Ebre 13 - A SƐB-SÕW

A lɛ tɩ na na ɩrɛ a pɛlɩ a Naaŋmɩn pʋɔ a

¹ Nyɩ cãà nɔnɛ taa mɛ̃ yɛbr a.

² Nyɩ taa yiire a sãanʋ deb yele bɛrɛ ɩ. Bʋ̃ʋ n'ʋ vɛ̃, a sãanʋ deb ŋa pʋɔ n'a bɛ mɩnɛ de malkɩ mɩnɛ sãanʋ ɛ́ bɛ bãwnɩ a ɩ.

³ Nyɩ tɛr a gaso pʋɔ dem tɩɛrʋ mɛ̃ nyɩ lãw nɩ bɛ na be a gaso pʋɔ a. Nyɩ tɛr a bɛlɩ dem bɛ na dɔwrɛ a tɩɛrʋ, nyɩ mɩ̀ na tɛr ƴã-gamɛ a.

⁴ A nɩbɛ za, bɛ tɛr maal-ɩrɛ a kul-taa ƴãw. A dɛbr nɩ a pɔwbɛ na kul taa a, bɛ be taa bɛl tɛwr ƴãw. Bʋ̃ʋ n'ʋ vɛ̃, Naaŋmɩn na maal'ɩ nɩ a ɩ-fa-maalbɛ nɩ a pɔw-gaa-yel-bier-maalbɛ ƴɛ̀rʋ.

⁵ A libi-nɔ̃w ta tʋ̃ɔ́ nyɩ ɛ. A lɛ nyɩ na tɛr a, a man nyɩ. Bʋ̃ʋ n'ʋ vɛ̃, a Naaŋmɩn yel'a: «Ɩ̃ bɛ be za na bɛr fʋ ɛ, ɩ̃ kʋ̃ jɛ b bɛr towtow ɛ.»

⁶ Lɛ so tɩ na tʋ̃ɔ́ bɛr tɩɛrʋ ɛ́ yel: «A Sore n'ɩ a ɩ̃ sõwne, ɩ̃ kʋ̃ zɔrɛ bom za dɛ̃bɩ̃ɛ ɩ. Bʋ̃ʋ n'ʋ nɩsaal na tʋ̃ɔ́ ɩ m?»

⁷ Nyɩ lɛb tɩɛrɩ a nyɩ niw-dierbɛ yele, bɛl na tɩ manɩ a Naaŋmɩn ƴɛ̀rʋ kʋ̀ nyɩ a. Nyɩ nyɛ̃ a lɛ bɛ na vʋʋrɩ tɩ kpi n a, nyɩ cɔwrɛ a bɛ naaŋmɩn-sàw-deb.

⁸ A Yeezu Kɩrɩta been n'ʋ, a zãa nɩ a dɩ̃a, nɩ a yome za.

⁹ Nyɩ ta sàw wul-pɛ-bʋʋrɛ za nɩ wul-yoru wa bɔr'ɩ nyɩ ɛ. Naaŋmɩn maalʋ n'ʋ a sɛw k'ʋʋ mɩ́ ɩ a nɩr ʋ kpɛmɛ socir, bʋ̃-dɩrɩ bɛ n'a ɩ. A bɛlɩ dem na tuur a nɛ́ɛ bɛ na ƴãw càar'ɩ a bʋ̃-dɩrɩ á ŋá a, bɛ bɛ dãw nyɛ̃ tɔnɛ a pʋɔ ɩ.

¹⁰ Tɩ tɛr'ɩ bàwr-maal-kuur, a pɛn-sɛw pʋɔ bàwr-maalbɛ na bɛ tɛr sɔ́r na dɩ bom na dɔwlɩ a ʋ zu a ɩ.

¹¹ A dʋn al a bàwr-maal-kara na mɩ́ ɩ a zɩ̃ɩ kpɛ n a zi-sõw-za-zi-sõw pʋɔ, tɩ de tɩr a yel-bebe suur páwfʋ ƴãw a, bɛ mɩ́ yi na zaa nɩ a dʋn á ŋá ƴã-gamɛ a laɩ pʋɔ tɩ nyɩw bɛr.

¹² A lɛ n'a so a Yeezu mɩ̀ yi zaa a tẽw pʋɔ tɩ kpi, k'aa ʋl mɩŋa zɩ̃ɩ tʋ̃ɔ́ ɩ a nɩbɛ bɛ ɩ son.

¹³ A na ɩ à ŋá a, nyɩ ɩ tɩ yi a laɩ pʋɔ tuor ʋ, ɛ́ sàw de a ʋlɩ vĩ-been nɛ.

¹⁴ Bʋ̃ʋ n'ʋ vɛ̃, a tẽw zu ka a, tɩ bɛ tɛr tẽ-kpɛ̃ɛ ʋ be be kʋralɛ ɩ. A tẽ-kpɛ̃ɛ ʋl na waar a n'ʋ tɩ bɔbr.

¹⁵ Tɩ tu a Yeezu maalɛ danʋ bàwr kʋralɛ kʋ̀rɛ a Naaŋmɩn, a pɛr lɛ kɛ́ danʋ na yire nɛ́ɛ na íre a ʋ yúor a pʋɔ.

¹⁶ Nyɩ taa yiire a nɩbɛ maalʋ nɩ a sõw-taa bɛrɛ ɩ, a bàwr á ŋá taabɛ n'a mɩ́ nʋmɛ a Naaŋmɩn zie.

¹⁷ Nyɩ sàwr a nyɩ niw-dierbɛ nʋɔr ɛ́ siwre nyɩ tʋɔra a bɛ zie. Bʋ̃ʋ n'ʋ vɛ̃, bɛ kaarɛ nɩ a nyɩ zie kʋralɛ, mɛ̃ Naaŋmɩn nãà wa sowri bɛ na a. Nyɩ ɩrɛ bɛ tʋ̃ɔ́ tone a bɛ tome nɩ nʋ̃ɔ̀, ɛ́ ta tone zɛbr'ɩ ɛ, a kʋ̃ wa n tɔnɛ za a nyɩ zie ɩ.

¹⁸ Nyɩ puore kʋ̀rɛ tɩ. Tɩ bãwnɩ a na a tɩ tɩɛrʋ na vɩɛl a, bʋ̃ʋ n'ʋ vɛ̃, tɩ bɔbr'a kɛ́ tɩ ɩrɛ vla a yele za pʋɔ.

¹⁹ Ɩ̃ zɛlɛ nyɩ na kɛ́ nyɩ puore kpɛ̃w za, a Naaŋmɩn sàw ɩ̃ lɛb wa a nyɩ zie fɔ̃w.

Zɛlʋ puoru

²⁰ A ƴã-ɓaarʋ Naaŋmɩn ɩ na a tɩ Sore Yeezu na lɩɛbɩ a pi-cɩ̃ɩn-kpɛ̃ɛ, a zɩ̃ɩ ʋ na cir bin nɩ Wõ-taa na be kʋralɛ a ƴãw a, ʋ ɩ na ʋ lɛb yi a kũuni pʋɔ.

²¹ A Naaŋmɩn ŋa a, ʋ ɩ kɛ̀ nyɩ mɩ́ tʋ̃ɔ́ yel-vla za maalɩ, tʋ̃ɔ́ maalɛ a ʋ pʋ-tɩɛrʋ. Ʋ mɩ́ maalɩ a lɛ na pɛlɩ a ʋ pʋɔ a, a tɩ zie, a Yeezu Kɩrɩta ƴãw, ʋl na so danʋ a yome yome za a. Amɛn.

Ƴɛ̀rʋ nʋɔr kʋb nɩ puor-taa

²² Yɛbr i, ɩ̃ zɛlɛ nyɩ na kɛ́ nyɩ dɩ kanyir bɛr wõ a kpaalʋ ƴɛ̀r-bie á ŋá. Ŋmãa ŋmãalɛ n'a ɩ̃ sɛb nyɩ.

²³ Nyɩ bãwnɩ a kɛ́ bɛ lɛb'a bɛr a tɩ yɛb Timote. Ʋlɛ wa wa fɔ̃w a, ɩ̃ na wa na wa nyɛ̃ nyɩ, mãa nɩ a ʋl za.

²⁴ Nyɩ puori a nyɩ niw-dierbɛ za nɩ a kɩrɩta-nɩbɛ za. A bɛl na yi a Ɩtali tẽw a puore nyɩ na.

²⁵ A Naaŋmɩn maalʋ, ʋ be a nyɩ za zie!