Ekilezɩasɩ 5 - A SƐB-SÕW

¹ Ta mɩ́ pawr a ƴɛ̀rʋ ƴãw ɛ, ɛ́ ta mɩ́ zɛ̃zɛ̃ ƴãw nʋɔr kʋ̀ a Naaŋmɩn ɛ. A Naaŋmɩn be n a salom zu, ɛ́ fʋ̃ʋ be a tẽw zu. Lɛ so, a fʋ ƴɛ̀rʋ, a ta mɩ́ yãwmɛ ɩ.

² Bʋ̃ʋ n'ʋ vɛ̃, a tɩɛr-yaga yaga waar'ɩ nɩ zán-faar, ɛ́ a ƴɛ̀r-yaga yaga pʋɔ n'a a dãbol-ƴɛ̀rʋ yire.

³ Fʋ̃ʋ wa kõ nʋɔr kʋ̀ a Naaŋmɩn a, ír ʋ fɔ̃wlɛ, bʋ̃ʋ n'ʋ vɛ̃, Naaŋmɩn bɛ nɔnɛ a dãbole ɩ. Lɛ so, ír a nʋɔr fʋ na kõ a.

⁴ A nʋɔr fʋ na bɛ kõ a, alɛ sa fʋ na kõ ɛ́ bɛ ír a.

⁵ Ta bɛr a fʋ nʋɔr ʋ ɩ fʋ ɩ sãwna sob ɛ, ɛ́ ta cen a Naaŋmɩn nɩ-tona zie tɩ yel kɛ́ fʋ tuli na ɩ. Alɛ bɛ ɩ lɛ, Naaŋmɩn na nyɛ̃ nɩ suur a ƴɛ̀rʋ á ŋá ƴãw, ɛ́ sãw a fʋ nuru tome bɛr.

⁶ A ƴɛ̀r-yaga yaga bɛ mɩ́ tɛr pɛr, mɛ̃ a lɛ a zán-yaga yaga mɩ̀ na bɛ mɩ́ tɛr pɛr a ɩ. Alɛ pʋɔ a, nɩ̃ɛ zɔrɛ a Naaŋmɩn.

A bɛlɩ dem na dɩrɛ a naalʋ a bɛ mɩ́ dɩrɛ ʋ vla ɩ

⁷ Fʋ̃ʋ wa nyɛ̃ bɛ dɔwrɛ a nã́w sob, bɛ bɛ tuur a yel-na-tu-sɔr nɩ a mɩnʋ tẽw kãw pʋɔ a, a taa wa ùre fʋ ɛ. Bʋ̃ʋ n'ʋ vɛ̃, nɩr na do gãw a ʋ tɔ a zu-sɔw a, nɩr be n be piw ʋ tɛr, ɛ́ a bɛ za ayi zu-sɔw a, nɩbɛ mɩ̀ lɛb'a be be do gãw bɛ, ɛ́ mɩ̀ piw bɛ tɛr.

⁸ A nɩbɛ za so a tẽsɔw tɔnɛ. A nãà tɔr za tɛr'ɩ a póru tome yel-ɩra.

A naalʋ bɛ tɛr yel-ɩra ɩ

⁹ Nɩr na nɔ̃w a libie a bɛ dãw tɛr a a sɛw ʋ ɛ. Nɩr na nɔ̃w a tɛra a bɛ dãw tɛr a a man ʋ ɛ. À á ŋá za mɩ̀ ɩ n bàlʋ zawla.

¹⁰ Nɩr wa tɛr a yaga a, nɩ-yaga nɛbɛ mɩ́ so a dɩrɛ. Bʋ̃ʋ tɔnɛ n'a a sob nɛ mɩ́ páw? A ʋ naalʋ tɛwr'a ʋ na tʋ̃ɔ́ mɩ́ jɩ́rɛ.

¹¹ Tõ-tone gʋ̃ɔ mɩ́ nʋmɛ na ʋlɛ saa tɛr bʋ̃-dɩrɩ blã bɩɩ yaga na dɩ a. Ɛcɛ tɛra sob bʋ̃-yaga bɛ mɩ́ sàw ʋ na gúr ɛ.

¹² Ɩ̃ nyɛ̃ nɩ kpɩɛrʋ kãw na kpɛ faa a tẽw zu a: nɩr na maal bin a ʋ naalʋ a ʋl mɩŋa malʋ ƴãw a.

¹³ A naalʋ á ŋá mɩ́ bɔr'ɩ yel na bɛ tɛr tɔnɛ a pʋɔ. Ɛ́ ʋlɛ wa dɔw bidɛb a, bom bɛ mɩ́ lɛb cãà a ʋ nũú ɛ.

¹⁴ Mɛ̃ a lɛ ʋ na yi a ʋ mã puori ɩ a ƴã-gã-kpãkpol a, lɛ mɩ̀ n'a ʋ na yi a tẽw zu ka lɛb cen. Ʋ kʋ̃ ír tɔnɛ kãw za a ʋ tome pʋɔ ɩ, ʋ kʋ̃ tɛr bom kãw za cen nɩ ɛ.

¹⁵ Kpɩɛrʋ kpɛ̃ɛ n'ʋ a ʋ zie, k'ʋʋ yi a tẽw ŋa zu mɛ̃ a lɛ ʋ na wa a. Bʋ̃ʋ n'ʋ ʋ páw a ʋ tome pʋɔ? Zawlalɛ n'a ʋ tõ.

¹⁶ Lɛb waar mɩ̀, a ʋ nyɔ-vʋʋrʋ daar za a, ʋ nyɛ̃ nɩ niw-sʋba yaga nɩ pʋ-sãwna, suur nɩ a kanyir na baarɩ a.

¹⁷ Lɛ so, a bom a mãa na nyɛ̃ ʋ vɩɛl'a n'ɩ ŋa: a sɛw na k'aa nɩsaal mɩ́ dɩrɛ, ɛ́ nyuur ɛ́ wone nʋ̃ɔ̀ nɩ a ʋ tome tɔnɛ a tẽw zu ka, a nyɔ-vʋʋrʋ a Naaŋmɩn na kʋ̀ ʋ a daar. Bʋ̃ʋ n'ʋ vɛ̃, a ʋ dem'ɩ a lɛ.

¹⁸ Lɛb waar mɩ̀, Naaŋmɩn na tʋ̃ɔ́ na kʋ̀ nɩr naalʋ nɩ tɛra, ɩ ʋ so a dɩrɛ, íre a tome tɔnɛ wone nɩ nʋ̃ɔ̀. Naaŋmɩn bʋ̃-kʋ̀ra n'ʋ.

¹⁹ A lɛ pʋɔ a, a nɩsaal mɩ́ yiir'ɩ a ʋ nyɔ-vʋʋrʋ na ɩ ŋmãa a, bʋ̃ʋ n'ʋ vɛ̃, Naaŋmɩn mɩ́ paal'ɩ a ʋ socir nɩ nʋ̃ɔ̀.