Ekilezɩasɩ 6 - A SƐB-SÕW

¹ Ɩ̃ lɛb'a nyɛ̃ kpɩɛrʋ kãw a tẽw zu ka, kpɩɛrʋ kpɛ̃ɛ a nɩsaalbɛ ƴãw.

² Nɩr'ɩ ŋa Naaŋmɩn kʋ̀ naalʋ, tɛra nɩ yúor. A nɩr ŋa tɛr'ɩ a alɩ bome nɛ ʋ na mɩ́ bɔbr a. Ɛcɛ Naaŋmɩn bɛ bɛr ʋ ʋ wõ nʋ̃ɔ̀ nɩ a ʋ bʋ̃-tɛrɩ ɛ. Nɩ-yũo n'ʋ íre a ʋ tɛra á ŋá tɔnɛ. À á ŋá mɩ̀ ɩ n bàlʋ zawla nɩ kpɩɛrʋ kpɛ̃ɛ.

³ Nɩr na tʋ̃ɔ́ na dɔw bibiir kʋba (100), ɛ́ vʋʋrɩ cɛlɩ. Ɛcɛ a nyɔ-vʋʋr-wogo ŋa pɛr'ɩ bo, ʋlɛ bɛ wa wõ nʋ̃ɔ̀ bɩɩ bɛ bɛ maalɩ a ʋ kuor a? Mãa zie a, bi-cur-bɛra sa ʋ na.

⁴ Bʋ̃ʋ n'ʋ vɛ̃, zawlalɛ n'a a bie ŋa dɔw ɛ́ lɛb kpɩɛr a lige pʋɔ, ɛ́ a lige na pili na pàw a ʋ yúor.

⁵ Ʋ bɛ nyɛ̃ a mʋ̃tɔ̃w ɛ́ mɩ́ bɛ bãw ʋ ɛ, ʋ be n pɩ̃ɛnʋ pʋɔ zuo a nɩr ŋa na vʋʋrɩ cɛlɩ a.

⁶ A nɩr ŋa saa tɩ vʋʋrɩ yome túr-ayi (2 000) ɛ́ bɛ wa lɛm a nʋ̃ɔ̀ kaa a, a bɛ tɛr pɛr ɛ. Bʋ̃ʋ n'ʋ vɛ̃, a nyɔ-vʋʋrʋ za baarʋ n'ɩ a kũu.

⁷ A nɩsaal tome za ɩ n a ʋ nʋɔr-dɩb ƴãw, ɛcɛ a ʋ kɔ̃ bɛ dãw baarɩ ɛ.

⁸ Bʋ̃ʋ n'ʋ a yã-bãwnɛ tɛr zuo a dãbol? A nã́w sob na tɛr maal-ɩb a ʋ taabɛ niŋé a yel-ɩra n'ɩ bo?

⁹ A alɩ bome nɛ a fʋ mimir na nyɛ̃ a sa n a bʋ̃-bɔbrɩ fʋ na bɛr a tawr fʋ a. À á ŋá mɩ̀ ɩ n bàlʋ zawla nɩ sɛsɛb diwfʋ.

Wulu na tu yã-bãwfʋ a

¹⁰ Bom za na be a, bɛ tɩ dãw na bãw ʋ, ɛ́ tɩ bãw nɩ vla a sob nɛ na n'ɩ a nɩsaal a: ʋ kʋ̃ tʋ̃ɔ́ ŋmɛ nɔkpɛn nɩ nɩr na kpɛmɛ zuo ʋ a ɩ.

¹¹ Ƴɛ̀r-yaga wa be be a, a mɩ́ wa n nɩ yel-zawlɛ yaga. Bʋ̃ʋ tɔnɛ n'a be a pʋɔ?

¹² A nɩsaal mɩ́ vʋʋr'a tɔl fɔ̃w zuo mɛ̃ a ɓaarʋ a. Ãa n'ʋ bãw bom nɛ na vɩɛl a ʋ zie, a ʋ bibie za nyɔ-vʋʋr-ŋmãa ŋa pʋɔ a? Nɩr za kʋ̃ yel bom nɛ na na ɩ a tẽw zu ka a kʋ̀ ʋ a ʋ pùorí ɛ.