Ekilezɩasɩ 10 - A SƐB-SÕW

¹ Nazʋ-kũuni mɩ́ ɩ na a parfɛ̃-maalɛ kãá nyũu sãw. Lɛ mɩ̀ n'a a dãbolu blã mɩ́ sãw a yã-bãwfʋ nɩ a ƴãwfʋ bɛr.

² A yã-bãwnɛ tɩɛrʋ mɩ́ tori na, ɛcɛ a dãbol sob tɩɛrʋ bɛ mɩ́ tori ɛ.

³ A sɔ́r saa n'ʋ a dãbol sob lo cere a, ʋ bɛ mɩ́ tɛr yã ɩ, mɩ́ ƴãw a nɩbɛ za yere k'ʋʋ ɩ n dãbol sob.

⁴ A fʋ nɩ-kpɛ̃ɛ wa nyɛ̃ nɩ fʋ suur a, ta bɛr a fʋ tõ-nʋɔr ɛ, bʋ̃ʋ n'ʋ vɛ̃, a tʋɔra-nyɔwfʋ mɩ́ nɩɩr'ɩ sãwna kpɛ̃ɛ bɛr.

⁵ Nɩ-kpɛ̃ɛ na tʋ̃ɔ́ na tuli, ɩ̃ɩ nyɛ̃ nɩ yel-yaga na bɛ tu a mɩnʋ a, a tẽw zu ka.

⁶ Mɛ̃ à ŋá a, dãbole na tʋ̃ɔ́ na páw tõ-nɔ-bɛrɛ, ɛ́ a nɩ-sɩza mɩnɛ tɛr tõ-nɛ́ɛ na siw pile a.

⁷ Ɩ̃ nyɛ̃ nɩ gbãgbaar bɛ zɔm wie, ɛ́ nɩ-tɩbrɛ cere nɩ gbɛ́ɛ mɛ̃ gbãgbaar a.

⁸ Nɩr na tuwr bɔw a na tʋ̃ɔ́ na lo a ʋ pʋɔ, ɛ́ nɩr na wɛlɛ dacin a, waab na tʋ̃ɔ́ na cɛ ʋ.

⁹ Nɩr na tuwr íre kʋsɛbɛ a na tʋ̃ɔ́ na ƴãw ʋ tʋɔra bàalʋ, ɛ́ nɩr na ɓarɛ dàar a na tʋ̃ɔ́ na cɛ ʋ tʋɔra.

¹⁰ A lɛr-bir bɛ wa cãà dɩrɛ ɛ́ bɛ bɛ saalɩ ʋ a, a fɛr'a kɛ́ bɛ mɩ́ lɛb ƴãw fãw gb'a ayi a cɛb ƴãw. A yã-bãwfʋ tɔnɛ n'ɩ k'ʋʋ mɩ́ ɩ a yele a tʋ̃ɔ́.

¹¹ Nɩr na bãw waab bɛlʋ a, ʋlɛ wa bɛr a waab cɛ ʋ a, a ʋ waab bãw-bɛlʋ tɔnɛ wa?

Ta mɩ́ ƴɛ̀rɛ yaga ɩ

¹² Yã-bãwnɛ wa ƴɛ̀r a, a ʋ ƴɛ̀rʋ mɩ́ pɛlɩ nɩ a nɩbɛ pʋɔ, ɛcɛ a dãbol wa háarɛ a ʋ nʋɔr a, a ʋ ƴɛ̀rʋ mɩ́ siwri ʋ na.

¹³ A ʋ ƴɛ̀rʋ ʋ na mɩ́ tine a mɩ́ ɩ n gẽgemi, ɛ́ a baarʋ zie ɩ dãbol-ƴɛ̀rʋ nɩ ƴɛ̀r-faar.

¹⁴ A gẽgemi sob ƴɛ̀rʋ yaga tɔ. Ɛcɛ a nɩsaal bɛ bãw a ʋlɩ bom nɛ na na ɩ a ɩ. Ãa n'ʋ na yel a ʋlɩ bom nɛ na na ɩ a pùorí a kʋ̀ ʋ?

¹⁵ A gẽgemi sob mɩ́ bàl'ɩ ʋ tʋɔra yaga zawlalɛ. Ʋ tɔr za bɛ mɩ́ bãw a sɔ́r ʋ na na de cen a tẽ-kpɛ̃ɛ pʋɔ a ɩ.

¹⁶ Zu-bio tẽw n'ɩ a tẽw ʋl a nãà na ɩ bibi-cãpile, ɛ́ a ʋ tõ-tõ-bi-bɛrɛ za mɩ́ so dɩb tɛwr dɩrɛ a.

¹⁷ Zu-nʋ̃ɔ̀ tẽw n'ɩ a tẽw ʋl a nãà na ɩ nɩ-yúor pɛr, ɛ́ a ʋ tõ-tõ-bi-bɛrɛ mɩ́ dɩ a bɛ bʋ̃-dɩrɩ a daar ʋl na sɛw taa nɩ a. Bɛ mɩ́ dɩ na kɛ́ bɛ tʋ̃ɔ́ lɛb páw fãw, a bɛ mɩ́ ɩ nyũ-kuol ƴãw n'a ɩ.

¹⁸ Nɩr wa ɩ ƴã-tuo sob a, a ʋ gàr mɩ́ lo na, ʋlɛ bɛ wa tone a, a kʋ̃ɔ mɩ́ kpɩɛr'ɩ a ʋ yir.

¹⁹ A bɛ dɩ̃ɛnʋ ƴãw a, a na-mɩnɛ mɩ́ cɔbr'ɩ bʋ̃-dɩ-nʋʋr nʋʋr. A divɛ̃ mɩ́ ƴãw bɛ nɩ nʋ̃ɔ̀, ɛ́ a libie sõw bɛ bɛ páw bom za.

²⁰ Ta ŋmɩɛr ƴãwn a nãà ɩ, alɛ saa ɩ a fʋ tɩɛrʋ pʋɔ n'a a. Ta ŋmɩɛr ƴãwn a tɛra sob ɛ, a fʋ yõ zie saa n'a a. Bʋ̃ʋ n'ʋ vɛ̃, lile na tʋ̃ɔ́ na de a fʋ ƴɛ̀rʋ cen nɩ, ɛ́ tɩ yel a lɛ za fʋ na yel a.