Efɛɛzɩ 3 - A SƐB-SÕW

A Pol tõ-nʋɔr a nɩ-bʋʋr-yoru zie

¹ Alɛ n'a so a mãa, Pol, ɩ̃ puore a Naaŋmɩn. Ɩ̃ be n a gaso pʋɔ a Yeezu Kɩrɩta tome ɩ̃ na tone a nyɩɩm nɩ-bʋʋr-yoru ƴãw a zũú.

² Nyɩ bãw nɩ a maalʋ a Naaŋmɩn na kʋ̀ m a nyɩ ƴãw a ʋ pʋ-tɩɛrʋ maalʋ ƴãw a,

³ a lɛ ʋ na wul mɛ̃ ɩ̃ bãw a ʋ yel-sɔwla a, mɛ̃ a lɛ ɩ̃ na sɛb ŋmãa ŋmãa kʋ̀ nyɩ a.

⁴ Nyɩmɛ wa kanɛ a ɩ̃ sɛbɛ a, nyɩ na nyɛ̃ nɩ a lɛ ɩ̃ na bãw a yel-sɔwla na càarɩ a Kɩrɩta sɛw a.

⁵ A Naaŋmɩn yel-sɔwla ŋa a, ʋ bɛ tɩ wul ʋ a koro za nɩbɛ mɛ̃ a lɛ ʋ na ƴãw a Vʋʋrʋ Sõw wul ʋ a ƴɛrɛŋa a ʋ nɩ-toni na ɩ son a, nɩ a ʋ ƴɛ̀r-manbɛ a ɩ.

⁶ A Naaŋmɩn yel-sɔwla ʋl n'ɩ ŋa: a Yel-nʋ̃ɔ̀ zũú, a Yeezu Kɩrɩta pʋɔ, ʋ ɩ na a nɩ-bʋʋr-yoru mɩ̀ pʋɔ a gbã-dɩ-bʋ̃-been nɛ pʋɔ, bɛ pʋɔ a ƴã-gã-been nɛ pʋɔ, nɩ a nɔ-been nɛ ʋ na ƴãw a pʋɔ.

⁷ Ɩ̃ lɩɛb'ɩ a Yel-nʋ̃ɔ̀ tõ-tõ-bie, a maalʋ a Naaŋmɩn na kʋ̀ m nɩ fãw a zũú.

⁸ A mãa na ɩ a pʋrɩ woro a kɩrɩta-nɩbɛ za pʋɔ a, mãa n'ʋ a Naaŋmɩn kʋ̀ a maalʋ ŋa, k'ɩ̃ɩ hieri yel a Kɩrɩta Naalʋ na bɛ vʋʋr a Yel-nʋ̃ɔ̀ kʋ̀ a nɩ-bʋʋr-yoru,

⁹ ɛ́ ɩ a ɩ cãà a nɩsaalbɛ za zie, a lɛ a Naaŋmɩn na mɩ́ ɩ a ʋ yel-sɔwla tu a ʋ tub a. Ʋl na ɩ bome za Íre a, ʋ ɩ n a ʋ yel-sɔwla ŋa gã koro za a ʋl mɩŋa pʋɔ.

¹⁰ À ŋá n'a a ƴɛrɛŋa, a Lãw-yir ƴãw, a salom zu naalʋ-dɩrbɛ nɩ fãw dem bãw a Naaŋmɩn yã-bãwfʋ pɔ́lɛ́ za.

¹¹ À á ŋá za tu n a lɛ a Naaŋmɩn na tɩ cɔbrɩ a yele bin kʋralɛ a, a yele ʋ na maalɩ a tɩ Sore Yeezu Kɩrɩta pʋɔ a.

¹² A Kɩrɩta tɩ na sàw de ɛ́ lãw nɩ a ƴãw n'a tɩ mɩ́ sʋ̃ɔmɩ sàw bɛr dɛ̃bɩ̃ɛ ɛ́ àr a Naaŋmɩn niŋé.

¹³ A na ɩ à ŋá a, ɩ̃ zɛlɛ nyɩ na, nyɩ ta sàw a kpɩɛrʋ ɩ̃ na sàwr dier a nyɩ ƴãw a tʋ̃ɔ́ nyɩ ɛ, a ɩ n a nyɩ yúor-vɩɛlʋ-danʋ.

Nyɩ bãw a Kɩrɩta nɔ̃wfʋ

¹⁴ Alɛ n'a so ɩ̃ gbine dume a Naaŋmɩn Sãà niŋé,

¹⁵ ʋl zie dɔwlʋ za na yi, a salom zu nɩ a tẽw zu ka a.

¹⁶ Ʋl na kpɛ yúor-vɩɛlʋ-danʋ naalʋ a, ɩ̃ zɛlɛ na k'ʋʋ ɩ a Vʋʋrʋ kʋ̀ nyɩ a fãw, k'aa nyɩ pʋ̃ɔmɩ nɩr tɛr fãw.

¹⁷ Ʋ sàw a Kɩrɩta kpɩɛr a nyɩ socie pʋɔ. A nyɩ naaŋmɩn-sàwfʋ zũú, nyɩ tɛ nyɩgɛ ɛ́ kpɛmɛ a nɔ̃wfʋ pʋɔ.

¹⁸ Lɛ n'a nyɩ na tʋ̃ɔ́ bãw, lãwnɩ a kɩrɩta-nɩbɛ za, a lɛ a Kɩrɩta nɔ̃wfʋ na yɛlmɛ ɛ́ wõwme a, na kɛrɩ ɛ́ zulme a,

¹⁹ ɛ́ bãw a Kɩrɩta nɔ̃wfʋ na gãw bãwfʋ za a, lɛ n'a a Naaŋmɩn na paalɩ nyɩ ʋ za.

²⁰ A Naaŋmɩn na na tʋ̃ɔ́ mɩ́ maalɩ yel za tɩ zuo nɩ a lɛ tɩ na zɛlɛ bɩɩ tɩɛrɛ a, a ʋ fãw na tone a tɩ pʋɔ a zũú a,

²¹ ʋlɛ so yúor-vɩɛlʋ-danʋ a Lãw-yir pʋɔ a Yeezu Kɩrɩta yúor ƴãw, kʋralɛ nɩ yome yome za. Amɛn.