Ezekɩɛl 18 - A SƐB-SÕW

Nɩr bɛ yarɛ a ʋ dɔwrbɛ sãwna san ɛ

¹ A Sore tɩ yel mɛ̃ na:

² «Bʋ̃ʋ n'ʋ so bɛ wone bɛ lɔbr a zʋkpar ŋa a Ɩsɩrayɛl tẽw pʋɔ: “A dɔwrbɛ 'wɔb'ɩ suw-kɛrɛ, ɛcɛ a bibiir nyɩmɛ n'a mĩi?”

³ Mãa bɛ wa vʋʋrɛ a n'a, a mãa Sore Naaŋmɩn n'ʋ yere, nyɩ kʋ̃ cãà lɔbr a zʋkpar ŋa a Ɩsɩrayɛl tẽw pʋɔ ɩ.

⁴ Bʋ̃ʋ n'ʋ vɛ̃, mãa so a nyɩ been been za nyɔ-vʋʋrʋ, a dɔwrbɛ dem lãwnɩ a bibiir dem. Sob nɛ na maalɩ yel-bier a, ʋlɛ n'ʋ na kpi.

⁵ A ɩ mɛ̃ nɩr kãw ɩrɛ nɩ vla, sàwr a wulu ɛ́ ɩrɛ a lɛ na tu a mɩnʋ a.

⁶ Ʋ bɛ dɩrɛ bàwr-maal bʋ̃-dɩrɩ a tan zu ɛ, ʋ bɛ maalɛ a Ɩsɩrayɛl nɩbɛ ŋmɩn-bɛlɛbɛlɛ ɩ. Ʋ bɛ sãwnɛ a ʋ tɔ pɔw yúor, ɛ́ bɛ ganɛ nɩ pɔw a ʋ sɩɛ-loba daar ɛ.

⁷ A nɩr ŋa bɛ nɛbr ɛ́ bɛ zure nɩr ɛ. Ʋ mɩ́ lɛb'a kʋ̀ a san-bãwfʋ bom a ʋ san sob. Ʋ mɩ́ kʋ̀ n bʋ̃-dɩra sob nɛ kɔ̃ na kpɩɛr a nɩ bʋ̃-suuri sob nɛ na bɛ tɛr a a.

⁸ A nɩr ŋa mɩ́ pɛ̃w nɩ a ʋ libie bɛ bɔbr'ɩ dɔwlɛ ɩ, ʋ bɛ íre tɔnɛ kãw za ɩ. Ʋ mɩ́ ír'ɩ nũu yel na bɛ tu mɩnʋ a pʋɔ, ɛ́ mɩ́ dɩ a ƴɛ̀rʋ tu n a yel-mɩŋa.

⁹ Ʋ sàwr'ɩ a ɩ̃ wulu ɛ́ tuur a ɩ̃ nɛ-ƴãwnɩ kʋ̃ lɛb pùor ɛ. Nɩ-mɩŋa sɩrɩ n'ʋ, ʋ na vʋʋrɛ na, a mãa Sore Naaŋmɩn n'ʋ yere.

¹⁰ A ɩ mɛ̃ a nɩr ŋa tɛr'ɩ bidɛb na ɩrɛ po-to-fãw-ɩb, kʋrɛ ɛ́ ɩrɛ ɩ-pɛ-bʋʋrɛ za na ŋmɛ̃ taa nɩ à á ŋá a.

¹¹ A ʋ sãà bɛ maalɩ a yele á ŋá kãw za ɩ. Ɛcɛ a ʋ bie ʋl a, ʋ dɩrɛ nɩ bàwr-maal bʋ̃-dɩrɩ a tan zu, ɛ́ sãwnɛ a ʋ tɔ pɔw yúor.

¹² Ʋ nɛbr'ɩ a nan dem nɩ a bãbàalbɛ, ɛ́ zure a nɩbɛ. Ʋ bɛ lɛbr tɩrɛ a san-bãwfʋ bome a ʋ samɛ dem na mɩ́ kʋ̀ ʋ a ɩ. Ʋ puore nɩ a ŋmɩn-bɛlɛbɛlɛ ɛ́ ɩrɛ ɩb na bɛ maal'ɩ wob a.

¹³ Ʋ mɩ́ pɛ̃w nɩ a ʋ libie bɔbr'ɩ dɔwlɛ ɛ́ mɩ́ páw tɔnɛ. A bidɛb ŋa tɔ na vʋʋrɛ na bɩɩ? Towtow! Ʋ na ɩ a ɩb á ŋá za na bɛ maal'ɩ wob a, ʋ na kpi na, ɛ́ ʋl mɩŋa n'ʋ na so a ʋ kũu.

¹⁴ A ɩ mɛ̃ a nɩr ŋa tɛrɩ bidɛb. A bidɛb ŋa nyɛ̃ nɩ a ɩ-faar al za a ʋ sãà na maalɛ a, ɛcɛ ʋ bɛ tu ʋ ɛ.

¹⁵ Ʋ bɛ dɩrɛ bàwr-maal bʋ̃-dɩrɩ a tan zu ɛ, ʋ bɛ puore a Ɩsɩrayɛl nɩbɛ ŋmɩn-bɛlɛbɛlɛ ɩ, ʋ bɛ sãwnɛ a ʋ tɔ pɔw yúor ɛ.

¹⁶ Ʋ bɛ nɛbr nɩr, bɛ zure nɩr, bɛ dier san-bãwfʋ bom a ʋ samɛ dem zie ɩ. Ʋ mɩ́ kʋ̀ n bʋ̃-dɩrɩ sob nɛ kɔ̃ na kpɩɛr a nɩ bʋ̃-suuri sob nɛ na bɛ tɛr a a.

¹⁷ Ʋ mɩ́ ír'ɩ nũu yel na bɛ tu mɩnʋ a pʋɔ. Ʋ bɛ mɩ́ pɛ̃w a ʋ libie bɔbr'ɩ dɔwlɛ ɩ, ʋ bɛ mɩ́ páw tɔnɛ kãw za ɩ. Ʋ tuur'ɩ a ɩ̃ nɛ-ƴãwnɩ ɛ́ sàwr a ɩ̃ wulu. A nɩr ŋa kʋ̃ kpi a ʋ sãà sãwna zũú ɛ. Ʋ na vʋʋrɛ na.

¹⁸ A ʋ sãà n'ʋ ɩ a kpɛ a nɩbɛ, ʋlɛ n'ʋ zu ɛ́ dɔwrɩ a nɩbɛ na jil koli ʋ a. A lɛ pʋɔ a, ʋlɛ n'ʋ na kpi a ʋ sãwna zũú.

¹⁹ Nyɩ sowre na: “Bʋ̃ʋ n'ʋ so a bidɛb bɛ tuo a sãà sãwna?” Ʋ na ɩ a ɩb a tu a sɔ́r nɩ mɩnʋ a, ʋ na sàw a ɩ̃ nɛ-ƴãwnɩ a n'a so. A na ɩ lɛ a, ʋ na vʋʋrɛ na.

²⁰ A sãwna sob'ʋ mɩ́ sɛw k'ʋʋ kpi. Bɛ kʋ̃ mɩ́ dɔwrɩ a bibiir a bɛ dɔwrbɛ yel-bebe zũú ɛ, a dɔwrbɛ kʋ̃ mɩ́ nyɛ̃ dɔwrʋ a bɛ bibiir sãwna zũú ɛ. Sob nɛ na ɩrɛ vla a na páw nɩ sã-ya a ʋ ɩb na tu mɩnʋ a zũú, sob nɛ na kpɛ faa a na nyɛ̃ nɩ dɔwrʋ a ʋ ɩb na bɛ vɩɛl a zũú.»

A Sore na mɩ́ dɩ n nɩ ŋa za ƴɛ̀rʋ tu n a ʋ ɩb

²¹ «A nɩ-faa wa zawrɩ a yel-bebe al za ʋ na tɩ maalɩ a bɛr a, ʋlɛ wa tuur a ɩ̃ nɛ-ƴãwnɩ za a, ʋlɛ wa ɩrɛ a lɛ na tori a, ɛ́ tu a mɩnʋ a, ʋ na vʋʋrɛ na, ʋ kʋ̃ kpi ɛ.

²² Bɛ na yiir'ɩ a ʋ sãwna za bɛr, ʋʋ na vʋʋrɛ nɩ a vla ʋ na maalɩ a ƴãw.

²³ A nɩ-faa kũu nyɛ́b nɔ̃w ɩrɛ mɛ̃ nɩ nʋ̃ɔ̀ bɩɩ? Ɩ̃ yere na kʋ̀rɛ nyɩ, a mãa, a Sore Naaŋmɩn: a ʋlɩ bom nɛ ɩ̃ na bɔbr'a, ʋlɛ n'ɩ k'ʋʋ lɩɛbɩ a ʋ ɩb ɛ́ vʋʋrɛ.

²⁴ Ɛcɛ a nɩ-mɩŋa wa bɛr a ʋ mɩnʋ, ɛ́ maalɛ a faar al za na bɛ maal'ɩ wob, a nɩ-faa na maalɛ a, ʋ na vʋʋrɛ na bɩɩ? Bɛ kʋ̃ cãà bãwnɩ a mɩnʋ al za ʋ na tɩ tu a ɩ. Ɛcɛ a pùor ʋ na lɛb a, nɩ a yel-bier ʋ na maalɩ a zũú, ʋ na kpi na.

²⁵ Ɛcɛ nyɩ mɩ́ yel'a: “A Sore ɩb bɛ tori ɛ.” Nyɩ bɛrɛ wone Ɩsɩrayɛl nɩbɛ ɛ: Mãa ɩb'a bɛ tori ɛ? A nyɩ ɩb bɛ n'a nɩ̃ɛ bɛ tori ɛ?

²⁶ A nɩ-mɩŋa wa bɛr a ʋ mɩnʋ ɛ́ maalɛ a faa wa kpi a faalʋ kũu a, a faa ʋ na maalɩ a n'a so ʋ kpi.

²⁷ Ɛcɛ a nɩ-faa wa bɛr a ʋ fa-ɩb ɛ́ tuur a lɛ na tori a nɩ a mɩnʋ a, ʋ na faa nɩ a ʋ nyɔ-vʋʋrʋ.

²⁸ Ʋ na cãà na vʋʋrɛ, ʋ na faa nyɛ̃ a ʋ ɩ-faar ɛ́ zawrɩ a bɛr a. A bɛ cãà tɛr sɔ́r k'ʋʋ kpi ɛ.

²⁹ Ɛcɛ a nyɩɩm Ɩsɩrayɛl nɩbɛ, nyɩ mɩ́ yel'a: “A Sore ɩb bɛ tori ɛ.” Alɛ, Ɩsɩrayɛl nɩbɛ ɛ, mãa ɩb'a bɛ tori ɛ? A nyɩ ɩb bɛ n'a nɩ̃ɛ bɛ tori ɛ?

³⁰ Alɛ n'a so, a mãa Sore Naaŋmɩn, ɩ̃ yere na kʋ̀rɛ a nyɩɩm Ɩsɩrayɛl nɩbɛ: ɩ̃ na dɩ n nɩ ŋa za ƴɛ̀rʋ tu n a ʋ ɩb. A na ɩ lɛ a, nyɩ lɩɛbɩ a nyɩ nyɔ-vʋʋrʋ, nyɩ zawrɩ a nyɩ sãwna bɛr, ɛ́ nyɩ kʋ̃ ɩrɛ wa lɛb lo a faalʋ pʋɔ ɩ.

³¹ Nyɩ zawrɩ a nyɩ ɩ-faar za bɛr, nyɩ lɩɛbɩ a nyɩ socie nɩ a nyɩ tɩɛrʋ. Bʋ̃ʋ n'ʋ so nyɩ bɔbr kɛ́ nyɩ kpi, Ɩsɩrayɛl nɩbɛ ɛ?

³² Sɩza, ɩ̃ yere na, a mãa Sore Naaŋmɩn, ɩ̃ bɛ bɔbr nɩr kãw za kũu ɛ. Nyɩ lɩɛbɩ a nyɩ ɩb ɛ́ vʋʋrɛ!»