Ezekɩɛl 11 - A SƐB-SÕW

Bɛ na dɩ n nɩ a Zerizalɛm ƴɛ̀rʋ, a ʋ sãwna ƴãw

¹ A Sore Vʋʋrʋ tɩ zɛw mɛ̃ na ìr'ɩ tẽw, ɛ́ tɩ ɓáw mɛ̃ cen nɩ a Ŋmɩn-yir-kpɛ̃ɛ saa-pɛrɩ́ dɩ̃dɔrɩ́. A dɩ̃dɔr nʋɔrɩ́ a, ɩ̃ tɩ nyɛ̃ nɩ dɛbr lɩzɛr'ɩ anũu. A bɛ pʋɔ a, ɩ̃ tɩ nyɛ̃ nɩ a nɩbɛ nɩ-bɛrɛ ayi, Azuur bidɛb, Yaazanɩa, nɩ Benayahu bidɛb, Pelatɩahu.

² A Vʋʋrʋ tɩ yel mɛ̃ na: «A fʋ̃ʋ nɩsaal bie, bɛrɛ wone! Nyɛ̃ a nɩbɛ bɛl na bɔbr kɛ́ bɛ maalɩ faa a. Bɛ wule nɩ yã-faar a Zerizalɛm tẽw pʋɔ.

³ Bɛ yere na: “Ƴɛrɛŋa bɛ n'a tɩ na ŋma yie a ka ɩ. A Zerizalɛm ɩ na mɛ̃ ziduwle a, ɛ́ a tɩɩm ɩ a nɛn.”

⁴ A na ɩ à ŋá a, fʋ̃ʋ nɩsaal bie e, ƴɛ̀r wo bɛ, mɛ̃ naaŋmɩn-ƴɛ̀r-manɛ a.»

⁵ Lɛ n'a a Sore Vʋʋrʋ tɩ siw a ɩ̃ zu ɛ́ ƴãw k'ɩ̃ ƴɛ̀r à ŋá: «À ŋá n'a a Sore ƴɛ̀rɛ: Ɩsɩrayɛl nɩbɛ ɛ, ɩ̃ bãw nɩ a lɛ nyɩ na yere a, ɛ́ bãw a lɛ nyɩ a tɩɛrɛ a!

⁶ Nyɩ kʋ n nɩ-yaga a tẽ-kpɛ̃ɛ ŋa pʋɔ, nyɩ ɩ na kũuni pàw a sɛ́ɛ.

⁷ Alɛ n'a so a mãa, a Sore Naaŋmɩn, ɩ̃ yere kʋ̀rɛ nyɩ: A Zerizalɛm sɩrɩ na ɩ mɛ̃ ziduwle a, ɛ́ a nɛn a, a bɛl nyɩ na kʋ a n'a. Ɛcɛ a nyɩɩm a, ɩ̃ na diw nyɩ nɩ a tẽ-kpɛ̃ɛ ŋa pʋɔ.

⁸ Nyɩ zɔrɛ nɩ a zɛbr, ɛcɛ ɩ̃ na ɩ na ʋ wa a nyɩ zu! A mãa, a Sore Naaŋmɩn n'ʋ yel.

⁹ Ɩ̃ na diw nyɩ nɩ a Zerizalɛm, ɛ́ de nyɩ ƴãw sãanbɛ nuru pʋɔ. Ɩ̃ na ɩ n a ƴɛ̀rʋ ɩ̃ na dɩ n nyɩ ƴãw dɔwrʋ a, a tu.

¹⁰ Nyɩ na kpi n zɛbr-sɔ-kpɛ̃ɛ kũu. Ɩ̃ na dɩ n nyɩ nɩ ƴɛ̀rʋ a Ɩsɩrayɛl tẽw tɔr za zu. Lɛ n'a nyɩ na bãw kɛ́ mãa n'ɩ a Sore.

¹¹ A tẽ-kpɛ̃ɛ ŋa kʋ̃ ɩ ziduwle a nyɩ ƴãw ɛ, ɛ́ nyɩ kʋ̃ ɩ mɛ̃ nɛn a, a ʋ pʋɔ ɩ. Ɩ̃ na dɩ n nyɩ nɩ ƴɛ̀rʋ a Ɩsɩrayɛl tẽw tɔr za zu.

¹² Lɛ n'a nyɩ na bãw kɛ́ mãa n'ɩ a Sore, a sob nɛ nɛ́ɛ nyɩ na bɛ tu ɛ́ bɛ sàw a ʋ wulu a. Bʋ̃ʋ n'ʋ vɛ̃, nyɩ tu n a nɩ-bʋʋr-yoru na viiri koli nyɩ a tub.»

¹³ Ɩ̃ na tɩ manɛ a Sore ƴɛ̀rʋ ŋa tɩrɛ a, a Benaya bidɛb, Pelatɩahu, tɩ kpi na. Ɩ̃ tɩ lo na gbĩ dume gũu tɩ tɔ tẽw ɛ́ cɩɩr'ɩ kɔkɔr-kpɛ̃w yel à ŋá: «'Woi, Sore Naaŋmɩn i, fʋ na ɩ n a Ɩsɩrayɛl nɩbɛ za na cɛ a bɛ kpi i?»

Naaŋmɩn na ɓã n a Ɩsɩrayɛl nɩbɛ na tɩ yaarɩ a taa

¹⁴ A Sore tɩ yel mɛ̃ na:

¹⁵ «A fʋ̃ʋ nɩsaal bie, nyɛ̃ a wulu a bɛlɩ dem na kpɩɛr a Zerizalɛm a na kʋ̀rɛ a fʋ yɛbr, a fʋ yir nɩbɛ, a Ɩsɩrayɛl nɩbɛ za bɛ na diw cen nɩ a: “Nyɩ àr zãá nɩ a ka a Sore na be a. Tɩɩm n'a ʋ kʋ̀ a tẽw ŋa.”

¹⁶ A na ɩ à ŋá a, yel kʋ̀ a bɛl nɩ a fʋ̃ʋ bɛ na lãw diw cen nɩ a: À ŋá n'a a Sore ƴɛ̀rɛ: “Ɩ̃ ɩ na nyɩ cen tẽ-zãánɩ pʋɔ, nɩ-sãanbɛ pʋɔ, ɛcɛ a be mɔ̃ mɩ̀ a, ɩ̃ be n a nyɩ sɔgɔ mɛ̃ zi-sõw pʋɔ a.”

¹⁷ A na ɩ lɛ a, lɛb yel à ŋá a mãa Sore Naaŋmɩn na yere a kʋ̀ bɛ: “Ɩ̃ na de nyɩ nɩ a nɩ-bʋʋrɛ bɛl pʋɔ nɩ a ten al pʋɔ ɩ̃ na diw nyɩ cen nɩ a, lɛb ɓã taa, ɛ́ lɛb kʋ̀ nyɩ a Ɩsɩrayɛl tẽw.

¹⁸ Nyɩmɛ wa lɛb wa a ʋ pʋɔ a, nyɩ na ír'ɩ a puoru ɩ-ɩrɩ al na bɛ maal'ɩ wob a bɛlɩ dem na tɩ kpɩɛr a ʋ pʋɔ a na tɛr a ŋmɩn-bɛlɛbɛlɛ ƴãw a bɛr.

¹⁹ Ɩ̃ na kʋ̀ nyɩ nɩ soci-paala, ɩ̃ na ƴãw nyɩ nɩ tɩɛr-paala. Ɩ̃ na ír'ɩ a kʋsɩɛr socir bɛr a nyɩ ƴã-ganɩ́ ɛ́ ƴãw nyɩ ƴã-gã-nɛn socir.

²⁰ Lɛ n'a nyɩ na tuur a wulu ɩ̃ na kʋ̀ nyɩ a, nyɩ na maal'a ɩrɛ a ɩ̃ nɛ́ɛ ƴãw, ɛ́ sàwr a. Nyɩ na ɩ n a ɩ̃ nɩ-bʋʋrɛ, ɩ̃ɩ ɩ a nyɩ Naaŋmɩn.

²¹ Ɛcɛ, a bɛlɩ dem na puore a ŋmɩn-bɛlɛbɛlɛ ɛ́ ɩrɛ ɩb na bɛ maal'ɩ wob, tuur'ɩ a bɛ socir bʋ̃-bɔbrɩ a, ɩ̃ na ɩ na bɛ ya a bɛ ɩb san.” Mãa n'ʋ yel, a mãa, Sore Naaŋmɩn.»

A Sore yire na ɛ́ bɛrɛ a Zerizalɛm

²² Lɛ n'a a seribɛ̃ mɩnɛ tɩ dɔl a pɩgɛ ɛ́ a torko gbɛ́ɛ tɩ lãw damnɛ nɩ a. A Ɩsɩrayɛl Naaŋmɩn yúor-vɩɛlʋ-danʋ tɩ nyɩwrɛ nɩ a zu-sɔw.

²³ Al pùorí, a Sore yúor-vɩɛlʋ-danʋ tɩ ìr'ɩ a tẽ-kpɛ̃ɛ sɔwlɩsɔw zu-sɔw ɛ́ tɩ cen tɩ àr a tãw na be a Zerizalɛm saa-pɛrɩ́ a zu.

²⁴ A yel-nyɛra nɛ pʋɔ a, a vʋʋrʋ tɩ zɛw mɛ̃ na ìr'ɩ a tẽw. Ʋ tɩ lɛb'a tɛr mɛ̃ cen nɩ a nɩ-diw-ceni zie a Babɩlɔn tẽw, ɛ́ a yel-nyɛra a Naaŋmɩn na tɩ ɩ ɩ̃ nyɛ̃ a tɩ baarɩ.

²⁵ Lɛ n'a ɩ̃ tɩ manɩ kʋ̀ a nɩ-diw-ceni a yele al za a Naaŋmɩn na tɩ ɩ ɩ̃ nyɛ̃ a.