Ekilezɩasɩ 1 - A SƐB-SÕW

A ZI-DÃW-NIWN SOB 1—6 Bàlʋ zawla

¹ A Daviir bidɛb, Kohelɛtɩ, na tɩ ɩ nãà a Zerizalɛm a, ƴɛ̀r-bie n'ɩ à á ŋá.

² Bàlʋ zawla, bàlʋ zawla, Kohelɛtɩ yel'ɩ lɛ, bàlʋ zawla, bàlʋ zawla, bom za ɩ n bàlʋ zawla.

³ Bʋ̃ʋ tɔnɛ n'a a nɩsaal pãa mɩ́ páw a ʋ tẽw zu ka tõ-kpɛn pʋɔ a?

⁴ Nɩbɛ mɩ́ dɔw na kpi lɩɛrɩ taa cen, nɩbɛ dɔw lɩɛrɩ taa wa, ɛ́ a tẽsɔw cãà be kʋralɛ.

⁵ A mʋ̃tɔ̃w mɩ́ pur'a, a mʋ̃tɔ̃w mɩ́ kpɛ na, al pùorí ʋ lɛb pawr fɔ̃w wɩɛr a ʋ puru zie.

⁶ A sɛsɛb mɩ́ fu na cen a saa-pɛrɩ́-dʋrʋ-lowr, fu cen a saa-pɛrɩ́-gʋba-lowr. Ʋ mɩ́ lɩɛbɛ na, lɩɛbɛ tɩ lɩɛb cen, al pùorí, ʋ lɛb tĩ lɩɛbɛ.

⁷ A kʋ̃ɔ-kpɛ̃ɛ pʋɔ n'a a mamɛ za wɩɛr, ɛ́ a kʋ̃ɔ-kpɛ̃ɛ bɛ be na paalɩ ɛ. A be a mamɛ na zɔrɛ cere a, be n'a a mɩ̀ lɛb zɔ cen.

⁸ A ƴɛ̀r-bie za kor'a, a bɛ cãà tɛr yelu ɛ: a mimir bɛ dãw nyɛ̃ sɛw ɛ, a tobr bɛ dãw wõ a man ɛ.

⁹ Bom nɛ na tɩ be a na lɛb'a be. Bom nɛ na ɩ a na lɛb'a ɩ. Bʋ̃-sãan kãw za bɛ be a tẽw zu ka ɩ.

¹⁰ Bom wa be be tɩ na tʋ̃ɔ́ yel à ŋá: «Nyɩ nyɛ̃, bʋ̃-sãan ʋ!», a bom ʋl tɩ dãw na be a dãwdãw za, ɛ́ tɩ wa bãw be.

¹¹ Tɩɩm a, tɩ mɩ́ yiir'ɩ a yele na ɩ a koro za a. A tɩ pùorí dem mɩ̀ na yiir'ɩ bom nɛ na na ɩ a bɛ pùorí a.

A bãwfʋ a Yã-bãwnɛ na bãw a

¹² A Mãa Kohelɛtɩ, ɩ̃ tɩ dɩ n naalʋ a Ɩsɩrayɛl nɩ-bʋʋrɛ zu a Zerizalɛm.

¹³ Ɩ̃ ƴãw nɩ fãw bɔ ɛ́ jɛl'ɩ a yã-bãwfʋ bom nɛ na ɩrɛ a tẽ-daa zu a. Tõ-nɔ-kpɛ̃w n'ɩ à ŋá a Naaŋmɩn na kʋ̀ a nɩsaalbɛ a.

¹⁴ Ɩ̃ nyɛ̃ nɩ bom za na ɩrɛ a tẽw zu ka a. Ɛcɛ nyɛ̃, a za ɩ n bàlʋ zawla, alɛ nɩ sɛsɛb diwfʋ za been.

¹⁵ Bom na gɔ̃w a, bɛ kʋ̃ lɛb tʋ̃ɔ́ ʋ dɛnɩ ɛ, a ʋl na bɛ ka be a, bɛ kʋ̃ tʋ̃ɔ́ sɔ́r ʋ ɛ.

¹⁶ Ɩ̃ tɩɛr'ɩ ɩ̃ pʋɔ à ŋá: «Ɩ̃ ɩ na a yã-bãwfʋ ɩ kpɛ̃ɛ ɛ́ cen tɔl nidaa zuo a bɛlɩ dem za na de niwn dɩ naalʋ a Zerizalɛm a ɩ̃ ƴãw a.» Ɩ̃ bãw nɩ yele yaga, ɛ́ bãw a nyɔ-vʋʋrʋ pɛr.

¹⁷ Ɩ̃ ƴãw nɩ fãw bãw a yã-bãwfʋ, bãw a yãyaar nɩ a dãbolu, ɛ́ nyɛ̃ k'aa za nɩ a sɛsɛb diwfʋ mɩ̀ ɩ n been.

¹⁸ A yã-bãwfʋ yaga waar'ɩ nɩ pʋ-sãwna yaga. Sob nɛ na ɩrɛ a ʋ bãwfʋ dɔwlɛ a, ɩrɛ nɩ a ʋ kpɩɛrʋ a dɔwlɛ.