Ekilezɩasɩ 8 - A SƐB-SÕW

¹ Ãa n'ʋ ɩ mɛ̃ a yã-bãwnɛ, ɛ́ na tʋ̃ɔ́ ír a ƴɛ̀rʋ ŋa pɛr? A nɩsaal yã-bãwfʋ mɩ́ ɩ na a ʋ niwn nyɩwrɛ, ɛ́ ɩ a ʋ niwn na ko a ʋ lɩɛbɩ.

A nãà nʋɔr-sàwfʋ ɩ n yã-bãwfʋ ɩb

² Ɩ̃ yere na: Sàwr a nãà nɛ́ɛ mɛ̃ a lɛ fʋ na pɔ a Sore niŋé a.

³ Ta mɩ́ taw zãá nɩ ʋ fɔ̃wlɛ ɩ. Ta mɩ́ kpãa tobr ɩrɛ a ʋlɩ bom nɛ na bɛ mɩ́ pɛlɩ a ʋ pʋɔ a ɩ. Bʋ̃ʋ n'ʋ vɛ̃, ʋ mɩ́ ɩ n lɛ za ʋ na bɔbr a.

⁴ A nãà ƴɛ̀rʋ tɛr'ɩ fãw, ɛ́ nɩr kʋ̃ tʋ̃ɔ́ sowr'ʋ kɛ́ bʋ̃ʋ n'ʋ ʋ ɩrɛ ɩ.

⁵ Nɩr na tuur a nãà nɛ-ƴãwnɩ a kʋ̃ nyɛ̃ faa kãw za ɩ. Ɛcɛ, a yã-bãwnɛ bãwnɩ a nɩ vla vla k'aa ƴɛ̀rʋ-dɩb daar na be n be bom za ƴãw.

⁶ Sɩza, Naaŋmɩn na dɩ n ƴɛ̀rʋ ɩb za ƴãw bibir kãw, bʋ̃ʋ n'ʋ vɛ̃, a nɩsaalbɛ faalʋ bɛ dɩ vuo ɩ.

⁷ Tɩ bɛ bãw ʋlɩ bom nɛ na na ɩ a ɩ. Ãa n'ʋ na yel a lɛ a yele na na ɩ a kʋ̀ tɩ?

⁸ Nɩsaal za bɛ so a ʋ nyɔ-vʋʋrʋ na tʋ̃ɔ́ nyɔw ʋ tɛr ɛ. Nɩsaal za bɛ so a ʋ kũu bibir ɛ. Zɛbr wa be be a, ɩb bɛ ka be fʋ na ɩ cɩ̃ɛ ɩ. A faalʋ kʋ̃ tʋ̃ɔ́ faa a ɩ-fa-maalɛ ɩ.

A tɩɛrʋ na càarɩ a nɩsaal nyɔ-vʋʋrʋ a

⁹ Ɩ̃ nyɛ̃ nɩ à á ŋá za: alɩ bome nɛ na ɩrɛ a tẽw zu ka a, ɩ̃ jɩ́r a na kaa vla vla. Ʋ ɩ n a daar ʋl a nɩsaal na tɛr fãw a ʋ nɩsaal-tɔ zu na maalɩ ʋ faa a.

¹⁰ Ɩ̃ nyɛ̃ na bɛ maalɩ nɩ-faar kuor. A nɩbɛ bɛ ŋa mɩ̀ mɩ́ tɩ cen nɩ a Ŋmɩn-yir-kpɛ̃ɛ pʋɔ. Ɛ́ a Zerizalɛm a, a nɩbɛ yiir'ɩ a lɛ za bɛ na tɩ ɩ a bɛr. À á ŋá mɩ̀ ɩ n bàlʋ zawla.

¹¹ Nɩr na maalɩ faa a bɛ mɩ́ nyɛ̃ dɔwrʋ a pɛr nɛ pʋɔ ɩ. Alɛ n'a so a nɩsaal socir paalɩ a tɩɛr-faar tɛwr.

¹² Yel-bier-maalɛ na tʋ̃ɔ́ na maalɩ faa gb'aa kʋba (100), ɛ́ vʋʋrɩ tɩ cɛlɩ. Ɩ̃ bãwnɩ a na, bɛ mɩ́ yel'ɩ à ŋá: «Bɛlɩ dem na zɔrɛ a Naaŋmɩn a na bãw nɩ a nʋ̃ɔ̀ bɛ na zɔrɛ ʋ a zũú.

¹³ Bɛlɩ dem na ɩrɛ a ɩ-faar a kʋ̃ bãw a nʋ̃ɔ̀ ɩ. Bɛ na tɔl'a mɛ̃ ɓaarʋ a, bɛ kʋ̃ vʋʋrɩ cɛlɩ ɛ, bʋ̃ʋ n'ʋ vɛ̃, bɛ bɛ zɔ a Naaŋmɩn ɛ.»

¹⁴ Ɛcɛ yel kãw be n a tẽw zu ka ɩ bàlʋ zawla: Bɛ mɩ́ ɩrɛ nɩ a nɩ-mɩn zie mɛ̃ a lɛ na sɛw nɩ a nɩ-faar a, ɛ́ ɩrɛ a nɩ-faar zie mɛ̃ a lɛ na sɛw nɩ a nɩ-mɩn a. Ɩ̃ lɛb'a yel k'aa á ŋá mɩ̀ ɩ n bàlʋ zawla.

¹⁵ Mãa a, ɩ̃ danɛ nɩ a nʋ̃ɔ̀. Bʋ̃ʋ n'ʋ vɛ̃, a tẽw zu ka a, a nɩsaal nʋ̃ɔ̀ been tẽtẽ n'ɩ k'ʋʋ dɩrɛ, k'ʋʋ nyuur, ɛ́ wone nʋ̃ɔ̀. Ɛ́ à á ŋá n'a a fɛr k'aa bɩɛlɛ a ʋ tome bibir za a Naaŋmɩn na kʋ̀ ʋ, k'ʋʋ vʋʋrɩ a tẽw zu ka a.

^16-17 Ɩ̃ ƴãw nɩ fãw k'ɩ̃ɩ bãw ŋmɩŋmɩn n'a nɩr na tʋ̃ɔ́ ɩ yã-bãwnɛ. Ɩ̃ jɩ́r'ɩ a nɩsaal tẽw zu ka tõ-nɛ́ɛ za kaa vla vla. Bom ŋa n'ʋ ɩ̃ nyɛ̃: tɩmɛ saa bɛ mɩ́ gúr a tɩ̃ɩsɔw nɩ a mʋ̃tɔ̃w a, tɩ kʋ̃ tʋ̃ɔ́ mɩ́ bãw a ʋlɩ bom a Naaŋmɩn na ɩrɛ a yele na mɩ́ tarɛ a tẽw zu ka a pʋɔ ɩ. A nɩsaal na tʋ̃ɔ́ na mɩ́ bàlɛ ʋ tʋɔra bɔbr, ʋ bɛ nyɛrɛ ʋ ɛ. A yã-bãwnɛ mɩ́ saa wa yel k'ʋʋ bãw ʋ na a, ʋ kʋ̃ tʋ̃ɔ́ bãw a pɛr ɛ.