Ezekɩɛl 12 - A SƐB-SÕW

A diw-cenu ayi sob bãwfʋ a Ezekɩɛl na tɩr a

¹ A Sore tɩ ƴɛ̀r'ɩ a ɩ̃ zie à ŋá:

² «A fʋ̃ʋ nɩsaal bie, fʋ kpɩɛr'ɩ nɩ-bʋʋr-gaarɩ sɔgɔ! Bɛ tɛr'ɩ mimie nyɛ́b ƴãw, ɛ́ bɛ nyɛrɛ ɩ. Bɛ tɛr'ɩ tobe wob ƴãw, ɛ́ bɛ wone ɩ. Sɩza, nɩ-bʋʋr-gaarɩ nɛbɛ!

³ A na ɩ lɛ a, fʋ̃ʋ nɩsaal bie e, cɔbrɩ nɩ-diw-cena kɔr, ɛ́ yi cere diw-cenu zie a bɛ mimirí. Yi a zie nɛ fʋ na kpɩɛr a tu zi-yũo a bɛ mimirí. Kapaw, bɛ na sàw na kɛ́ bɛ ɩ n nɩ-bʋʋr-gaarɩ.

⁴ Cɔbrɩ a fʋ bome mɛ̃ nɩ-diw-cena tuor a, mʋ̃tɔ̃w a bɛ mimirí. Ɛ́ yi a zaanʋɔra a bɛ mimirí mɛ̃ a nɩ-diw-ceni na mɩ́ yi a.

⁵ A bɛ mimirí a, fʋ na puo nɩ vʋɔr a dacin pʋɔ ɩ a fʋ tuor a yi a be.

⁶ A bɛ mimirí a, fʋ na tuo nɩ a fʋ tuor a bawŋman zu, ɛ́ yi a lige pʋɔ. Fʋ na pàw nɩ a niwn ta tʋ̃ɔ́ nyɛ̃ a tẽw ɛ, bʋ̃ʋ n'ʋ vɛ̃, ɩ̃ ɩ na fʋ ɩ bãwfʋ a Ɩsɩrayɛl nɩbɛ zie.»

⁷ Ɩ̃ tɩ ɩ n a lɛ a Sore na tɩ yel kʋ̀ m a: ɩ̃ tɩ yi n nɩ a ɩ̃ tuor mʋ̃tɔ̃-tuo mɛ̃ nɩ-diw-cena tuor a. A zaanʋɔra a, ɩ̃ tɩ puo nɩ vʋɔr a dacin pʋɔ nɩ a ɩ̃ nuru. A nɩbɛ tɩ nyɛ̃ m'a ɩ̃ yi a tɩ̃ɩsɔw cere nɩ a ɩ̃ kɔr a bawŋman zu.

⁸ A bio daarɩ́ biɓaara a, a Sore tɩ ƴɛ̀r'ɩ a ɩ̃ zie à ŋá:

⁹ «Fʋ̃ʋ nɩsaal bie e, fʋ bɛ wõ a Ɩsɩrayɛl nɩbɛ, a nɩ-bʋʋr-gaarɩ bɛ ŋa, bɛ sowri fʋ kɛ́ bʋ̃ʋ n'ʋ fʋ tɩ ɩrɛ a lɛ ɩ?

¹⁰ Sɔw bɛ: À ŋá n'a a Sore Naaŋmɩn ƴɛ̀rɛ: A ƴɛ̀rʋ ŋa ɩ n a nãà na be a Zerizalɛm a nɩ a Ɩsɩrayɛl yir za na be a be a ƴãw.

¹¹ Yel kʋ̀ bɛ kɛ́ fʋ ɩ n à à ŋá a ɩ bãwfʋ. Bʋ̃ʋ n'ʋ vɛ̃, bɛ na cen nɩ diw-cenu zie, gbãgbaalʋ pʋɔ.

¹² A sob nɛ na dɩrɛ naalʋ a nyɩ zu a na tuo nɩ a ʋ tuor a ʋ bawŋman zu tɩ̃ɩsɔw. Ʋ na yi na ɛ́ bɛr a tẽ-kpɛ̃ɛ. Bɛ na puo nɩ vʋɔr a dacin pʋɔ, ʋʋ na yi n a be. Ʋ na pàw nɩ a ʋ niwn ɛ́ kʋ̃ nyɛ̃ a be ʋ na cere a ɩ.

¹³ A mãa Sore, ɩ̃ na ƴãw ʋ nɩ bɛra, nyɔw ʋ. Ɩ̃ na tɛr ʋ na cen nɩ a Babɩlɔn tẽw, ɛcɛ ʋ kʋ̃ nyɛ̃ a tẽ-kpɛ̃ɛ ŋa ɩ. A be n'a ʋ na tɩ kpi.

¹⁴ Ɩ̃ na ɩ n a bɛlɩ dem za na jil koli ʋ a, a ʋ gùrbɛ nɩ a ʋ sojarɩ bɛ bʋnɩ cere a ziir za. Ɩ̃ɩ na diwr bɛ na nɩ a ɩ̃ zɛbr-sɔ-kpɛ̃ɛ.

¹⁵ Mãa wa diw bɛ yaarɩ nɩ-bʋʋrɛ nɩ tẽ-sãanbɛ pʋɔ a, bɛ na bãw na kɛ́ mãa n'ɩ a Sore.

¹⁶ Ɛcɛ, ɩ̃ na bɛr'ɩ nɩbɛ blã bɛ cɩ̃ɛ a zɛbr, a kɔ̃ nɩ a jɛ̀lmɛ̃ bàalʋ pʋɔ. Lɛ n'a bɛ na manɛ kʋ̀rɛ a nɩ-bʋʋrɛ bɛl sɔgɔ bɛ na na be a, a ɩ-faar al na bɛ maal'ɩ wob bɛ na maalɩ a. Ɛ́ a nɩ-bʋʋrɛ bɛ ŋa na bãw na kɛ́ mãa n'ɩ a Sore.»

¹⁷ A Sore tɩ lɛb'a yel mɛ̃:

¹⁸ «A fʋ̃ʋ nɩsaal bie, dɩrɛ a fʋ bʋ̃-dɩrɩ màwr'ɩ, nyúur a fʋ kʋ̃ɔ nɩ dɛ̃bɩ̃ɛ nɩ pʋl-vʋ̃ɔ.

¹⁹ Fʋ na yel'ɩ a tẽw nɩbɛ: “A Sore Naaŋmɩn ƴɛ̀rʋ n'ɩ ŋá: A Zerizalɛm nɩbɛ na kpɩɛr a Ɩsɩrayɛl tẽw a na dɩrɛ na ɛ́ nyúur pʋl-vʋ̃ɔ nɩ kpɩɛrʋ pʋɔ. Bʋ̃ʋ n'ʋ vɛ̃, bɛ na sãw nɩ a bɛ tẽw bɛr, a bɛlɩ dem na kpɩɛr a ʋ pʋɔ a na paalɩ ʋ nɩ po-to-fãw-ɩb tɛwr a ƴãw.

²⁰ Nɩbɛ kʋ̃ be be kpɩɛr a tẽ-bɛrɛ pʋɔ ɩ, ɛ́ a tẽw na ɩ n wɛja-kpalɛ. Lɛ n'a nyɩ na bãw kɛ́ mãa n'ɩ a Sore.”»

A Sore ƴɛ̀rʋ na tu na

²¹ A Sore tɩ yel mɛ̃ na:

²² «A fʋ̃ʋ nɩsaal bie, yel kʋ̀ m, bʋ̃ʋ n'ʋ so bɛ wone a nyɩ pʋɔ nyɩ lɔbr a zʋkpar ŋa càar'ɩ a Ɩsɩrayɛl tẽw: “A tɛm tɔlɛ na ɛ́ yel-nyɛra kãw za kʋ̃ tu ɛ”?

²³ A na ɩ à ŋá a, yel kʋ̀ a Ɩsɩrayɛl nɩbɛ k'aa mãa Sore Naaŋmɩn yere na k'ɩ̃ɩ kʋ̃ lɛb bɛr bɛ lɔb a zʋkpar ŋa ɩ, bɛ kʋ̃ lɛb lɔb ʋ a Ɩsɩrayɛl tẽw pʋɔ ɩ. Ɛcɛ yel kʋ̀ bɛ: “A daar ta na a yel-nyɛrɩ za na na tu a.”

²⁴ Yel-nyɛr-ziri nɩ bɛ̀lʋ ƴɛ̀rʋ kʋ̃ lɛb cãà a Ɩsɩrayɛl nɩbɛ zie ɩ.

²⁵ Bʋ̃ʋ n'ʋ vɛ̃, a mãa Sore n'ʋ ƴɛ̀rɛ, ɛ́ a lɛ ɩ̃ na yere a na tu n ƴɛrɛŋa. Sɩza, nɩ-bʋʋr-gaarɩ i, a nyɩ cãafʋ daar'a ɩ̃ na ɩ a lɛ ɩ̃ na yel a a tu. À à ŋá n'a a Sore Naaŋmɩn yel.»

²⁶ A Sore tɩ lɛb'a yel mɛ̃:

²⁷ «Fʋ̃ʋ nɩsaal bie e, bɛrɛ wone! A Ɩsɩrayɛl nɩbɛ yere na: “A na cɛlɩ nɩ yaga ɛ́ a Ezekɩɛl bʋ̃-nyɛrɩ wa tu. A naaŋmɩn-ƴɛ̀r-manɛ ŋa ƴɛ̀rɛ nɩ nɩdaar na zãá yaga za a ƴãw.”

²⁸ A na ɩ à ŋá a, yel à ŋá kʋ̀ bɛ: “A mãa Sore Naaŋmɩn, ɩ̃ na ɩ n a al za ɩ̃ na yel a, a tu a ƴɛrɛŋa.”» A Sore Naaŋmɩn n'ʋ yel.