Ekilezɩasɩ 12 - A SƐB-SÕW

¹ Fʋ na ɩ pɔlbile a, ta yiiri a fʋ Íre bɛr ɛ. Lɛb tɩɛrɩ a ʋ yele, ɛ́ a bibi-faar nɩ a yome al fʋ na na yel: «A nyɔ-vʋʋrʋ bɛ ɩrɛ mɛ nʋ̃ɔ̀ a», wa bãw vɩɛ.

² Lɛ n'a a mʋ̃tɔ̃w nɩ a cãà mɩ́ liw, a cuw nɩ ŋmar-bie mɩ̀, ɛ́ a zũzuwe mɩ́ lɛb wa a saa na mĩ baar'a.

³ Lɛ n'a a yir-gurbɛ na màwr, a dɛb-gãdaar ka gùr, a zɔ̃-ƴɛ́rbɛ bɛr a zɔ̃ ƴɛ́rʋ bɛ na bɛ yãwmɛ a ƴãw, ɛ́ a pɔwbɛ na mɩ́ jɩ́rɛ a tokoro vʋɔrɩ́ a vɩɛlʋ baarɩ.

⁴ Lɛ n'a a dɩ̃dɔr na tori a sɔ́r a na pàw, a nɩɛr gɔmɛ siwri, a lile yielu ŋmãa, a yielu za tɛw.

⁵ Lɛ n'a a sɔ́r na dúor a na ɩrɛ dɛ̃bɩ̃ɛ, ɛ́ pʋl-vʋ̃ɔ be a sɔ́r zu. A zukɔbɛ na pɛlɩ na mɛ̃ tɩɛ na pu a, ɛ́ a ƴã-gan tɩbrɛ mɛ̃ sãsowr na ìr gù ɛ́ lɛb lo a, ɛ́ a bʋ̃-dɩ-mɩɩla nʋ̃ɔ̀ baarɩ. À ŋá n'a ŋa na mɩ́ cere a ʋ yir-pɛ-baara pʋɔ, ɛ́ a kõ-konbɛ be a sɔ́r zu baarɩ.

⁶ Lɛ n'a a salm-pla fomiwr na ŋmãa, a salm-zɩɛ koli-nyúura ŋmɛr, a yuor ŋmɛr a bule pɛr, a bule miwr for lo a bule pʋɔ.

⁷ A nɩsaal ƴã-gan mɩ́ lɛb'a kpɛ a tẽw, a be ʋ na yi a, ɛ́ a vʋʋrʋ lɛb cen a Naaŋmɩn na n'ʋ tɩr ʋ a zie.

⁸ Bàlʋ zawla, bàlʋ zawla, bom za ɩ n bàlʋ zawla, Kohelɛtɩ yel'ɩ lɛ.

A ƴɛ̀rʋ nʋɔr kʋb

⁹ A ʋlɩ bom nɛ na lɛb dɔwlɩ a Kohelɛtɩ yã-bãwfʋ zu a n'ɩ k'ʋʋ lɛb'a zanɩ nɩ a nɩbɛ a bãwfʋ. Ʋ bɔ n zʋkpaɩ yaga pɛr bãw, jieli a, ɛ́ ɩ a tu taa vla vla.

¹⁰ A Kohelɛtɩ ƴãw nɩ fãw nyɛ̃ ƴɛ̀r-bie na nʋmɛ a, ɛ́ sɩrɩ manɩ a lɛ a yele na ɩ a.

¹¹ A yã-bãwnbɛ ƴɛ̀rʋ ɩ na mɛ̃ nĩi dà-ɓɩlɓɩl a. A bɛlɩ dem na sɛbr a sɛbr a ɩ na mɛ̃ kpawbie bɛ na bà vla vla a. A Naaŋmɩn na ɩ a bʋ̃-cɩ̃ɩn-been tẽtẽ a n'ʋ tɩr à á ŋá za.

¹² Ɩ̃ bie e, gù fʋ tʋɔra, taa ƴãwnɛ bom dɔwlɛ ɩ. Sɛb-yaga sɛbrʋ ɩ n tõ-nʋɔr na bɛ tɛr tɛwfʋ zie a, ɛ́ a zanʋ yaga bàlɛ a ƴã-gan.

¹³ Nyɛ̃ a ƴɛ̀rʋ á ŋá za na ƴɛ̀r a nʋɔr kʋb zie: zɔrɛ a Naaŋmɩn ɛ́ sàwr a ʋ nɛ-ƴãwnɩ. À à ŋá n'a a fɛr kɛ́ nɩsaal za ɩrɛ.

¹⁴ Bʋ̃ʋ n'ʋ vɛ̃, Naaŋmɩn na sowr'ɩ a tɩ ɩ-ɩrɩ za pɛr, a na vɩɛl bɩɩ kpɛ faa, alɛ saa sɔwlɩ a.