Efɛɛzɩ 2 - A SƐB-SÕW

Tɩ yi n a kũu pʋɔ kpɛ nyɔ-vʋʋrʋ pʋɔ

¹ A nyɩɩm a, nyɩ tɩ dãw na ɩ nɩ-kũuni a nyɩ sãwna nɩ a nyɩ yel-bebe zũú.

² A lɛn daar a, nyɩ tɩ ɩrɛ nɩ a tẽ-daa ŋa zu ɩb, nyɩ tɩ tuur'ɩ a vʋʋrʋ ʋl na ɩ a salom zu kpɛnʋ bʋʋrɛ za tɩ na bɛ nyɛrɛ a nɩ-kpɛ̃ɛ a, a vʋʋrʋ ŋa na damnɛ a nɩ-gaarɩ ƴãwn bɛ ɩrɛ a nɩ-gaarɩ ɩb a.

³ A tɩɩm za mɩ̀ tɩ pʋɔ nɩ a nɩbɛ bɛ ŋa pʋɔ, tɩɩm na tɩ tu a nɩsaal ƴã-gan yel-bɔbrɩ na bɛ vɩɛl a pùor tɛwr a: tɩ tɩ maalɛ nɩ a nɩsaal ƴã-gan pʋ-tɩɛrʋ ɛ́ tuur a ʋ yã-faa. À ŋá n'a a tɩ nɩsaal ŋmɛ̃a tɩ ɩ tɩ sɛw nɩ a Naaŋmɩn suur mɛ̃ a ŋmaarɛ bɛ ŋa a.

⁴ Ɛcɛ a Naaŋmɩn na dɩrɛ su-ɓaarʋ naalʋ, ɛ́ nɔ̃w tɩ nɩ nɔ̃wfʋ na bɛ dɩ vuo a,

⁵ al ƴãw n'a ʋ ɩ tɩ lɛb vʋʋrɛ lãwnɩ a Kɩrɩta, tɩɩm na tɩ kpi baarɩ a tɩ sãwna ƴãw a. Naaŋmɩn maalʋ zũú sɩrɩ n'a nyɩ nyɛ̃ a faafʋ.

⁶ A Yeezu Kɩrɩta tɩ na lãw nɩ a, ʋl pʋɔ n'a a Naaŋmɩn ɩ tɩ lɛb yi a kũu pʋɔ lãw nɩ ʋ, ʋʋ ɩ tɩ lãwnɩ ʋ zɩ̃ a tẽ-vla pʋɔ.

⁷ A Naaŋmɩn vɩɛlʋ ɩb ʋ na ɩ a tɩ ƴãw a sãá a Yeezu Kɩrɩta zie a zũú n'a ʋ tɩ bɔbr k'aa yome na tuur taa a pʋɔ, ʋ wul a ʋ maalʋ na bɛrmɛ bɛ tɛr vuo a.

⁸ Sɩza, a Naaŋmɩn maalʋ ƴãw n'a nyɩ nyɛ̃ a faafʋ, nyɩ na sàw de ʋ a zũú. A faafʋ ŋa bɛ yi nyɩ zie ɩ, Naaŋmɩn maalʋ n'ʋ ʋ kʋ̀ nyɩ zawlalɛ.

⁹ Ʋ bɛ yi a nyɩ ɩ-ɩrɩ zie ɩ, kɛ́ nɩr za taa wa dier ʋ pɔrɛ nɩ ɛ.

¹⁰ Naaŋmɩn mɩŋa n'ʋ maalɩ tɩ, ʋlɛ n'ʋ ír tɩ tɩ lãw nɩ a Yeezu Kɩrɩta, kɛ́ a tɩ ɩ-ɩrɩ tʋ̃ɔ́ vɩɛl, a ɩ-ɩrɩ á ŋá a Naaŋmɩn na cɔbrɩ bɛr a koro za kɛ́ tɩ wa ɩrɛ a.

Tɩ lãw nɩ nɩ a Kɩrɩta ɩ been

¹¹ Nyɩ lɛb tɩɛrɩ a lɛ nyɩ na tɩ ŋmɛ̃ a koro za a. Nyɩ tɩ tɛr'ɩ a nɩ-bʋʋr-yoru bãwfʋ a nyɩ ƴã-gan pʋɔ. A bɛlɩ dem na tɩ yel kɛ́ bɛ ŋma n a bɛ yɛɛ a tɩ bʋɔlɛ nyɩ nɩ nɩbɛ bɛ na bɛ ŋma a yɛɛ a, bɛl na tɛr a ŋmãafʋ ŋa bãwfʋ a bɛ ƴã-gan pʋɔ a zũú.

¹² Nyɩ lɛb tɩɛrɩ bãwnɩ a k'aa lɛn daar nyɩ bɛ tɩ bãw a Kɩrɩta ɩ, bɛ bɛ tɩ sɔ́r nyɩ ƴãw a Ɩsɩrayɛl bʋʋrɛ pʋɔ ɩ, nyɩ tɩ ɩ n sãanbɛ a Wõ-taa ƴãw a Naaŋmɩn na ƴãw nʋɔr maal'ɩ a ʋ nɩ-bʋʋrɛ a, nyɩ bɛ tɩ ƴãw a nyɩ tɩɛrʋ bom kãw za ƴãw ɛ, ɛ́ bɛ tɛr Naaŋmɩn a tẽw zu ɛ.

¹³ Ɛcɛ ƴɛrɛŋa nyɩ na lãw nɩ a Yeezu Kɩrɩta a, nyɩɩm na tɩ be zi-zãána a, a ʋ zɩ̃ɩ ɩ na nyɩ taw pɩɛlɩ.

¹⁴ A Kɩrɩta mɩŋa n'ʋ ɩ a tɩ ƴã-ɓaarʋ. A Ɩsɩrayɛl nɩ a nɩ-bʋʋr-yoru na tɩ ɩ bʋʋrɛ ayi a, ʋ ɓã bɛ nɩ taa bɛ ɩ bʋʋr-been. A ʋ ƴã-gan pʋɔ, ʋ dáa nɩ a dɔ̀nʋ dacin ʋl na tɩ bʋ́r bɛ a lɔb.

¹⁵ Ʋ sãw nɩ a Moyiir wulu nɩ a ʋ nɛ-ƴãwnɩ lãwnɩ a tub bɛr. À ŋá n'a ʋ ɩ, bɔbr k'ʋʋ ɓã a bʋʋrɛ bɛ ŋa ayi taa, ɛ́ ɩ bɛ lɩɛbɩ nɩ-paala been lãwnɩ ʋ.

¹⁶ Ʋ tɩ bɔbr'a kɛ́ bɛlɛ nɩ a Naaŋmɩn lɛb kpɛ taa, a ʋ da-gara zu kũu ƴãw, ɛ́ k'aa bʋʋrɛ bɛ za ayi tʋ̃ɔ́ lãw taa ɩ ƴãw-been. A ʋl mɩŋa pʋɔ n'a ʋ kʋ a dɔ̀nʋ.

¹⁷ Ʋ wa na wa hieri yel a ƴã-ɓaarʋ kʋ̀ a nyɩɩm na tɩ zãá a, nɩ a bɛlɩ dem na tɩ pɩɛlɩ a.

¹⁸ Ɛ́ ʋlɛ n'ʋ so a tɩ bʋʋrɛ bɛ ŋa ayi mɩ́ tʋ̃ɔ́ taw pɩɛlɩ a Naaŋmɩn Sãà, a Vʋʋrʋ been yõ ƴãw.

¹⁹ A na ɩ à ŋá a, a nyɩɩm nɩ-bʋʋr-yoru bɛ cãà ɩ nɩ-sãanbɛ nɩ nʋʋrɩ ɛ, nyɩ ɩ n a Naaŋmɩn nɩ-bʋʋrɛ tẽ-bi-taabɛ, nyɩ pʋɔ nɩ a ʋ yir nɩbɛ pʋɔ.

²⁰ Bɛ de nyɩ na ƴãw a yir mɩɛrʋ pʋɔ, a ʋl bɛ na sʋ̃ɔ́ a pɛr a nɩ-toni nɩ a naaŋmɩn-ƴɛ̀r-manbɛ zu, ɛ́ a Yeezu Kɩrɩta mɩŋa ɩ a yir pɛr kʋsɩɛr a.

²¹ Ʋlɛ n'ʋ mɩ́ so a mɩɛrʋ za mɩ́ kpɛmɛ ɛ́ kɛrɛ dúor tɩ ɩ Ŋmɩn-yir-sõw a Sore ƴãw.

²² Nyɩ na lãw nɩ ʋ a n'a nyɩ mɩ̀ pʋɔ a mɩɛrʋ pʋɔ, kɛ́ nyɩ wa ɩ Naaŋmɩn kpɛb zie a Vʋʋrʋ Sõw ƴãw.