Ezekɩɛl 10 - A SƐB-SÕW

A Naaŋmɩn lɛb'a wul ʋ tʋɔra a Ezekɩɛl

¹ Ɩ̃ tɩ jɩ́rɛ na: a bɩwra na tɩ be a seribɛ̃ zu zu-sɔw a, kʋsɛ-nyɩla na ɩ mɛ̃ safɩɩr kʋsɩɛr a tɩ sãá na. Ʋ tɩ ŋmɛ̃ na taa nɩ naalʋ-dà-kɔw.

² A Naaŋmɩn tɩ yel'ɩ a nɩr ʋl na tɩ su a lɛ̃ pɛn kparɩ a: «Cen a torko gbɛ́ɛ na be a seribɛ̃ pile a cará. Wob vũu-bie a seribɛ̃ mɩnɛ sɔgɔ paalɩ a fʋ nuru, ɛ́ cen tɩ yàarɩ a pàw a tẽ-kpɛ̃ɛ.» Ɩ̃ tɩ nyɛ̃ nɩ a nɩr ʋ cere a be.

³ A lɛn daar a, a seribɛ̃ tɩ be n a Ŋmɩn-yir-kpɛ̃ɛ dʋrʋ-lowr, ɛ́ zũzuwr tɩ paalɩ a sɔwlɩsɔw davʋra.

⁴ A Sore yúor-vɩɛlʋ-danʋ na tɩ be a seribɛ̃ zu-sɔw a tɩ cere nɩ a Ŋmɩn-yir-kpɛ̃ɛ dɩ̃dɔrɩ́. Lɛ n'a a zũzuwr tɩ paalɩ a Ŋmɩn-yir-kpɛ̃ɛ, ɛ́ a Sore yúor-vɩɛlʋ-danʋ cãà paalɩ a davʋra.

⁵ Bɛ tɩ wɩɛr'a tɩ wone a seribɛ̃ pɩgɛ gɔmɛ a yẽw davʋrá. A gɔmɛ á ŋá tɩ ŋmɛ̃ na mɛ̃ saa-tanʋ a, mɛ̃ a Naaŋmɩn kpɛnʋ-za-sob kɔkɔr a.

⁶ A nɩr ʋl na tɩ su a lɛ̃ pɛn kparɩ a tɩ àr'a pɩɛlɩ a torko gbɛ́r kãw. Ʋ tɩ cen na tɩ àr a be a lɛn daar a Naaŋmɩn na tɩ ƴãw a nʋɔr kʋ̀ ʋ, k'ʋʋ mʋ̃ɔ a vũu a torko gbɛ́ɛ cará, a seribɛ̃ sɔwlɩsɔw a.

⁷ A seribɛ̃ kãw tɩ tur'ɩ a nũu cɔw a vũu na tɩ pɩɛlɩ ʋ a. Ʋ tɩ ɓáw nɩ vũu-bie ƴãw a nɩr ʋl na tɩ su a lɛ̃ pɛn kparɩ a nuru pʋɔ. Ʋ tɩ de a na lɩɛb yire nɩ.

⁸ Bʋ̃-kãw na ŋmɛ̃ mɛ̃ nɩsaal nũu a tɩ sãá nɩ a seribɛ̃ pɩgɛ pile.

⁹ Ɩ̃ mɩ̀ tɩ nyɛ̃ nɩ torko gbɛ́ɛ anaar, gbɛ́r za mɩ́ tɩ pɩɛl'ɩ seribɛ̃ za. A torko gbɛ́ɛ á ŋá tɩ nyɩwrɛ na mɛ̃ kʋsɛ-bi-nyɩla a.

¹⁰ A za anaar tɩ ŋmɛ̃ n taa, ɛ́ a ɩ mɛ̃ a sawl sawl'ɩ taa a.

¹¹ A mɩ́ tɩ tʋ̃ɔ́ na cere lɩɛbɛ a lowe a za anaar, ɛ́ bɛ mɩ́ tɩ àr ɛ́ lɩɛbɩ ɛ. A be a seribɛ̃ zu na mɩ́ lɩɛbɩ cɔw a, be n'a a mɩ́ tɩ tu cere ɛ́ bɛ àrɛ ɛ́ lɩɛbɛ ɩ.

¹² Zili-nyɩwrɩ tɩ pàw nɩ a seribɛ̃ ƴã-gan za, a zikur, a nuru nɩ a pɩgɛ, de nɩ a gbɛ́ɛ al na cɛ a.

¹³ Ɩ̃ tɩ wõ na bɛ por a gbɛ́ɛ á ŋá yúor kɛ́ «sɛsɛb-pɩl».

¹⁴ Seribɛ̃ za tɩ tɛr'ɩ niŋe anaar: a niwn dãw-niwn sob tɩ ɩ n seribɛ̃ niwn, a ayi sob ɩ nɩsaal niwn, a ata sob ɩ gbẽw niwn, ɛ́ a anaar sob ɩ sɩla niwn.

¹⁵ A seribɛ̃ mɩnɛ tɩ zɛw na ìr a saa-zu. A tɩ ŋmɛ̃ na taa nɩ a bʋ̃-vʋʋrɩ al ɩ̃ na tɩ nyɛ̃ a Kebaar man nʋɔr a.

¹⁶ A seribɛ̃ mɩnɛ wa tawr tɔlɛ a, a gbɛ́ɛ mɩ̀ mɩ́ lãw na tawr tɔlɛ nɩ a. Alɛ wa dɔl a pɩgɛ k'aa zɛw ìr a saa-zu a, a gbɛ́ɛ mɩ́ àr'a kɔw a.

¹⁷ A seribɛ̃ mɩnɛ wa tɛw àr a, a gbɛ́ɛ mɩ̀ mɩ́ tɛw na àr, alɛ wa zɛw ìr a saa-zu a, a mɩ̀ mɩ́ lãw na zɛw ìr'ɩ a. Bʋ̃ʋ n'ʋ vɛ̃, a bʋ̃-vʋʋrɩ vʋʋrʋ n'ʋ tɩ be a pʋɔ.

A Sore yire na kɛ́ bɛrɛ a Ŋmɩn-yir-kpɛ̃ɛ

¹⁸ A Sore yúor-vɩɛlʋ-danʋ tɩ yi n a Ŋmɩn-yir-kpɛ̃ɛ dɩ̃dɔrɩ́ ɛ́ tɩ àr a seribɛ̃ mɩnɛ zu-sɔw.

¹⁹ A seribɛ̃ mɩnɛ tɩ dɔl'ɩ a pɩgɛ k'aa tɔl cen. Ɩ̃ tɩ nyɛ̃ a na a zɛw ìr a saa-zu lãwnɩ a Sore torko gbɛ́ɛ. A tɩ tɛw na àr a Ŋmɩn-yir-kpɛ̃ɛ saa-pɛrɩ́, a dɩ̃dɔr nʋɔrɩ́. A Ɩsɩrayɛl Naaŋmɩn yúor-vɩɛlʋ-danʋ tɩ nyɩwrɛ nɩ a seribɛ̃ mɩnɛ zu-sɔw.

²⁰ A Kebaar man nʋɔr a, ɩ̃ tɩ nyɛ̃ nɩ a bʋ̃-vʋʋrɩ al tɛɛ za a Ɩsɩrayɛl Naaŋmɩn pile. Ɩ̃ tɩ bãwnɩ a na kɛ́ seribɛ̃ mɩnɛ tɩ n'a.

²¹ Seribɛ̃ za tɩ tɛr'ɩ niŋe anaar, pɩgɛ anaar nɩ bome kãw na ɩ mɛ̃ nɩsaal nuru a, a be a pɩgɛ pile.

²² A niŋe tɩ ŋmɛ̃ na taa nɩ a bʋ̃-vʋʋrɩ al ɩ̃ na tɩ nyɛ̃ a Kebaar man nʋɔr a niŋe. A seribɛ̃ mɩnɛ tɩ tawr'a tɔlɛ, ŋa za tori niwn cere.