Ekilezɩasɩ 2 - A SƐB-SÕW

¹ Ɩ̃ tɩɛr'ɩ ɩ̃ pʋɔ à ŋá: «Wa wa lɛm a nyɔ-vʋʋrʋ nʋ̃ɔ̀ kaa, bãw a lɛ a nʋ̃ɔ̀ na ŋmɛ̃ a.» Ɛcɛ nyɛ̃, à á ŋá za mɩ̀ ɩ n bàlʋ zawla.

² A laarʋ ɩ n dãbol-ɩb, ɛ́ a nʋ̃ɔ̀ bɛ ɩrɛ bom za ɩ.

³ Ɩ̃ tɩɛr'ɩ ɩ̃ pʋɔ k'ɩ̃ɩ na nyuur'ɩ a divɛ̃ wone nɩ nʋ̃ɔ̀, cɔwrɛ nɩ a dãbole nyɔ-vʋʋrʋ ɛ́ cãà ƴãw fãw so ɩ̃ tʋɔra. Ɩ̃ tɩ bɔbr'a k'ɩ̃ɩ bãw a vla a nɩsaalbɛ na na tʋ̃ɔ́ maalɩ a bɛ tẽw zu ka nyɔ-vʋʋrʋ daar a.

⁴ Ɩ̃ tõ n tõ-bɛrɛ. Ɩ̃ ŋma n yie, ɛ́ sɛl divɛ̃ tɩɩr.

⁵ Ɩ̃ ƴãw nɩ zaadɛnɩ nɩ tɩ-wɔnɩ púo, púo na tɛr tɩ-wɔ̃-pɛ-bʋʋrɛ bʋʋrɛ za a.

⁶ Ɩ̃ tuw nɩ sa-bie-kʋ̃ɔ-bɔwrɩ a ɩ̃ púo tɩ-pɔlɛ cɔrʋ ƴãw.

⁷ Ɩ̃ dà n gbãgbaar, dɛbr nɩ pɔwbɛ, ɛ́ tɛr tõ-tõ-biir yaga. Ɩ̃ tɩ tɛr'ɩ dʋn: nĩi, píir nɩ bʋʋr bɛ dɩ vuo ɩ, zuo a bɛlɩ dem za na tɩ de niwn vʋʋrɩ a Zerizalɛm a ɩ̃ ƴãw a.

⁸ Ɩ̃ mɩ̀ bɔ n salm-pla nɩ salm-zɩɛ gbõ taa, a na-mɩnɛ nɩ a tẽ-ŋma-kʋ̀rɩ ɩ̃ na tɩ so a na-bome pʋɔ n'a a tɩ yi. Ɩ̃ páw nɩ yiel-yielbɛ dɛbr nɩ pɔwbɛ, ɛ́ páw bom nɛ a dɛbr na mɩ́ bɔbr zuo a za a: pɔwbɛ yaga yaga.

⁹ Ɩ̃ wa tɩ ɩ n nɩr na tɛr yúor a, ɩ nɩr na kpɛ naalʋ zuo a bɛlɩ dem za na de niwn vʋʋrɩ a Zerizalɛm a ɩ̃ ƴãw a. Ɛcɛ, ɩ̃ tɩ cãà na tɛr a yã-bãwfʋ.

¹⁰ Ɩ̃ bɛ sɩb ɩ̃ tʋɔra bom kãw za ɩ̃ na bɔbr a ɩ. Ɩ̃ bɛ zawrɩ nʋ̃ɔ̀ kãw za wob ɛ. Yel-mɩŋa, ɩ̃ ír'ɩ a ɩ̃ tome za tɔnɛ, ɛ́ wõ a nʋ̃ɔ̀ al za a na tɩ tʋ́ɔr kʋ̀rɛ mɛ̃ a.

¹¹ Lɛ n'a ɩ̃ tɩɛrɩ a ɩ̃ tome za kaa, ɛ́ nyɛ̃ a bàlʋ ɩ̃ na bàl ɩ̃ tʋɔra tõ a a. Ɛcɛ nyɛ̃, à á ŋá za ɩ n bàlʋ zawla nɩ sɛsɛb diwfʋ. A nɩsaalbɛ bɛ nyɛrɛ tɔnɛ kãw za a bɛ tẽw zu ka nyɔ-vʋʋrʋ pʋɔ ɩ.

¹² Ɩ̃ tɩ bɔbr'a k'ɩ̃ɩ bãw bʋ̃ʋ n'ɩ a yã-bãwfʋ, bʋ̃ʋ n'ɩ a yãyaar nɩ a dãbolu. Ɩ̃ tɩ sowr'ɩ ɩ̃ tʋɔra à ŋá: «A nɩr ʋl na na ɩ a nãà a ɩ̃ pùorí a, ʋ na ɩrɛ na mɛ̃ a ʋ taabɛ bɛl na de ʋ niwn a bɩɩ?»

¹³ Yel-mɩŋa n'a, ɩ̃ nyɛ̃ na k'aa yã-bãwfʋ sa a dãbolu, mɛ̃ a lɛ a cãà na sa a lige a.

¹⁴ Bʋ̃ʋ n'ʋ vɛ̃, a yã-bãwnɛ mɩ́ nyɛ̃ nɩ be ʋ na cere a, ɛ́ a dãbol sob cere lige pʋɔ. Ɛcɛ mãa a, ɩ̃ bãwnɩ a na, a bɛ za ayi baarʋ ɩ n been.

¹⁵ Ɩ̃ tɩɛr'ɩ ɩ̃ pʋɔ à ŋá: «Ɩ̃ na baar'a mɛ̃ a dãbol sob a. A na ɩ à ŋá a, a tɔnɛ n'ɩ a abobe ɩ̃ na na ɩ a yã-bãwnɛ zuo ʋ a? À á ŋá za mɩ̀ cãà na lɛb ɩ bàlʋ zawla!»

¹⁶ Bom nɛ za na mɩ́ ta a yã-bãwnɛ nɩ a dãbol sob a, bɛ mɩ́ yiiri ʋ na bɛr a bibie na tu a pʋɔ. A yã-bãwnɛ mɩ́ kpi na, mɛ̃ a dãbol sob a, ɛ́ a nɩsaalbɛ yiiri a bɛ za ayi bɛr. Bʋ̃ʋ n'ʋ so a ŋmɛ̃ à à ŋá?

¹⁷ Lɛ so ɩ̃ hɩ̃ɛn a nyɔ-vʋʋrʋ, bʋ̃ʋ n'ʋ vɛ̃, ɩ̃ nyɛ̃ na kɛ́ bom nɛ za a nɩsaalbɛ na ɩrɛ a tẽw zu ka a bɛ vɩɛl ɛ, a za ɩ n bàlʋ zawla nɩ sɛsɛb diwfʋ.

¹⁸ Ɩ̃ bɛ nɔnɛ a hanʋ al za ɩ̃ na hanɩ a tẽw zu ka a ɩ. Bʋ̃ʋ n'ʋ vɛ̃, ɩ̃ na bɛr'ɩ a bome al ɩ̃ na páw a kʋ̀ a sob nɛ na na lɩɛrɩ mɛ̃ a.

¹⁹ Ʋ na ɩ n yã-bãwnɛ bɩɩ dabol sob? Ãa n'ʋ na tʋ̃ɔ́ bãw? Ɛcɛ ʋ na so nɩ a ɩ̃ bom za ɩ̃ na tõ n yã-bãwfʋ páw a tẽw zu ka a. A yel ŋa mɩ̀ ɩ n bàlʋ zawla!

²⁰ Ɩ̃ na nyɛ̃ ɩ̃ bàl ɩ̃ tʋɔra sɛw à ŋá a tẽw zu ka a, a ɩ̃ tɩɛrʋ za wɛ na.

²¹ Bʋ̃ʋ n'ʋ vɛ̃, nɩr'ɩ ŋa tõ a ʋ ton nɩ yã-bãwfʋ, nɩ tome-bãwfʋ ɛ́ tõ páw, ɛcɛ nyɛ̃, nɩ-yũo na bɛ tõ a n'ʋ a fɛr k'ʋʋ bɛr a ʋ dem á ŋá kʋ̀. À á ŋá mɩ̀ ɩ n bàlʋ zawla nɩ faalʋ kpɛ̃ɛ!

²² À na ŋmɛ̃ à ŋá a, bʋ̃ʋ tɔnɛ n'a a nɩsaal mɩ́ páw a tẽw zu ka, a tome nɩ a ʋ mɩŋa bàlʋ za pʋɔ?

²³ A ʋ bibie za tõ-nɛ́ɛ mɩ́ waar'ɩ nɩ tɩɛrʋ nɩ pʋ-sãwna, ɛ́ a tɩ̃ɩsɔw tɔr za a, a ʋ tɩɛrʋ bɛ mɩ́ gã zoom ɛ. A yel ŋa mɩ̀ ɩ n bàlʋ zawla.

²⁴ A nɩsaal bʋ̃-vla yõ n'ɩ k'ʋʋ dɩrɛ, k'ʋʋ nyuur ɛ́ wone nʋ̃ɔ̀ nɩ a ʋ tome tɔnɛ. A mãa a, ɩ̃ nyɛ̃ na kɛ́ Naaŋmɩn n'ʋ mɩ̀ mɩ́ tɩr a lɛ.

²⁵ Ãa n'ʋ na tʋ̃ɔ́ dɩrɛ ɛ́ wone nʋ̃ɔ̀, Naaŋmɩn bɛ wa n'ʋ kʋ̀ ʋ a lɛ a?

²⁶ Sɩza, ʋ mɩ́ kʋ̀ n a yã-bãwfʋ, a yele-bãwfʋ nɩ a nʋ̃ɔ̀ a sob nɛ na pɛlɩ a ʋ pʋɔ a. Ɛcɛ ʋ mɩ́ ƴãw na a yel-bier-maalɛ bɔbr bʋ̃-vɩɛlɩ gbone taa a sob nɛ na pɛlɩ a ʋl Naaŋmɩn pʋɔ a ƴãw. A yel ŋa mɩ̀ ɩ n bàlʋ zawla nɩ sɛsɛb diwfʋ.