Ekilezɩasɩ 4 - A SƐB-SÕW

Nɛb-taa nɩ yele na bɛ sɛw a

¹ Ɩ̃ nyɛ̃ nɩ a dɔwr-taa za na be a tẽw zu ka a. A bɛlɩ dem bɛ na dɔwrɛ a ŋmɩɛr'ɩ cɛlsɩ, ɛ́ nɩr bɛ mɔwlɛ bɛ ɩ. A bɛ dɔwr-dɔwrbɛ nɛbɛ tɛr a fãw, lɛ so mɔwl-mɔwlɛ bɛ ka be ɩ.

² Mãa zie a, a nɩ-kũuni tɛr'ɩ zu-nʋ̃ɔ̀ zuo a nɩ-vʋʋrɩ.

³ Ɛcɛ a sob nɛ na bɛ dɔw sɛr a tɛr'ɩ zu-nʋ̃ɔ̀ zuo a nɩ-kũuni nɩ a nɩ-vʋʋrɩ, ʋ na bɛ nyɛ̃ a ɩ-faar na ɩrɛ a tẽw zu ka a zũú.

⁴ Yel ŋa n'ʋ ɩ̃ mɩ̀ nyɛ̃: a nɩbɛ mɩ́ bàlɛ nɩ bɛ tʋɔra, ɛ́ bɔbr kɛ́ bɛ tõ a bɛ tome vla, a bɛ taabɛ zuo bɛ́rʋ tɛwr ƴãw. À à ŋá mɩ̀ ɩ n bàlʋ zawla nɩ sɛsɛb diwfʋ.

⁵ A dãbol sob na mɩ́ tɩɛ gbɛ́ɛ zɩ̃ nɩ a mɩ́ kpi n kɔ̃.

⁶ Ɛcɛ pɩ̃ɛnʋ blã sa tõ-kpɛ̃w fʋ na tone ɛ́ a ɩ sɛsɛb'ʋ fʋ diwr a.

⁷ Yel ŋa n'ʋ ɩ̃ lɛb nyɛ̃ a tẽw zu ka ʋ ɩ bàlʋ zawla:

⁸ nɩr kãw n'ɩ ŋan ɩ ʋ yõ tẽtẽ, bɛ tɛr tu-ta-tɔ ɩ, bɛ tɛr bie ɩ, bɛ tɛr yɛb ɛ, ɛ́ tone bɛ tɛr bɛ́rʋ ɛ. Ʋ mɩ́ bɔbr'a k'ʋʋ cãà páw na-bome dɔwlɩ. Ɛcɛ ʋ mɩ́ tɩɛr'ɩ ʋ pʋɔ: «Ãa ƴãw n'a ɩ̃ tone? Ãa ƴãw n'a ɩ̃ bɛr a nʋ̃ɔ̀ wob?» À á ŋá mɩ̀ ɩ n bàlʋ zawla, nɩ yel na bɛ vɩɛl a nyɔ-vʋʋrʋ pʋɔ a.

⁹ Nɩbɛ ayi na lãw tone a sa n nɩ-been, bʋ̃ʋ n'ʋ vɛ̃, bɛ páwr'ɩ tɔnɛ yaga a bɛ ton pʋɔ.

¹⁰ A bɛ kãw wa lo a, a kãw na nyɔw ʋ na ʋ lɛb ìr. Ɛcɛ baw-bio sob'ɩ a sob nɛ na ɩ ʋ yõ a, ʋlɛ wa lo a, nɩr bɛ ka be na nyɔw ʋ ʋ lɛb ìr ɛ.

¹¹ Lɛb waar, nɩbɛ ayi wa lãw gã a, tʋlʋ mɩ́ kpɩɛr bɛ na. Ɛcɛ sob nɛ na ɩ ʋ yõ a, ŋmɩŋmɩn n'a ʋ na ɩ a tʋlʋ tɩ kpɛ ʋ?

¹² Nɩbɛ ayi na tʋ̃ɔ́ na zɛb tʋ̃ɔ́ nɩ-been mɔlɛ lɛ. Miwr na mĩ nɩ fomi-mɩɩlɛ yaga a kʋ̃ tʋ̃ɔ́ ŋmãa mɔlɛ ɩ.

¹³ Pɔlbile na bɛ tɛr bom za ɛ́ bãw yã a sa n nãà na kor ɛ́ bɛ tɛr yã ɛ́ mɩ̀ bɛ sàwr bɛ na wul ʋ a.

¹⁴ A yel ŋa ɩ n yel-mɩŋa, a pɔlbile saa yi gaso pʋɔ lɩɛbɩ a nãà, bɩɩ ʋlɛ saa tĩ zɛlɛ a ʋ naalʋ-tẽw pʋɔ a.

¹⁵ Ɩ̃ nyɛ̃ na k'aa tẽw zu ka a, a nɩbɛ za tɩ tu n a pɔlbile na na dɩ a naalʋ, lɩɛrɩ a na-kʋra a.

¹⁶ Ʋ na lɩɛb'ɩ nɩ-yaga yaga nãà. Ɛcɛ a pùorí a, a nɩbɛ kʋ̃ cãà cɩlɛ a ʋ ƴãw ɛ. À á ŋá mɩ̀ ɩ n bàlʋ zawla nɩ sɛsɛb diwfʋ.

Ta ƴɛ̀rɛ yaga yaga a Naaŋmɩn niŋé ɩ

¹⁷ Tɛr maal-ɩb a lɛn daar fʋ na mɩ́ cere a Naaŋmɩn yir a. Mɩ́ cen a be a ɩ bɛr-wob ƴãw, alɛ sa fʋ na na maalɛ a bagɛ mɛ̃ a dãbole a. Bʋ̃ʋ n'ʋ vɛ̃, bɛ bɛ mɩ́ bãw kɛ́ bɛ ɩrɛ nɩ faa ɩ.