Ekilezɩasɩ 3 - A SƐB-SÕW

Bom za nɩ ʋ daar

¹ A tẽ-daa ŋa zu a, bom za tɛr'ɩ ʋ daar, ɛ́ vuo be be bom za ƴãw.

² Dɔwfʋ daar be n be, kũu daar be be. Sɛlʋ daar be n be, a bʋ̃-sɛlɩ vɔb daar be be.

³ Kʋb daar be n be, sanʋ daar be be. Da-lɔbrʋ daar be n be, mɛb daar be be.

⁴ Kon daar be n be, laarʋ daar be be. Kuor cɛlsɩ daar be n be, nʋ̃ɔ̀ bɩnɛ daar be be.

⁵ Kʋsɛbɛ lɔb-bɛrʋ daar be n be, kʋsɛbɛ wobru daar be be. Weri taa daar be n be, ta weri taa daar be be.

⁶ Bɔb daar be n be, bɔr-bɛrʋ daar be be. Tɛrʋ daar be n be, lɔb-bɛrʋ daar be be.

⁷ Cɩ̀ɛr-bɛrʋ daar be n be, sɛb daar be be. Gbili-ɩb daar be n be, ƴɛ̀rʋ daar be be.

⁸ Nɔ̃wfʋ daar be n be, hɩ̃ɛnʋ daar be be. Zɛbr daar be n be, ƴã-ɓaarʋ daar be be.

⁹ Bʋ̃ʋ tɔnɛ n'a a tõ-tone mɩ́ páw a hanʋ ʋ na mɩ́ hanɩ tõ a pʋɔ?

¹⁰ Ɩ̃ nyɛ̃ nɩ a tõ-toni a Naaŋmɩn na kʋ̀ a nɩsaalbɛ a.

¹¹ Naaŋmɩn mɩ́ ɩ na kɛ̀ yel za maalɩ a daar ʋl na sɛw taa nɩ a. Ʋ mɩ̀ mɩ́ kʋ̀ n a nɩsaalbɛ kɛ́ bɛ bɔbr a yele na tɔl a, nɩ a yele na waar a bãwfʋ. Ɛcɛ bɛ kʋ̃ tʋ̃ɔ́ mɩ́ bãw a Naaŋmɩn ton ʋ za ɩ.

¹² Ɩ̃ bãwnɩ a na kɛ́ bʋ̃-vla za bɛ ka a nɩsaal ƴãw, a bɛ ɩ k'ʋʋ cɩlɛ ɛ́ páwr a ʋ nʋ̃ɔ̀ a ʋ nyɔ-vʋʋrʋ daar ɛ.

¹³ Nɩr na mɩ́ wa dɩrɛ ɛ́ nyuur, ɛ́ páwr a ʋ tome tɔnɛ a, Naaŋmɩn n'ʋ mɩ́ kʋ̀ ʋ.

¹⁴ Ɩ̃ bãwnɩ a na, bom za Naaŋmɩn na maalɩ a na be n be kʋralɛ. Bom bɛ lɛb dɔwlɛ ɩ, bom bɛ lɛb íre bɛrɛ ɩ. A Naaŋmɩn mɩ́ ɩ n à à ŋá k'aa nɩsaalbɛ zɔrɛ ʋ.

¹⁵ Bom nɛ na be a tɩ dãw na be, ɛ́ bom nɛ na na be a tɩ dãw na be. Naaŋmɩn mɩ́ ɩ na a yele a lɛb puule.

A kũu n'ɩ a bom za baarʋ zie

¹⁶ Yel ŋa n'ʋ ɩ̃ mɩ̀ cãà lɛb nyɛ̃ a tẽw zu ka: be a yel-na-tu-sɔr na tɩ sɛw k'ʋʋ be a, be n'a a faalʋ be, ɛ́ be a mɩnʋ na tɩ sɛw k'ʋʋ be a, be n'a a faalʋ be.

¹⁷ Lɛ n'a ɩ̃ tɩɛr'ɩ ɩ̃ pʋɔ à ŋá: Naaŋmɩn na dɩ n nɩ a nɩ-mɩŋa nɩ a nɩ-faa a ƴɛ̀rʋ, bʋ̃ʋ n'ʋ vɛ̃, bom za tɛr'ɩ ʋ daar, ɛ́ ɩb za tɛr ʋ daar.

¹⁸ A nɩsaalbɛ ƴãw a, ɩ̃ tɩɛr k'aa Naaŋmɩn mɩ́ ɩ bɛ na kaa, k'ʋʋ wul bɛ kɛ́ bɛ bɛ sa a dʋn ɛ.

¹⁹ Bʋ̃ʋ n'ʋ vɛ̃, lɛ a nɩsaalbɛ na ŋmɛ̃ a bɛ baarʋ daar a, lɛ n'a a dʋ̃w mɩ̀ ŋmɛ̃, bɛ za dem ɩ n been: a lɛ a dʋ̃w na mɩ́ kpi a, lɛ n'a a nɩsaal mɩ̀ mɩ́ kpi, nyɔ-vʋʋrʋ pɩɛlʋ been n'ʋ bɛ za tɛr. A nɩsaal bɛ zuo a dʋ̃w towtow ɛ, bʋ̃ʋ n'ʋ vɛ̃, bom za ɩ n bàlʋ zawla.

²⁰ Nyɔ-vʋʋrʋ za baarʋ mɩ́ ɩ n been, bom za yi n tẽsɔw pʋɔ, ɛ́ na lɛb kpɛ a tẽsɔw pʋɔ.

²¹ Ãa n'ʋ na tʋ̃ɔ́ yel k'aa nɩsaalbɛ vʋʋrʋ dúori saa-zu, ɛ́ a dʋn dem siwr pile a tẽsɔw pʋɔ?

²² Lɛ n'a ɩ̃ nyɛ̃ k'aa nɩsaal yel-vla vla za n'ɩ k'ʋʋ wone nɩ nʋ̃ɔ̀ a ʋ tome tɔnɛ. A ʋ dem tɛwr'ɩ a lɛ, bʋ̃ʋ n'ʋ vɛ̃, nɩr bɛ lɛb tɛrɛ ʋ waar'ɩ ʋ wa nyɛrɛ bom nɛ na na ɩ a ʋ pùorí a ɩ.