Ebre 4 - A SƐB-SÕW

¹ A Naaŋmɩn nʋɔr na cãà ƴãw gã, kɛ́ tɩ na tʋ̃ɔ́ na ta a ʋ pɩ̃ɛnʋ zie a, nyɩ ɩ tɩ gù vla bɛ taa wa nyɛ̃ k'aa nyɩ kãw bɛ tʋ̃ɔ́ ta ɩ.

² Bʋ̃ʋ n'ʋ vɛ̃, a Yel-nʋ̃ɔ̀ ƴɛ̀rʋ ta tɩ na, mɛ̃ a lɛn tɔr za ʋ na tɩ ta a nɩbɛ bɛl na tɩ be a wɛja-kpalɛ pʋɔ a. Ɛcɛ a ƴɛ̀rʋ bɛ na tɩ wõ a bɛ tɩ maalɩ bɛ towtow za ɩ, bɛ na tɩ wõ ɛ́ bɛ sàw de a ƴãw.

³ Tɩɩm na sàw de a, tɩ na ta n a pɩ̃ɛnʋ ŋa zie, ʋl ƴãw a Naaŋmɩn na yel: «Ɩ̃ nyɛ̃ nɩ suur pɔ: bɛ bɛ be za na ta a ɩ̃ pɩ̃ɛnʋ zie ɩ!» Ɛcɛ a ʋ tome tɩ tõ na baarɩ a tẽ-daa íru daar, ʋʋ yel à à ŋá.

⁴ A Sɛb-sõw pʋɔ zie kãw a, bɛ sɩrɩ na yel à ŋá a bibie ayopõi sob ƴãw: «Naaŋmɩn zɩ̃ na pɩ̃ɛnɩ a bibie ayopõi sob, a ʋ tome za na tɩ tõ baarɩ a ƴãw.»

⁵ Ɛ́ cãà lɛb yel a be mɩ̀: «Bɛ bɛ be za na ta a ɩ̃ pɩ̃ɛnʋ zie ɩ.»

⁶ A bɛlɩ dem na tɩ de niwn wõ a Yel-nʋ̃ɔ̀ a bɛ tɩ ta a pɩ̃ɛnʋ zie ɩ, a bɛ bɛ-wonu zũú. A na ɩ à ŋá a, nɩbɛ bɛ mɩnɛ na tʋ̃ɔ́ na cãà ta a pɩ̃ɛnʋ zie.

⁷ A lɛ n'a so a Naaŋmɩn lɛb ƴãwnɛ bibir na dɩ kɛ́ «Dɩ̃a bibir» a. Ʋ wa ƴãw na Daviir ƴɛ̀r a ƴɛ̀rʋ pùorí pùorí za, a Sɛbɛ zie ʋl tɩ na dãw yel kɛ́: «A dɩ̃a bibir, nyɩmɛ wa wõ a Naaŋmɩn kɔkɔr a, nyɩ ta kpãa tobr ɛ.»

⁸ A Zozue tɩ sɩrɩ ɩ mɛ̃ ʋ tɛr bɛ na ta n a pɩ̃ɛnʋ zie a, a Naaŋmɩn kʋ̃ʋ lɛb ƴɛ̀rɛ bibi-yũo ƴɛ̀rʋ a pùorí ɛ.

⁹ A na ɩ lɛ a, pɩ̃ɛnʋ-bibir pɩ̃ɛnʋ cãà nɩ be gùre a Naaŋmɩn nɩ-bʋʋrɛ.

¹⁰ Bʋ̃ʋ n'ʋ vɛ̃, sob nɛ na ta a Naaŋmɩn pɩ̃ɛnʋ zie a mɩ́ baar'ɩ a ʋ tome ɛ́ pɩ̃ɛnɩ, mɛ̃ a lɛ a Naaŋmɩn na baarɩ a ʋ dem ɛ́ pɩ̃ɛnɩ a.

¹¹ A na ɩ à ŋá a, nyɩ ɩ tɩ ƴãw fãw ta a pɩ̃ɛnʋ ŋa zie, a tɩ sãàkʋm-kore bɛ-wonu taa ɩrɛ tɩ kãw za ʋ lore ɩ.

¹² Bʋ̃ʋ n'ʋ vɛ̃, a Naaŋmɩn ƴɛ̀rʋ ɩ n bʋ̃-vʋʋra na tone a, ɛ́ dɩrɛ gãw zɛbr-sɔ-kpɛ̃ɛ za na dɩrɛ a loge a za ayi a. Ʋ mɩ́ cɔr'a kpɛ tɩ põ a sɩ́ɛ nɩ a tɩɛrʋ, a kɔbɛ tuor-taa ziir nɩ a kɔbɛ buge. Ʋ mɩ́ jɛl'ɩ a nɩsaal socir bʋ̃-bɔbrɩ nɩ a nɩsaal socir tɩɛrʋ.

¹³ Bʋ̃-íra kãw bɛ be be sɔwlɩ a ʋ zie ɩ. Bom za mɩ́ sãá nɩ nyɩraalɛ a ʋ niŋé, ʋ na sowri tɩ nɩ bom.

A Naaŋmɩn bàwr-maal-kara Yeezu

¹⁴ A na ɩ lɛ tɩ tɛr Naaŋmɩn bàwr-maal-kara ʋ tɔl gãw a salom tɩ ta a Naaŋmɩn zie a, a Yeezu, Naaŋmɩn Bie, nyɩ ɩ tɩ tɛr a sàw-deb tɩ na hiere a kpɛ̃w za.

¹⁵ Bàwr-maal-kara na kʋ̃ tʋ̃ɔ́ lãw nɩ tɩ gú a tɩ bãbàalʋ pʋɔ a bɛ n'ʋ tɩ tɛr ɛ. Bɛ nɩ̃ɛ na ɩ ʋ kaa a za pʋɔ mɛ̃ a tɩɩm a, ʋʋ bɛ maalɩ yel-bier ɛ.

¹⁶ A na ɩ lɛ a, nyɩ ɩ tɩ bɛr tɩɛrʋ ɛ́ taw ta a Naaŋmɩn naalʋ-dà-kɔw pɛr maalʋ na ʋr a. Tɩ na páw nɩ su-ɓaarʋ ɛ́ nyɛ̃ maalʋ a be, k'aa daar wa ta a, tɩɩm nyɛ̃ sõwfʋ.