Ezekɩɛl 15 - A SƐB-SÕW

A Sore divɛ̃ tɩɩr púo na dɩ n vũu

¹ A Sore tɩ yel mɛ̃ na:

² «A fʋ̃ʋ nɩsaal bie, sɔw kʋ̀ m! A divɛ̃ tɩɛ dàa vɩɛl'a zuo a dàar za na cɛ a bɩɩ? A ʋ wuli tɛr'ɩ yel-ɩra zuo a wɩ̀ɛ pʋɔ tɩɩr wuli bɩɩ?

³ Bɛ mɩ́ tʋ̃ɔ́ na de a ʋ dàa maal'ɩ bʋ̃-kãw bɩɩ? Bɛ na tʋ̃ɔ́ na maal'ɩ ʋ kpawbir mɩ́ yawlɩ bom bɩɩ?

⁴ Ʋ̃ʋ'hʋ̃, vũu tɛwr'a ʋ na tʋ̃ɔ́ gbɔw. A vũu wa dɩ a ʋ nyɛɛ a za ayi, ɛ́ a sɔwlɩsɔw mɩŋa nyɔw vũu a, ʋ na lɛb'a tʋ̃ɔ́ ɩ bom bɩɩ?

⁵ A lɛn daar ʋ na tɩ ɩ a ɓil a, ʋ bɛ tɩ tɛr yel-ɩra kãw za ɩ. Ƴɛrɛŋa a vũu na wa dɩ ʋ za cʋmcʋm a, bɛ na tʋ̃ɔ́ na ɩ n ʋ bom bɩɩ? Towtow!

⁶ Nyɛ̃, à ŋá n'a a mãa Sore Naaŋmɩn yere: Bɛ mɩ́ kaa na ír a divɛ̃ tɩɛ dàa lɔb ƴãw a vũumí ɛ́ bɛr a tɩ-yũo dàa. Lɛ mɩ̀ n'a ɩ̃ na nyɩw a bɛlɩ dem na kpɩɛr a Zerizalɛm a bɛr.

⁷ Ɩ̃ na ìr'ɩ a bɛ ƴãw. Bɛ tɩɛrɛ kɛ́ bɛ yi n a vũu pʋɔ, ɛcɛ a vũu na dɩ bɛ na. A lɛn daar mãa wa ìr a bɛ ƴãw a, nyɩ na bãw na kɛ́ mãa n'ɩ a Sore.

⁸ Ɩ̃ na ɩ na a bɛ tẽw ɩ wɛja-kpalɛ, bɛ na bɛ tu a ɩ̃ pùor a ƴãw. À ŋá n'a a Sore Naaŋmɩn yere.»