kpãkpol, ɛ́ nɩsaal za na nyɛ̃ nɩ a fʋ pɔw-yɛm vĩ-ɩb. Nyɛ̃ a ʋlɩ bom nɛ na n'ʋ so bɛ na ɩrɛ fʋ à à ŋá: Fʋ vʋʋr'ɩ sãsaralɛ, fʋ bʋnɩ na gã nɩ nɩr za, fʋ tõ n pɔw-yɛm tome a nɩ-bʋʋr-yoru dɛbr zie, fʋ puor'ɩ a bɛ ŋmɩn-bɛlɛbɛlɛ ɩ dɛwr sob.

³¹ Fʋ cɔwr'ɩ a fʋ yɛb Ohola, alɛ n'a so ɩ̃ na ɩ fʋ mɩ̀ nyũ a ɩ̃ suur koli-nyúura mɛ̃ a ʋl a.

³² À ŋá n'a a mãa Sore Naaŋmɩn yere: Fʋ na nyũ n a koli-nyúura been nɛ mɛ̃ a fʋ yɛb a, koli-nyúura na yɛlmɛ ɛ́ zulme a. A nɩbɛ na laar fʋ na ɛ́ kpɔwrɛ fʋ, bʋ̃ʋ n'ʋ vɛ̃, a koli-nyúura paal'a cire!

³³ Ʋ na ɩ na 'wɔbrʋ kuoli fʋ, a dɛ̃bɩ̃ɛ nɩ a kpɩɛrʋ koli-nyúura ŋa a fʋ yɛb Samaari na de niwn fuori a.

³⁴ Fʋ na nyũ ʋ na tɩ baarɩ, fʋ na kar ʋ na nɩ a fʋ nyɩmɛ, a ʋ bʋ̃-ŋmɛrsɩ na ƴãw nɩ natɩɛ a fʋ bɩrɛ. A mãa Sore Naaŋmɩn n'ʋ ƴɛ̀rɛ, ɛ́ lɛ n'a ɩ̃ yere.

³⁵ Alɛ n'a so a mãa Sore Naaŋmɩn yere à ŋá: Fʋ na faa yiiri mɛ̃ bɛr, jɛ m bɛr a, fʋ na tuo nɩ a fʋ pɔw-yɛm vĩ-ɩb.»

A Naaŋmɩn dɩ n ƴɛ̀rʋ ƴãw dɔwrʋ a Samaari nɩ a Zerizalɛm

³⁶ A Sore tɩ yel mɛ̃ na: «A fʋ̃ʋ nɩsaal bie, fʋ na dɩ n nɩ ƴɛ̀rʋ a Ohola nɩ a Oholiba. Wul bɛ a ɩb na bɛ maal'ɩ wob al za bɛ na ɩ a.

³⁷ Pɔw-pɩ̃ɔ-yel-maalbɛ nɩ pɔw-nɩ-kʋrbɛ nɛbɛ. Bɛ maal'ɩ pɩ̃ɔ-yele, bɛ na puori a bɛ ŋmɩn-bɛlɛbɛlɛ a. Bɛ kʋ na, bɛ na maal'ɩ a bibiir bɛ na tɩ dɔw kʋ̀ m a bàwr a.

³⁸ À á ŋá tɛwr bɛ na bɛ ɩ ɛ! Bɛ dɛw nɩ a ɩ̃ zi-sõw bɛr, ɛ́ ɩ a pɩ̃ɛnʋ-bibir ɩ̃ na so a la: à á ŋá za bibi-been!

³⁹ Bʋ̃ʋ n'ʋ vɛ̃, a ʋlɩ bibir nɛ bɛ na kʋ a bɛ bibiir maal'ɩ bàwr kʋ̀ a bɛ ŋmɩn-bɛlɛbɛlɛ a, bɛ kpɛ n a ɩ̃ zi-sõw pʋɔ, a ɩ̃ yir tɔr za, kɛ́ bɛ ɩ ʋ la.

⁴⁰ Lɛb waar mɩ̀, bɛ tɩ tõ n nɩr ʋ tɩ bʋɔlɩ tẽ-zãánɩ dɛbr. Bɛ na dɛ wa wõ a bɛ bʋɔlʋ a, bɛ ta n fɔ̃wlɛ a bɛ zie. A dɛbr ƴãw a, bɛ tɩ so n kʋ̃ɔ, ƴãw kpal, ɛ́ ƴãw pɩ̃ɛmɛ.

⁴¹ Al pùorí, bɛ tɩ gã nɩ gado-vɩɛlɩ vɩɛlɩ zu. Bɛ tɩ bin nɩ tabal a bɛ niŋé, ɛ́ tɩ dɔwlɩ a tɩ-suur-zɔ̃-na-nyùur-vla-vla-a nɩ a kãá-nyũu ɩ̃ na tɩ so a.

⁴² Nɩ-yaga tɩ be n be, ɛ́ zu-sɛbla na bɛ tɛr tɩɛrʋ a tɩ pawr gɔmɛ. Nɩbɛ na tɩ yi a wɛja-kpalɛ ziir za wa ta a mɩ̀ tɩ be n be. Bɛ tɩ ƴãw nɩ bamɛ a yɛb-pɔwbɛ ayi nurú ɛ́ vɔblɩ bɛ nãà-kpawɔ-vɩɛlɩ vɩɛlɩ a zurú.

⁴³ Lɛ n'a ɩ̃ tɩ tɩɛrɩ à ŋá: “A ʋl mɩ̀ a pɩ̃ɔ-yele na saa ɩ ʋ bàl a mɩ̀ cãà na tone a pɔw-yɛm tome!

⁴⁴ Dɛbr mɩ́ cere nɩ a ʋ zie mɛ̃ bɛ na mɩ́ cere pɔw-yɛm zie a! Dɛbr cen nɩ a Ohola nɩ a Oholiba zie mɛ̃ bɛ na mɩ́ cen pɔw-yɛm zie a, a pɔwbɛ bɛ ŋa na mɩ́ gã nɩ dɛb-sãsaralɛ a.”

⁴⁵ Ɛcɛ, dɛb-mɩn na dɩ n nɩ a pɔwbɛ bɛ ŋa ƴɛ̀rʋ mɛ̃ bɛ na mɩ́ dɩ n pɩ̃ɔ-yel-maalbɛ nɩ nɩ-kʋrbɛ ƴɛ̀rʋ a. Bʋ̃ʋ n'ʋ vɛ̃, bɛ maal'ɩ pɩ̃ɔ-yele ɛ́ a bɛ nuru ɩ zɩ̃ɩ.

⁴⁶ À ŋá n'a a mãa Sore Naaŋmɩn yere: Nyɩ bʋɔlɩ a nɩbɛ ɓã taa a bɛ ƴãw! Bɛ ɩ bɛ màwr dɛ̃bɩ̃-mawfʋ, bɛ faa bom za bɛ na tɛr a!

⁴⁷ Nyɩ lɔb'ɩ bɛ kʋsɛbɛ, nyɩ cɔr'ɩ bɛ zɛbr-sɔ-kpɛ̃ɛ kʋ! Nyɩ kʋ a bɛ bidɛbr nɩ a bɛ pɔwyaar ɛ́ nyɩw a bɛ yie bɛr!

⁴⁸ Ɩ̃ na ɩ n a vĩ-ɩb baarɩ a tẽw pʋɔ. A na ɩ n wulu a pɔwbɛ za zie, ɛ́ bɛ kʋ̃ cãà cɔwrɛ a yɛb-pɔwbɛ ayi nyɔ-vʋʋr-faa ɩ.

⁴⁹ Ohola nɩ Oholiba a, nyɩɩm so a nyɩ vĩ-ɩb. Nyɩ na páw nɩ a nyɩ sãwna dɔwrʋ, nyɩ na faa puori a ŋmɩn-bɛlɛbɛlɛ a ƴãw. Lɛ n'a nyɩ na bãw kɛ́ mãa n'ɩ a Sore.»