Ebre 7 - A SƐB-SÕW

A Mɛlkɩsedɛkɩ yele

¹ A Mɛlkɩsedɛkɩ ŋa na tɩ ɩ Salɛm tẽw nãà ɛ́ ɩ a Naaŋmɩn-na-do-saa-bɛ-pɩɛl-a bàwr-maalɛ a tɩ tuor'ɩ a Abraham ɛ́ maalɩ ʋ, a lɛn daar a Abraham na tɩ zɛb tʋ̃ɔ́ a na-mɩnɛ ɛ́ lɛb waar a.

² A Abraham tɩ kʋ̀ ʋ nɩ a bome ʋ na zɛb de a ziir pie sob. A dãw-niwn sob a, a Mɛlkɩsedɛkɩ yúor pɛr'ɩ: «Mɩnʋ nãà», ɛ́ lɛb waar, ʋ ɩ Salɛm nãà, a pɛr lɛ kɛ́: «Ƴã-ɓaarʋ nãà».

³ Ʋ bɛ tɛr sãà ɩ, bɛ tɛr mã ɩ, bɛ tɛr sãàkʋm-kʋra kãw za ɩ. Bɛ mɩ̀ bɛ por a ʋ dɔwfʋ nɩ a ʋ kũu yúor zie za ɩ. Ʋ ŋmɛ̃ na taa nɩ a Naaŋmɩn Bie: ʋ ɩ n bàwr-maalɛ kʋralɛ.

⁴ Nyɩ nyɛ̃ ʋ na ɩ kpɛ̃ɛ sɛw a! Ʋl a sãàkʋm-kʋra Abraham na kʋ̀ a bome ʋ na zɛb de a, a bʋ̃-vɩɛlɩ zie ziir pie sob a!

⁵ Mɛ̃ a lɛ a Naaŋmɩn wulu na yel a, a Levi bibiir bɛl na ɩ a bàwr-maalbɛ a, bɛ ƴãw nɩ nʋɔr kʋ̀ bɛ kɛ́ bɛ mɩ́ de a bʋ̃-tɛrɩ ziir pie sob a Ɩsɩrayɛl nɩbɛ zie, a pɛr lɛ k'aa bɛ yɛbr mɩ̀ na saa mɩ̀ ɩ a Abraham bʋʋrɛ a zie.

⁶ A Mɛlkɩsedɛkɩ nɩ a bɛl bɛ tɩ lãw sãàkʋm ɛ, ɛcɛ ʋ tɩ de a Abraham bome ziir pie sob, ɛ́ maalɩ a sob nɛ a Naaŋmɩn na tɩ ƴãw a nɛ́ɛ kʋ̀ a.

⁷ Ɛcɛ nɔkpɛn dɛ bɛ ka be ɩ, a kpɛ̃ɛ n'ʋ mɩ́ maalɩ a bile.

⁸ A Levi bibiir na dier a bʋ̃-tɛrɩ ziir pie sob a ɩ n nɩsaalbɛ na ɩ bʋ̃-kpiiri a. Ɛcɛ a Mɛlkɩsedɛkɩ lowr a, nɩr na bɛ kpiir a n'ʋ de, mɛ̃ a lɛ a Sɛb-sõw na dɩ a dãsɩɛ a.

⁹ Mɔ̃ mɩ̀, tɩ na tʋ̃ɔ́ na yel k'aa Abraham na tɩr a bʋ̃-tɛrɩ ziir pie sob a, a Levi na dier a bʋ̃-tɛrɩ ziir pie sob a mɩ̀ tɩr'ɩ a bʋ̃-tɛrɩ ziir pie sob.

¹⁰ Bʋ̃ʋ n'ʋ vɛ̃, a Levi bɛ tɩ dɔw sɛr ɛ, ɛ́ ɩ mɛ̃ ʋ cãà na be a ʋ sãàkʋm-kʋra pʋɔ, a lɛn daar a Mɛlkɩsedɛkɩ na tɩ tuori a Abraham a.

¹¹ A bàwr-maalɛ ɩb a Levi pal pʋɔ n'ʋ tɩ so a nʋɔr bɛ na kʋ̀ a Ɩsɩrayɛl nɩbɛ a. Ɛcɛ a Levi pal pʋɔ bàwr-maalbɛ tɩ tõ ton na vɩɛl ʋ za a, a kʋ̃ʋ lɛb fɛrɛ kɛ́ bàwr-maal-yũo yi ɩ mɛ̃ a Mɛlkɩsedɛkɩ na tɩ ɩ a bàwr-maalɛ a ɩ, ɛ́ bɛ ɩ mɛ̃ a lɛ a Aarɔ̃ na tɩ ɩ a bàwr-maalɛ a ɩ.

¹² Bʋ̃ʋ n'ʋ vɛ̃, a lɛ bɛ na mɩ́ ɩ a bàwr-maalɛ a wa lɩɛbɩ a, a fɛr'a k'aa Naaŋmɩn wulu mɩ̀ lɩɛbɩ.

¹³ Ɛ́ a tɩ Sore a ƴɛ̀r-bie á ŋá na càarɩ a pʋɔ nɩ dɔwl-yũo pʋɔ, a nɩr kãw za na bɛ dãw tõ a bàwr-maal-kuur tome a.

¹⁴ Nɩbɛ za bãwnɩ a na ʋ na ɩ Zuda dɔwlʋ nɩr a, a dɔwlʋ ŋa ƴãw Moyiir na bɛ yel yel za, a lɛ ʋ na tɩ ƴɛ̀rɛ a bàwr-maalbɛ ƴɛ̀rʋ a.

Bàwr-maal-kara na ŋmɛ̃ taa nɩ Mɛlkɩsedɛkɩ a

¹⁵ A yele nɩ̃ɛ na lɛb bãw ɩ cãà, a bàwr-maal-yũo na yi ŋmɛ̃ taa nɩ a Mɛlkɩsedɛkɩ a.

¹⁶ Ʋ bɛ lɩɛbɩ a bàwr-maalɛ a tu nʋɔr na tu nɩsaalbɛ dɔwfʋ a ɩ, ɛ́ lɩɛbɩ a bàwr-maalɛ nyɔ-vʋʋrʋ na bɛ tɛr sãwfʋ a fãw zũú.

¹⁷ Bʋ̃ʋ n'ʋ vɛ̃, a Sɛb-sõw dɩ n a ʋ dãsɩɛ à ŋá: «Fʋ ɩ n bàwr-maalɛ kʋralɛ a Mɛlkɩsedɛkɩ pal pʋɔ.»

¹⁸ A na ɩ à ŋá a, bɛ ír'ɩ a koro za tub na bɛ tɛr yel-ɩra, ɛ́ bɛ tɛr fãw na ɩ bom a bɛr.

¹⁹ Bʋ̃ʋ n'ʋ vɛ̃, a Naaŋmɩn wulu bɛ ɩ bom za ʋ páw a ʋ vɩɛlʋ za ɩ. Ɛcɛ tɩɛrʋ na vɩɛl zuo tɩ ƴãw a Naaŋmɩn ƴãw a wa na, ɛ́ a ʋl zũú n'a tɩ mɩ́ tawr pɩɛlɛ a Naaŋmɩn.

²⁰ Lɛb waar mɩ̀, a Naaŋmɩn pɔb be n be. A bɛ ŋa lɩɛb'ɩ bàwr-maalbɛ, ɛ́ a pɔb ŋa bʋʋrɛ bɛ pɔ ɩ.

²¹ Ɛcɛ a Yeezu a, pɔb'a Naaŋmɩn pɔ ʋ lɩɛbɩ bàwr-maalɛ, a lɛ a Naaŋmɩn na tɩ yel ʋ a: «A Sore pɔ na, ɛ́ kʋ̃ lɩɛbɩ bɛr ɛ: fʋ ɩ n Naaŋmɩn bàwr-maalɛ kʋralɛ.»

²² A na ɩ à ŋá a, a Yeezu ƴãw n'a tɩ bɛ bʋ́nɛ nɩ kɛ́ Wõ-taa na vɩɛl zuo a be n be ɩ.

²³ Bom ŋa n'ʋ mɩ̀ lɛb be be, a bàwr-maalbɛ bɛl tɩ yãwmɛ n'a, a kũu na bɛ tɩ sàwr bɛ na cɛlɩ a ƴãw.

²⁴ Ɛcɛ a Yeezu ʋl na be be kʋralɛ a, a ʋ bàwr-maalɛ tome be n kʋralɛ.

²⁵ A lɛ n'a so, a bɛlɩ dem na tawr pɩɛlɛ a Naaŋmɩn a ʋ ƴãw a, ʋ na tʋ̃ɔ́ mɩ́ faa bɛ a nʋɔr kʋ̀. Bʋ̃ʋ n'ʋ vɛ̃, ʋ vʋʋrɛ nɩ kʋralɛ k'ʋʋ tʋ̃ɔ́ puore a Naaŋmɩn kʋ̀rɛ bɛ.

²⁶ A bàwr-maal-kara tɔr za n'ɩ à ŋà a na tɩ fɛr kɛ́ tɩ tɛr a: ʋ ɩ n sõw, ʋ bɛ tɛr sãwna ɩ, ʋ vɩɛl'ɩ ʋ za. Bɛ bʋ́r ʋ na ʋ bɛ pʋɔ a yel-bebe dem pʋɔ ɩ, ɛ́ zɛw ʋ k'ʋ do gãw a salom.

²⁷ A bɛ fɛrɛ ʋ mɛ̃ a bàwr-maal-karɩ a, kɛ́ bibir za, ʋ mɩ́ de niwn maalɩ bàwr a ʋl mɩŋa yel-bebe ƴãw, ɛ́ a pùorí ʋ maalɩ a nɩbɛ dem ƴãw ɛ. Daƴen daadaa n'a ʋ maalɩ a bàwr, a lɛ ʋ na de ʋ tʋɔra tɩr a.

²⁸ A Naaŋmɩn wulu mɩ́ ƴãw nɩ nɩbɛ na tɛr bãbàalʋ a bɛ ɩ a bàwr-maal-karɩ. Ɛcɛ a pɔb a Naaŋmɩn na ƴɛ̀r pɔ n a Wulu pùorí a ɩ na a ʋ Bie na páw vɩɛlʋ za a nʋɔr kʋ̀ a, ʋ ɩ bàwr-maal-kara na be kʋralɛ a.