Efɛɛzɩ 6 - A SƐB-SÕW

Bibiir nɩ bɛ dɔwrbɛ yele

¹ Bibiir i, nyɩ sàwr a nyɩ dɔwrbɛ nʋɔr a Sore niŋé, à ŋá n'a sɛw.

² «Ƴãwnɛ fʋ sãà nɩ fʋ mã» n'ɩ a Naaŋmɩn nɔ-ƴãwna dãw-niwn sob, a Naaŋmɩn na ƴãw lãwnɩ maalʋ nʋɔr ŋa a:

³ «Kɛ́ fʋ tʋ̃ɔ́ wone nʋ̃ɔ̀ ɛ́ páw nyɔ-vʋʋr-wogo a tẽw zu.»

⁴ Nyɩɩm dɔwrbɛ ɛ, nyɩ ta gaarɛ a nyɩ bibiir bɛrɛ ɩ, nyɩ guole bɛ nɩ wulu nɩ kpaalʋ na yi a Sore zie a.

Gbãgbaar nɩ a nɩbɛ na so bɛ a yele

⁵ Gbãgbaar i, nyɩ sàwr a nyɩ tẽw zu ka nɩbɛ na so nyɩ a nʋɔr, nɩ ƴãwfʋ nɩ zɔba, nɩ nyɩ pʋɔ za mɛ̃ a Kɩrɩta nʋɔr'ʋ nyɩ sàwr a.

⁶ Nyɩ ta ɩrɛ à à ŋá bɛ na piwre nyɩ a zũú ɛ, mɛ̃ nyɩ bɔbr'a kɛ́ nyɩ ɩrɛ a pɛlɩ nɩsaalbɛ pʋɔ a ɩ. Ɛcɛ nyɩ ɩrɛ mɛ̃ Kɩrɩta gbãgbaar na páwr a Naaŋmɩn pʋ-tɩɛrʋ maalʋ ƴãw a.

⁷ Nyɩ tone nɩ pʋ-pla mɛ̃ a Sore mɩŋa n'ʋ nyɩ tone, ɛ́ a bɛ ɩ nɩsaalbɛ nɛbɛ a ɩ.

⁸ Nyɩ bãwnɩ a na, bʋ̃-vla nɛ ŋa za na maalɩ a, ʋ ɩ n gbãgbaa bɩɩ nɩr na so ʋ tʋɔra a, ʋ na lɛb'a páw ʋ a Sore zie.

⁹ Ɛ́ nyɩɩm na so a gbãgbaar a, nyɩ mɩ̀ ɩrɛ a lɛ a bɛ zie. Nyɩ bɛr a bɛ tanʋ. Nyɩ bãwnɩ a na, nyɩɩm nɩ a bɛl za Sore be n a saa-zu, ɛ́ ʋl bɛ tɛr owru kãw za a nɩsaalbɛ ƴãw ɛ.

A zɛbr bome a Naaŋmɩn na tɩrɛ a

¹⁰ A al na cɛ a n'ɩ kɛ́ nyɩ tɛr fãw na yi nyɩɩm nɩ a Sore lãw-taa pʋɔ a, nyɩ tɛr fãw na yi a ʋ fãw na kpɛmɛ bɛ tɛr tɔ a pʋɔ.

¹¹ Nyɩ de a Naaŋmɩn zɛbr bome tʋ̃ɔ́ zɛb tʋ̃ɔ́ nɩ a Gɛgɛra yã-maalʋ.

¹² Nɩsaal bɛ n'ʋ tɩ zɛbr'ɩ ɛ, niw-dierbɛ nɩ kpɛnʋ dem a, a bɛlɩ dem na so a lige tẽ-daa ŋa a, nɩ a kɔ̃tɔ̃-faar na be a salom zu a, bɛlɛ nɛbɛ tɩ zɛbr'ɩ.

¹³ Alɛ so, nyɩ de a Naaŋmɩn zɛbr bome, lɛ n'a a bibi-faa bibir nyɩ kʋ̃ sàw bɛ tʋ̃ɔ́ nyɩ ɛ, ɛ́ cãà tʋ̃ɔ́ àr saaƴẽwn à á ŋá za pùorí.

¹⁴ A na ɩ lɛ a, nyɩ ìr cɔbrɩ gù: nyɩ de a yel-mɩŋa sɛ sɩɛmɩ́ mɛ̃ kpàwr a, ɛ́ su a mɩnʋ mɛ̃ zɛbr-nyãa-kpale a.

¹⁵ Ɛ́ a ƴã-ɓaarʋ Yel-nʋ̃ɔ̀ hieru ton na faarɛ a, ɩ nafawr nyɩ ƴãw.

¹⁶ Ɛ́ baa zuo a za, nyɩ de a naaŋmɩn-sàwfʋ ʋ ɩ a zɛbr-kur-pãgala, ʋ na sõw nyɩ na nyɩ kpiiri a pime vũu a Faalʋ sob na tɛbr'ɩ nyɩ a.

¹⁷ Nyɩ sàw de a faafʋ mɛ̃ kpawɔ-kpow nyɩ na vɔblɩ a, ɛ́ tɛr a Vʋʋrʋ Sõw zɛbr-sɔ-kpɛ̃ɛ, a pɛr lɛ kɛ́ a Naaŋmɩn ƴɛ̀rʋ.

¹⁸ Nyɩ puore zɛlɛ à á ŋá za a Naaŋmɩn zie. A Vʋʋrʋ Sõw, ʋ sõwne nyɩ nyɩ puore kʋralɛ. A lɛ ƴãw a, nyɩ bɛr gʋ̃ɔ ɛ́ taa lɛbr pùor ɛ. Nyɩ puore kʋ̀rɛ a Naaŋmɩn nɩ-bʋʋrɛ za.

¹⁹ Nyɩ mɩ̀ puore kʋ̀rɛ mɛ̃, kɛ́ Naaŋmɩn ƴãw a ƴɛ̀r-bie al na sɛw a a ɩ̃ nʋɔrɩ́, k'ɩ̃ tʋ̃ɔ́ ɓãá ƴãw manɩ a Yel-nʋ̃ɔ̀ yel-sɔwla wul ʋ sãá.

²⁰ Ɩ̃ na saa be a gaso pʋɔ a, ɩ̃ cãà na ɩ nɩr bɛ na tõ a Yel-nʋ̃ɔ̀ ŋa yúor ƴãw a. Lɛ so, nyɩ puore kʋ̀rɛ mɛ̃ k'ɩ̃ tʋ̃ɔ́ ɓãá ƴãw manɛ ʋ mɛ̃ a lɛ a na fɛr k'ɩ̃ɩ ɩrɛ a.

A sɛbɛ baarʋ daar nɩbɛ puoru

²¹ A tɩ yɛb-nɔna Tɩsɩkɩ mɩ̀ na lãwnɩ mɛ̃ tone a Sore bɛ lɛbr pùor a, ʋ na manɩ nɩ a ɩ̃ yele za kʋ̀ nyɩ nyɩ tʋ̃ɔ́ bãw lɛ a na ŋmɛ̃ a ɩ̃ zie a, nɩ bom nɛ ɩ̃ na ɩrɛ a.

²² Ɩ̃ sʋ̃ɔm'a tõ ʋ a nyɩ zie k'ʋʋ wa manɩ a tɩ yele kʋ̀ nyɩ ɛ́ mɔwlɩ nyɩ.

²³ A Naaŋmɩn Sãà nɩ a Sore Yeezu Kɩrɩta, bɛ kʋ̀ a yɛbr za ƴã-ɓaarʋ, nɔ̃w-taa nɩ naaŋmɩn-sàwfʋ.

²⁴ A bɛlɩ dem za na nɔnɛ a tɩ Sore Yeezu Kɩrɩta nɩ nɔ̃wfʋ na bɛ tɛr sãwfʋ a, a Naaŋmɩn maalʋ, ʋ be a bɛ zie.